4 მარტს შვეიცარიაში საზოგადოებრივი მაუწყებლის დაფინანსების შეწყვეტაზე რეფერენდუმი ჩატარდა და მოსახლეობის უმრავლესობამ (71%) ამ ინიციატივას მხარი არ დაუჭირა. შესაბამისად, მაუწყებელს თითოეული ოჯახი კვლავაც გადაუხდის სავალდებულო გადასახადს წელიწადში 451 შვეიცარული ფრანკის ოდენობით (1 200 ლარამდე).

შვეიცარიის საზოგადოებრივი მაუწყებელი აერთიანებს 7 ტელევიზიას, 17 რადიო სადგურს და ოთხ ნაციონალურ ენაზე მაუწყებლობს - გერმანულად, ფრანგულად, იტალიურად და რეტორომანულად. მისი დაფინანსების ძირითადი წყარო სამომხმარებლო გადასახადია და მთელი ბიუჯეტის მხოლოდ მეოთხედი მოდის რეკლამაზე. გადასახადის შენარჩუნების მომხრეებს მიაჩნიათ, რომ შვეიცარიის მსგავსი პატარა ქვეყნისთვის, რომლის მოსახლეობაც 8,4 მილიონია, მნიშვნელოვანია საზოგადოებრივი მაუწყებლის არსებობა, რომელიც მის კულტურულ და ლინგვისტურ მრავალფეროვნებას ასახავს.

საზოგადოებრივი მაუწყებლის დაფინანსების არსებული სისტემის გაუქმების ინიციატორები, შვეიცარიის მემარჯვენე პოლიტიკური სპექტრის ორი მთავარი პარტიის ახალგაზრდული ფრთის წარმომადგენლები იყვნენ. ისინი ამტკიცებდნენ, რომ შვეიცარიაში საზოგადოებრივი მაუწყებლის პოზიცია დომინანტურია და დაფინანსების გაუქმება კერძო მედიის წაახალისებდა.