თსუ-ში სტუდენტთა ნაწილის საპროტესტო აქციები 7 მარტს დაიწყო. ისინი თვითმმართველობის ბიუჯეტის გამჭვირვალობას ითხოვდნენ და კანცლერობის კანდიდატად გიორგი გაფრინდაშვილის დასახელებას აპროტესტებდნენ. იმავე დღეს გავრცელდა ლადო პაპავას პასუხი სტუდენტების შეკითხვაზე, სადაც ის ამბობდა, რომ თსუ-ში ე.წ. ოდეერი არსებობს. ტელევიზიების უმრავლესობამ სახელმწიფო უნივერსიტეტის ამბების გაშუქება 2 დღის შემდეგ, 9 მარტიდან დაიწყო .

გაშუქება საკმაოდ ფრაგმენტული და არათანმიმდევრული იყო. გამონაკლისია საზოგადოებრივი მაუწყებელი, რომელმაც ამბის შესახებ ინფორმაცია 7 მარტსვე გაავრცელა და როგორც საინფორმაციო გამოშვებაში, ისე ტოკ-შოუ “რეალურ სივრცეში” აუდიტორიას თანმიმდევრულად და ამომწურავად აწვდიდა თსუ-ში მიმდინარე ამბების შესახებ ინფორმაციას.

7 მარტის მოვლენათა განვითარება

თსუ-ში საპროტესტო აქციები დაიწყო. სტუდენტების ნაწილი სტუდენტური თვითმმართველობის მიერ უნივერსიტეტის ბიუჯეტიდან თანხების არამიზნობრივ ხარჯვას აპროტესტებდა.

მოგვიანებით აქციას დაემატა გიორგი გაფრინდაშვილის, კანცლერობის კანდიდატის, წინააღმდეგ პროტესტი. სტუდენტები ამბობდნენ, რომ გაფრინდაშვილი სტუდენტური თვითმმართველობის წევრი იყო და წლების განმავლობაში მათ ძალადობრივ პოლიტიკას უჭერდა მხარს. მას კი დღეს ე.წ. “ოდეერი” “მფარველობს”. საპროტესტო აქციამ ეზოდან უნივერსიტეტში გადაინაცვლა. სტუდენტები რექტორისგან და აკადემიური საბჭოსგან ითხოვდნენ პასუხს გაფრინდაშვილის კანცლერობის კანდიდატად დასახელებისა და თვითმმართველობის ხარჯების შესახებ.

შეხვედრაზე ვლადიმერ პაპავამ აქციის მონაწილის კითხვაზე უპასუხა, რომ უნივერსიტეტში ე.წ. “ოდეერი” არის, ხოლო სტუდენტების მიერ “ოდეერად” დასახელებული პირი, რექტორის თქმით, გიორგი გაფრინდაშვილის მეგობარია.

რა გააშუქა მედიამ

საზოგადოებრივი მაუწყებელი

7 მარტს საზოგადოებრივი მაუწყებელის მთავარმა საინფორმაციო გამოშვებამ სახელმწიფო უნივერსიტეტში მიმდინარე საპროტესტო აქცია მეოთხე მასალად შესთავაზა მაყურებელს. მასალის მიხედვით, სტუდენტები კანცლერობის კანდიდატად გიორგი გაფრინდაშვილის დასახელებას აპროტესტებდნენ. “საარჩევნო მარათონში ჩართულ ერთადერთ კანდიდატს პოლიტიკურ მიკერძოებაში ადანაშაულებენ” - აღნიშნა წამყვანმა შესავალ ტექსტში. მასალაში არ იყო ახსნილი, თუ რაში გამოიხატებოდა გაფრინდაშვილის პოლიტიკური მიუკერძოებლობის მიმართ კითხვები. “მოამბეს” მაყურებლისთვის ასევე არ მიუწოდებია ინფორმაცია იმის შესახებ, რომ თსუ-ს რექტორმა, ფაქტობრივად, დაადასტურა ე.წ. ოდეერის არსებობა უნივერსიტეტში.

იმავე დღეს “რეალურ სივრცეში”, ღამის 9 საათზე, სტუდიაში სკაიპით ჩართეს აქციის მონაწილე ლევან ლორთქიფანიძე, რომელმაც სტუდენტთა პროტესტის მიზეზებზე ისაუბრა. თუმცა “ოდეერების” თემა არც აქ გაჟღერებულა.

კავკასია

თემაზე “კავკასიის” 20:30-იან გამოშვებაში 2 წუთიანი (2 წთ და 19 წმ) მასალა გამოშვების 38-ე წთ-ზე გავიდა. მასალის ძირითადი აქცენტი გაკეთდა სტუდენტების მოთხოვნაზე ბიუჯეტის თანხის ხარჯვის გამჭვირვალედ ხარჯვასთან დაკავშირებით. ვისმენთ აქციის მონაწილეების სინქრონებსაც. მათ ბრალდებებს თვითმმართველობის პრეზიდენტი პასუხობს.

უნივერსიტეტში ე.წ. “ოდეერების” არსებობის საკითხი “კავკასიის” სიუჟეტში არ განხილულა.

ამავე დღეს ამბავი ტოკ-შოუ „ბარიერის“ თემაც გახდა. გადაცემაში წარმოდგენილნი იყვნენ როგორც თვითმმართველობის, ისე აქციის მონაწილე სტუდენტები.

GDS

2030-მა ვრცლად გააშუქა თემა. 7 წუთიან ჩართვაში საუბარი იყო სტუდენტების მოთხოვნასა და ლადო პაპავას მიერ ე.წ. “ოდეერის” არსებობის დადასტურების შესახებ. ასევე, ახსნილი იყო, კონკრეტულად რა პრეტენზიები აქვთ სტუდენტებს კანცლერობის კანდიდატის გიორგი გაფრინდაშვილის მისამართით.

თემა არ გაშუქდა შემდეგი არხების დღის მთავარ საინფორმაციო გამოშვებებში:

ტელეკომპანია “იმედი”

ტელეკომპანია “რუსთავი 2”

ტელეკომპანია “მაესტრო”

8 მარტის მოვლენათა განვითარება

საღამოს დაახლოებით 22:00 სთ-ზე აქციის ერთ-ერთმა აქტიურმა მონაწილემ, ირაკლი კუპრაძემ საკუთარ ფეისბუქ გვერდზე დაწერა, რომ მის ოჯახთან ორჯერ მივიდნენ უშიშროების თანამშრომლები და ოჯახის წევრებს ირაკლისა და მათი ოჯახის შესახებ ცნობების მიწოდებას სთხოვდნენ;

რა გააშუქა მედიამ

საზოგადოებრივი მაუწყებელი

8 მარტს თემას აღარ დაბრუნებიან “მოამბეში”, თუმცა ამ დღის “რეალური სივრცის” ერთ-ერთი მთავარი თემა სწორედ 7 მარტს დაწყებული სტუდენტური პროტესტი იყო. გადაცემის მეორე ნახევარი მთლიანად ამ თემის განხილვას დაეთმო სტუმრებთან ერთად. ჟურნალისტებმა მაყურებელს ვრცლად უჩვენეს 7 მარტს თსუ-ში განვითარებული მოვლენების ქრონოლოგია, რის შემდეგაც დისკუსია სტუდიაში დაპირისპირებულ მხარეებს შორის გაგრძელდა. გადაცემის სტუმრები იყვნენ როგორც აქციის მონაწილეები, ისე თვითმმართველობის წარმომადგენელი. წამყვანებმა სტუმრებს საშუალება მისცეს, დეტალურად ესაუბრათ თავიანთ მოთხოვნებსა და განმარტებებზე. მაყურებელს ამ გადაცემით ჰქონდა საშუალება, მიეღო სრულყოფილი და ამომწურავი ინფორმაცია თსუ-ში განვითარებულ მოვლენებზე. თუმცა “ოდეერების” თემა არც 8 მარტს განუხილავთ.

თემა არ გაშუქდა შემდეგი არხების დღის მთავარ საინფორმაციო გამოშვებებში

ტელეკომპანია “კავკასია”

ტელეკომპანია “რუსთავი2”

ტელეკომპანია GDS - “2030”

ტელეკომპანია “მაესტრო”

ტელეკომპანია “იმედი”

9 მარტის მოვლენათა განვითარება

პროტესტი გაგრძელდა, სახელმწიფო უსაფრთხოების სამსახურში უარყვეს, რომ თსუ-ში უსაფრთხოების სამსახურის წარმომადგენელია;

უსაფრთხოების სამსახურმა ასევე უარყო, რომ აქციის მონაწილე სტუდენტის ოჯახში მათი თანამშრომლები მივიდნენ;

რა გააშუქა მედიამ

საზოგადოებრივი მაუწყებელი

სახელმწიფო უნივერსიტეტში ე.წ. “ოდეერის” არსებობის შესახებ ეჭვები და რექტორის განცხადება საზოგადოებრივი მაუწყებლის დღის მთავარ საინფორმაციო გამოშვებაში სწორედ 9 მარტს გაშუქდა. (“ოდეერის” არსებობის შესახებ ვლადიმერ პაპავამ სტუდენტებთან შეხვედრისას 7 მარტს ისაუბრა).მოამბემ გააშუქა სუს–ის განცხადება, სადაც აღნიშნული იყო, რომ უნივერსიტეტში სუს-ის თანამშრომელი არ არის.

გარდა ამისა, “მოამბის” სიუჟეტში გაშუქდა აქციის მონაწილე ირაკლი კუპრაძის განცხადება, რომლის მიხედვითაც მან შსს დაადანაშაულა ოჯახზე ზეწოლაში.

სიუჟეტში ვრცლად ისაუბრეს კანცლერობის კანდიდატზე გიორგი გაფრინდაშვილზეც და მის მიმართ სტუდენტების მხრიდან არსებულ შეკითხვებსა და პროტესტზეც. სიუჟეტში არ ყოფილა გაფრინდაშვილის კომენტარი. როგორც ჟურნალისტმა აღნიშნა, ის მედიასთან არ კონტაქტობს.

“რეალური სივრცის” 9 მარტის გადაცემის ერთ–ერთი მთავარი თემა კვლავ თსუ იყო. გადაცემის პირველი ნაწილი მთლიანად ამ პრობლემას დაეთმო, გადაცემაში სტუმართან, პარლამენტარ თამარ კორძაიასთან, აქციის მონაწილე ირაკლი კუპრაძესა და არასამათავრობო ორგანიზაცია” ადამიანის უფლებების სწავლებისა და მონიტორინგის ცენტრის” წარმომადგენლებთან ერთად ამომწურავად ისაუბრეს “ოდეერის” ინსტიტუტზე.

რუსთავი 2

“რუსთავი 2 - მა" ამბის გაშუქება 9 მარტს, 2 დღის დაგვიანებით დაიწყო. სიუჟეტი 42-ე წუთზე გავიდა და ძირითადი აქცენტი ირაკლი კუპრაძის ოჯახში სუს-ის თანამშრომლების მისვლაზე გაკეთდა.

სიუჟეტში წამყვანი ამბობს: “სახელმწიფო უსაფრთხოების სამსახურში ამ დრომდე უარყოფენ ინფორმაციას, რომ თბილისის სახელმწიფო უნივერსიტეტში მათი თანამშრომელი მუშაობს. თუმცა უნივერსიტეტის სტუდენტის, ირაკლი კუპრაძის ოჯახში სამართალდამცველები სწორედ ამ ინფორმაციისა და სუს-ის თანამშრომლის გვარის გასაჯაროების შემდეგ მივიდნენ”

ამავე სიუჟეტში სტუდენტებმა ისაუბრეს, თუ რა პრეტენზიები აქვთ კანცლერობის კანდიდატთან, გიორგი გაფრინდაშვილთან.

სიუჟეტში ჩაწერილია თვითმმართველობის პრეზიდენტი და ჟურნალისტი აღნიშნავს, რომ გიორგი გაფრინდაშვილის გადაწყვეტილებით, ის არჩევნებში კვლავ მიიღებს მონაწილეობას.

“იმედი”

მე-18 წუთზე ქრონიკაში თემაზე დაახლოებით 4 წუთიანი სიუჟეტი გავიდა. ძირითადი აქცენტი უნივერსიტეტში სუსის თანაშრომლების არსებობას ეხებოდა. სიუჟეტში ისმის ლადო პაპავას კომენტარი, სადაც ადასტურებს რომ უნივერსიტეტში სუსის თანამშრომელი არის. სიუჟეტში ვხვდებით არასამთავრობო ორგანიზაციების განმარტებას, რატომ არ შეიძლება უსაფრთხოების სამსახურის წარმომადგენელი უნივერსიტეტში იყოს. წარმოდგენილია განათლების მინისტრისა და უსაფრთხოების სამსახურის განცხადებაც. ისინი “ოდეერის” არსებობას უარყოფენ.

სიუჟეტში ფაქტობრივარდ არ ჩანს სტუდენტების სხვა მოთხოვნები, მაგალითად, თვითმმართველობის ბიუჯეტის გამჭვირვალობის საკითხი, ასევე არაფერი თქმულა წინა დღეს, 8 მარტს, აქციის ერთ-ერთი აქტიური მონაწილის ირაკლი კუპრაძის საკუთარ ფეისბუქ გვერდზე დაწერილი სტატუსის შესახებ, სადაც ის ამბობდა, რომ მის ოჯახთან 2-ჯერ მივიდნენ უშიშროების თანამშრომლები და ოჯახის წევრებს ირაკლისა და მათი ოჯახის შესახებ ინფორმაციის მიწოდებას სთხოვდნენ.

თემა არ გაშუქდა შემდეგი არხების დღის მთავარ საინფორმაციო გამოშვებებში

ტელეკომპანია “კავკასია”

ტელეკომპანია GDS „2030“

ტელეკომპანია “მაესტრო”

10 მარტის მოვლენათა განვითარება

10-ში სენატს გაფრინდაშვილის კანდიდატურა უნდა განეხილა. სტუდენტებმა უნივერსიტეტში იმ ოთახის პიკეტირება მოახდინეს, სადაც აქცია უნდა ჩატარებულიყო. ხმაურიანი აქციის ფონზე კრება ჩაიშალა. სტუდენტების ნაწილსა და სენატის წევრებს შორის შეთანხმება ვერ შედგა. ისინი მოითხოვდნენ, გაფრინდაშვილს უარი ეთქვა კანცლერის არჩევნებში მონაწილეობაზე. სტუდენტებს ნაწილმა პროტესტის ნიშნად ღამით უნივერსიტეტში დარჩენა გადაწყვიტა.

რა გააშუქა მედიამ

საზოგადოებრივი მაუწყებელი

10 მარტის “მოამბემ” თსუ-ში მიმდინარე პროტესტი პირველ ამბად გაუშვა. სიუჟეტში ასახული იყო სტუდენტთა პრეტენზიები კანცლერობის კანდიდატის მიმართ, მათი მოთხოვნები და განწყობები. გარდა ამისა, სიუჟეტში ნაჩვენები იყო კადრები სტუდია “მონიტორის” არქივიდან. პირველი არხის თქმით, კანცლერობის კანდიდატ გიორგი გაფრინდაშვილს სტუდენტების ცემაში წლების წინ ადანაშაულებდნენ. გიორგი გაფრინდაშვილმა ამჯერადაც უარი თქვა მედიასთან ურთიერთობაზე.

სხვა დღეების მსგავსად, 10 მარტსაც თსუ-ში განვითარებულ მოვლენებს, “რეალური სივრცე” ფეისბუქზე ონლაინ რეჟიმშიც აქტიურად აშუქებდა. საღამოს გამოშვებაში კი რამდენიმე წუთი დაეთმო თსუ–ს ამბების მიმოხილვას და სტუდენტის ჩართვას უნივერსიტეტიდან.

რუსთავი 2

10 მარტს "კურიერი" გაიხსნა უნივერსიტეტში მიმდინარე ამბებით. “კურიერმა” 7 წუთიან მასალაში მთელი დღის განმავლობაში მიმდინარე პროცესების დეტალური მიმოხილვა შემოგვთავაზა: სტუდენტების მიერ იმ ოთახის პიკეტირება, სადაც კანცლერი უნდა აერჩათ, სტუნტების დაპირისპირება უნივერსიტეტის დაცვასთან და პრობლემები პოლიციასთან, რექტორის და სტუდენტების პოზიციები.

2030

თემის გაშუქებას „2030“ ათ მარტს დაუბრუნდა. პირველივე სიუჟეტში თსუ-ში მიმდინარე ამბები დეტალურად აღწერეს. მეორე ბლოკი კი მთლიანად ამ თემას დაეთმო. გადაცემის სტუმარი იყო აქციის 2 მონაწილე, ასევე სხვადასხვა პოზიციის მქონე პროფესორები. თვითმმართველობის წარმომადგენლები გადაცემაში არ იყვნენ.

იმედი

ტელეკომპანია “იმედმა” ძირითადი აქცენტები თსუ-ში პოლიციის შესვლის ფაქტზე და ფიზიკურ შეხლა-შემოხლაზე გააკეთა. ჟურნალისტის თქმით, “სტუდენტებმა გაარღვიეს პოლიციის კორდონი, რა დროსაც მოხდა დაპირისპირება. რამდენიმე სტუდენტი აცხადებს, რომ მათ მიიღეს ფიზიკური დაზიანება”.

მაესტრო

მაესტრომ თსუ-ში მიმდინარე ამბები პირველად სამი დღის დაგვიანებით, სწორედ 10 მარტს გაუშვა დღის მთავარ საინფორმაციო გამოშვებაში.

ჟურნალისტმა აღწერა დღის განმავლობაში მიმდინარე მოვლენები და იქვე აღნიშნა, რომ გიორგი გაფრინდაშვილის კანდიდატურას დადებითად აფასებენ სენატის წევრები. მათი თქმით, ბრალდებები, რომლებსაც გაფრინდაშვილს უყენებენ, უსაფუძვლოა. სიუჟეტში კი სენატის მხოლოდ ერთი წევრი ჰყავთ ჩაწერილი, რომელიც ამბობს, რომ ის მხარს უჭერს სხდომის ჩატარებას იმისთვის, რომ ყველა პოზიცია მოისმინოს. მას გაფრინდაშვილზე მხოლოდ კარგი სმენია, “უარყოფით კონტექსტში მოვისმინე სტუდენტებისგან, ამიტომ საინტერესოა რა არგუმენტი აქვთ მათ”.

თსუ-ს თემა კიდევ ერთმა გადაცემამ, მაესტროს “ფაქტორმა” გააშუქა. წამყვანის თქმით, თსუ-ში “უპრეცედენტო მღელვარება იყო” . სტუმრად ჰყავდათ მხოლოდ თვითმმართველობის წევრი გიორგი კაკაურიძე. წამყვანმა მას ჰკითხა, რას აპროტესტებდა და რა ეჭვები ჰქონდა კანცლერობის კანდიდატ გიორგი გაფრინდაშვილის მიმართ. სტუმარმა ლოგიკურად უპასუხა, რომ ის არაფერს აპროტესტებდა და არც კანცლერობის კანდიდატის მიმართ ჰქონდა რამე ეჭვი.

მთელი გადაცემის განმავლობაში სტუმარი გიორგი გაფრინდაშვილზე პოზიტიურ კონტექსტში საუბრობდა. წამყვანი ცდილობდა რესპონდენტისთვის გამოეკითხა, რომელი პოლიტიკური პარტიის ინტერესებს ხედავდა მიმდინარე მოვლენებში, სტუმარმა კი ეჭვი გამოთქვა, რომ რაც უნივერსიტეტში ახლა ხდება, ყველაზე მეტად რექტორის ინტერესებში შედის. გადაცემის ბოლოს წამყვანმა აღნიშნა, რომ სხვა დღეებში სტუდენტების სხვა მოსაზრებებს შემოგვთავაზებს.

თუმცა იმ ფონზე, როცა თსუ-ში მთელი დღე სტუდენტების საპროტესტო აქცია მიმდინარეობდა, როცა ისინი სტუდენტურ თვითმმართველობას უპირიპირდებოდებიან და ამბობენ, რომ კანცლერობის კანდიდატი თვითმმართველობის ყოფილი წევრია, თვითონ სტუდენტური თვითმმართველობის წევრის ეთერში მოყვანა და იმის კითხვა, თუ რას აპროტესტებდა და რა ეჭვები აქვს კანცლერის კანდიდატურასთან დაკავშირებით, ლოგიკას მოკლებულია.

შენიშვნა: მეთოთხმეტე და მეჩვიდმეტე აბზაციდან, ფაქტობრივი უზუსტობის გამო, ამოღებულია წინადადება: "აქცია უცვლელი მოთხოვნებით, ისევ გაგრძელდა". 13.03.2016, 14:30