© 2021 Aziz Karimov/Getty Images

რუსეთის უსაფრთხოების ფედერალურმა სამსახურმა Deutsche Welle-ს ჟურნალისტის, ნიკოლას კონოლისა და უკრაინული არხის - „1+1“ კორესპონდენტის, ნატალია ნაგორნაიას წინააღმდეგ სისხლის სამართლის საქმე აღძრა.

ФСБ-ის განცხადებით, მედიის წარმომადგენლებმა „უკანონოდ გადაკვეთეს რუსეთის ფედერაციის სახელმწიფო საზღვარი და გადაიღეს ვიდეოები კურსკის ოლქის სუჯას დასახლების ტერიტორიაზე“.

როგორც ირკვევა, ჟურნალისტები ქალაქ სუჯაში რეპორტაჟების გადასაღებად იმყოფებოდნენ, თუ რა ვითარება იყო იქ უკრაინის შეიარაღებული ძალების შესვლის შემდეგ. 

ФСБ-მ გასულ კვირას ანალოგიური ბრალდებით სისხლის სამართლის საქმის წარმოება დაიწყო იტალიური მაუწყებლის, RAI-ს ჟურნალისტების, სტეფანია ბატისტინისა და სიმონე ტრეინის, ასევე CNN-ის რეპორტიორ ნიკ უოლშის, უკრაინელი ჟურნალისტების ოლესია ბოროვიკისა და დიანა ბუცკოს წინააღმდეგ.

რუსეთის უსაფრთხოების ფედერალური სამსახურის დასკვნაში ნათქვამია, რომ 17 აგვისტოდან, მთლიანობაში, რუსეთის ფედერაციის საზღვრის უკანონო გადაკვეთის გამო, სისხლის სამართლის საქმე შვიდი უცხოელი ჟურნალისტის წინააღმდეგ აღიძრა.

Deutsche Welle-ს ჟურნალისტის, კონოლის თქმით, ის აგრძელებს მოვლენების გაშუქებას როგორც უკრაინაში, ასევე რუსეთში და რუსეთის უსაფრთხოების ძალების გადაწყვეტილება მის მუშაობაზე არანაირ გავლენას არ მოახდენს. 

ნიკოლას კონოლის მომზადებული მასალა სუჯადან - „Visiting Sudzha, Russian Kursk border town held by Ukraine“

ნატალია ნაგორნაიას სიუჟეტი სუჯადან - „ТСН ВЖЕ В КУРСЬКІЙ ОБЛАСТІ! НАЖИВО!“