„რუსეთში ქონებას კი ყიდულობს და სულ უფრო მდიდრდება, მაგრამ საქართველოში, ბიძინა ივანიშვილის ბაობაბები გახმა. ოლიგარქის მიერ კენიიდან საქართველოში გადმორგულმა 8 გიგანტურმა, საუკუნოვანმა ხემ ვერ გაიხარა.

ამ, შესაძლოა მართლაც არასასიამოვნო ისტორიას, მოჰყვა სრულიად ტრაგიკომიკური გაგრძელება. სავარაუდოდ, ოლიგარქის დავალებით, დენდროლოგიური პარკის ადმინისტრაციამ გაავრცელა განცხადება, რომ ბაობაბების გახმობაში ოპოზიცია და კრიტიკული მედია არიან დამნაშავეები“, - ამ სიტყვებით წარადგინა პაატა იაკობაშვილმა სიუჟეტი.

„მთავარი არხი“ კენიელ გარემოს დამცველებსაც დაუკავშირდა. ერთ-ერთი ასეთი სოფია რაჯავია, რომლის თქმითაც, ამ ბაობაბების გახმობა მოსალოდნელი იყო, ვინაიდან ისინი კენიის სხვა რეგიონშიც რომ გადარგონ, იქაც ვერ გაიხარებენ, არამცთუ დედამიწის სხვა წერტილში. „ბაობაბების დაცვის ასოციაციის“ წარმომადგენელის, ფრენსის კაგემას განცხადებით კი:

„ხეების გახმობა შეიძლება ბევრი რამის ბრალი იყოს. მათ შორის განსხვავებული კლიმატური პირობების და ხანგძლილვი მგზავრობის, მაგრამ არამც და არამც ჩვენი პოტესტის და ჟურნალისტების“.

ჟურნალისტმა, ზურა პეტროსიანმა პირდაპირი ჩართვა ირონიულად, შემდეგი სიტყვებით დაამთავრა: „იმედი გვაქვს, რომ ჩვენი პასუხისმგებლობის საკითხს არ დააყენებს როგორც ოლიგარქი, ასევე დენდროლოგიური პარკი, 8 გამხმარი გიგანტის გამო“.

სენატორ ჯიმ შაჰინისა და მაიკ ტერნერის საქართველოში ვიზიტის შესახებ საუბრით დაიწყო „TV პირველის“ მთავარი საინფორმაციო გამოშვებაც, რასაც  ივანიშვილის რუსულ ქონებასა და რუსეთზე უკრაინის შეტევის შესახებ მოზადებული მასალები მოჰყვა. „ოლიგარქის ბაობაბები გახმა“ კი „პირველების ცენტრალური გამოშვების“ 25-ე წუთზე დაიწყო. 

„ამ ხეს შეძახილი ვერ გაახმობდა. ეს მხოლოდ გამონათქვამებსა და ანდაზებში ხდება. სინამდვილეში, ყველაფერი სხვაგვარადაა. ხე შესაძლოა კენწეროში მოჭრილი ერთი ტოტის, ან უცოდინრობის გამო მოკვდეს. სავარაუდოდ, ასე მოხდა ამ გიგანტური ბაობაბების შემთვევაშიც. 8 ხე, რომელიც კენიაში მოთხარეს და 2 ოკეანის, ხმელთაშუა ზღვის და ბოსფორის სრუტის გავლით საქართველოში ჩამოიტანეს, უკვე გახმა. ხეების სიკვდილს კი, კლიმატის ცვლილებას კი არა, არამედ ოპოზიციას აბრალებენ“. 

ირონიით დაწყებული სიუჟეტი, გუგა არჩვაძემ ამავე ტონითვე დაასრულა: „ინდური ლეგენდის თანახმად, ვინც ბაობაბის ქვეშ დადგება და სურვილს ჩაუთქვამს, აუცილებლად აუსრულდება. ამიტომ, ახლა, საინტერესოა ვინ მოასწრო სურვილის ჩაფიქრება“.

როგორც წესი, ქართული მედია გარემოსდაცვითი საკითხებით არც თუ ისე ხშირად ინტერსდება, მაგრამ ასე არ ხდება როდესაც საქმე პოლიტიკას, ივანიშვილსა და გამხმარ ბაობაბებს ეხება. 

გამხმარი ბაობაბები

ბიძინა ივანიშვილის კენიიდან ჩამოტანილი ბაობაბები ბრიტანული გამოცემა The Guardian-ის ცნობით, ადგილობრივმა ფერმერებმა თავიანთი კერძო მიწებიდან გაყიდეს და მათი ფასი $800-დან $2400-მდე მერყეობდა. თუმცა, კენიის გარემოს დაცვის სამინისტრომ 2022 წლის ნოემბერში ის ლიცენზია გააუქმა, რომლის საფუძველზეც უცხოურ კომპანიას ქვეყნის ტერიტორიაზე ბაობაბის 8 ხე უნდა ამოეთხარა და საქართველოში წაეღო. ეს გადაწყვეტილება ქვეყნის პრეზიდენტის სამინისტროსადმი მოთხოვნას მოჰყვა - შეემოწმებინა კილიფის ოლქში ბაობაბის ხეების ამოთხრის პროცესი.

კენიის გარემოს დაცვის სამინისტრო მაშინ აცხადებდა, რომ ბაობაბები ექსპორტზე მანამ არ უნდა გასულიყო, სანამ მხარეებს შორის შეთანხმებები სათანადოდ არ დარეგულირდებოდა და ჰარმონიაში არ მოვიდოდა  ბიომრავალფეროვნებისა და გენეტიკური რესურსების ხელმისაწვდომობის შესახებ საერთაშორისო დოკუმენტებთან.

როგორც ადგილობრივი მედია Nation-ი იუწყებოდა, კენიის პარლამენტის დეპუტატებმა საქართველოში ბაობაბების ექსპორტთან დაკავშირებით გამოძიება დაიწყეს. ამავე მედიის ცნობით, ისინი ხეების გაყიდვის დროს გამჭვირვალობის ნაკლებობასა და კორუფციაში სამ სახელმწიფო უწყებას ადანაშაულებენ. გარემოს დამცველები კი ბაობაბების კენიის ტერიტორიიდან საქართველოში ექსპორტს ეწინააღმდეგებოდნენ და ამ პროცესს „ბიომეკობრეობას“ უწოდებდნენ.

ბაობაბების ექსპორტზე კენიის მთავრობამ ნებართვა საბოლოოდ, 2023 წლის თებერვალში გასცა. ბაობაბის ხეები კი საქართველოს ნიადაგში, როგორც შეკვეთილის დენდროლოგიური პარკის მიერ გავრცელებული განცხადებიდან ირკვევა, 2023 წლის 8 ნოემბერს ჩაირგო, ხოლო გრუნტში ჩარგვიდან 6-7 თვის გასვლის შემდეგ, რვავე მათგანი გახმა.





ბლოგში გამოთქმული მოსაზრებები ეკუთვნის ავტორს და შეიძლება არ ასახავდეს რედაქციის პოზიციას.