20 ივნისს თბილისში მომხდარი თვიმკვლელობის მცდელობა “კურიერის” მთავარი საინფორმაციო გამოშვების N1 ამბავი იყო. “16 წლის მოზარდმა დედას ყელი გამოსჭრა, შემდეგ კი თვითმკვლელობის მიზნით მე-11 სართულიდან გადმოხტომა სცადა. მას ამის საშუალება მისმა მამამ და სამართალდამცავებმა არ მისცეს. დაჭრილი დედა კი მისმა უმცროსმა შვილებმა - 12 და 4 წლის ბავშვებმა გადაარჩინეს” - ამ სიტყვებით გახსნა წამყვანმა მთავარი საინფორმაციო გამოშვება. კადრში ჩანს როგორ აპირებს გადმოხტომას არასრულწლოვანი ბიჭი მე-11 სართულის აივნიდან და როგორ ცდილობენ აივანზე მყოფი ადამიანები მის დაკავებას. სიუჟეტში, რომელიც მთავარ საინფორმაციო გადაცემაში გავიდა, მოზარდის სახე დაფარეს. თუმცა, “კურიერის” ანონსში, რომელიც “რუსთავი 2-ის” ეთერში 20:00 სთ-ზე გავიდა, არასრულწლოვნის სახე დაფარული არ იყო.

სიუჟეტში ჟურნალისტი ასახელებს მოზარდის საცხოვრებელი სახლის მისამართს, ასევე მის, დედის და 2 დანარჩენი ბავშვის ასაკს.

ერთ-ერთი თვითმხილველი ამბობს, რომ არასრულწლოვანმა დედას ყელი გამოსჭრა და ის სისხლში ცურავდა. ახლო ხედით არის ნაჩვენები სახლის სადარბაზოს იატაკზე დარჩენილი სისხლის კვალი. ჟურნალისტი აცხადებს, რომ დაჭრილი ქალი რესპუბლიკურ საავადმყოფოშია გადაყვანილი, სადაც მას ოპერაცია უკეთდება. ჩაწერილია ექიმის კომენტარი. კომენტარში ექიმი დეტალურად აღწერს, რა სახის დაზიანებები მიღო ქალმა კისრის არეში დანით მიყენებული ჭრილობის შემდეგ. სიუჟეტის ბოლოს ჟურნალისტი ამბობს, რომ დანაშაულის ჩადენის მოტივისა და არასრულწლოვნის ფსიქიკური მდგომარეობის შესახებ არაფერია ცნობილი.

ეს შემთხვევა მოხვდა „მოამბის“ დღის მთავარ გამოშვებაშიც. მასალაში ნახსენებია უბანი, სადაც შემთხვევა მოხდა, ნაჩვენებია საცხოვრებელი სახლი და ჩაწერილია თვითმხილველების კომენტარები. რამდენიმე კადრი, თუ როგორც ცდილობს არასრულწლოვანი აივნიდან გადმოხტომას, საზოგადოებრივმა მაუწებელმაც აჩვენა, თუმცა ისე, რომ არასრულწლოვანი არ ჩანდა.

ამავე თემაზე “მაესტროს“ 9 საათიანი გამოშვების მიერ მომზადებულ მასალაშიც ნაჩვენებია საცხოვრებელი სახლი, თუმცა არ არის ნახსენები მისამართი, კადრებში ყველა, მათ შორის არასრულწლოვანი, რომელიც აივნიდან გადმოხტომას ცდილობდა და თვითმხილველებიც, რომლებიც შემთხვევის შესახებ ყვებოდნენ, დაფარულები არიან.

საცხოვრებელი სახლის ზუსტი მისამართი აღნიშნულია ინტერპრესნიუსისა და ambebi.ge-ს მიერ მომზადებულ სიახლეებშიც. Palitra.tv - ს სიუჟეტში კი მსხვილი ხედით ნაჩვენებია კორპუსის აბრა, რომელზეც მისამართი გარკვევით იკითხება.



მაუწყებელთა ქცევის კოდექსი, მუხლი 36, 1 : „მაუწყებელი განსაკუთრებული სიფრთხილით უნდა მოეკიდოს პირადი ცხოვრების ხელშეუხებლობის უფლებას. მიზანშეწონილი არ არის დაზარალებულის, გვამისა ან დასახიჩრებული სხეულის, სისხლისა და სხვა მსგავსი სცენების ჩვენება მნიშვნელოვანი სარედაქციო დასაბუთების გარეშე“.

მუხლი 41: „ძალადობის, ან მისი შედეგების ამსახველი კადრები, აგრეთვე ძალადობის როგორც ვიზუალური, ისე ვერბალური აღწერის გადაცემა, უნდა იყოს ჯეროვნად რედაქტირებული 23:00 საათამდე, გარდა იმ შემთხვევისა, როცა ეს გამართლებულია შესაბამისი კონტექსტით.

2. დაუშვებელია არასრულწლოვნის მიერ იოლად იმიტირებადი ძალადობრივი ან სახიფათო ქმედების გადაცემა 23:00 საათიან წყალგამყოფამდე, თუ ამის მნიშვნელოვანი სარედაქციო დასაბუთება არ არსებობს“.

მუხლი 44,2: „მაუწყებელმა უნდა დაიცვას არასრულწლოვან ეჭვმიტანილთა, ბრალდებულთა, განსასჯელთა, მსჯავრდებულთა, მოწმეთა და დაზარალებულთა ( განსაკუთრებით სქესობრივი თავისუფლებისა და ხელშეუხებლობის წინააღმდეგ მიმართული დანაშაულის ჩამდენ პირთა) ანონიმურობა“.

მუხლი 55, 3: „მაუწყებელმა არ უნდა გადასცეს თვითმკვლელობის, ან საკუთარი თავისთვის ზიანის მიყენების მეთოდები. აღნიშნული მეთოდების გადაცემა იმ შემთხვევაშიც კი, როცა ეს რედაქციულად დასაბუთებულია ან გამართლებულია კონექსტით, უნდა მოხდეს მხოლოდ ვერბალური სახით“.

13 ივნისს თბილისში მომხდარი სტიქიური უბედურება ქართული მედიის მთავარი თემაა და თითქმის ყველა მედიასაშუალება საგანგებო რეჟიმში მუშაობს. ძლიერი წვიმის და მდინარე ვერეს ადიდების გამო ქუჩების დატბორვის შესახებ ინფორმაცია 13 ივნისს ღამის 12 საათისთვის გავრცელდა.

რუსთავი 2

ამ ამბის გაშუქება ტელეარხებიდან პირველმა რუსთავი 2-მა დაიწყო. გვიან ღამით, 02:30 წუთზე, პირველი სპეციალური საინფორმაციო გამოშვება „კურიერი“ გავიდა . მანამდე არხი მაყურებელს მორბენალი სტრიქონით აწვდიდა ინფორმაციას.

არხი პირდაპირ ეთერში, უწყვეტ რეჟიმში დარჩა დილის 6 საათამდე. მაყურებელს სთავაზობდნენ განახლებულ ინფორმაციას, გადამღები ჯგუფები სხვადასხვა უბნებში მუშაობდნენ. „კურიერი“ ეთერში ერთ საათში დაბრუნდა და 14 ივნისს მთელი დღის განმავლობაში ყოველ საათში ერთხელ გადიოდა ეთერში. საღამოს კი ტოკ შოუ „არჩევანი“ გაუშვეს ეთერში, სადაც სტუმრებთან ერთად განიხილეს როგორც სტიქიის შედეგები, ასევე ის მიზეზებ,ი რამაც ეს შედეგები გამოიწვია.

მთელი დღის განმავლობაში არხზე მოიხსნა გასართობი გადაცემები და საინფორმაციო გამოშვებებს შორის შუალედებში მხოლოდ დოკუმენტური ფილმები გადაიცემოდა.

იმედი

შედარებით გვიან, ღამის 3 საათზე, გავიდა სპეციალური საინფორმაციო გამოშვება „იმედის“ ეთერში.არხი 05:23 წუთამდე გადასცემდა სტიქიის ამსახველ კადრებს უკომენტაროდ, რის შემდეგაც ეთერში ფილმი და „ფარული კამერა“ გაუშვეს.

დილით „იმედმა“ საკუთარ მაყურებელს უკვე ეკა ხოფერიას გასართობი შოუს გამეორება შესთავაზა, რომელიც საკუთარი ჟურნალისტების „შატო მერესა“ და „როიალ ბატონში“ დასვენებას ეძღვნებოდა.

იმედის საინფორმაციო გამოშვება სტუდიიდან მხოლოდ 14 ივნისს 11:00 საათზე გავიდა. ამის შემდეგ არხმა საგანგებო რეჟიმში დაიწყო მუშაობა - თბილისში სხვადასხვა წერტილიდან რთავდნენ ჟურნალისტებს პირდაპირ ეთერში და განახლებულ ინფორმაციას აწვდიდნენ მაყურებელს. უკომენტაროდ სთავაზობდნენ ღამით გადაღებულ კადრებსაც. საღამოს 8 საათზე ეთერში გაუშვეს „იმედის კვირა“, სადაც მოწვეულ სტუმრებთან ერთად იმსჯელეს მომხდარზე და მაყურებელს ბოლო ინფორმაცია მიაწოდეს.

პირველი არხი

ოპერატიულობის თვალსაზრისით მესამე ადგილზე აღმოჩნდა საზოგადეობრივი მაუწყებლის პირველი არხი, რომელმაც საკუთარ მაყურებელს მომხდარი სტიქიური უბედურების შესახებ გვიან ღამით, 03:10 წუთზე ამცნო. საინფორმაციო გამოშვება „მოამბე“ პირდაპირ ეთერში რთავდა ჟურნალისტებს, რომლებიც სტიქიის ზონაში იმყოფებოდნენ და უწყვეტ რეჟიმში ავრცელებდა განახლებულ ინფორმაციას 06:10 წუთამდე.

არხმა მაუწყებლობა 08:00 საათზე განაახლა ბაქოში მიმდინარე ევროპული თამაშებით. „მოამბე“ კი ეთერში 10 საათზე დაბრუნდა. ნახევარსაათიანი საინფორმაციო გამოშვების შემდეგ კვლავ ევროპული თამაშების ჩვენება განახლდა. ამის შემდეგ „მოამბემ“ახალი ამბები მაყურებელს 12, 14 და 16:00 საათზე შესთავაზა და 18:10 საათამდე იმუშავა. წამყვანმა მაყურებელს ამცნო, რომ ღამით ეთერში დაგვიანებით გასვლის მიზეზი ტელევიზიის წინ არსებული რთული სიტუცია იყო. მთავარი საინფორმაციო გამოშვება კი ეთერში 20:00 საათზე გავიდა. ამ თემას მიეძღვნა გადაცემა „რეალური სივრცე“ და სტუმრებთან ერთად განიხილეს ღამით მომხდარი სტიქიური უბედურება.

მაესტრო

„მაესტრომ“ საკუთარ მაყურებელს ღამით განვითარებული მოვლენების შესახებ 14 ივნისს დილით 12:00 საათზე ამცნო. მანამდე ეთერში ფილმები და სერიალები გადიოდა. წამყვანმა აღნიშნა, რომ ტექნიკური გეგმიური სამუშაოები მიმდინარეობდა და არხმა ღამით ეთერში გასვლა ვერ შეძლო მიუხედავად იმისა, რომ გადამღები ჯგუფები მთელი ღამის განმავლობაში მუშაობდნენ.

კავკასია

„კავასიის“ ეთერში არც გვიან ღამით და არც 14 ივნისს, მთელი დღის განმავლობაში, არც ერთი საინფორმაციო გამოშვება არ გასულა. ამ ტელეკომპანიამ საკუთარ მაყურებელს სტიქიური უბედურების შესახებ დღენახევრით გვიან, მხოლოდ 15 ივნისს 17:00 ამცნო.

აღსანიშნავია, რომ არც ერთ არხზე, რომელიც მომხდარ ტრაგიკულ მოვლენებს ოპერატიულად შუქებდა, არ მომხდარა გარდაცვლილების იდენტიფიცირება, ოფიციალური ინფორმაციის გავრცელებამდე. მაუწყებლებს არ გადაუციათ გადაუმოწმებელი ინფორმაცია გარდაცვლილების შესახებ, არ უჩვენებიათ ახლო კადრით ცხედრები და არ შეულახავთ დაზარალებულთა პირადი ცხოვრების ხელშეუხებლობის უფლება.მაუწყებელთა ქცევის კოდექსის შესაბამისად, წინა ღამით გადაღებულ მასალას, ეთერში გაშვებისას, მითითებული ჰქონდა კადრების გადაღების თარიღი, რითიც თავიდან იქნა აცილებული მაყურებლის შეცდომაში შეყვანა.

ნატა ძველიშვილი

ონლაინ მედიაში თბილისის წყალდიდობაზე გამოქვეყნებული მასალების ნაწილს შეცდომაში შემყვანი, არასწორი ფოტოები ერთვოდა - ფოტოები, იმ ფაქტს არ ასახავდა, რაზეც მასალაში იყო საუბარი.

მაგალითად, ზოოპარკიდან გაქცეული ლომის შესახებ სიახლეს, ადევს ფოტო, რომელიც საქართველოში საერთოდ არ არის გადაღებული.

სააგენტოთა ნაწილმა ამბავთან შეუსაბამო ფოტოები გაავრცელა მაშინაც, როდესაც ზოოპარკის ბინადართა ცეცხლსასროლი იარაღით დახოცვის შესახებ გამოაქვეყნეს ინფორმაცია. საიტებზე განთავსებულ ფოტოებში, დახოცილი ცხოველების გროვა იყო ასახული, მათ შორის ზებრებიც, რომლებიც თბილისის ზოოპარკში სტიქიას გადაურჩნენ.

სააგენტების ნაწილმა მსგავსი ფოტოების გამოქვეყნებისას აღნიშნა, რომ ფოტო არ ასახავდა თბილისის მოვლენებს, მათ შორის იყო „რეპორტიორი“ და „გურიანიუსი“. თუმცა, "გურიანიუსის" მინაწერში აღნიშნული იყო მხოლოდ ის, რომ ფოტო არ ასახავდა სტატიაში აღნიშნულ ფაქტს, მინიშნება იმის შესახებ რომ ფოტო საქართველოში არ იყო გადაღებული, არ ყოფილა.

არასწორი ფოტო ედო „პირველ რადიოსაც“, რომელმაც ქობულეთის ქუჩაზე ავაზის გამოჩენის შესახებ, „ფეისბუქიდან“ ერთ-ერთი მომხმარებლის პოსტი აიღო და შავი ავაზის ფოტო დაურთო.

10 ივნისს “მაესტროს” მთავარ გამოშვებაში ახალციხის მერიაში საბიუჯეტო სახსრების შესაძლო გაფლანგვის ფაქტს სიუჟეტი მიეძღვნა. საქმე ეხება 2014 წლის დეკემბერში, ახალციხის მკვიდრის,სერგეი აკოფიანისთვის, მერიის მიერ საკონპენსაციო თანხის - 150 ათასი ლარის გადახდას.

ახალციხის საკრებულოს ოპოზიციონერი წევრები ეჭვობენ, რომ მერიამ მოქალაქეს ფარული მოლაპარაკების შედეგად მუნიციპალიტეტის ბიუჯეტიდან 150 ათასი ლარი გადაუხადა. აკოფიანის ყოფილი მეზობლები აცხადებენ, რომ 1903 წელს აშენებული სახლის მეპატრონე, თავის დროზე, საკუთარ უძრავ ქონებას 6 000 დოლარად აფასებდა და მათაც უკვირთ, თუ რატომ გადაუხადა მერიამ თითქმის 25-ჯერ მეტი თანხა მოქალაქეს.

წამყვანმა მომხდარი კორუფციად შეაფასა და სიუჟეტი ასე წარადგინა: “კორუფცია ნანგრევებში - რაში გახარჯა ახალციხის გამგებელმა 150 ათასი ლარი? ია თინიკაშვილი ახალციხიდან უკვე დაბრუნდა და ჩინოვნიკზე მოგვიყვება, რომელიც გულუხვი აღმოჩნდა”.

სიუჟეტის მიხედვით, ნამდვილად შედგა თუ არა კორუფციული გარიგება, ჯერ დადგენილი არ არის. შსს-ს ანტიკორუფციული სამსახური საქმეს, სამსახურებრივი მდგომარეობის ბოროტად გამოყენებისა და თანხების მითვისება-გაფლანგვის მუხლებით, ამჟამად იძიებს და საბოლოოდ რა კვალიფიკაციით გაგრძელდება გამოძიება, ეყოლება თუ არა საქმეს ბრალდებულები ან მსჯავრდებულები, ან საერთოდ დადასტურდება თუ არა კორუფციის ფაქტი, ჯერჯერობით უცნობია.

სიუჟეტში ახალციხის ახლანდელი მერი გიორგი კოპაძე ამბობს, რომ გამოძიება არასწორი მიმართულებით მიდის - ის აკოფიანისთვის კომპენსაციის გადახდას სამართლიანობის აღდგენის პროცესს უკავშირებს, თუმცა სიუჟეტიდან ვერ ვიგებთ, რას გულისხმობს მერი, მაყურებელს მხოლოდ ინტერპრეტაციის საშუალება რჩება: იქნებ რაბათის რეაბილიტაციის დროს, აკოფიანს ქონების დაზიანების ან სახლის დანგრევის გამო, თანხა არ გადაუხადეს ან დამატებით რამე გარემოებაა, რაზეც სიუჟეტში საუბარი არ არის. ამასთან, ვიგებთ, რომ აკოფიანს საკომპენსაციო თანხის მისაღებად მუნიციპალიტეტისთვის 2013 წელსაც მიუმართავს, თუმცა უშედეგოდ.

2015-06-12 გაზეთ „ასავალ-დასავალის“ 8-14 ივნისის გამოცემის სტატიებში სიძულვილის ენა და აგრესიული ჰომოფობიურ ეპითეტები გვხვდება. 21-ე გვერდზე კი ილუსტრაციად გამოქვეყნებულია მარიხუანის მოხმარების დეკრიმინალიზაციის მოთხოვნით გამართულ აქციაზე გადაღებული ფოტო, რომელზეც ახლო კადრით ასახული არიან ბავშვები.

„ასავალ-დასავალს“ არაერთხელ დაუწერია, რა ანტიქართულ და ანტიმართლმადიდებლურ სექტას წარმოადგენს რესპუბლიკური პარტია“ - ამ წინადადებით იწყება სტატია მე-9 გვერდზე, რომელსაც ჰომოფობიური სათაური აქვს: „თინა მარიხუანას ემხრობა - რესპუბლიკური პარტია ნაცებთან ერთად საქართველოს პედერასტიზაციასა და ნარკომანიზაციაზე ოცნებობს!“

სტატიას თან ახლავს რესპუბლიკური პარტიის ლიდერების, ლევან და დავით ბერძენიშვილების ფოტოები - კადრები ტოკ-შოუ „იმედის კვირის“ ერთ-ერთი სიუჟეტიდან, სადაც მათ ხელში ეჭირათ შვიდფეროვანი დროშები და საუბრობდნენ ლგბტ მოქალაქეების უფლებების დაცვაზე. ფოტოსურათების ქვემოთ მსხვილი შრიფტით გამოყოფილია ჰომოფობიური სიტყვები: „ძმები ბერძენიშვილები ლგბტ-სექტის მხარდასაჭერად 17 მაისს ისე აენთნენ, რომ პარლამენტში პედერასტიის საერთაშორისო ფერადოვანი დროშებიც კი ააფრიალეს“.

სტატიის ილუსტრაციად ასევე გამოყენებულია რესპუბლიკური პარტიის კიდევ ერთი ლიდერის - თავდაცვის მინისტრ თინა ხიდაშელის ფოტო. ჟურნალისტი აკრიტიკებს თინა ხიდაშელის პოზიციას, რომ მარიხუანის მოხმარება სისხლის სამართლის წესით არ უნდა ისჯებოდეს.

სტატიაში რამდენიმეგან უკიდურესად უარყოფითი ტონით, სიძულვილის ენით არის შეფასებული რესპუბლიკური პარტიის საქმიანობა: „რესპუბლიკური პარტია ნაცებთან ერთად, არა მხოლოდ საქართველოს ნარკომანიზაცია-გამოთაყვანებაზე ოცნებობს, არამედ ქვეყნის ლგბტ-იზაცია-პედერასტიზაციაზეც!“ „ქართველებს ლევან ბერძენიშვილივით არ ემშობლიურებათ პედერასტია და ეკლესიურ სწავლებას უფრო მისდევენ, ვიდრე რესპუბლიკურ სატანიზმს!“

მარიხუანის მოხმარების დეკრიმინალიზაციის თემას გაზეთი 21-ე გვერდზეც უბრუნდება, სტატიით - „ეს მარიხუანობაა! ამ სატანისტებმა მარიხუანა მაცხოვარსაც კი „მოაწევინეს“. სტატიის პირველივე სიტყვებში სიძულვილის ენაა გამოყენებული: „17 მაისის გეი-აღლუმის ჩაშლის შემდეგ ჩვენებურმა ლიბერასტებმა ახალი ანტიქართული დივერსია წამოიწყეს!“

სტატიაში საუბარია 2 ივნისს სახელმწიფო კანცელარიასთან მარიხუანის მოხმარების დეკრიმინალიზაციის მოთხოვნით მოწყობილ აქციაზე სახელწოდებით „არ დაიჭირო!“

ჟურნალისტი წერს: „მარიხუანისტთა აქციაზე ბავშვების უზნეო გამოყენების გამო არც ერთ არასამთავრობო ორგანიზაციასა და ლიბერასტ ასო-ელს არ გამოუთქვამთ იოტისოდენა პროტესტი! არადა, აშკარად ბავშვთა უფლებების უუხეშესი დარღვევის ფაქტთან და მთელი რიგი საერთაშორისო კონვენციების დარღვევასთან გვაქვს საქმე!“

ამ სიტყვების დასტურად სტატიას ახლავს აქციაზე გადაღებული ფოტო, სადაც ორი ბავშვი სახის დაუფარავად არის გამოსახული.

ტელეკომპანია „მაესტროს“ ეთერში 7 ივნისს გავიდა სიუჟეტი ყალიონაშვილების ოჯახის შესახებ. ისინი მძიმე სოციალურ პირობებში ცხოვრობენ. სიუჟეტის თანახმად, ოჯახს თავის გატანა თვიდან თვემდე სოციალური დახმარებით უწევს. თუმცა წამყვანი იქვე ამბობს, რომ „დახმარებაზე მცხეთის მუნიციპალიტეტი უარს ამბობს, მიზეზად კი ტერიტორიის მათ ბალანსზე არარსებობას ასახელებს".

ინტერნეტგამოცემა „საქართველო და მსოფლიო“ აქვეყნებს ინტერვიუს სიონის საკათედრო ტაძრის მოძღვართან, დეკანოზ დავით ლასურაშვილთან, რომელიც ინტერვიუში ჰომოფობიურ და ანტიდასავლურ განწყობებს ავლენს.

„დღეს არაერთი ე.წ არასამთავრობო ორგანიზაცია ამტკიცებს, რომ ჰომოსექსუალიზმი, ლესბოსელობა თუ სხვა სახის გადახრები ავადმყოფობა არ არის, მაგრამ უნდა ითქვას,- თუკი ადამიანს რამე მსგავსი სახის გადახრების ნიშნები აღმოაჩნდება, მას გარკვეული გამოკვლევები და მკურნალობა უნდა ჩაუტარდეს. ის არის ავად და ჩავარდნილია უმძიმეს ცოდვაში, ამიტომ აუცილებლად სჭირდება როგორც ფიზიკური, ასე სულიერი მკურნალობა და არავითარ შემთხვევაში არ შეიძლება იმის პროპაგანდა, რომ ეს არ არის არანაირი გადახრა. ეს რომ გადახრაა და ყველანაირი ნორმიდან ამოვარდნა, მსოფლიოს წამყვანმა მეცნიერებმა დიდი ხნის წინათ დაასკვნეს“ - აცხადებს მამა დავით ლასურაშვილი გამოცემა „საქართველო და მსოფლიოსთვის“ 3 ივნისს მიცემულ ინტერვიუში.

ამავე სტატიაში დასავლეთი, ამერიკის შეერთებული შტატები და ევროატლანტიკური სტრუქტურები ქართველი ერისა და მართლმადიდებლური ეკლესიისათვის საფრთხის შემქმნელ ორგანიზაციებადაა წარმოჩენილი.

„ევროპული და ამერიკული სტრუქტურები ამას განსაკუთრებით მოითხოვენ (ერთსქესიანთა ქორწინების დაკანონებას) წინააღმდეგ შემთხვევაში გვეუბნებიან, რომ ვერ გავხდებით ვერც ნატოს და ვერც ევროკავშირის წევრი; ეს ნიშნავს, რომ გვაყენებენ არჩევანის წინაშე, ან უნდა მივიღოთ ის გარყვნილება რაც დასავლეთში ნორმადაა გამოცხადებული, ან გავქრეთ. ეს არის პირდაპირი ზეწოლა ადამიანების ცნობიერებაზე;“

სასულიერო პირი აქვე დასძენს: „უნდა ვიცოდეთ, რაც მეტად დავუახლოვდებით ევროპულ და ამერიკულ „ფასეულობებს“, მით მეტად დავშორდებით ქრისტეს და ეკლესიას“ .

ანტიდასავლური და ჰომოფობიური გამონათქვამებია იმავე გამოცემის მიერ 5 ივნისს გამოქვეყნებულ ინტერვიუში, გამოცემის რესპონდენტია წმ.მარინეს ტაძრის წინამძღვარი, მოძღვარი დავით ისაკაძე;

„ჩვენ ასეთი ევროპული და ამერიკული კანონები არ გვინდა, ჩვენ ისეთი კანონები გვინდა, რომელიც საღმრთო კანონებს დაექვემდებარება. ის ხელისუფალი, რომელიც ასეთ კანონებს იღებს (იგულისხმება ერთსქესიანთა ქორწინების შესახებ კანონი) ჩვენთვის მიუღებელი იქნება და მას ყოველთვის ბრძოლას გამოვუცხადებთ“.

"ისეთი პიროვნება, როგორიც დღევანდელი სახალხო დამცველია, მნიშვნელოვანი ორგანიზაციის ხელმძღვანელად არ უნდა ინიშნებოდეს. ჩვენ გვყავს სახალხო დამცველი, რომელიც საქართველოში ტრანსგენდერების ცხოვრების წესის დანერგვაზე ლაპარაკობს, ამაზე მეტი საშინელება რა უნდა იყოს?! ამით ის არღვევს ჩვენს უფლებებს არღვევს, ის ხომ სახალხო დამცველია, ანუ ჩვენი, ყველას დამცველია და არა ტრანსგენდერების წარმომადგენელი?! ჩვენც ხომ უნდა გვკითხონ, ამ საკითხზე რა აზრის ვართ, გვინდა კი ეს მოხდეს? (...) თუ ყველა საკითხს ასე მივუდგებით, უახლოეს მომავალში ტრანსგედერი პრეზიდენტი გვეყოლება, რადგან საპრეზიდენტო არჩევნებში კენჭისყრის უფლებას ისიც მოითხოვს. თუ ბატონ უჩა ნანუაშვილს სურს, ქალბატონი კონჩიტა გახდეს, ეს მისი უფლებაა, მაგრამ ჩვენ ამას თავს ნუ გვახვევს".

გაზეთმა „ალიამ“ თავიდანვე უარყოფითად შეაფასა საქართველოს თავდაცვის მინისტრად ქალის დანიშვნა, რაზეც mediachecker ერთი თვის წინ წერდა. გაზეთი კვლავ განაგრძობს გენდერული სტერეოტიპის დამკვიდრებას, რომ თავდაცვის მინისტრის თანამდებობა ქალისთვის შეუფერებელია.ამჯერად „ალიას“ ერთ-ერთი აქტიური რესპონდენტი, დეკანოზი ელიზბარ დიაკონიძე, გამოხატავს უკმაყოფილებას თავდაცვის სამინისტროს უმაღლეს თანამდებობებზე ქალების დანიშვნის გამო.

„მინდა ჩემი გაოცება გამოვხატო. თავდაცვის მინისტრად ხომ დაგვინიშნეს ერთი ქალი და მოადგილედ წაიყვანა მეორე ქალბატონი და ამიხსნას ვინმემ, სწორება რაზე უნდა იყოს ნეტა? ვერ ვხვდები, რა ხდება: საქართველოში თამარი რომ მეფე იყო, ის არ იყო მხედართმთავარი, ამ ადგილას ჯერ მეუღლე ჩააყენა და მერე მხარგრძელები იყვნენ სარდლები და ჯარს მხედართმთავრობდა დავით სოსლანი. ანუ მეფე თამარი არ გაკადნიერებულა ამ დონეზე, რომ ჯარისთვის ეხელმძღვანელა და რუსუდანი, თავისი გოგო, დაენიშნა მოადგილედ, ან კრავაი, ან ვინმე, კითხვა მაქვს, როდემდე შეიძლება ასეთი აბსურდი ითმინოს ხალხმა?“ - აცხადებს ელიზბარ დიაკონიძე 3 ივნისს „ალიაში“ გამოქვეყნებულ ინტერვიუში.

გენდერულ თანასწორობასა და მედიაზე ევროსაბჭოს წევრი ქვეყნების მინისტრთა კომიტეტის რეკომენდაციის თანახმად,მედიასაშუალებებმა ხელი უნდა შეუწყონ თვითრეგულირების მექანიზმების, შიდა ქცევის/ეთიკის კოდექსებისა და შიდამონიტორინგის, ასევე ისეთი სტანდარტების შემუშავებას, რაც მედიაგაშუქებაში გენდერულ თანასწორობას შეუწყობს ხელს;უნდა უზრუნველყონ ქალთა და მამაკაცთა არასტერეოტიპული იმიჯი, ფუნქცია და ხილვადობა, რომელიც თავისუფალი იქნება სექსისტური რეკლამირების, ენისა და შინაარსისაგან, რასაც სქესის საფუძველზე დისკრიმინაციის, სიძულვილისა და გენდერზე დაფუძნებული ძალადობისკენ მივყავართ.

ჟურნალისტური ეთიკის ქარტიის#7პრინციპში ვკითხულობთ: „ჟურნალისტს უნდა ესმოდეს მედიის მიერ დისკრიმინაციისწახალისების საფრთხე; ამიტომ ყველაფერი უნდა იღონოსნებისმიერი პირის დისკრიმინაციის თავიდან ასაცილებლადრასის, სქესის, სექსუალური ორიენტაციის, ენის, რელიგიის,პოლიტიკური და სხვა შეხედულებების, ეროვნული ანსოციალური წარმოშობის საფუძველზე ან რაიმე სხვა ნიშნით.

2 ივნისს მარიხუანის დეკრიმინალიზაციის მოთხოვნით აქცია გაიმართა. მედიასაშუალებების ნაწილმა გამოაქვეყნა აქციის ფოტოები, რომლებზეც ბავშვები ჩანდნენ.

„ლიბერალის“ გვერდზე ბავშვის ორი ფოტო გამოქვეყნდა, მათ შორის, მთავარ გვერდზე გამოტანილი იყო ახლო ხედით გადაღებული ფოტო.

ბავშვები ჩანდნენ „ინტერპრესნიუსის“ მიერ გამოქვეყნებულ ფოტორეპორტაჟშიც. EPN.GE -ს მასალაში კი, სამი სხავდასხვა ბავშვის ფოტოა გამოყენებული, ერთ-ერთ მათგანში, ბავშვს მარიხუანის ფოთლებით გაფორმებული პლაკატიც უჭირავს - წარწერით „არ დაიჭირო“.

“პირველ რიგში, ამ ასაკის ბავშვს ნაკლებად აქვს წარმოდგენა, თუ რა პროცესშია ჩართული, საინტერესოა იმავე სახის აქცია თამბაქოს შესახებ რომ ტარდებოდეს, ჩართავდა თუ არა მას მშობელი? ეს ხომ ჯანსაღი ცხოვრების პროპაგანდა არ არის? და მეორეც - როცა ბავშვი მონაწილეობს პროცესში, რაც მისი არჩევანი არ არის, მეტიც - წარმოდგენაც კი არ აქვს ამის შესახებ, ეს უფრო მისით მანიპულაციას ჰგავს”, - ამბობს მაია ცირამუა, ბავშვთა ფსიქოლოგი.

მისივე თქმით, მანიპულირებს მედიაც, რომელიც ბავშვს მსგავს აქციაზე ფოტოს უღებს და შემდეგ აქვეყნებს: “რა მიზანიც არ უნდა ჰქონდეს მედიას, რა აქცენტის გაკეთებაც არ უნდა უნდოდეს, მთავარია ამისთვის ბავშვი არ გამოიყენოს. მითუმეტეს ბავშვი, რომლის იდენტიფიცირება შესაძლებელია იქნება. შეიძლება ფოტოს ისე გადაღებაც, რომ არ ჩანდეს კონკრეტული არასრულწლოვანი. ამასთანავე, არ ვიცით მომავალში რა პოლიტიკური რეალობა იქნება ქვეყანაში ან რა ნარკოპოლიტიკა გვექნება და ვინ როგორ გამოიყენებს ამ ბავშვების ფოტოებს”, - ამბობს ცირამუა Mediachecker- თან საუბარში.

3 ივნისს, „კურიერის“ მთავარ გამოშვებაში გავიდა სიუჟეტი, რომელიც ბიზნესმენ ბადრი შოშიაშვილის მიერ, მიხეილ სააკაშვილის ყვარელში მდებარე სახლის დაკავების მცდელობას შეეხებოდა. მიზეზი გრემის კულტურის სახლი გახდა, რომელიც, შოშიაშვილის თქმით, „ნაციონალურმა მოძრაობამ“ 2012 წელს „იძულებით აყიდინა“.

წამყვანი შესავალ ტექსტში ამბობს, რომ მიხეილ სააკაშვილის სახლი ყვარელში „ნაცონალური მოძრაობის“ წევრებმა დაიცვეს: „ბადრი შოშიაშვილი დეიდებთან და მამიდებთან ერთად სახლის დაკავებას რამდენიმე საათის განმავლობაში ცდილობდა. ნინო ბურჯანაძის პარტიის კახეთის რეგიონული ორგანიზაციის თავმჯდომარე დღის ბოლოს თბილისში დაიბარეს. თუ მისი მოთხოვნა სამართლიანობის აღდგენის შესახებ არ დაკმაყოფილდა, ბიზნესმენი პარასკევს სააკაშვილის სახლის მორიგი შტურმით იმუქრება“.

სიუჟეტის ტექსტში ჟურნალისტი კიდევ ერთხელ აღნიშანვს, რომ სახლის დაცვა, ვალერი შოშიაშვილისა და მისი ნათესავებისგან, „ნაციონალური მოძრაობის“ წევრებს მოუწიათ.

კომენტარში „ნაციონალური მოძრაობის წევრი“ გიორგი ღვინიაშვილი კი აღნიშნავს, რომ შოშიაშვილი ხელისუფლების გამოგზავნილია და მას ხელისუფლება პატრონობს: „ეს ცხადი იქიდანაც ხდება, რომ ჩვენ პირადად ველაპარეკთ შს მინისტრის მოადგილეს თალაკვაძეს, მაგრამ როგორც ხედავთ, ადგილზე ერთი პოლიციელიც არ გამოცხადებულა“.

სიუჟეტში არ ჩანს შსს-ს პოზიცია, იმის შესახებ თუ რატომ არ მივიდა ადგილზე პოლიცია. მედიასაშუალებას არ დაუსვამს კითხვები, ჰქონდა თუ არა ამ ინციდენტის შესახებ შსს-ს წინასწარი ინფორმაცია და თუ ჰქონდა, რატომ არ მიიჩნია საჭიროდ, ადგილზე მისვლა.

ხევსურეთში, დუშეთის რაიონის სოფელ ხონესთან, მდინარე ანდაქის ხეობაში მომხდარი სტიქიის შესახებ სიუჟეტი “ქრონიკის” მთავარ საინფორმაციო გამოშვებაში 2 ივნისს გავიდა.

“ხევსურეთში ამ წუთებშიც სამაშველო ოპერაცია მიმდინარეობს. შსს-ს თანამშრომლები ღვარცოფში მოყოლილ მეცხვარეს ეძებენ. თოვლის და მიწის მასის ქვეშ მწყემსი, 500 სული ცხვარი და 40 სული საქონელია მოყოლილი”, - აღნიშნა წამყვანმა.

სიუჟეტში ერთ-ერთი რესპონდენტი, თბილისის სახელმწიფო უნივერსიტეტის ასისტენტ-პროფესორი, გიორგი დვალაშვილი ამბობს, რომ მწყემსი საძოვარზე 1 კვირის წინ წავიდა. სამის დღის შემდეგ მას ძმამ მიაკითხა და ნახა, რომ ხეობა მთიდან წამოსული თოვლის და მიწის ნაშალით იყო სავსე.

სიუჟეტში ჩაწერილია საგანგებო სიტუაციების მართვის სააგენტოს საზოგადოებასთან ურთიერთობის სამსახურის ხელმძღვანლის, სოფო კობაიძის, კომენტარიც. კობაიძე განმარტავს, რომ: “შსს-ს თანამშრომლები დაუყოვნებლივ ჩავიდნენ ადგილზე, სადაც ვერტმფრენის დაჯდომა იყო შესაძლებელი. სამწუხაროდ, რთული რელიეფის გამო ვერ მოხერხდა ვერტმფრენის დასმა. ჩვენმა თანამშრომლებმა 15 კმ ფეხით გაიარეს შემთხვევის ადგილამდე. ამ დროისთვის არსებული ინფორმაციით ერთი პირი ითვლება დაკარგულად”.

სიუჟეტში არ არის დაზუსტებული, როდის მოხდა სტიქია სოფელ ხონესთან, შემთხვევის შესახებ როდის შევიდა შეტყობინება საგანგებო სიტუაციების მართვის სააგენტოში, შეტყობინებიდან რამდენი ხნის შემდეგ ჩავიდნენ მაშველები სტიქიის ზონაში, კონკრეტულად რა სამაშველო სამუშაოები ჩატარდა ადგილზე, რა გაირკვა ვერტმფრენიდან გარემოს დათვალიერების შემდეგ - მწყემსი და ფარა სტიქიას გადაურჩნენ, თუ ისინი ნამდვილად მთიდან წამოსული მასის ქვეშ მოჰყვნენ. მასალაში შსს-ს მიერ გავრცელებული ინფორმაცია სტიქიის ზონაში მაშველების “დაუყოვნებელ” ჩასვლის და სამაშველო სამუშაოების მიმდინარეობის შესახებ ადგილობრივ მოსახლეობასთან არ არის გადამოწმებული.

სიუჟეტში არაფერია ნათქვამი სტიქიის გამომწვევი მიზეზებისა და მასშტაბის შესახებ - არ არის ჩაწერილი გარემოს დაცვის სამინისტროს კომენტარი.

ჟურნალისტური ეთიკის ქარტიის პირველი მუხლის თანახმად, ჟურნალისტმა პატივი უნდა სცეს სიმართლეს და საზოგადოების უფლებას – მიიღოს ზუსტი ინფორმაცია. ამავე მუხლის განმარტებაში აღნიშნულია, რომ მასალაში უნდა ჩანდეს ჟურნალისტის მცდელობა, რომ მან საზოგადოების მიმართ გამოიჩინა პატივისცემა და ბოლომდე გადაამოწმა ფაქტები, რათა გამოექვეყნებინა სიმართლე და ზუსტი ინფორმაცია.