გასული წლის ოქტომბერში, საკუთარი ხელისუფლებისადმი კრიტიკულად განწყობილი არაბი ჟურნალისტის ჯამალ ხაშოგის მკვლელობის საქმეზე დაკავებული 11 პირიდან ხუთ ბრალდებულს საუდის არაბეთის სასამართლომ სიკვდილით დასჯა, სამს 24 წლიანი პატიმრობა მიუსაჯა, დანარჩენი სამი კი - უდანაშაულოდ ცნო. ინფორმაციას დასავლური მედია ავრცელებს.

ჯამალ ხაშოგი 2018 წლის 2 ოქტომბერს სტამბოლში მდებარე არაბეთის საკონსულოში შევიდა და მას შემდეგ გაუჩინარდა. თავდაპირველად, საუდის არაბეთი ჟურნალისტის გაუჩინარებაში ქვეყნის რაიმე ფორმით ჩართულობას ორი კვირის განმავლობაში უარყოფდა და ამბობდა, რომ ხაშოგი საკონსულოდან ცოცხალი გავიდა.

თუმცა, მას შემდეგ, რაც თურქეთმა ოფიციალურად განაცხადა, რომ ჟურნალისტი საკონსულოში მოკლეს და მისი გვამი გაანადგურეს, საუდის არაბეთი საერთაშორისო თანამეგობრობის დიდი წნეხის ქვეშ მოექცა და იძულებული გახდა, რომ ჟურნალისტის მკვლელობა ოფიციალურად დაედასტურებინა.

• ვრცლად წაიკითხეთ: საუდის არაბეთი ჯამალ ხაშოგის მკვლელობას ადასტურებს