მოსამართლე ვლადიმერ ხუჭუამ 4 ნოემბერს 26 ოქტომბრის საპარლამენტო არჩევნებზე ორ ოლქში ხმის ფარულობის დარღვევა დაადასტურა და მისი შედეგები გააბათილა. სამთავრობო მედიამ თეთრიწყაროს სასამართლოს გადაწყვეტილებიდან მალევე ვლადიმერ ხუჭუას მადისკრედიტირებელი კამპანია დაიწყო. 

ტელეკომპანია „იმედმა“ 22:35 საათზე facebook-ის ოფიციალურ გვერდზე გამოაქვეყნა ქარდი წარწერით - „პირველი ინსტანციის მოსამართლე ვლადიმერ ხუჭუამ რამდენიმე უბნის შედეგები გააბათილა. ხუჭუას ცოლი ელზა გურგენიძე რადიკალური ოპოზიციის აქტივისტია“. დაახლოებით 20 წუთში (22:56) მსგავსი შინაარსის ქარდი გაავრცელა Postv-მაც, რასაც მეორე მასალაც მოჰყვა - „მოსამართლე ხუჭუას ცოლი „ევროპული საქართველოს“ შემომწირველია“. 

თეთრიწყაროს რაიონული სასამართლოს მოსამართლის, ვლადიმერ ხუჭუას დისკრედიტაცია მალევე სცადეს სამთავრობო ონლაინ მედიებმაც: info 9 (22:52) და Newshub.ge (22:49), რომლებმაც ერთი და იგივე ვიდეომასალა იდენტური ტექსტით თითქმის ერთდროულად, 3 წუთის სხვაობით, გაავრცელეს: „მოსამართლე ხუჭუას ცოლი, რომელმაც რამდენიმე უბნის შედეგები გააბათილა,  რადიკალური ოპოზიციის აქციაზე ლაზარე გრიგორიადისის გათავისუფლებას ითხოვდა“.

Newshub.ge-იმ „დემოკრატიული ცვლილებების ცენტრის“ ხელმძღვანელის, დავით ჩიხელიძის შეფასებაც მოიშველია და დაწერა: „ჩიხელიძე მოსამართლის მეუღლის, ელზა გურგენიძის ფეისბუქ-პოსტებს აზიარებს და აღნიშნავს, რომ ვლადიმერის მეუღლე ოპოზიციას წარმოადგენს და მსგავსი მნიშვნელობის საქმე მხარემ არ უნდა განიხილოს“. ჩიხელიძის კომენტარი გამოაქვეყნა „რუსთავი 2-მაც“. ერთმანეთის იდენტურია ამ მედიების ვებგვერდებზე გამოქვეყნებული მასალებიც. 

აღსანიშნავია, რომ დავით ჩიხელიძე, როგორც ექსპერტი სამთავრობო მედიის რესპონდენტი ხშირად არის. 

ტელეკომპანია „რუსთავი 2-მა“ გაავრცელა გია აბაშიძის შეფასებაც: „გია აბაშიძე: თეთრიწყაროს მოსამართლემ, ვლადიმერ ხუჭუამ 12 საარჩევნო უბნის შედეგები გააბათილა - "ნაცების" ხანმოკლე შავბნელი დავალება შესრულებულია“.

სამთავრობო მედიაში ვლადიმერ ხუჭუას დისკრედიტაციის მცდელობა გაგრძელდა მეორე დღესაც. „მოსამართლე ვლადიმერ ხუჭუას, რომელმაც რამდენიმე უბნის შედეგები გააბათილა, ცოლი მარწყვის ტორტის გამოცხობას დაჰპირდა. მოსამართლის ცოლი ელზა გურგენიძე ოპოზიციის აქტივისტია“, - ამ ტექსტით ქარდი „იმედმა“ 5 ნოემბრის დილას გამოაქვეყნა. მსგავსი შინაარსის მასალა გაავრცელა info 9-მაც. 

„რუსთავი 2“-მა კი ფეისბუკის ოფიციალურ გვერდზე დაწერა: „ნანუკა ჟორჟოლიანი მოსამართლე ხუჭუას: მარწყვის ტორტებს არ მოგაკლებთ“. Postv-ის ქარდზე კი ვკითხულობთ: „რა მიირთვა დღეს ვლადიმერ ხუჭუამ? ა) ცოლის ტორტი ბ) სამართალი გ) მოსამართლის ღირსება დ) დიეტაზეა".

„არ მინდა ვიფიქრო, რომ მოსამართლე ცოლის გავლენის ქვეშ არის“, - სამთავრობო ტელევიზიებმა ქარდები მოამზადეს შალვა პაპუაშვილის ამ ციტატაზეც: 

5 ნოემბერს „იმედმა“, postv-მა და „რუსთავი 2-მა“(15:00 საათიანი „კურიერის“ პირველივე სიუჟეტში) გაავრცელეს ინფორმაციაც, თითქოს კოალიციის „ძლიერი საქართველო“ ერთ-ერთმა ლიდერმა, ალეკო ელისაშვილმა არჩევნებზე ხმის ფარულობასთან დაკავშირებით სასამართლოს მიერ მიღებული გადაწყვეტილება წინასწარ იცოდა. ეს გაიმეორა პარტია „ქართული ოცნების“ წევრმა, თემურ შარმანაშვილმაც, რომლის ციტატა სამთავრობო მედიებმაც გაავრცელეს. 

„იმედისა“ და postv-ის მტკიცებით, ელისაშვილმა ხმის ფარულობის დარღვევის შესახებ ინფორმაცია დაახლოებით 21:00 საათზე გაავრცელა, ვლადიმერ ხუჭუამ კი გადაწყვეტილება დაახლოებით 22 საათზე გამოაცხადა. 

სინამდვილეში ინფორმაცია, რომ თეთრიწყაროს რაიონულ სასამართლოში ხმის მიცემის ფარულობის დარღვევა დადგინდა, „საქართველოს ახალგაზრდა იურისტთა ასოციაციამ“ 4 ნოემბერს, 18:25 საათზე გაავრცელა. ამის შესახებ კი ელისაშვილმა მედიასთან 20:00-დან 21:00 საათამდე პერიოდში ისაუბრა. არჩევნებზე ხმის ფარულობის დარღვევასთან დაკავშირებით ხუჭუამ რომ 21:00-დე თქვა, ეს „TV პირველის“ მასალაშიც ჩანს. 

„იმის საილუსტრაციოდ, რომ ალექსანდრე ელისაშვილმა მოსამართლის გადაწყვეტილება წინასწარ იცოდა, POSTV ტელევიზია “პალიტრას” 5 ნოემბრის დილის გადაცემაში გასულ კადრებს იყენებს. “პალიტრას” 4 ნოემბრის საღამოს საინფორმაციო გამოშვებებში არ მოხვდა კადრები, სადაც პოლიტიკოსი თეთრიწყაროს სასამართლოს გადაწყვეტილებაზე საუბრობდა, თუმცა კადრები დილის გადაცემაში გავიდა. გასულ საღამოს ალექსანდრე ელისაშვილმა “პალიტრას” ჟურნალისტთან თქვა: (დრო: 4:50) “ჩაატარა ექსპერიმენტი [მოსამართლემ] ჟონავდა ამ იმიდან და ჩანდა, ვის მისცემდი ხმას. ყველა ის ინტერვიუ თუ კომენტარი, რომელიც ალექსანდრე ელისაშვილმა მედიასთან გააკეთა, მას შემდეგ იყო, რაც საია-მ ფეისბუქზე ხმის ფარულობის დარღვევის შესახებ ინფორმაცია გაავრცელა. ყველაზე ადრე, აქციაზე სიტყვით გამოსვლისას, მან ახსენა, რომ ინფორმაციის წყარო საქართველოს ახალგაზრდა იურისტთა ასოციაცია იყო“, - წერს „მითების დეტექტორი“, რომელიც ერთ-ერთი ის ფაქტების გადამოწმების პლაფტორმა, რომელმაც სამთავრობო მედიების მიერ ალეკო ელისაშვილთან დაკავშირებით გავრცელებული ინფორმაცია მანიპულაციურად შეაფასა. facebook-მა კი, ეს მასალები შესაბამისად (missing context) აღნიშნა.

5 ნოემბერსვე „TV პირველის“ გადაცემა „რეაქციაში“ ვლადიმერ ხუჭუას ჩართვას სამთავრობო მედიები კვლავ მანიპულაციური ქარდებით გამოეხმაურნენ:

სამთავრობო ტელეკომპანია postv-ის საინფორმაციო გამოშვებაში გავიდა დაახლოებით 9-წუთიანი სიუჟეტიც - „მოსამართლის პოლიტიკური ვერდიქტი“. მასალაში ჟურნალისტი ვლადიმერ ხუჭუას „საკუთარ აღქმებში ჩაკარგულ მსაჯულს“ უწოდებს, მის გადაწყვეტილებას კი მოსამართლის წარსულს და მეუღლის აწმყოს უკავშირებს: 

„რას ემსახურება ვერდიქტი, რომელიც წინააღმდეგობაშია 22 მოსამართლის გადაწყვეტილებასთან. ყველაფერი ნათელი მაშინ ხდება, როდესაც ხუჭუას წარსულისა და მისი მეუღლის აწმყოს შესახებ ხდება ცნობილი. მოსამართლის სამუშაო გამოცდილების ძირითადი ნაწილი ნაცმოძრაობის რეჟიმს უკავშირდება. იმ წლებში, როდესაც საგამოძიებო უწყება ზურაბ ადეიშვილს ებარა, ხუჭუა პროკურატურაში ხელმძღვანელ თანამდებობებს იკავებდა. 2006 წელს კი მიხეილ სააკაშვილისგან ღირსების ორდენიც მიიღო. რა დამსახურებისთვის უცნობია“.

ჟურნალისტი „ნაცოპოზიციის აქტივისტად“ მოიხსენიებს მოსამართლის მეუღლესაც. მისი თქმით, ელზა გურგენიძე „აქტიურად მონაწილეობს აქციებში, ჩართულია არჩევნების გაყალბების შესახებ რადიკალების უსაფუძვლო კამპანიაში და იბრძვის ხელისუფლების წინააღმდეგ.  როგორც ჩანს, ცოლ-ქმრის პოლიტიკური გემოვნება იმდენად თანხვედრაშია, რომ ხუჭუა სამართალს აცდენილი გადაწყვეტილებების მიღებაზე უარს არ ამბობს“.

თეთრიწყაროს მაგისტრი მოსამართლის მიერ მიღებული გადაწყვეტილების დისკრედიტაციას ისახავდა მიზნად ტელეკომპანია „იმედის“ სიუჟეტიც, რომელიც ეთერში უკვე 6 ნოემბრის დილას, 9-საათიან „ქრონიკაში" გავიდა. 

„ალეკო ელისაშვილის მიერ გადაწყვეტილების წინსწრებად გახმიანება მმართველ გუნდს იმის თქმის საშუალებას აძლევს, რომ ეს ნაბიჯი პოლიტიკური და ოპოზიციასთან შეთანხმებული იყო. კიდევ ერთი დეტალი - ვლადიმერ ხუჭუა, რომელმაც საიას სარჩელი დააკამყოფილა, ოპოზიციის აქტივისტის მეუღლეა,“ -აღნიშნა საინფორმაციო გამოშვების წამყვანმა, ქეთევან გრიგორაშვილმა.

ვლადიმერ ხუჭუას მადისკრედიტირებელი კამპანიას გამოეხმაურა „სამართლიანი არჩევნებისა და დემოკრატიის საერთაშორისო საზოგადოებაც“. ISFED-ის მასალის მიხედვით, სასამართლოს გადაწყვეტილების გამოცხადებიდან მალევე სოციალური მედიის პლატფორმებზე (ფეისბუკი, ტიკტოკი) მოსამართლის მადისკრედიტირებელი გზავნილების გავრცელება დაიწყო, ამ კამპანიაში კი პროსახელისუფლებო მედიასაშუალებებიც იყვნენ ჩართული („იმედი“, Info9, „ნიუსჰაბი“, POSTV).

„პოსტების ნაწილი სიძულვილის ენის შემცველი იყო. მათ შორის, ვრცელდებოდა სექსისტური და შეურაცხმყოფელი, გზავნილები. გამოქვეყნებულ პოსტებში, ძირითადად, მითითებული იყო, რომ თეთრიწყაროს რაიონული სასამართლოს მოსამართლის გადაწყვეტილებაზე მისმა ცოლმა მოახდინა გავლენა. ამასთანავე, მედიასაშუალებამ „POSTV“ ხუჭუას ოჯახის შესახებ ჰომოფობიური შინაარსის პოსტი გამოაქვეყნა“, - წერს „სამართლიანი არჩევნები“. 

საქართველოში 26 ოქტომბერს საპარლამენტო არჩევნები ჩატარდა. „ცენტრალური საარჩევნო კომისიის“ მიერ გამოქვეყნებულ შედეგებს ოპოზიციური პარტიები და ამომრჩეველთა ნაწილი არ აღიარებს და მას გაყალბებულად მიიჩნევს. არჩევნებზე დამკვირვებელი ორგანიზაციები კი, კენჭისყრის დღეს აღმოჩენილ დარღვევებს სასამართლოებში ასაჩივრებენ.  

ტელეკომპანია „იმედმა“ 26 ოქტომბრის არჩევნების წინა პერიოდში კიდევ ერთხელ განაცხადა, რომ ტელევიზიის მისია „ნაციონალური მოძრაობის“ ხელისუფლებაში არ დაბრუნებაა. postv-ის 52 %-იანი წილის მფლობელი კი, ვიქტორ ჯაფარიძეა, რომელიც 2024 წლის არჩევნებზე „ქართული ოცნების“ პარტიული სიის 55-ე ნომერია.