აშშ-ის სახაზინო დეპარტამენტმა მედიაჯგუფ „როსია სევოდნიასა„ და მისი შვილობილი კომპანიების: „რია ნოვოსტის“, TV-Novosti-ის, RT-ს, Sputnik-ისა და  Ruptly-ს წინააღმდეგ სანქციები დააწესა.

როგორც გავრცელებული ინფორმაციიდან ირკვევა, შეზღუდვები ასევე ეხებათ ფიზიკურ პირებს: RT-ის მთავარ რედაქტორს, მარგარიტა სიმონიანს, მის მოადგილეებს: ანდრეი კიაშკოს, ელიზავეტა ბროდსკაიასა და ანტონ ანისიმოვს, RT-ის მედიაპროექტების დეპარტამენტის თანამშრომელს, ელენა აფანასიევასა და ციფრული პროექტების მენეჯერ კონსტანტინ კალაშნიკოვს. მათ სანქციის სახით სავიზო შეზღუდვები დაუწესდათ. 

ოფიციალური განცხადების თანახმად, მიზეზი „მოსკოვის მიერ აშშ-ის საპრეზიდენტო არჩევნებზე გავლენის მოხდენის მცდელობებია“. 

გარდა ამისა, დოკუმენტში საუბარია რუსეთის მცდელობებზე თავისი საინფორმაციო რესურსების დახმარებით სიტუაციის დესტაბილიზაცია მოახდინოს უკრაინასა და მთელს მსოფლიოში და გავლენა იქონიოს მოლდოვაში არსებულ ვითარებაზე. 

უწყების თქმით, RT-ის თანამშრომლებმა რუსული ინტერესების დასაცავად ვიდეოების გამოქვეყნებაზე, თითქმის, 10 მილიონი დოლარი დახარჯეს.