ბათუმში „ალი და ნინოს“ ქანდაკების დემონტაჟისას, ერთ-ერთი ქანდაკების დაზიანებას ambebi.ge- ც გამოეხმაურა. მასალა რუბრიკაში „საზოგადოება“, შემდეგი სათაურით გამოქვეყნდა: „პასუხი მათ, ვისაც "ალი და ნინოს" ძეგლის დაზიანებამ ურა-მართლმადიდებლური და ურა-პატრიოტული სიხარულით აუვსო გული“.

Mediachecker-ის გუნდის აზრით, სტატიის საერთო კონტექსტი, თემის გარშემო საზოგადოებაში წამოჭრილი ნეგატიური სტერეოტიპებისა და თურქოფობიის კრიტიკაა, თუმცა მასალა, ნებსით თუ უნებლიეთ, თავად ხდება მუსლიმების, თურქების მიმართ სტერეოტიპების გავრცელების წყარო.

„თუ ასე განიცდით ამ ამბავს (მუსლიმის მიერ ქართველის ნამუსის ახდას), მინიმუმ 10 საროსკიპოს გეტყვით (თბილისში, ლესელიძის ცენტრალური გზის პირას განთავსებულს) სადაც მხოლოდ თურქი მძღოლები დადიან და ქართველ ქალებს ნამუსის ახდაზე უარესს უშვებიან. ჰოდა ის, ვინც ასე განიცდით ამ ამბავს და მხოლოდ ამწეს მძღოლის დაუდევრობის იმედად ხართ, კომენტარებში დაწერეთ საკონტაქტო ინფორმაცია და ამ საროსკიპოების მისამართს გეტყვით, მიდით და მერე იქიდან წერეთ აღშფოთებული სტატუსები "ფეისბუქზე", ვკითხულობთ მასალაში.

ჟურნალისტური ეთიკის ქარტია, პრინციპი 7: „ჟურნალისტს უნდა ესმოდეს მედიის მიერ დისკრიმინაციის წახალისების საფრთხე; ამიტომ ყველაფერი უნდა იღონოს ნებისმიერი პირის დისკრიმინაციის თავიდან ასაცილებლად რასის, სქესის, სექსუალური ორიენტაციის, ენის, რელიგიის,პოლიტიკური და სხვა შეხედულებების, ეროვნული ან სოციალური წარმოშობის საფუძველზე ან რაიმე სხვა ნიშნით“.