გიორგი კოხრეიძის დირექტორად არჩევის შემდეგ, საზოგადოებრივი მაუწყებლის აჭარის ტელევიზიის კონსულტატის პოზიცია მედიაექსპერტმა ზვიად ქორიძემ და მედიამენეჯერმა მარინა ვაშაყმაძემ დატოვეს. ამ ეტაპზე მაუწყებლის დატოვებას არ აპირებს დირექტორის მოადგილე ნათია ზოიძე, რომელიც არხს თვეების განმავლობაში, უდირექტორობის პერიოდში ხელმძღვანელობდა და რომელსაც ახალმა დირექტორმა პირველივე დღეს მიანიშნა, რომ უნდა წავიდეს.

“არ ვფიქრობ, რომ ამ კონკრეტულ სიტუაციაში, ამ ბრძოლაში ჩემი კოლეგები უნდა მივატოვო… ბატონი კოხრეიძე ჯერ არ დამკავშირებია. მან მხოლოდ სატელევიზიო კომენტარი გააკეთა, რომ არის ჩემი გადასაწყვეტი.  ჩემი გადასაწყვეტი თუ არის, მაშინ მე ვაგრძელებ მუშაობას, ჩვეულებრივად ვრჩები და ვაკეთებ იგივეს, რასაც აქამდე ვაკეთებდი”, - ამბობს ნათია ზოიძე.

იგი მიიჩნევს, რომ გიორგი კოხრეიძის განცხადებები საზოგადოებრივი მაუწყებლის კონცეფციასთან შეუსაბამოა: “მე არ მგონია, რომ მან გამარჯვება ჯანსაღი კონკურენციის პირობებში მოიპოვა. რა თქმა უნდა, არ ვარ იმ არჩევანით მოხიბლული, რა არჩევანიც გაკეთდა, მაგრამ მე შევეცდები, რომ დავრჩე და გავაგრძელო მუშაობა ისე, როგორც აქამდე.”

“მედიაჩეკერის” კთხვაზე, როგორ აპირებს ახალ დირექტორთან თანამშრომლობას, ნათია ზოიძე გვპასუხობს:   “ჩვენი თანამშრომლობის საფუძველი არის მაუწყებლობის შესახებ კანონი.  შევასრულებ იმას, რაც მევალება და, შევეცდები,  როგორც ვმუშაობდი ბოლო 6 თვის განმავლობაში, ისევ ისე გავაგრძელო".

ზვიად ქორიძემ, რომელიც არხზე ყოფილმა დირექტორმა ნათია კაპანაძემ მიიწვია და რომელიც იანვრიდან ამ დრომდე მაუწყებლის მართვის მოდელზე, სტრუქტურასა და შიდა სახელმძღვანელო დოკუმენტებზე მუშაობდა, ღიად განაცხადა, რომ ტელევიზიას ახალი დირექტორის გამო ტოვებს.

“ვიყავი აჭარის ტელევიზიისა და რადიოს კონსულტანტი, ეს შემოთავაზება იყო წინა დირექტორისგან და მაშინ გაფორმდა კონტრაქტი, ნათია კაპანაძის დროს. შემდგომ ნათია ზოიძე იყო დირექტორის მოვალეობის შემსრულებელი, მასაც ჰქონდა სურვილი, რომ ვყოფილიყავი კონსულტანტი. ახლა უკვე ჩემი სურვილია, რომ არ მინდა ამ დირექტორის კონსულტირება. ამიტომ მე ცალმხრივად ვწყვეტ კონტრაქტს და დანარჩენი მასზეა დამოკიდებული”, - ამბობს ზვიად ქორიძე "მედიაჩეკერთან" საუბრისას.

ზვიად ქორიძის გარდა, მაუწყებლიდან წასვლის გადაწყვეტილება მიიღო მარინა ვაშაყმაძემაც, რომელიც აჭარის ტელევიზიაში, კონსულტანტის პოზიციას, 2018 წლის მარტიდან იკავებდა. მაუწყებელში იგი ტელე, რადიო და ვებპლატფორმების განვითარებაზე მუშაობდა. მანამდე, 12 წლის განმავლობაში, მარინა ვაშაყმაძე “რადიო თავისუფლების” თბილისის ბიუროს ხელმძღვანელობდა.

“მარინა ვაშაყმაძემ უშუალოდ იყო ჩართული აჭარის საზოგადოებრივი მაუწყებლის ახალი ვებგვერდის კონცეფციის შექმნასა და ამ პროექტის განცხორციელებაში. ის მუშაობდა ახალი ამბების, ანალიტიკური თუ გასართობი გადაცემების განახლებაზე. მისი ინიციატივით გაკეთდა ახალი სოციალური პროექტი - "ათვლის კუთხე". მუშაობდა მაუწყებლის ყველა რგოლთან, ჟურნალისტებისა და პროდიუსერებისთვის ატარებდა შიდა ტრენინგებს. ასევე, აქტიურად იყო ჩართული დონორებთან, უცხოურ მაუწყებლებთან და საერთაშორისო ორგანიზაციებთან მოლაპარაკებების პროცესში და წარმოადგენდა აჭარის საზოგადოებრივ მაუწყებელს”, - ვკითხულობთ აჭარის ტელევიზიის ვებგვერდზე.

თავად გიორგი კოხრეიძე ჯერჯერობით მედიასთან კომენტარს არ აკეთებს: “ჯერ ჩემი ტელევიზიისთვისაც არ მიმიცია კომენტარი, მიუხედავად იმისა, რომ საფუძველი ძალიან ბევრი მაქვს. დილიდან ვხვდები თანამშრომლებს, პრინციპულად ასე მაქვს გადაწყვეტილი - ჯერ ხალხი და შემდეგ კომენტარები.”

კოხრეიძის განცხადებები აშინებთ მაუწყებლის თანამშრომლებს, რომლებმაც დირექტორის არჩევამდეც არაერთხელ გაანცხადეს, რომ არხის სარედაქციო პოლიტიკას საფრთხე ემუქრებოდა.

“6 თვის განმავლობაში განვითარებული პროცესების გარდა, ჩვენს შეშფოთებას იწვევს დღეს არჩეული დირექტორის პირველი ინტერვიუ, რომელშიც გიორგი კოხრეიძემ თქვა, რომ მაუწყებელში არის კონკრეტული ადამიანი, ვისთან თანამშრომლობაც კითხვის ნიშნის ქვეშაა, საუბარია ნათია ზოიძეზე… ვფიქრობთ, რომ კოხრეიძის განცხადება იმ ადამიანის შესახებ, რომელიც ყველაზე რთულ და კრიტიკულ სიტუაციაში არის ჯანსაღი სარედაქციო პოლიტიკის გარანტი, არის ნიშანდობლივი სიგნალი”, - ნათქვამია განცხადებაში, რომელიც საინფორმაციო სამსახურმა 22 ნოემბერს გაავრცელა.

გიორგი კოხრეიძე საზოგადოებრივი მაუწყებლის აჭარის ტელევიზიისა და რადიოს 22 ნოემბრიდან ხელმძღვანელობს, მას შემდეგ, რაც “ქართული ოცნების” დაკომპლექტებულმა მრჩეველთა საბჭომ, განმეორებით კენჭისყრაზე, იგი დირექტორად აირჩია.

გიორგი კოხრეიძე მაუწყებლის დირექტორის შესარჩევად მიღებულ კონკურსში ოთხივეჯერ მონაწილეობდა. თუმცა, პირველ ორ მცდელობაზე მას საბჭოს არცერთი წევრის ხმა არ მიუღია. მესამე კონკურსზე კი, რომელშიც საბჭოს 5 წევრიდან მხოლოდ 3 მონაწილეობდა, კოხრეიძემ 2 ხმა მიიღო. იგი ამბობდა, რომ რადგან ბორდის ერთი წევრი - ბეჟან გობაძე კენჭისყრაში არ მონაწილეობდა, დანარჩენი სამი წევრიდან კი მას ორის, ანუ, უმრავლესობის ხმა ჰქონდა და ამიტომ, დირექტორად ის უნდა გამოეცხადებინათ. სწორედ მისი სარჩელის საფუძველზე შეჩერდა დირექტორის შესარჩევი მეოთხე კონკურსი, რომლის გაგრძელების უფლება მრჩეველთა საბჭომ ქუთაისის სააპელაციო სასამართლოს გადაწყვეტილების საფუძველზე მიიღო.

“ჟურნალისტები მტრები არ არიან” - ამ გზავნილით უპასუხა ამერიკის შეერთებული შტატების 300-ზე მეტმა გამოცემამ 2018 წლის აგვისტოში პრეზიდენტ დონალდ ტრამპის მხრიდან მედიაზე გახშირებულ თავდასხმებს. გაზეთ “Golden Globe-ის” ინიციატივით, პროტესტის ნიშნად ქვეყნის მასშტაბით დიდმა და მცირე ზომის რედაქციებმა იდენტური შინაარსის სარედაქციო სვეტები დაბეჭდეს, რომელშიც საზოგადოების განვითარებაში მედიის დადებით როლსა და მნიშვნელობაზე საუბრობდნენ.

ჟურნალისტების კორპუსი ერთიანი იყო მაშინაც, როდესაც პრეზიდენტმა ტრამპმა 2018 წლის ივლისში მისთვის არასასიამოვნო კითხვის დასმის გამო, CNN-ის რეპორტიორი კეიტლენ კოლინზი ჯერ პრესკონფერენციის ოთახიდან გააძევა, შემდეგ კი, თეთრი სახლის მიერ ორგანიზაებული ღონისძიებების გაშუქება აუკრძალა. მაშინ თეთრ სახლში მომუშავე ჟურნალისტების მთელმა კორპუსმა, მიუხედავად მათ შორის არსებული დიდი კონკურენციისა, ტრამპის მიერ დაბლოკილი ჟურნალისტისადმი ღია მხარდაჭერა ერთობლივი განცხადებით გამოხატა. CNN-ისადმი სოლიდარობა პირდაპირ ეთერში კონკურენტი არხის Fox News-ის წამყვანმაც დააფიქსირა. კოლეგებისადმი სოლიდარული იყო NBC News-ც.

კრიტიკული კითხვების საპასუხოდ, პოლიტიკოსების მხრიდან ჟურნალისტებზე თავდასხმა, უცხო არც ქართული სინამდვილისთვისაა. ამას მხოლოდ გასული კვირის მოვლენების ანალიზიც ადასტურებს, რომ არაფერი ვთქვათ, უფრო შორეულ გამოცდილებაზე.

უფრო კონკრეტულად, მას შემდეგ, რაც 14 ნოემბერს “ქართულმა ოცნებამ” 2020 წლის საპარლამენტო არჩევნებისთვის პროპორციულ საარჩევნო სისტემაზე გადასვლის შესახებ მის მიერვე ინიცირებული კანონპროექტი ჩააგდო, “ქართული ოცნების” ლიდერებმა ჟურნალისტებთან ურთიერთეობის ხისტი ფორმა აირჩიეს. დეპუტატებმა მათთვის არასასიამოვნო კითხვების პასუხად ჟურნალისტების კონკრეტულ პოლიტიკურ ძალასთან გაიგივება დაიწყეს.

მაგალითად,19 ნოემბერს, საპარლამენტო უმრავლესობის ლიდერმა გია ვოლსკიმ “მთავარი არხის” ჟურნალისტს კითხვის დასმის უფლება არ მისცა და უთხრა: “თქვენ არაფერი მკითხოთ ძაან გთხოვთ, თქვენ არ ხართ ტელევიზია, ეგ არის ხეპრე ადამიანების თავყრილობა, რომლებიც გხელმძღვანელობენ თქვენ და ვერ არჩევენ, რას ნიშნავს მედია და რას ნიშნავს პარტიული ქვედანაყოფი”.



იქამდე კი, დასმული კითხვებით უკმაყოფილო გიორგი ვოლსკიმ ჟურნალისტთა კორპუსი “ნაციონალური მოძრაობის” ქვედანაყოფად” გამოაცხადა.

იმავე დღეს, “ქართული ოცნების” მაჟორიტარმა დეპუტატმა კახა ოქრიაშვილმა ჟურნალისტებისთვის შეურაცხყოფის მისაყენებლად ისეთი სიტყვა გამოიყენა, რომელიც თავისი არსით შეურაცხმყოფელი არ არის, მაგრამ მისი დეპუტატისეული კონტექსტით გამოყენება მიუღებულია და საზოგადოების გარკვეული ჯგუფის დისკრიმინაციას ახდენს: “დებილები ყველგან არიან, ჟურნალისტებშიც ბევრი დებილი მინახავს”, - თქვა მან მედიასთან საუბრისას.




ჟურნალისტებისადმი შეურაცხმყოფელი მიმართვებით, ხელისუფლებას არც ოპოზიცია ჩამორჩა.

18 ნოემბერს პარლამენტის მიმდებარე ტერიტორიაზე აქციის მონაწილეების დაშლისას, ოპერატორებს მიმართა უცენზუროდ “ერთიანი ნაციონალური მოძრაობის” ერთ-ერთმა ლიდერმა გრიგოლ ვაშაძემ: “კამერები იქით მიატრილეთ თქვე ჩემისებო”, - უთხრა მან ოპერატორებს.



ამავე დღეს, ჟურნალისტის კითხვამ გააღიზიანა “ნაციონალური მოძრაობის” კიდევ ერთი ლიდერი ნიკა მელია და მას უთხრა, რომ “იდიოტურ” კითხვას სვამდა.



ჟურნალისტებისადმი არაეთიკური მიმართვის რეკორდი გასულ კვირას, საქართველოს პარლამენტის ყოფილმა თავმჯდომარემ ირაკლი კობახიძემ მოხსნა. 14 ნოემბერს, იგი პირდაპირ ეთერში ჩაერთო ექვს ტელევიზიას: “ტელეკომპანია პირველს”, “აჭარის ტელევიზიას”, “იმედს”, “ფორმულას”, “მაესტროს” და “რუსთავი 2-ს”. აქედან, ორი არხის, “ტელეკომპანია პირველისა” და “აჭარის ტელევიზიის” ჟურნალისტების მიერ დასმულმა კითხვებმა იგი განსაკუთრებულად გააღიზიანა.

მაგალითად, “ტელეკომპანია პირველის” წამყვანის ნინო ჟიჟილაშვილის კითხვებით უკმაყოფილო პარალმენტის ყოფილმა თავმჯდომარემ წამყვანი პირდაპირ “ნაციონალურ მოძრაობასთან” გააიგივა. არასასიამოვნო კითხვების პასუხად, იმავე დღეს “ნაციონალური მოძრაობისგან” გამიჯვნისკენ მოუწოდა “აჭარის ტელევიზიის” წამყვანს თეონა ბაკურიძეს.



იმ დროს, როდესაც დასავლური მედია პოლიტიკოსების მხრიდან გამოვლენილ თავდასხმებს გაერთიანებითა და კოორდინირებული პროტესტით პასუხობს, კოლეგების მიმართ ჩინოვნიკების კრიტიკას უმეტესად დუმილით ხვდებიან საქართველოში.

“მედიაჩეკერი” დაინტერესდა, შესაძლებელია თუ არა ჟურნალისტების ერთიანი პროტესტი პოლიტიკოსების თავდასხმების საპასუხოდ საქართველოშიც ვიხილოთ.

“დღეს ჩვენ გვყავს მძლავრი სახელისუფლებო მედია, რომელთა ჟურნალისტები ვერასდროს გაბედავენ მაგალითად მსგავსი სოლიდარულობის აქციაში მიიღონ მონაწილეობა და არ ჩაწერონ რომელიღაცა რესპონდენტი, რომელიც თავს ესხმის თავისუფალ მედიას. მათ ეს დაუჯდებათ სამსახურის დაკარგვის ტოლფასი. შეიძლება ხელისუფლების გავლენისგან თავისუფალი მედია გაერთიანდეს და მათ მოაწყონ მსგავსი კამპანია”,- ამბობს ტელეკომპანია “მთავარი არხის” საინფორმაციო სამსახურის უფროსი ნოდარ მელაძე და ამატებს, რომ მედიის სოლიდარობა ასეთ დროს არის ძალიან კარგი იდეა.

მსგავს სოლიდარობის კამპანიაზე აქამდე არ უფიქრია, საზოგადოებრივი მაუწყებლის აჭარის ტელევიზიის საინფორმაციო გადაცემის წამყვანს თეონა ბაკურიძეს, რომელიც არაერთხელ გახდა მსგავსი თავდასხმის მსხვერპლი პირდაპირ ეთერში.

“დამოუკიდებელი, მიუკერძოებელი მედია არის ხოლმე სოლიდარული ერთმანეთის მიმართ, მაგრამ ეს ცოტა ფრაგმენტულია. ცოტა რთულია ჩვენს ქვეყანაში ერთიანი კამპანია, იმიტომ რომ ძალიან პოლარიზებულია მედია გარემო და არის მედიები, რომელსაც სულ არა აწუხებს ეს ამბავი”, - ამბობს იგი.

პოლიტიკოსების მხრიდან მედიაზე თავდასხმების დროს კოლეგების სოლიდარობის მნიშვნელობაზე საუბრობს “ტელეკომპანია პირველის” წამყვანი დიანა ტრაპაიძეც, თუმცა იქვე ამბობს, რომ არსებული მედიაპოლარიზაციის პირობებში, რაიმე საერთო საპროტესტო კამპანიის ორგანიზება გართულდება. შესაბამისად, იგი ასეთ დროს ინდივიდუალური პროტესტისა და წინააღმდეგობის ფორმას ამჯობინებს.

მედიაექსპერტი ზვიად ქორიძე საზოგადოებრივი მაუწყებლის აჭარის ტელევიზიის კონლულტატის პოზიციას ტოვებს. ხელშეკრულების შეწყვეტის შესახებ განცხადება მაუწყებლის ახალი დირექტორის, გიორგი კოხრეიძის სახელზე დღეს, 25 ნოემბერს შევიდა. ზვიად ქორიძის თქმით, მისი გადაწყვეტილების მიზეზი გიორგი კოხრეიძის დირექტორად არჩევა გახდა.

“ვიყავი აჭარის ტელევიზიისა და რადიოს კონსულტანტი, ეს შემოთავაზება იყო წინა დირექტორისგან და მაშინ გაფორმდა კონტრაქტი, ნათია კაპანაძის დროს. შემდგომ ნათია ზოიძე იყო დირექტორის მოვალეობის შემსრულებელი, მასაც ჰქონდა სურვილი, რომ ვყოფილიყავი კონსულტანტი. ახლა უკვე ჩემი სურვილია, რომ არ მინდა ამ დირექტორის კონსულტირება. ამიტომ მე ცალმხრივად ვწყვეტ კონტრაქტს და დანარჩენი მასზეა დამოკიდებული”, - ამბობს ზვიად ქორიძე მედიაჩეკერთან საუბრისას.

“ქართული ოცნების” დაკომპლექტებულმა მრჩეველთა საბჭომ საზოგადოებრივი მაუწყებლის აჭარის ტელევიზიისა და რადიოს დირექტორად გიორგი კოხრეიძე 22 ნოემბერს, განმეორებით კენჭისყრაზე აირჩია.

 

• წაიკითხეთ როგორ ხედავს ტელევიზიის მომავალს ახალარჩეული დირექტორი 

ზვიად ქორიძე აჭარის საზოგადოებრივ მაუწყებელში, კონსულტანტად,  2019 წლის იანვარიდან მუშაობდა. ამ დროის განმავლობაში ქორიძე აჭარის მაუწყებლის მართვის მოდელზე/სტრუქტურასა და შიდა სახელმძღვანელო დოკუმენტებზე მუშაობდა.

ზვიად ქორიძე  25 წელზე მეტია, პრაქტიკულ ჟურნალისტიკაშია, არის მრავალი პუბლიკაციის და გადაცემის ავტორი.  სხვადასხვა პერიოდში მუშაობდა ტელეკომპანია „რუსთავი 2-ის“, „ტელეიმედის“, ტელეკომპანია „მზეს“, „პირველი არხის“ ახალი ამბების რედაქციებში.  ასევე იყო სხვადასხვა გამოცემების რედაქტორი და კონსულტანტი.

2011 – 2013 წლებში საქართველოს ჟურნალისტური ეთიკის ქარტიის საბჭოს ხელმძღვანელობდა. ზვიად ქორიძე არის თანაავტორი „მაუწყებლობის შესახებ“ საქართველოს კანონში შეტანილი ცვლილებების, რომლის საფუძველზე სსიპ „საზოგადოებრივი მაუწყებლის აჭარის ტელევიზია და რადიო“ შეიქმნა.  

საზოგადოებრივი მაუწყებლის აჭარის ტელევიზიისა და რადიოს დირექტორად, მრჩეველთა საბჭომ, გიორგი კოხრეიძე აირჩია. კოხრეიძემ პირველ კენჭისყრაზე საბჭოს ოთხი წევრიდან ორის ხმა მიიღო, რამდენიმე წუთში გამართულ განმეორებით კენჭისყრაზე კი სამი ხმა და გამარჯვებული გახდა.

სწორედ მისი სარჩელის საფუძველზე შეჩერდა დირექტორის შესარჩევი მეოთხე კონკურსი, რომლის გაგრძელების უფლება მრჩეველთა საბჭომ ქუთაისის სააპელაციო სასამართლოს გადაწყვეტილების საფუძველზე მიიღო.

გიორგი კოხრეიძე მაუწყებლის დირექტორის შესარჩევად მიღებულ კონკურსში ოთხივეჯერ მონაწილეობდა. პირველ ორ მცდელობაზე მას საბჭოს არცერთი წევრის ხმა არ მიუღია, მესამე კონკურსზე კი (რომლის კენჭისყრა 22 აგვისტოს გაიმართა) 2 ხმა მიიღო. მესამე კონკურსს საბჭოს 5 წევრიდან 4 ესწრებოდა და ამათგან ერთმა, ბეჟან გობაძემ კენჭისყრაში მონაწილეობაზე უარი თქვა. კოხრეიძე ამბობდა, რომ რადგან ბეჟან გობაძე კენჭისყრაში არ მონაწილეობდა, ის ოთახში დამსწრის სტატუსით იმყოფებოდა, დანარჩენი სამი წევრიდან კი მას ორის, ანუ, უმრავლესობის ხმა ჰქონდა და ამიტომ, დირექტორად ის უნდა გამოეცხადებინათ.

გიორგი კოხრეიძე - საზოგადოებრივი მაუწყებლის სამეურვეო საბჭოს წევრი იყო. ამ პოზიციაზე ის სწორედ აჭარის უმაღლესი საბჭოს კვოტით იყო წარდგენილი; კოხრეიძე 2005 წლიდან იყო ტელეკომპანია 202-ს თამფუძნებელი და დირექტორი.  ასევე არის რამდენიმე არასამთავრობო ორგანიზაციის დამფუძნებელი, რომლები შშმპ პირების უფლებების თემებზე მუშაობდა. კოხრეიძე ასევე იყო საქართველოს მე-5 მოწვევის პარლამენტის წევრი

აჭარის ტელევიზიის ახალარჩეული დირექტორი ფიქრობს, რომ მაუწყებლის თანამშრომლებმა მოთმენა უნდა ისწავლონ. ამის შესახებ მან დღეს, არჩევამდე რამდენიმე საათით ადრე, მრჩეველთა საბჭოსთან გასაუბრებისას რამდენჯერმე, სხვადასხვა კონტექსში განაცხადა.

“რატომ არის, რომ დღევანდელ დღეს ჩვენ გვესმის ყურში, თავდაცვის მიზნით ხდება ეს თუ რის ხდება არ ვიცი, ვიღაცა, რომელიღაცა რესპონდენტი შემოეკამათა წამყვანს. ეს პრობლემა ძალიან მარტივად გვარდება და ამას აქვს მიზეზი, რატომაც მოხდა ეს ყველაფერი. ჩვენ მსგავსი გვინახავს სხვაგანაც, მაგრამ არ მისულა ეს ყველაფერი იმ ბოლო კონფლიქტამდე, რომელმაც გარკვეული უკმაყოფილება გამოიწვია. ამისთვის არის საჭირო ის, რომ გააცნობიეროს ტელევიზიის ყველა თანამშრომელმა, რომ ის ყოველთვის არის მიმტანი, ყოველთვის არის მიმტანი გარკვეული ინფორმაციის”, - თქვა მან მისი პრეზენტაციის ნაწილში.

ასევე განაცხადა, რომ როდესაც კრიტიკულობაზე ვსაუბრობთ, “რა თქმა უნდა ტელევიზია უნდა იყოს კრიტიკული, მაგრამ ეს თუ დადის თანამშრომლის დონზე, იქ უკვე მის განწყობაზე ვართ დამოკიდებული, იმან როგორ გაიღვიძა დილას და ძალიან ბევრ მომენტზე ვართ და, აი, ეს თუ არ იქნა გარკვეულწილად დაბალანსებული, ყოველთვის მოხდება მსგავსი რაღაცეები, რაც არ უნდა მოხდეს”.

ბორდის ერთ-ერთი წევრის თამარ წილოსანის კითხვაზე, როგორ უზრუნველყოფს სარედაქციო დამოუკიდებლობას, გიორგი კოხრეიძემ განაცხადა, რომ ამისთვის ერთადერთი რამ არის საჭირო, “დაიცვან თანამშრომლები ზეწოლისგან, შენ ამაში არ უნდა ჩაერიო. უნდა დაიცვა ყველაფრისგან, მაგის გარანტიას, ჩემი ცხოვრებიდან გამომდინარე, თუ გადახედავთ, არასოდეს, არასოდეს, არ მითქვამს ბრძოლაზე უარი, არასოდეს არ დამითმია იქ, სადაც ვყოფილვარ მართალი”.

ამავე თემაზე საუბრისას მან თქვა, რომ ჟურნალისტებმა უნდა ისწავლონ როგორ არ შევიდნენ კონფლიქტში რესპონდენტთან: “მე გადავეფარები თითოეულ მათგანს, მაგერამ ვასწავლი მას როგორ არ შევიდეს კონფლიქტში, ვასწავლი როგორ გაიმარჯვოს კონფლიქტში არშესვლით სიტუაციაზე…. ცხოვრებამ მასწავლა მუშტის და ძალის გარეშე როგორ შეიძლება გაიმარჯვო და ზუსტად ეს უნდა ასწავლო. ჟურნალისტი, როდესაც რესპონდენტი უზის და აღიზიანებს, მას შეიძლება ბევრის მოთმენა მოუწიოს ძალიან, ძალიან ბევრის მოთმენა, ეს მოთმენა უნდა ასწავლო”.

რაც შეეხება მაუწყებელთან დაკავშირებულ გეგმებს, კოხრეიძემ პირობა დადო, რომ სამი წლის შემდეგ “მინიმუმ, მინიმუმ, შენობის საკითხი გადაწყვეტილი იქნება, შეიძლება უკვე გადასულიც იყოს იმ პერიოდში”.

ასევე მან თქვა, რომ სამ წელიწადში მინიმუმ ორჯერ გაიზრდება მაყურებლის რიცხვი და დააზუსტა, რომ ამაში წვდომას გულისხმობს: “ეგეც ცოტაა, მაგრამ ვთქვათ რომ ორჯერ, მაგრამ მეტი იქნება რა, დარწმუნებული ვარ. წვდომა, წვდომაზე ვსაუბრობ, იმდენი საშუალებებია ჩადებული ელექტრონულ მედიაში, იმას თუ გამოვიყენებთ, წვდომა შეიძლება ძალიან მაღლა წავიდეს. რაც გააკეთა პირველმა არხმა და დღეს მიაღწია, რომ არის პირველ ადგილზე”.

გიორგი კოხრეიძემ ისაუბრა მაუწყებლის ბიუჯეტზეც და განაცხადა: “რაც ვიცი, რაც წარმოდგენა მაქვს, ერთი თეთრი არ არის განვითარებისთვის და სხვა საშუალებები უნდა ეძებო, პირველ რიგში, პირველ წელიწადს, ამ წელიწადს, ჩვენ მაქსიმალურად უნდა ვეცადოთ რომ მოვამზადოთ პერიოდი იმისათვის თუ მოვიზიდავთ რაღაც თანხას, თუ მოვიზიდავთ, მოვიზიდავთ. მე ძლიან დიდი იმედი მაქვს გრანტების. არ მინდოდა ამაზე საუბარი, მაგრამ მაინც მომიწევს, წინა დირექტორი აკეთებდა ისეთ რაღაცას, რომელიც ალბათ მომიწევს გაგზავნა აუდიტთან, კითხვის დასმა, თუ ეს პროცესი არის სწორი, მაშინ გამოდის რომ ძალიან დიდი საშუალება გაჩნდება დონორების მოზიდვის. თუ არ არის, მაშინ მომიწევს სხვანაირად კეთება”.

ასევე ახსენა, რომ აპირებს გაიცნოს ადამიანები აჭარის უმაღლეს საბჭოსა და მთავრობაში ერთობლივი ინიციატივებისთვის. თუმცა, რას გულისხმობდა, არ დაუკონკრეტებია და კითხვა არც ბორდის წევრებს შეუბრუნებიათ.

ტელეკომპანია “მთავარი არხის” ერთ-ერთ მეწილეს, გიორგი რურუას, მოსამართლე რომან ხორავამ აღკვეთის ღონისძიების სახით პატიმრობა შეუფარდა.

გიორგი რურუა, რომელიც 18 ნოემბერს, იარაღის უკანონო შეძენა-შენახვა-ტარების ბრალდებით დააკავეს, ბრალს არ აღიარებს. სასამართლო პროცესზე მან განაცხადა, რომ ის იარაღი, რომლის ტარებასაც ედავებიან, თვალით არ უნახავს, ასევე, თქვამ, რომ დნმ-ის ანალიზი მისი ნების საწინააღმდეგოდ აუღეს.

გიორგი რურუა პოლიციამ სსკ-ის 236-ე მუხლის მე-3 და მე-4 ნაწილებით გათვალისწინებული დანაშაულისთვის დააკავა, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.

გიორგი რურუა ტელეკომპანია "ფორმულას" 2.5%-იანი წილის მფლობელია.

საქართველოს მთავრობის ადმინისტრაციის ცნობით, კომუნიკაციების ეროვნული კომისიის წევრის ერთი ვაკანტური თანამდებობის დაკავების მიზნით გამოცხადებულ კონკურსში მონაწილეობის სურვილი ოთხმა პირმა გამოთქვა. მათგან, ერთი კომისიის მოქმედი თავმჯდომარე კახი ბექაური, ორი კი კომისიის თანამშრომელია.

წევრობის მსურველები არიან:

• კახი ბექაური
• მაია მეცხვარიშვილი
• ივანე მახარაძე
• მარიამ სულაბერიძე

საქართველოს კანონმდებლობით დადგენილი მოთხოვნების თანახმად, საქართველოს კომუნიკაციების ეროვნული კომისიის წევრობის კანდიდატი უნდა იყოს საზოგადოებრივი აღიარებისა და ნდობის მქონე პირი, რომელსაც აქვს ეკონომიკის, საჯარო ადმინისტრირების, ბიზნესადმინისტრირების, სამართლის, ელექტრონული კომუნიკაციების ან ჟურნალისტიკის მაგისტრის ან მასთან გათანაბრებული აკადემიური ხარისხი და არანაკლებ 10 წლის მუშაობის გამოცდილება, მათ შორის, 3 წლისა - მმართველ თანამდებობაზე.

საქართველოს კომუნიკაციების ეროვნული კომისიის წევრის ერთი ვაკანტურ პოზიციაზე კონკურსი 17 ოქტომბერს გამოცხადდა. საბუთების მიღების ვადა 15 ნოემბერს ამოიწურა, კანდიდტთა სია კი საქართველოს მთავრობის ვებგვერდზე დღეს გამოქვეყნდა.

როგორც კომუნიკაციების კომისიის ვებგვერდზე ვკითხულობთ,

• კანდიდატთა სიის გამოქვეყნების შემდეგ საქართველოს მთავრობა, დადგენილი საკვალიფიკაციო მოთხოვნების გათვალისწინებით, საქართველოს პრეზიდენტს წარუდგენს საქართველოს პარლამენტისათვის ასარჩევად წარსადგენი კანდიდატურების სიას. 1 ვაკანტურ თანამდებობაზე არანაკლებ 3 კანდიდატურა შეირჩევა;
• საქართველოს მთავრობის მიერ საქართველოს პრეზიდენტისათვის წარდგენილი კანდიდატურების სიას საქართველოს პრეზიდენტი 3 დღის ვადაში გადასცემს საქართველოს პრემიერ-მინისტრს თანახელმოწერისათვის;
• პრემიერ-მინისტრისგან თანახელმოწერის მიღების შემდეგ საქართველოს პრეზიდენტი კანდიდატურებს ასარჩევად წარუდგენს საქართველოს პარლამენტს;
• წარდგენილი კანდიდატი არჩეულად ჩაითვლება თუ იგი მიიღებს სხვა კანდიდატებზე მეტ ხმას, მაგრამ არანაკლებ საქართველოს პარლამენტის სიითი შემადგენლობის ნახევრის ხმებისა.

საქართველოს კომუნიკაციების ეროვნული კომისია მაუწყებლობისა და ელექტრონული კომუნიკაციების სფეროს მარეგულირებელი ორგანოა, რომელმაც საქმიანობა 2000 წლის 1 ივლისს დაიწყო. კომისია ექვსი წლის ვადით არჩეული ხუთი წევრისგან შედგება.

საზოგადოებრივი მაუწყებლის აჭარის ტელევიზიისა და რადიოს დირექტორის თანამდებობის დასაკავებლად 10 განმცხადებელი დარეგისტრირდა. მათ შორის 6 ისეთი კანდიდატია, რომლებიც წინა კონკურსებშიც მონაწილოებდნენ, ოთხი კი ახალი. ამ ოთხ კანდიდატს შორის არიან მაუწყებლის თანამშრომლები, მათ შორის ნათია ზოიძე, რომელიც ამჟამად ასრულებს დირექტორის მოვალეობას.

დირექტორობის მსურველთა სია ასეთია:

• დავით ჩხარტიშვილი - ბათუმის მერიის მუნიციპალური სერვისების სააგენტოს თანამშრომელი.
• ფირუზ ბოლქვაძე - აჭარის ტელევიზიისა და რადიოს ჟურნალისტი;
  
• შოთა ზოიძე - ფილოლოგიის მეცნიერებათა დოქტორი. 2012 წლის საპარლამენტო არჩევნებში იყო "ქართული ოცნების" მაჟორიტარობის კანდიდატი შუახევში;
• გიორგი კოხრეიძე - იყო საზოგადოებრივი მაუწყებლის სამეურვეო საბჭოს წევრი. ამ პოზიციაზე ის სწორედ აჭარის უმაღლესი საბჭოს კვოტით იყო წარდგენილი;
  
• შოთა  გუჯაბიძე - საზოგადოება "ბათომის" დამფუძნებელი, მაუწყებლის თანამშრომელი;
• ნათია ზოიძე -  ამჟამად იგი ასრულებს აჭარის ტელევიზიისა და რადიოს დირექტორის მოვალეობას, რადგანაც ნათია კაპანაძისთვის უნდობლობის გამოცხადებმდე ცოტა ხნით ადრე სწორედ ის დაინიშნა დირექტორის მოადგილედ. მანამდე ნათია ზოიძე "საერთაშორისო გამჭვირვალობა - საქართველოს" ბათუმის ოფისში მუშაობდა
• ნათია შავაძე - საზოგადოებრივი მაუწყებლის აჭარის ტელევიზიის ახალი ამბების პროდიუსერი;
• მაია მერკვილაძე - საზოგადოებრივი მაუწყებლის აჭარის ტელევიზიის ახალი ამბების სამსახურის უფროსის მოადგილე;
• ლაშა ზარგინავა  -  საზოგადოებრივი მაუწყებლის აჭარის ტელევიზიის  ტოქშოუს "მთავარი აჭარაში" წამყვანი;
• შოთა (ბაჩო) გურაბანიძე -  საზოგადოებრივი მაუწყებლის აჭარის ტელევიზიის გადაცემა "დილის ტალღის" ხელმძღვანელი;

მრჩეველთა საბჭოს ერთ-ერთი წევრის, სოსო სტურუას თქმით, რადგან ათიდან ექვსი კანდიდატი კონკურსებში ადრეც მონაწილეობდა და მათი ბიოგრაფიები მათთვის ცნობილია, განაცხადების გადარჩევა და შესაბამისად, დირექტორის არჩევა დროში არ გაჭიანურდება. 

"ხვალ დღის პირველ ნახევარში უკვე გვეცოდინება იმ კანდიდატთა სია, რომელთაც მოვიწვევთ გასაუბრებაზე", - განაცხადა  სოსო სტურუამ აჭარის მაუწყებელთან.

მაუწყებლის ახალი დირექტორი მრჩეველთა საბჭომ უნდა შეარჩიოს, რომელიც ამ ეტაპზე 4 წევრისგან შედგება.  

• ამ თემაზე წაიკითხეთ: 5-დან 3 ხმა ხელისუფლებას - ხარვეზები და კითხვები აჭარის ტელევიზიის ბორდის დაკომპლექტებაში

შეგახსენებთ, ეს აჭარის ტელევიზიის დირექტორის შესარჩევად გამოცხადებული მეოთხე კონკურსია. ბოლო 7 თვის განმავლობაში, აპრილიდან დღემდე, დირექტორის შესარჩევი კონკურსი სამჯერ ჩავარდა. მეოთხე კონკურსი კი საბუთების მიღების დასრულებამდე ორი დღით ადრე, წინა კონკურსში მონაწილე ერთ-ერთი კანდიდატის, გიორგი კოხრეიძის სარჩელის საფუძველზე, სასამართლომ შეაჩერა. კონკურსი ორი დღის წინ, 18 ნოემბერს, ქუთაისის სააპელაციო სასამართლოს გადაწყვეტილებით გაგრძელდა.

• ამ თემაზე: 'ოცნების' დაკომპლექტებული ბორდი რამდენიმე დღეში აჭარის ტელევიზიის ახალ დირექტორს აირჩევს

 

აჭარის ტელევიზიისა და რადიოს დირექტორის თანამდებობის დასაკავებლად კონკურსი მას შემდეგ გამოცხადდა რაც მრჩეველთა საბჭომ ყოფილი დირექტორი ნათია კაპანაძე იმპიჩმენტის წესით გადაირჩია. ამ დრომდე მაუწყებელს დირექტორის მოადგილე ნათია ზოიძე მართავს.

მაუწყებლის თანამშრომელთა ნაწილი შიშობს, რომ მრჩეველთა საბჭო, რომელიც უკვე ახალი წევრებისგან შედგება, ხელისუფლებისადმი ლოიალურად განწყობილ კანდიდატს აირჩევს. ამის შესახებ მათ არაერთხელ ღიადაც განაცხადეს.

• ამ თემაზე: აჭარის ტელევიზიის ჟურნალისტები საერთაშორისო ორგანიზაციების ყურადღებას ითხოვენ

ამ შიშებს იზიარებს საქართველოს ჟურნალისტური ეთიკის ქარტიაც.

“ბოლო დღეებში განვითარებულმა მოვლენებმა გაგვიმძაფრა ეჭვი, რომ ტელევიზიის ახალი მრჩეველთა საბჭო, რომლის უმრავლესობაც სრულად "ქართული ოცნების" ხელისუფლების მხარდაჭერითაა დამტკიცებული, აირჩევს ისეთ ახალ დირექტორს, რომელიც ხელისუფლების ინტერესს გაატარებს და მმართველი ძალისთვის ლოიალურ სარედაქციო პოლიტიკას განახორციელებს”, - ვკითხულობთ განცხადებაში, რომელიც დღეს, 20 ნოემბერს, ქარტიის საბჭოს სახელით გავრცელდა.

ამ განცხადებაში ნათქვამია, რომ “სასიცოცხლოდ მნიშვნელოვანია, აჭარის საზოგადოებრივმა მაუწყებელმა შეინარჩუნოს დღეს არსებული კრიტიკული, ხელისუფლების გავლენისგან დამოუკიდებელი სარედაქციო პოლიტიკა”.

ასევე, განცხადებაში ხაზგასმითაა აღნიშნული, რომ აუცილებელია ახალმა დირექტორმა არ განახორციელოს იქ მომუშავე პროფესიონალი, გავლენებისგან თავისუფალი ჟურნალისტების დევნა ან შეზღუდვა: “ უფრო მეტიც, საპარლამენტო არჩევნებამდე დარჩენილ ერთ წელზე ნაკლებ დროში მნიშვნელოვანია აჭარის საზოგადოებრივი მაუწყებლის სარედაქციო პოლიტიკა გახდეს უფრო სიღრმისეული, კრიტიკულად მოდარაჯე ხელისუფლების ყველა შტოს მიმართ”.

აჭარის ტელევიზიაში მიმდინარე მოვლენების შესახებ დღეს გავრელდა მედიაკოალიციის განცხადებაც. 

"კოალიცია მედიის ადვოკატირებისთვის მიიჩნევს, რომ აჭარის საზოგადოებრივი მაუწყებლის გარშემო ბოლო პერიოდში განვითარებული მოვლენები, მათ შორის აჭარის უმაღლესი საბჭოს მიერ მრჩეველთა საბჭოს წევრების შერჩევა და შემდგომში განვითარებული მოვლენები ტოვებს ვარაუდის საფუძველს, რომ ეს პროცესი მართულია ხელისუფლების მიერ", - ვკითხულობთ განცხადებაში.

მედიაკოალიციას  კრიტიკულად მნიშვნელოვნად მიაჩნია დირექტორად შერჩეული იქნეს ისეთი პირი, რომლის დირექტორობის პერიოდში უზრუნველყოფილი იქნება ჟურნალისტთა სარედაქციო დამოუკიდებლობა.

გიორგი თარგამაძის შემდეგ, ტელეკომპანია “ფორმულა” მაყურებელს კიდევ ერთი ძველი ტელესახის, დავით კიკალიშვილის გადაცემებს შესთავაზებს. "ფორმულა ევროპიდან" - ასე ერქმევა ახალ გადაცემას, რომელსაც კიკალიშვილი გაუძღვება.

როგორც ტელეკომპანია “ფორმულას” დირექტორი ზუკა გუმბარიძე “მედიაჩეკერთან” განმარტავს, გადაცემის სტუდიური ჩანაწერები გაკეთდება ავსტრიაში, სადაც დავით კიკალიშვილი ცხოვრობს.

მისივე განმარტებით, გადაცემა ძირითადად ევროპისა და ამერიკის შეერთებული შტატების თემებს შეეხება: “ცხადია იქნება საქართველოსთან კორალაციაში და კავშირში მყოფი საკითხების განხილვაც”.

ზუკა გუმბარიძე ამბობს, რომ მოლაპარაკებები სხვადასხვა ქვეყნის ფრილანსერ ჟურნალისტებთანაც მიმდინარებს. Როდის გავა გადაცემა ეთერში, ამ ეტაპზე ზუსტად განსაზღვრული არ არის. Ზუკა გუმბარიძე ამბობს, რომ "ფორმულა ევროპიდან" სავარაუდოდ იქნება შაბათს ან კვირას, საღამოს, პრაიმ-ტაიმში. ჯერჯერობით ასევე უცნობია, მოესწრება თუ არა გადაცემის დაწყება მიმდინარე წელს.

დავით კიკალიშვილი 20 წლის განმავლობაში "რუსთავი 2-ზე" გადაცემა "პოსტ სკრიპტუმის" წამყვანი იყო. არხი მან 2016 წელს დატოვა და საცხოვრებლად ავსტრიაში გადავიდა.

შეგახსენებთ, ტელეკომპანია "ფორმულას" ეთერით დაუბრუნდა ჟურნალისტიკას კიდევ ერთი ყოფილი ტელეწამყვანი გიორგი თარგამაძე.  მას არხზე ყოველდღიური ტოქშოუ "გიორგი თარგამაძის ფორმულა" მიჰყავს.

საერთაშორისო რესპუბლიკური ინსტიტუტის (IRI) მიერ 18 ნოემბერს გამოქვეყნებული საზოგადოებრივი აზრის კვლევის შედეგების მიხედვით, ქართულ მედიას გამოკითხული მოსახლეობის 72% ენდობა და ინსტიტუტებს შორის ნდობის მიხედვით, ჯარისა და ეკლესიის შემდეგ, მესამე ადგილს იკავებს. ამავე ორგანიზაციის მიერ ივნისში გამოქვეყნებული მონაცემების მიხედვით, ეს მაჩვენებელი 2 პროცენტული პუნქტით არის გაზრდილი.

კვლევის შედეგების მიხედვით, 83%-ით ინფორმაციის მიღების მთავარ წყაროდ კვლავ ქართული ტელევიზიები რჩება, 21%-ით მას სოციალური მედია, 10%-ით ინტერნეტსააგენტოები, 5-5%-ით კი რუსული ტელეარხები და ქართული ბეჭდვური მედია მოსდევს. ინფორმაციას ქართული რადიოსადგურებიდან გამოკითხულების მხოლოდ 3% იღებს, დასავლურ ტელევიზიებიდან კი - 2%. კვლევის თანახმად, გამოკითხულების ყველაზე მეტი რაოდენობა - 39% ტელეკომპანია „იმედს“ ენდობა, 18% „მთავარ არხს“, 13% „რუსთავი 2“-ს, 6% „ტელეკომპანია პირველს“ „საზოგადოებრივ მაუწყებელს“ კი - მხოლოდ 2%.

აღსანიშნავია, რომ ტელეკომპანია „იმედი“ ყველაზე ხშირად ყურებადი ტოქშოუების კუთხითაც ლიდერობს. რესპონდენტების 25% ამბობს, რომ ყველაზე ხშირად ტოქშოუ „პირისპირს“ უყურებს, 12% „ტელეკომპანია პირველის“ გადაცემა „რეაქციას“, 6% „მთავარი „არხის“ „ღამის მთავარს“, 1% კი - „ტელეკომპანია პირველის“ ტოქშოუ „პირველებს“.

კვლევის ფარგლებში, კითხვა ტელეკომპანია „რუსთავი 2-ის“ მფლობელების შესახებ მისი სარედაქციო პოლიტიკის ცვლილების შესახებაც იყო დასმული. გამოკითხულების 40% მიიჩნევს, რომ ტელეკომპანია „რუსთავი 2“-ის მფლობელების შემდეგ, არხის სარედაქციო პოლიტიკა შეიცვალა, 31%-ის მოსაზრებით ნაწილობრივ შეიცვალა, 7% მიიჩნევს, რომ თითქმის არ შეცვლილა, 5%-ის მოსაზრებით კი - საერთოდ არ შეცვლილა.

კვლევის ავტორებმა რესპონდენტებს კითხვა საქართველოში მედიის თავისუფლების კუთხით არსებული მდგომარეობის შესახებაც დაუსვეს. აღმოჩნდა, რომ მედიას სრულად თავისუფლად გამოკითხულების მხოლოდ 16% მიიჩნევს, 43% ფიქრობს, რომ ის ნაწილობრივ თავისუფალია, 21%-ის მოსაზრებით ის არც თუ ისე თავისუფალია, 8% ამბობს, რომ თავისუფალი არ არის, 12%-ს კი - კითხვაზე პასუხი არ აქვს ან უარს ამბობს პასუხზე.

მათგან, ვინც ამბობს, რომ მედია თავისუფალი არ არის, კითხვაზე: „რატომ არ არის გამოხატული ქართულ მედია განსხვავებული პოლიტიკური შეხედულებების გამოხატვაში თავისუფალი?“ – 67% პასუხობს, რომ მედია ხელისუფლების წნეხის ქვეშაა, 13% ამის მიზეზად მედიაში არსებულ კორუფციას ასახელებს.

კვლევა ინტერნეტის მოხმარების სიხშირის შესახებ კითხვასაც მოიცავდა. რესპონდენტების 56% ამბობს, რომ ინტერნეტთან წვდომა ყოველდღიურად აქვს, 31% ამბობს, რომ არასდროს, 4% ინტერნეტს კვირაში 4-6-ჯერ მაინც მოიხმარს, 6% კი - 1-3-ჯერ.

საზოგადოებრივი აზრის კვლევა, 11 სექტემბრიდან 14 ოქტომბრამდე პერიოდში, საერთაშორისო რესპუბლიკური ინსტიტუტის დაკვეთით, ბალტიის კვლევების/გელაპმა (The Gallup) ჩაატარა. კვლევის ფარგლებში, საქართველოს მასშტაბით, საარჩევნო უფლების მქონე 1 500 ადამიანი გამოიკითხა. კვლევის ავტორების განმარტებით, შედეგების საშუალო ცდომილების ზღვარი +/- 2.5%-ია.

ხვალიდან, 18 ნოემბრიდან, აჭარის ტელევიზიისა და რადიოს დირექტორის პოზიციაზე კონკურსი განახლდება. ქუთაისის სააპელაციო სასამართლომ დააკმაყოფილა მაუწყებლის კერძო საჩივარი და ბათუმის საქალაქო სასამართლოს  განჩინება, რომლითაც მეოთხე კონკურსი შეჩერებული იყო, გააუქმა. მაუწყებლის თანამშრომელთა ნაწილი შიშობს, რომ მათი ვარაუდი ხელისუფლებისადმი ლოიალურად განწყობილი დირექტორის შერჩევაზე, მართლდება. ამ ვარაუდის საფუძველს კი მათ საეჭვო სასამართლო პროცესები და “ქართული ოცნების” დაკომპლექტებული მრჩეველთა საბჭო აძლევს, - ბორდის 4 წევრიდან სამი “ქართული ოცნების” კვოტითაა არჩეული, მეოთხე, თამარ წილოსანი, რომელიც საბჭოში დამოუკიდებელი დეპუტატების კვოტით მოხვდა,  არჩევისას აჭარის უმაღლესი საბჭოს თანამშრომელი იყო. 

აჭარის ტელევიზიის მრჩეველთა საბჭოს თავმჯდომარის გიგა ჩხარტიშვილის განცხადებით, მაუწყებლის დირექტორის შესარჩევ კონკურსში საბუთების მიღება ხვალ 10:00 საათიდან დაიწყება და 20 ნოემბრის 18:00 საათზე დასრულდება. კონკურსზე საბუთების მიღება ზუსტად იმ ვადით გაგრძელდება, რა ვადაც იყო დარჩენილი მეოთხე კონკურსზე - ანუ, ორი დღით.

 

განჩინება, რომლითაც დაკმაყოფილდა “საზოგადოებრივი მაუწყებლის აჭარის ტელევიზიისა და რადიოს” კერძო საჩივარი ქუთაისის სააპელაციო სასამართლომ დღეს, 18 ნოემბერს გამოიტანა.  ამ განჩინების მიხედვით, გაუქმდა ბათუმის საქალაქო სასამართლოს 23 სექტემბრის გადაწყვეტილება, რომლის მიხედვითაც დირექტორის შესარჩევი კონკურსი შეჩერებული იყო. ბათუმის საქალაქო სასამართლოს, დირექტორობის ერთ-ერთმა მსურველმა, გიორგი კოხრეიძემ, 18 სექტემბერს, მეოთხე კონკურსის დასრულებამდე ორი დღით ადრე მიმართა. იგი ამბობდა, რომ მესამე კონკურსის გამარჯვებულია და დირექტორად მის გამოცხადებას ითხოვდა.

გიორგი კოხრეიძე მაუწყებლის დირექტორის შესარჩევად მიღებულ კონკურსში სამივეჯერ მონაწილეობდა. პირველ ორ მცდელობაზე მას საბჭოს არცერთი წევრის ხმა არ მიუღია, მესამე კონკურსზე კი (რომლის კენჭისყრა 22 აგვისტოს გაიმართა) 2 ხმა მიიღო. მესამე კონკურსს საბჭოს 5 წევრიდან 4 ესწრებოდა და ამათგან ერთმა, ბეჟან გობაძემ კენჭისყრაში მონაწილეობაზე უარი თქვა. კოხრეიძე ამბობდა, რომ რადგან ბეჟან გობაძე კენჭისყრაში არ მონაწილეობდა, ის ოთახში დამსწრის სტატუსით იმყოფებოდა, დანარჩენი სამი წევრიდან კი მას ორის, ანუ, უმრავლესობის ხმა ჰქონდა და ამიტომ, დირექტორად ის უნდა გამოეცხადებინათ.

ქუთაისის სააპელაციო სასამართლოს განჩინებაში ვკითხულობთ, რომ “საზოგადოებრივი მაუწყებლის აჭარის ტელევიზიის და რადიოს მრჩეველთა საბჭოს წევრი – ბეჟან გობაძე ესწრებოდა მოსარჩელე გიორგი კოხრეიძის გასაუბრებას და ის წარმოადგენდა არა საჯაროობის პრინციპიდან გამომდინარე კონკურსის ჩასატარებელ ოთახში უბრალო დამსწრე, დაინტერესებულ პირს, როგორც ამას მოსარჩელე მიიჩნევს, არამედ იგი, როგორც მრჩეველთა საბჭოს წევრი, აქტიურად იყო ჩართული მასთან გასაუბრების პროცესში, რაც ნათლად არის ასახული ვიდეო ჩანაწერში და აბსოლიტურ თანხვედრაშია კერძო საჩივრის ავტორის მიერ გადმოცემულ განმარტებასთან”.

ამავე განჩინების მიხედვით, როგორ უნდა შეფასდეს ბეჟან გობაძის მხრიდან კენჭისყრაში მონაწილოების არმიღება, ეს სასამართლოს არსებითი განხილვის ეტაპზე უნდა შეფასდეს.

კონკურსში მონაწილეთა განაცხადების მიღების დასრულებიდან, მრჩეველთა საბჭოს, ახალი დირექტორის შესარჩევად 10-დღიანი ვადა აქვს. როგორც მრჩეველთა საბჭოს თავმჯდომარე “მედიაჩეკერთან” განმარტავს, ამ ეტაპზე არ არის ცნობილი, დირექტორის შესარჩევად კენჭისყრა როდის გაიმართება: “ეს იმაზეა დამოკიდებული, რამდენი განაცხადი შემოვა, საბუთების გადარჩევას, პრეტენდენტების კვალიფიკაციის დადგენას რა დრო დასჭირდება. თუ ბევრი განაცხადი არ იქნება, მალევე დაინიშნება სხდომა და მალევე იქნება კენჭისყრა”.

ამ ეტაპზე ცნობილია, რომ აჭარის ტელევიზიისა და რადიოს მრჩეველთა საბჭოს რიგგარეშე სხდომა 21 ნოემბერს, 14:00 საათზეა ჩაინიშნული.

მართალია, კონკურსზე განაცხადების მიღება ჯერ კიდევ მრჩეველთა საბჭოს ძველი შემადგენლობის დროს დაიწყო, მაგრამ ახალ დირექტორს უკვე ახალი ბორდი შეარჩევს. მრჩეველთა საბჭოში ამ ეტაპზე 4 წევრია, ოთხი წევრიდან სამი - სოსო სტურუა, თამილა დოლიძე და გიგა ჩხარტიშვილი ''ქართული ოცნების'' კვოტით, ხოლო ერთი თამარ წილოსანი კი დამოუკიდებელი დეპუტატების კვოტით არის შესული. წილოსანი, ამავე დროს,  არჩევისას უმაღლესი საბჭოს მოქმედი თანამშრომელი იყო, -  ადამიანის უფლებათა დაცვის  კომიტეტის თავმჯდომარის თანაშემწე.

საბჭოს თავმჯდომარე გიგა ჩხარტიშვილია. იგი ერთ-ერთი საბჭოს იმ ორ წევრს შორის, რომლებმაც მიმდინარე წლის 10 აპრილს იმდროინდელ ბორდს ყოფილი დირექტორის ნათია კაპანაძის იმპიჩმენტის მოთხოვნით მიმართეს. მას შემდეგ მაუწყებელს დირექტორი არ ჰყავს და ამ მოვალეობას დირექტორის მოადგილე ნათია ზოიძე ასრულებს.

მრჩეველთა საბჭოს ამ ეტაპზე არ ჰყავს მეხუთე წევრი, მის შესარჩევად  აჭარის უმაღლესმა საბჭომ განმეორებითი კონკურსი უკვე გამოაცხადა. ამ კვოტით კანდიდატი "ერთიანმა ნაციონალურმა მოძრაობამ" უნდა წარადგინოს, რომელმაც წინა კონკურსზე კანდიდატის წარდგენაზე უარი თქვა იმ მოტივით, რომ მათ არ მიეცათ შესაძლებლობა კანდიდატებს გასაუბრებოდნენ.

 

რითი მყარდება მაუწყებლის თანამშრომელთა ნაწილის შიშები

 

ბორდის ამგვარი შემადგენლობა მთავარი საფრთხეა მაუწყებლის ჟურნალისტების ნაწილისთვის, რომელთაც პროტესტი ღია ეთერში არაერთხელ გამოხატეს. ისინი ფიქრობენ, რომ "ოცნებისგან" შერჩეული მრჩევლები ხელისუფლებისთვის სასურველ დირექტორს შეარჩევენ.  პროცესებში ხელისუფლების ფარულ მონაწილეობაზე ეჭვს სასამართლოს გადაწყვეტილებებიც აჩენს. 

ეს ყველაფერი ცხადად ჩანს ქრონოლოგიაშიც,  -   დირექტორობის პრეტენდეტმა, გიორგი კოხრეიძემ სასამართლოს 18 სექტემბერს მიმართა, ორი დღით ადრე იქამდე, ვიდრე კონკურსში განაცხდების მიღება დასრულდებოდა. იმ დროისთვის უკვე ცნობილი იყო, რომ კონკურსში მონაწილეობას აპირებდა მაუწყებლის დირექტორის ამჟამინდელი მოვალეობის შემსრულებელი ნათია ზოიძე.  23  სექტემბერს ბათუმის სასამართლომ კონკურსი შეაჩერა.  ამ პროცესებიდან ერთი თვის შემდეგ, 24 ოქტომბერს უმაღლესმა საბჭომ ბორდი დააკომპლექტა, ამის შემდეგ კი, 18 ნოემბერს  ქუთაისის სააპელაციო სასამართლომ ახალ მრჩევლებს ახალი დირექტორის არჩევის უფლება მისცა.
 

ტელეკომპანია მთავარი არხის დამფუძნებლის ნიკა გვარამიას ინფორმაციით, დააკავეს არხის ერთ-ერთი დამფუძნებელი, გიორგი რურუა. გვარამია წერს, რომ რურუას იარაღი ჩაუდეს.

"აღარაა დრო დაყოვნების! ან ჩვენ ვრჩებით ამ ქვეყანაში, ან დამნაშავე ივანიშვილის კლეპტოკრატია, მისი კორუმპირებული და ანტიხალხური რეჟიმი და კაციჭამია ზონდერი სპეცრაზმელები! უზურპატორი უნდა გავუშვათ, ან ის დაგვტოვებს სამშობლოს გარეშე!" — წერს გვარამია.



ნიკა რურუას ძმა, გიორგი რურუა ტელეკომპანია "ფორმულას" 2.5%-იანი წილის მფლობელია

შინაგან საქმეთა სამინისტროს ინფორმაციით, გიორგი რურუა პოლიციამ სსკ-ის 236-ე მუხლის მე-3 და მე-4 ნაწილებით გათვალისწინებული დანაშაულისთვის დააკავა, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.

პარტია “ქრისტიან-დემოკრატიული მოძრაობის” ყოფილი თავმჯდომარე გიორგი თარგამაძე ტელეკომპანია “ფორმულზე” ანალიტიკურ ტოქ-შოუს წაიყვანს. გადაცემა, სახელწოდებით - “გიორგი თარგამაძის ფორმულა”, ეთერში ყოველ სამუშაო დღეს 23:00 საათზე გავა.  პირველი გადაცემა არხზე დღეს, 17 ნოემბერს უნდა გავიდეს.

ტელეკომპანია „ფორმულას“ საინფორმაციო სამსახურის უფროსის გიორგი ლაფერაშვილის თქმით, ქვეყანაში მიმდინარე მოვლენების გამო, ახალი ტოქშოუს დაწყება დაჩქარებულ რეჟიმში გადაწყვიტეს: “გიორგი თარგამაძესთან თანამშრომლობა დაწყებული გვქონდა. ვაპირებდით, როგორც წესი, ისე დაგვეწყო - სარეკლამო რგოლებით, პრომოთი და ა.შ. მაგრამ გადავწყვიტეთ, რომ ახლა არის ვითარება, როცა ყოველდღიურ ფორმატში უნდა დაიწყოს კიდევ ერთი ტოქშოუ ჩვენს არხზე”.

გიორგი თარგამაძეც ადასტურებს, რომ ახალი გადაცემის ეთერში გასვლა ჯერ არ იგეგმებოდა. მისი თქმით, საზოგადოებაში არსებობს გარკვეული მოლოდინი, მოთხოვნა კიდევ უფრო მეტად აქტიური, კვალიფიციური ინფორმაციის მიწოდების.

“მგონია, რომ ახლა არის დრო იმისა, რომ კიდევ ერთი და მნიშვნელოვანი შტრიხი გაჩნდეს ქართულ სატელევიზიო პალიტრაში. ამის გაკეთებას ვეცდები მე, თქვენთან და ტელეკომპანია ფორმულას სხვა ჟურნალისტებთან და თანამშრომლებთან ერთად. არც ვგეგმავდით, რომ მე ასე სწრაფად შევსულიყავი ეთერში, მაგრამ ეს ყველაფერი განაპირობა იმ მოვლენებმა, რაც ჩვენს ქვეყანაში ვითარდება. თუნდაც ერთი კვირის განმავლობაში მიღებულმა გადაწყვეტილებებმა, უფრო სწორად, გადაუწყვეტელობამ, რომელმაც ქვეყანაში, ასე ვთქვათ, ტემპერატურა აწია და დაძაბა ვითარება. და მეორე მხრივ, აუცილებლობამ, რომ ტელეკომპანიამ ამას ფეხი კიდევ უფრო აქტიურად აუწყოს,” - განაცხადა გიორგი თარგამაძემ “ფორმულას” ეთერში.

გიორგი ლაფერაშვილი ამბობს, რომ ტელეკომპანია “ფორმულას” ეთერში მაყურებელი სულ მალე გიორგი თარგამაძის სხვა გადაცემებსაც იხილავს: “გიორგისთან დაკავშირებით სხვა გეგმები გვაქვს და სხვა ტიპის გადაცემებსაც შევთავაზებთ მაყურებელს, როდესაც საცდელი მაუწყებლობის ფორმატს დავასრულებთ”. “მედიაჩეკერის” კითხვაზე, რა ტიპის ახალ გადაცემებს უნდა ელოდოს მაყურებელი, გიორგი ლაფერაშვილმა გვიპასუხა, რომ “მათ შორის იმ ტიპის გადაცემებსაც რომელიც მაყურებელს უყვარს და მოენატრა”.

გიორგი თარგამაძე1999-2002 წლებში პარლამენტის წევრი იყო. 2002 წლიდან იგი ტელეკომპანია “იმედში” ჟურნალისტად მუშაობდა, სადაც საზოგადოებრივ-პოლიტიკური პროგრამების დირექტორობის პარალელურად, გადაცემა „დროების“ ავტორი და წამყვანი იყო. 2007 წლის 7 ნოემბერს ტელეკომპანია “იმედში” სპეცრაზმის შეჭრის შემდეგ გიორგი თარგამაძე ჟურნალისტიკიდან პოლიტიკაში წავიდა და პარტია “ქრისტიან-დემოკრატიული მოძრაობა” დააფუძნა. იგი 2013 წლის საპრეზიდენტო არჩევნებშიც მონაწილეობდა. 2013 წლიდან კი თარგამაძე პოლიტიკურ საქმიანობას ჩამოშორდა.

ტელეკომპანია "ფორმულამ",  რომელიც შპს “ფორმულა კრეატივმა” 20 ივლისს დააფუძნა,  მაუწყებლობა მიმდინარე წლის 1-ელ ოქტომბრიდან დაიწყო. არხზე "რუსთავი 2-დან" წასული ჟურნალისტების ნაწილი მუშაობს. 

პირველ ეტაპზე, კომპანიის 100%-იან წილს თანაბრად (25-25%) ფლობდნენ “ფორმულა კრეატივის” დამფუძნებლები: მიხეილ მშვილდაძე, ირაკლი საღინაძე, ზურაბ გუმბარიძე და გიორგი ლიფონავა . თუმცა, 3 სექტემბერს საჯარო რეესტრში ცვლილება აისახა და “ფორმულას” მეწილეებს საკონტროლო პაკეტით (51%) არხის მთავარი დამფინანსებელი დავით კეზერაშვილი დაემატა. ტელეკომპანიის დანარჩენი ოთხი მეწილე, ამ ეტაპზე წილებს კვლავ თანაბრად ინაწილებს. თითოეული მათგანი “ფორმულას” 12.25%-ს ფლობს