გაზეთი „ასავალ-დასავალი“ აგრძელებს ჰომოფობიურ კამპანიას და დიდ ადგილს უთმობს რესპონდენტებს, რომლებმაც მკითხველს თავი უკვე დაამახსოვრეს ჰომოფობიური და სექსისტური გამონათქვამებით.

ამჯერად, 20-26 ივლისის ნომერში, ერთი გვერდი ეთმობა მსახიობ გივი სიხარულიძესთან ინტერვიუს. გაზეთი მას „პოეტად, პროზაიკოსად და ცნობილ კოლორიტად“ წარმოგვიდგენს.

ჟურნალისტის შეკითხვებსა და რესპონდენტის პასუხებში მრავლად გვხვდება აგრესიული და შეურაცხმყოფელი გამონათქვამები, მათ შორის იმს პიროვნებების მისამართით, რომლებიც ლიბერალური შეხედულებებით არიან ცნობილი. გაზეთის ჟურნალისტი და გივი სიხარულიძე მათ მოიხსენიებენ კრებითი ჰომოფობიური ეპითეტით - „ლიბერასტები“.

„ლიბერასტებმა დიდი ზარ-ზეიმით აღნიშნეს ამერიკაში ლგბტ ქორწინების დაკანონება“... „რა უხარიათ ამ ჩვენებურ ლიბერასტებს ვერ გამიგია!..“ „ეს გლობალური გეი-ლაშქრობა დაგეგმილია და ფინანსდება მსოფლიო მასონური მოძრაობის მიერ, რომელსაც უზარმაზარი თანხა აქვს გამოყოფილი ამ სიბილწის გასავრცელებლად...“ „ეს ცივილიზებული მსოფლიო კი არა, პედერასტებით სავსე ბრბოა!..“

ინტერვიუს ბოლოს გვხვდება გენდერული სტერეოტიპები („ქალი თუ ხარ, შენი ადგილი უნდა იცოდე“) და ძალადობისკენ მოწოდებაც („ასეთებს დღეში ცხრაჯერ უნდა ცემა“).

შესაბამისი ფრაგმენტი ინტერვიუდან:

„სიხარულიძე: 100 კაცს რომ გამოიცვლი და „თავისუფალი გოგო“ ვარო, გაიძახი, ბოზი ხარ და ვერ გაგიგია! ჰოდა, ეს ჩვენი ხურუშიანი ბიჭები, თუ ქალი ასჯერ არ არის „შემოწმებული“, ისე ცოლად არ მოიყვანენ! ქალიშვილი გოგოები აღარ უნდათ და ბოზები მოჰყავთ ცოლად.

ასავალ-დასავალი: ბატონო გივი, „სიძულვილის ენით“ ლაპარაკს დაგაბრალებენ და „გენდერული თანასწორობის“ დამრღვევ „ჰომოფობობას“!

სიხარულიძე: მე „გენდერული თანასწორობა“ და შპიცბერგენობა არ ვიცი. გენდერული თანასწორობა კი არა, დღეში ცხრაჯერ უნდა ასეთებს ცემა! ქალი თუ ხარ, შენი ადგილი უნდა იცოდე!“

ჰომოფობიური გამონათქვამები, ასევე, გვხვდება გაზეთის 32-ე გვერდზე „იმედის დილის“ ყოფილ წამყვანთან, სალომე გოგიაშვილთან ინტერვიუში, რომლის სათაურად გამოტანილია რესპონდენტის სიტყვები: „როგორ შეიძლება, ბავშვს სწორი აზროვნება განუვითარდეს, როდესაც დედად წვერიანი კაცი ჰყავს?!“ მსხვილი შრიფტითაა გამოტანილი ფრაზა: „ჰომოსექსუალიზმი ავადმყოფობად მიმაჩნია“.

"ჟურნალისტს უნდა ესმოდეს მედიის მიერ დისკრიმინაციის წახალისების საფრთხე; ამიტომ ყველაფერი უნდა იღონოს ნებისმიერი პირის დისკრიმინაციის თავიდან ასაცილებლად რასის, სქესის, სექსუალური ორიენტაციის, ენის, რელიგიის, პოლიტიკური და სხვა შეხედულებების, ეროვნული ან სოციალური წარმოშობის საფუძველზე ან რაიმე სხვა ნიშნით"- ჟურნალისტური ეთიკის ქარტია, მეშვიდე პრინციპი.