მიხეილ ყაველაშვილის ინაუგურაციის დღეს, 29 დეკემბერს, პარლამენტის შენობაში უსაფრთხოების ყვითელი დონე იმოქმედებს, რაც ვიზიტორთა შეზღუდვას გულისხმობს. 

ინაუგურაციის გაშუქების მსურველ მედიასაშუალებებს კი სპეციალური აკრედიტაცია დასჭირდებათ. პარლამენტის განცხადებით, ერთ მედიასაშუალებაზე არაუმეტეს ორი ჯგუფის აკრედიტაცია გაიცემა და მათ პარლამენტის შენობაში მოწყობილი მედიასივრციდან ექნებათ საშუალება, „თვალი ადევნონ ინაუგურაციის მიმდინარეობას და ჩაწერონ რესპოდენტები“. 

„საქართველოს პარლამენტი უზრუნველყოფს სიგნალის მიწოდებას ინაუგურაციის ცერემონიის პირდაპირი ტრანსლირებისთვის“.

ერთჯერადი აკრედიტაციის მისაღებად სპეციალური განაცხადის შევსება მედიას 26 დეკემბრის 18:00 სთ-მდე შეეძლება. 

შალვა პაპუაშვილის თქმით, მიხეილ ყაველაშვილის ინაუგურაციის ცერემონია 29 დეკემბერს, 11:00 საათზე დაიწყება და, დაახლოებით, 40 წუთი გაგრძელდება. 

მედიას პარლამენტისგან სპეციალური აკრედიტაციის მიღება დასჭირდა მიხეილ ყაველაშვილის პრეზიდენტად არჩევის გასაშუქებლადაც. 

უსაფრთხოების ყვითელი დონის მოქმედების გამო პარლამენტში ონლაინ მედიის წარმომადგენლებს არ უშვებდნენ 25 ნოემბრიდანაც. ისინი პარლამენტში არ დაუშვეს 28 ივნისსაც, ირაკლი კობახიძის წლიური ანგარიშის მოსმენისას. 

ონლაინ მედიის წარმომადგენლებს საკანონმდებლო ორგანოში შესვლა რუსული კანონის განხილვების დროსაც ეკრძალებოდათ.