რემიერ მინისტრმა ირაკლი ღარიბაშვილმა საინვესტიციო პროექტის „აწარმოე საქართველოში“ ერთი წლის შედეგები შეაჯამა. თემა ეროვნული არხების „რუსთავი 2-ისა“ და „იმედის“ მთავარი საინფორმაციო გამოშვებების ინტერესის საგანი გახდა. ორივე მათგანმა პროექტის შესახებ მომზადებული სიუჟეტი მეორე ბლოკში გაუშვა, თუმცა განსხვავებული აქცენტებით.

„იმედმა“ წამყვანის ტექსტშივე ხაზი გაუსვა მიღებულ შედეგებს და სამომავლო სიკეთეებს, რაც ამ პროექტმა უნდა მოიტანოს:

„90 ახალი პროექტი და 252 მილიონიანი ინვესტიცია - ასეთია პროგრამის შედეგები სახელწოდებით „აწარმოე საქართველოში“. გასულ წელს ამოქმედებული პროექტი ხელისუფლებამ დღეს ბიზნესმენებთან შეაჯამა და მომავალი წლების გეგმებიც გაწერა. 2014 წლიდან პროგრამა „აწარმოე საქართველოში“ სოფლის მეურნეობის, ინფრასტრუქტურული და მრეწველობის პროექტების წახალისების მიზნით ხორციელდება. ხელისუფლება პირობას დებს, რომ მომავალში პროგრამის გაფართოებას და რამდენიმე ათასი ადამიანის დასაქმებას აპირებს“.

„იმედისგან“ განსხვავებით, „რუსთავი 2-ის“ წამყვანმა შესავალ ტექსტშივე აღნიშნა, რომ პროექტი ყველას არ მოსწონს:

„პრემიერ-მინისტრმა დღეს საინვესტიციო პროგრამა "აწარმოე საქართველოში" შეაჯამა. ირაკლი ღარიბაშვილმა ახალ ბიზნესზე, რამდენიმე ათას დასაქმებულზე და მილიონობით ლარით დაფინანსებულ საწარმოებზე ისაუბრა. თუმცა, ამ პროექტს დღეს კრიტიკოსები გამოუჩნდნენ. „ინფორმაციის თავისუფლების განვითარების ინსტიტუტი “ბიუჯეტიდან მილიონების ხარჯვის გამჭვირვალობას აყენებს ეჭვქვეშ“.

„იმედი“ კი, აქცენტს აკეთებს პროექტის ფარგლებში დასაქმებულთა რაოდენობაზე და აღნიშნავს, რომ პროექტის დაწყებიდან ორი წლის რეზულტატი 90 სამრეწველო პროექტი და 250 მილიონი ლარის ინვესტიციაა (შესავალ ტექსტში ეს რიცხვი 252 მილიონი იყო) . „აწარმო საქართველოს“ ეფექტურობის დასადასტურებლად ორი მეწარმეც არის ჩაწერილი, რომლებმაც პროექტის ფარგლებში ბიზნესი გააფართოვეს. სიუჟეტის განმავლობაში მაყურებელი ასევე ისმენს პრემიერ მინისტრის 2 სინქრონს, ეკონომიკისა და მდგრადი განვითარების, ფინანსთა და ენერგეტიკის მინისტრების კომენტარებს, რომლებიც პროექტის დადებით მხარეებსა და სამომავლო სიკეთეებზე საუბრობენ.

მართალია „რუსთავი 2-მაც“ ახსენა პროგრამის შედეგები და თქვა, რომ პროგრამის ფარგლებში 5000-ზე მეტი ადამიანი დასაქმდა, კომერციულმა ბანკებმა კი კერძო სექტორისთვის 120 მილიონამდე სესხი გასცეს, მაგრამ ძირითადი აქცენტი პროგრამის ხარვეზებზე გააკეთა და სიუჟეტიც სწორედ ამით დაიწყო.

„რუსთავი 2-ის“ მასალაში IDFI-ს ანალიტიკოსი ამბობს, რომ არ ჩანს რა საინვესტიციო ვალდებულება აიღო მეწარმემ პროექტის ფარგლებში. შემდეგ კი, ინფორმაციის გაუმჭვირვალობის უარყოფით მხარეზე საუბრობს. სიუჟეტში ჩანს პრემიერ მინისტრისა და ეკონომიკისა და მდგრადი განვითარების მინისტრის კომენტარები. ჩაწერილია ერთი მეწარმეც, რომელმაც ამ პროექტით ისარგებლა. თუმცა შემდეგ ჟურნალისტი აღნიშნავს, რომ „წინასაარჩევნო დაპირება - 100 ახალი საწარმო დღეს მმართველ გუნდს კიდევ ერთხელ შეახსენა ოპოზიციამ. „ნაციონალური მოძრაობა” ხელისუფლებას დეტალური ანგარიშის გამოქვეყნებას სთხოვს“. ამ ტექსტს მოსდევს „ნაციონალური მოძრაობის“ წარმომადგენლის კრიტიკული კომენტარი.

განსხვავებულია ორივე არხზე გასული სიუჟეტების დასასრულიც:

„იმედი“: მთავრობის მეთაურმა მომავალი 2 წლის ამბიციურ გეგმაზეც ისაუბრა. სოფლის მეურნეობის იმპორტირებული პროდუქცია მთლიანად ადგილობრივმა უნდა ჩაანაცვლოს.

„რუსთავი 2“: დაფინანსებული პროექტების ჩამონათვალი მეწარმეობის განვითარების სააგენტოს ოფიციალურ ვებგვერდზე უკვე გამოქვეყნდა. არ არის გამორიცხული, არასამთავრობო სექტორის მიერ წარდგენილი შენიშვნების შემდეგ, საინვესტიციო ვალდებულებების გრაფაც გაჩნდეს.