“მედია, ფსიქიკური ჯანმრთელობა და ადამიანის უფლებები” - მედია პროფესიონალებისთვის ახალი სახელმძღვანელო გამოიცა. წიგნის ავტორი ფსიქოლოგი ჯანა ჯავახიშვილია.

“არსებობს პროფესიები, რომელთაც განსაკუთრებული გავლენა აქვთ საზოგადოებრივ ფსიქიკურ ჯანმრთელობაზე. ერთ-ერთი ასეთია ჟურნალისტის პროფესია. მედია პროფესიონალებს საზოგადოების ფართო სეგმენტთან აქვთ შეხება, მათ გზავნილებს მედიის მაგიური ძალა აქვს. ისინი, ერთი მხრივ, ასახავენ რეალობას და მეორე მხრივ, აკონსტრუირებენ მას. სწორედ ამიტომ, მოცემული წიგნი - ფსიქიკურ ჯანმრთელობაზე და ფსიქიკური ჯანმრთელობის დაცვასთან დაკავშირებულ ადამიანის უფლებებზე - მედია პროფესიონალებისთვისაა განკუთვნილი” - ვკითხულობთ წინათქმაში.

წიგნი შედგება ოთხი თავისგან, სადაც განხილულია ფსიქიკური ჯანმრთელობის, ჟურნალიზმისა და ადამიანის უფლებების თემების თანაკვეთა. ასევე, საუბარია მედია ორგანიზაციებში ფსიქიკური ჯანმრთელობის დაცვას და მედიის წარმომადგენლების მიერ საკუთარ და კოლეგების ფსიქიკურ ჯანმრთელობაზე ზრუნვის მეთოდებზე. გარდა ამისა, წიგნში ყურადღება გამახვილებულია ფსიქიკურ ჯანმრთელობასთან დაკავშირებული საკითხების გაშუქებაზე.

სახელმძღვანელოს დანართების სახით ერთვის ჟურნალისზმისა და ტრავმის დარტ ცენტრის, საქართველოს ჟურნალისტური ეთიკის ქარტიის, საგამოძიებო ჟურნალისტთა გლობალური ქსელისა და ჯანმრთელობის მსოფლიო ორგანიზაციის მიერ გამოქვეყნებული რამდენიმე დოკუმენტი, სადაც გადმოცემულია ფსიქიკური ჯანმრთელობის პრობლემებთან დაკავშირებული და საზოგადოების ფსიქიკურ ჯანმრთელობაზე მოქმედი სხვადასხვა კრიზისული სიტუაციის გაშუქების სახელმძღვანელო პრინციპები.