ხვალ, 25 ნოემბერს საქართველოს პარლამენტში უსაფრთხოების ყვითელი დონე იმოქმედებს, რაც ვიზიტორების შეზღუდვას გულისხმობს. შენობაში მხოლოდ თითო ტელემაუწყებლის აკრედიტებული არაუმეტეს ორი ჯგუფი დაიშვება, ონლაინ მედიის წარმომადგენლებს კი საკანონმდებლო ორგანოში ისევ არ შეუშვებენ.

პარლამენტის ოფიციალური განცხადებით, უსაფრთხოების დამატებითი ზომების მიზანი სამუშაო და უსაფრთხო გარემოს უზრუნველყოფაა.

ხვალ საქართველოს მე-11 მოწვევის პარლამენტის პირველი პლენარული სხდომაა ჩანიშნული. ხვალვე, დილის 9 საათზე, საკანონმდებლო ორგანოსთან დაგეგმილია საპროტესტო აქცია. დღეს კი, აქციის მონაწილეები 21:00 საათზე რესპუბლიკის მოედანზე შეკრებას და პარლამენტთან ღამის გათენებას გეგმავენ.

ონლაინ მედიის ჟურნალისტები პარლამენტში არ დაუშვეს 28 ივნისსაც, პრემიერ მინისტრის წლიური ანგარიშის მოსმენისას.

ონლაინ მედიის ჟურნალისტებს საკანონმდებლო ორგანოში შესვლა, საქართველოს პარლამენტის თავმჯდომარის ბრძანებით, "უცხოური გავლენის გამჭვირვალობის შესახებ" რუსული კანონის განხილვების დროსაც ეკრძალებოდათ.