"პასუხი უნდა აგოს ძალადობის ყველა ორგანიზატორმა, მონაწილემ და ძალადობისკენ მომწოდებელმა, განურჩევლად საერო თუ სასულიერო სტატუსისა" - 20 არასამთავრობო ორგანიზაცია პრემიერ მინისტრის და შს მინისტრის გადადგომას მოითხოვს.

ორგანიზაციები "ტვ პირველის" ოპერატორის, ალექსანდრე ლაშქარავას გარდაცვალებაზე პასუხისმგებლობას ხელისუფლებას აკისრებენ მიიჩნევენ, რომ ხელისუფლებამ, ფაქტობრივად, უარი თქვა საკუთარი ფუნქციის შესრულებასა და ადამიანთა ჯანმრთელობისა და სიცოცხლის დაცვაზე.

ორგანიზაციები მოითხოვენ, რომ:

• საქართველოს პრემიერ მინისტრმა ირაკლი ღარიბაშვილმა და საქართველოს შსს მინისტრმა ვახტანგ გომელაურმა დაუყოვნებლივ დატოვონ დაკავებული თანამდებობა
• ძალადობის ყველა ორგანიზატორი, მონაწილე და წამქეზებელი, მიუხედავად მათი სტატუსისა, დაისაჯოს კანონის სრული სიმკაცრით.

"ხელისუფლებამ არაფერი არ გააკეთა ძალადობრივი ჯგუფების შესაჩერებლად მიუხედავად იმისა, რომ წინასწარ იყო ცნობილი მათი მხრიდან აგრესიისა და ძალადობის რისკის შესახებ. 5 ივლისს ადგილზე საკმარისი რაოდენობით არ იყვნენ მობილიზებული სამართალდამცავები, ხოლო ადგილზე მყოფი პოლიციელების მხრიდან მიღებული ზომები არ იყო საკმარისი ძალადობის შესაჩერებლად. ხელისუფლებამ არათუ არ მიიღო სათანადო ზომები საზოგადოებრივი უსაფრთხოების, ჯანმრთელობისა და სიცოცხლის დასაცავად, არამედ, პირიქით, წაახალისა ძალადობა. კერძოდ პრემიერ მინისტრმა, ირაკლი ღარიბაშვილმა 5 ივლისს განაცხადა, რომ “ღირსების მარშის” ჩატარება მიზანშეუწონელი იყო და “ღირსების მარშის” ორგანიზატორებს მოუწოდა არ გაემართათ მსვლელობა რუსთაველის გამზირზე, იმის მაგივრად, რომ ვითარების შესაძლო გართულებისთვის პასუხისმგებლობა დაეკისრებინა კონტრაქციის წევრებისთვის. ასევე საქართველოში აშშ-ს ელჩმა განაცხადა, რომ მათ ვერ დაინახეს პრემიერ მინისტრის წამყვანი როლი სიტუაციის განმუხტვასა და აგრესიის შეკავებაში" - აცხადებენ ორგანიზაციები

განცხაებას შემდეგი ორგანიზაციები აწერენ ხელს:

1. საქართველოს დემოკრატიული ინიციატივა (GDI)
2. მმართველობის მონიტორინგის ცენტრი (GMC)
3. საფარი
4. საზოგადოება და ბანკები
5. მედიის განვითარების ფონდი (MDF)
6. საქართველოს რეფორმების ასოციაცია (GRASS)
7. ინფორმაციის თავისუფლების განვითარების ინსტიტუტი (IDFI)
8. ეკონომიკური პოლიტიკის კვლევის ცენტრი (EPRC)
9. ადამიანის უფლებათა ცენტრი (HRC)
10. სოციალური სამართლიანობის ცენტრი
11. საქართველოს ატლანტიკური საბჭო
12. საქართველოს ახალგაზრდა იურისტთა ასოციაცია (GYLA)
13. საერთაშორისო გამჭვირვალობა-საქართველო (TI Georgia)
14. სამართლიანი არჩევნებისა და დემოკრატიის საერთაშორისო საზოგადოება (ISFED)
15. კვლევითი ჟურნალისტიკისა და ეკონომიკური ანალიზის ცენტრი
16. გაეროს ასოციაცია
17. მწვანე ალტერნატივა
18. თბილისი პრაიდი
19. დემოკრატიის კვლევის ინსტიტუტი (DRI)
20. საქართველოს ჟურნალისტური ეთიკის ქარტია