პროკურორ ვახტანგ ქირიას მკვლელობის საკითხი კიდევ ერთი ტესტი იყო ქართული მედიისთვის კრიმინალის გაშუქების კუთხით. ამ თემამ გამოკვეთა რამდენიმე ხარვეზი, რაც ქართული მედიის ზოგიერთ წარმომადგენელს კრიმინალის გაშუქებისას კვლავ ახასიათებს. ყველაზე მთავარი პრობლემა კი ისაა, რომ ბევრმა მედიასაშუალებამ დაასახელა პირი, რომლის დანაშაულიც ჯერ დადასტურებული არ არის.

გარდა ამისა, გარკვეული სახის ინფორმაცია ჯერ მედიამ გაავრცელა „სანდო წყაროზე“ დაყრდნობით, შემდეგ კი ოფიციალურმა წყაროებმა დაადასტურეს მედიით გავრცელებული ცნობა.

ინფორმაცია დაკარგული პროკურორის ცხედრის პოვნის შესახებ პირველად 16 იანვარს საღამოს 20:49 საათზე პირველმა რადიომ გაავრცელა. მიუხედავად იმისა, რომ სამართალდამცავები ინფორმაციას არ ადასტურებდნენ და არც განცხადებას აკეთებდნენ, რადიომ სტატია ასე დაასათაურა: “სამეგრელო ზემო სვანეთის პროკურორი გარდაცვლილი იპოვეს”. უცნობია, ჰქონდა თუ არა ამ დროისთვის ქირიას ოჯახს მისი გარდაცვალების შესახებ ინფორმაცია. როგორც საინფორმაციო სააგენტო “ინტერპრესნიუსის” სტატიაშია აღნიშნული, ვახტანგ ქირიას შვილმა მამის გარდაცვალების შესახებ მედიიდან შეიტყო. ამავეს აცხადებდნენ ქირიას მეზობლები, რომ პროკურორის გარდაცვალების შესახებ ტელევიზიიდან შეიტყვეს.

ინფორმაცია პროკურორ ვახტანგ ქირიას გარდაცვალების შესახებ 16 იანვარსვე გადასცა „რუსთავი 2-მაც” “კურიერის” 9 საათიან გამოშვებაში პირველ ამბად. წამყვანმა აღნიშნა, რომ ქავთარაძის ქუჩაზე ნაპოვნი გარდაცვლილი, “სავარაუდოდ” ვახტანგ ქირიაა. ამის შემდეგ დაადასტურა მედიის მიერ გავრცელებული ინფორმაცია პროკურატურამაც.

პროკურორის გარდაცვალების საკითხი იყო მთავარი თემა 17 იანვარსაც. დაახლოებით 12 საათის შემდეგ მედიასაშუალებებმა გაავრცელეს ინფორმაცია “სავარაუდო დამნაშავესთან” დაკავშირებით, რომელმაც თავი მოიკლა. ზოგიერთმა გამოცემამ პირდაპირ “პროკურორის მკვლელი” უწოდა ბიძინა კუჭავას, რომელიც ქირიას ნათესავი იყო და მოგვიანებით, შინაგან საქმეთა სამინისტრომ მკვლელობაში ბრალდებულად დაასახელა. ამ დროისთვის კუჭავა უკვე გარდაცვლილი იყო, გავრცელდა ინფორმაცია, რომ მან თავი მოიკლა მაშინ, როდესაც ის მანქანით მიმავალი საპატრულო ბრიგადამ გააჩერა.

პირველად სავარაუდო დამნაშავის შესახებ ინფორმაცია საზოგადოებრივი მაუწყებლის „პირველმა არხმა“ გაავრცელა. 17 იანვარს დღის 12 საათზე „მოამბის“ გამოშვება ვახტანგ ქირიას მკვლელობის დეტალებით დაიწყო ტელეარხმა:

„ოფიცალური კომენტარი არ გაკეთებულა ირაკლი შოთაძის უწყებაში, თუმცა, არაოფიცალური ინფორმაციით, რომელიც მოამბემ მოიპოვა ვახტანგ ქირიას მკვლელი არის მისი ნათესავი 50 წლამდე მამაკაცი და ასევე, წყარომ რომელმაც ჩვენ ეს ინფორმაცია მოგვაწოდა, გვითხრა ისიც, რომ აღნიშნულმა მამაკაცმა თავი მოიკლა მას შემდეგ, რაც სამართალდამცავები მის კვალზე გავიდნენ. ასევე ჩვენი ინფორმაციით, სამართალდამცავებმა აღნიშნული პიროვნების დადგენა მოახერხეს დეტალური ამონაწერების (სატელეფონო) მეშვეობით და ვახტანგ ქირიას მასთან ჰქონდა განხორციელებული ბოლო სატელეფონო ზარები. თუმცა, მე შეგახსენებთ, რომ ეს არის არაოფიციალური ინფორმაცია და ჩვენ დღის განმავლობაში ველოდებით აღნიშნული ინფორმაციის გადამოწმებასა და დადასტურებას ოფიცალურ სტრუქტურეში“, - განაცხადა ჟურნალისტმა ჩართვისას. მაუწყებლის მიერ „სანდო წყაროზე“ დაყრდნობით გავრცელებული გადაუმოწმებელი ინფორმაცია მოგვიანებით, ოფიციალური სტრუქტურების მიერ დადასტურდა.

მართალია ჟურნალისტს არ უხსენებია ქირიას ნათესავის სახელი და გვარი, თუმცა, რამდენიმე წუთში გაზეთმმა primetimenews.ge-მ გამოაქვეყნა სტატია, სადაც დეტალურად იყო აღწერილი მომხდარის შესახებ ზუსტად იგივე ვერსია, სადაც მითითებული იყო ვახტანგ ქირიას ნათესავის გვარი. მას გაზეთმა სტატიის პირველ ვერსიაში „მკვლელი“ უწოდა. “გუშინ მოკლული პროკურორის მკვლელი ბიძინა კუჭავაა - Exclusive”, - ასეთი სათაურით გამოქვეყნდა სტატია primetimenews.ge-ზე, თუმცა უნდა აღინიშნოს, რომ მოგვიანებით გამოცემამ სათაურიც შეცვალა და ტექსტიც ჩაასწორა (“ზუგდიდის პროკურორის მკვლელობაში ბრალდებული ბიძინა კუჭავაა – EXCLUSIVE”.)

ტელეკომპანია იმედის ეთერში 2 საათიან “ქრონიკაში” კი ჟურნალისტმა თქვა, რომ “პრაიმტაიმმა” კულუარულად აქამდე უცნობი დეტალები გაარკვია - როგორც აღმოჩნდა, პროკურორ ვახტანგ ქირიას მკვლელი “საქართველოს ხმის” დირექტორი ბიძინა კუჭავაა. მან სიცოცხლე თვითმკვლელობით დაასრულა”.

“გავრცელებული ინფორმაციით, პროკურორ ვახტანგ ქირიას მკვლელმა თავი მოიკლა”, - ასეთი სათაურით გაავრცელა ინფორმაცია საინფორმაციო სააგენტო “ინტერპრესნიუსმა”, რომელმაც მკითხველს აუწყა, რომ “ბინა, რომელშიც ქირიას გვამი აღმოაჩინეს, მკვლელის დაქირავებული იყო”.

„მაესტროს“ „კონტაქტმაც“ 17 იანვარს, 15 საათიან გამოშვებაში პროკურორ ვახტანგ ქირიას მკვლელად ვახტანგ კუჭავა დაასახელა.

„გავრცელებული ინფორმაციით, პროკურორ ვახტანგ ქირიას მკვლელი „საქართველოს ხმის“ დირექტორი ბიძინა კუჭავაა. მან სიცოცხლე თვითმკვლელობით დაასრულა“, - თქვა საინფორმაციო გამოშვების წამყვანმა.

18 საათიან გამოშვებაში ფორმულირება შეიცვალა და კუჭავას მონაწილეობა საქმეში ვერსიად მოიხსენიეს. საინფორმაციო გამოშვების წამყვანის თქმით, „არსებობს ვერსია, რომ სამეგრელო-ზემო სვანეთის პროკურორის ვახტანგ ქირიას მკვლელობასთან მის დეიდაშვილს ბიძინა კუჭავას კავშირი აქვს, თუმცა კუჭავას ნათესავები და მეზობლები აცხადებენ, რომ კუჭავას და ქირიას ერთმანეთთან კარგი ურთიერთობა ჰქონდათ და დარწმუნებულები არიან, რომ კუჭავა საკუთარ დეიდაშვილს არ მოკლავდა“.

უდანაშაულობის პრეზუმფციიდან გამომდინარე, პირი უდანაშაულოდ ითვლება მანამ, სანამ სასამართლო მას ბრალს არ დაუმტკიცებს.

ამასთანავე უნდა აღვნიშნოთ, რომ ბიძინა კუჭავას ოჯახის წევრები არ ენდობიან გამოძების ვერსიას, ბიძინა კუჭავას თვითმკვლელობასთან დაკავშირებით. ახლობლებს არ სჯერათ, რომ მან თავი მოიკლა.

თითქმის ყველა ტელეკომპანიამ უჩვენა ეთერში გარდაცვლილი ქირიას ოჯახის წევრების ცრემლები და ემოციები ახლო კადრებით. უჩვენეს მიცვალებულის ზუგდიდში ჩასვენების კადრები. ჩაწერილი იყო ინტერვიუ ქირიას მოადგილესთან, ფონად კი ისმოდა დატირების ხმები.

ჟურნალისტებმა სხვადასხვა გამოშვებაში განაცხადეს, რომ, “გავრცელებული ინფორმაციით, ქირიას ცხედრის დანაწევრებას ცდილობდნენ”. უნდა აღინიშნოს, რომ ცხედრის დანაწევრების მცდელობისა და მისი მოკვლის შესახებ საკმაოდ დეტალური ინფორმაცია თავად შინაგან საქმეთა სამინისტრომ გაავრცელა. რის შემდეგაც ეს დეტალები თითქმის ყველა საინფორმაციო საშუალებამ გამოიყენა.

ბიძინა კუჭავას შესახებ მედიაში ძირითადად ნეგატიური ინფორმაცია გავრცელდა, რაც საზოაგდოებას მის მიმართ უარყოფითად განაწყობდა. რამდენიმე მედიასაშუალებამ გაავრცელა ვიდეო, სადაც ბიძინა ივანიშვილსა და ბიძინა კუჭავას საკმაოდ არასასიამოვნო საუბარი ჰქონდათ. პრესკონფერენციაზე ბიძინა კუჭავამ კითხვის დასმა სცადა, ივანიშვილმა კი მას გაახსენა მათი პირველი შეხვედრა. ივანიშვილის თქმით, მაშინ კუჭავას ძალიან ცუდი პოზიცია ჰქონდა და ცუდ თამაშს თამაშობდა. ვიდეოდან გაუგებარი დარჩა რაზე იყო საუბარი.

9 საათზე “რუსთავი 2-ის“ გადაცემა “პოსტსკრიპტუმში” მეორე სიუჟეტად გავიდა ინფორმაცია ბიძინა კუჭავაზე. სიუჟეტში საუბარი იყო კუჭავას კავშირზე დიდი ხნის წინ მომხდარ ცოლ-ქმარ ნინუების მკვლელობის საქმესთან. სატელეფონო ინტერვიუ იყო ჩაწერილი ჟურნალისტ თეა ხურცილავასთან, რომელიც თავის დროზე ამ თემაზე მუშაობდა. მან აღნიშნა, რომ კუჭავა საქმეში ერთერთმა მოწმემ დაასახელა, თუმცა არ დაკითხულა.

კუჭავას დაუკავშირეს მისი დის გაუჩინარებასაც. ასევე მის მიერ დის ოჯახისთვის ბინის გაყიდვაზეც იყო საუბარი. სიუჟეტში ასევე ნახსენები იყო, რომ კუჭავა აზარტული თამაშებით იყო დაინტერესებული. ინფორმაცია გაზეთ ”კვირის პალიტრიდან” იყო ამოღებული.

თუმცა მოგვიანებით 18 იანვრის გამოშვებებში რადიო „საქართველოს ხმის“ დირექტორმა მამუკა კუჭავამ განაცხადა, რომ დის გაუჩინარებასთან ბიძინა კუჭავა დაკავშირებული არ იყო და ის ბინა, რომელიც გაყიდა, არა დას, არამედ მას [ბიძინა კუჭავას] ეკუთვნოდა. რაც შეეხება, აზარტულ თამაშებს, მამუკა კუჭავას თქმით, ბიძინა კუჭავა თავად ფლობდა კაზინოს და არ თამაშობდა.

პოსტსკრიპტუმის ინფორმაციაზე დაყრდნობით კი palitratv.ge-მ შემდეგი სათაურით გამოაქვეყნა მასალა - “ვინ იყო ბიძინა კუჭავა? - აზარტული მოთამაშე, რომლის სახელი სხვა მკვლელობებშიც ფიგურირებს?”

კიდევ ერთ მკვლელობასთან გაავლო პარალელი საზოგადოებრივმა მაუწყებელმა. „მოამბეში“ 20 საათზე ჟურნალისტმა ისაუბრა დაუდასტურებელ, საქმესთან კავშირის არმქონე დეტალებზე და კუჭავას გარკვეულ კავშირებზე რამდენიმე მკვლელობის საქმესთან. გარდა ნინუების მკვლელობისა, მან დაასახელა 2007 წელს სათამაშო ბიზნესთან დაკავშირებით გოჩა მაღალთაძის გახმაურებული მკვლელობა. მოამბის ინფორმაციით, ბიძინა კუჭავა სხვადასხვა წლებში რამდენჯერმე დაკითხულია სხვადასხვა მკვლელობის საქმეზე მოწმის სტატუსით.

გაუგებარია აღნიშნული მასალების საინფორმაციო ღირებულება, რადგან ამ ინფორმაციის გავრცელებით მხოლოდ იმის მტკიცება შეიძლება, რომ კუჭავას სუფთა წარსული არ ჰქონდა, რაც აძლიერებს ეჭვს საზოგადოებაში, რომ მკვლელი შესაძლოა ის იყოს.საერთო ჯამში, გამოიკვეთა შემდეგი პრობლემები: ერთი, რომ შესაძლოა ოჯახმა არ იცოდა ქირიას გარდაცვალების შესახებ და ეს ინფორმაცია ეთერიდან გაიგო. მეორე - ზოგიერთმა მედიასაშუალებამ კუჭავა „მკვლელად“ მოიხსენია მაშინ, როცა ჯერ დადასტურებული არ არის საქმის ყველა გარემოება, ოჯახს აქვს ეჭვები ოფიციალურ ვერსიასთან დაკავშირებით და აპირებს ალტერნატიული ექსპერტიზის ჩატარებას.

მაუწყებელთა ქცევის კოდექსის 48-ე მუხლი

დანაშაულისა და ანტისოციალური ქმედების გაშუქებისას, მაუწყებელმა უნდა დაიცვას ბალანსი, ერთი მხრივ, გამოხატვის თავისუფლებასა, ხოლო, მეორე მხრივ, უდანაშაულობის პრეზუმფციასა და ეჭვმიტანილთა, ბრალდებულთა, განსასჯელთა, მსჯავრდებულთა, მოწმეთა და დაზარალებულთა პირადი ცხოვრების ხელშეუხებლობის უფლებას შორის.

49-ე მუხლი

პუნქტი 2 - დანაშაულისა და ანტისოციალური ქმედების გაშუქებისას მაუწყებელი ვალდებულია უზრუნველყოს ეჭვმიტანილთა, ბრალდებულთა, განსასჯელთა, მსჯავრდებულთა, მოწმეთა, დაზარალებულთა და მათი ოჯახის წევრების კანონიერი ინტერესების დაცვა.

პუნქტი 8 - დაუშვებელია დანაშაულის ჩადენის ხერხის ისეთი აღწერა ან დემონსტრირება, რამაც შეიძლება ხელი შეუწყოს დანაშაულის ჩადენას, გარდა იმ შემთხვევებისა, როცა არსებობს სარედაქციო დასაბუთება.

50-ე მუხლი

პუნქტი 4 - სისხლის სამართლის საქმეზე გამოძიების ან სასამართლო პროცესის გაშუქებისას, მაუწყებელმა უნდა გააშუქოს საბოლოო განაჩენი და მიიღოს ყველა გონივრული ზომა ადამიანის რეპუტაციისათვის გაუმართლებელი ზიანის მიყენების თავიდან აცილების მიზნით.