"მთავარი არხი" ტელეკომპანიის მიერ გრანტის მიღებასთან დაკავშირებით ხელისუფლებისა და სხვადასხვა მედიასაშუალებით გავრცელებულ ინფორმაციას ოფიციალური განცხადებით პასუხობს. სოციალურ ქსელში გამოქვეყნებულ წერილში ნათქვამია, რომ არხს სხვადასხვა საერთაშორისო დონორისთვის არაერთხელ მიუმართავს. თანამშრომლობის მიზანი კი ტელევიზიის სარედაქციო პოლიტიკის შენარჩუნება და დამოუკიდებლობის ხარისხის კიდევ უფრო მეტად გაზრდაა. 

„ეს არის თავად ხელისუფლების მიერ გამოგონილი სრული სიცრუე, რაც მარტივად ამოსაცნობია: ამ თემაზე მომზადებულ სიუჟეტებსა თუ სტატიებში არ არის მოყვანილი არცერთი ირიბი მტკიცებულებაც კი მსგავსი ბრალდების გასამყარებლად - არც სიტყვიერი, არც დოკუმენტური. ხელისუფლებისა და სამთავრობო არხების მხრიდან განზრახ ტყუილის გავრცელება არის იმ „რუსული კანონის“ ოპერაციის გაგრძელება, რომელიც გასული წლის მარტში, ქართველი ხალხის ბრძოლის შედეგად, ხელისუფლებამ ვერ გაიტანა“, - ნათქვამია განცხადებაში. 

„მთავარი არხის“ დამფუძნებელმა და პარტია „ახალის“ ლიდერმა ნიკა გვარამიამ ტელეკომპანია „რუსთავი 2“-თან საუბარში ტელევიზიის მიერ გრანტის აღება დაადასტურა და განმარტა, რომ ის მიზნობრიობის გარეშე მედიამხარდაჭერისთვისაა განკუთვნილი.  

31 მარტს "ქართული ოცნების" თავმჯდომარემ მამუკა მდინარაძემ "მთავარი არხისთვის " გრანტის დამტკიცებაზე ისაუბრა და ის ქვიარ თემის მხარდაჭერას დაუკავშირა.