„ვივამედის“ კლინიკური დირექტორის, ზურაბ ჩხაიძის თქმით, „ბათუმელებისა“ და „ნეტგაზეთის“ დამფუძნებელი და დირექტორი, მზია ამაღლობელი დამატებითი კვლევების ჩატარების მიზნით, დღეს და სავარაუდოდ, ხვალ მათ კლინიკაში დარჩება.

„მხნედ არის. უგრძელდება კვლევები. დაგვჭირდა დამატებითი კვლევების ჩატარება და ასევე, კონსულტირება ამ კვლევის შედეგად ექიმ-სპეციალისტების მიერ. რეკომენდაციას ითვალისწინებს, მას აქვს უკვე დანიშნულება მიცემული, ეს დანიშნულება სრულდება, რაზეც თანხმობას აცხადებს“.

ჩხაიძის განცხადებით, მდგომარეობა საგანგაშოა და გარკვეული გართულებები ყოველთვის მოსალოდნელია.

„რა თქმა უნდა, საგანგაშო მდგომარეობაა და შეიძლება, ყოველთვის რაღაც გართულება იყოს. დღეს ჩვენთან დარჩება. სავარაუდოდ, ხვალაც დარჩება, რომ კვლევა კიდევ გაგრძელდეს და იყოს კონტროლის ქვეშ. ამდენი ხნის შიმშილობის ეფექტი თავის ზეგავლენას ახდენს ორგანიზმზე“, - თქვა ჩხაიძემ „TV პირველთან“ სატელეფონო საუბარში.

„ბათუმელებისა“ და ,,ნეტგაზეთის“ დამფუძნებელი და დირექტორი დაკავების დღიდან, 26-ე დღეა შიმშილობს. მზია ამაღლობელს წინასწარი პატიმრობა აქვს შეფარდებული. მას 4-დან 7 წლამდე პატიმრობა ემუქრება.

მზია ამაღლობელი 11-12 იანვარს ბათუმის პოლიციის მთავარ სამმართველოსთან ორჯერ დააკავეს. პირველად ამაღლობელი პოლიციამ კედელზე იმ სტიკერის გაკვრის გამო დააკავა, რომელზეც „გაიფიცე“ ეწერა, ის მოგვიანებით ხელწერილის საფუძველზე გაათავისუფლეს, თუმცა მალევე მეორედ ირაკლი დგებუაძისთვის სილის გაწვნის გამო დააკავეს.

15 იანვარს „საქართველოს ახალგაზრდა იურისტთა ასოციაციამ“ ინფორმაცია გაავრცელა ინფორმაცია, რომ „მისი[მზია ამაღლობელის] დაკავების შემდგომ, ირაკლი დგებუაძე აყენებდა სიტყვიერ შეურაცხყოფას ხოლო შემდგომ, პოლიციის განყოფილებაში რამდენჯერმე შეეცადა მას ფიზიკურად გასწორებოდა, თუმცა, პოლიციის სხვა თანამშრომლებმა შეძლეს ირაკლი დგებუაძის შეკავება და მისი ოთახიდან გაყვანა. ირაკლი დგებუაძე რამდენჯერმე შევიდა ოთახში და აგრძელებდა აგრესიულ მოპყრობას მის მიმართ, ერთ-ერთი ასეთი შესვლისას, მან მზია ამაღლობელს სახეში შეაფურთხა. ასევე, მისი ბრაძანების შესაბამისად, მზია ამაღლობელს გარკვეული დროის განმავლობაში არ ეძლეოდა წყლის დალევის  და საპირფარეშოთი სარგებლობის საშუალება“.

„საქართველოს ახალგაზრდა იურისტთა ასოციაციის“ განცხადებით, საზოგადოებრივი მაუწყებლის „პირველი არხის“ გადაწყვეტილება, ვასილ ივანოვ-ჩიქოვანმა განუსაზღვრელი დროით „მოამბე“ აღარ წაიყვანოს, სიტყვისა და ობიექტური ჟურნალისტიკის წინააღმდეგ მიმდინარე რეპრესიაა. 

„ეს შემთხვევა არის თავისუფალი სიტყვისა და ობიექტური ჟურნალისტიკის წინააღმდეგ მიმდინარე რეპრესია, რომელიც არღვევს, არა მარტო, ჟურნალისტის უფლებებს, არამედ, საზოგადოების უფლებას, მიიღოს ობიექტური ინფორმაცია იმ ორგანოსგან, რომლის დამოუკიდებლობაც კონსტიტუციით არის აღიარებული“.

ახალგაზრდა იურისტთა ასოციაციის შეფასებით, ივანოვ-ჩიქოვანის წინააღმდეგ გადადგმული ნაბიჯები პირდაპირ უკავშირდება მის საჯარო პოზიციონირებას, მათ შორის, პოზიციებს, რომლითაც ის სოლიდარობას უცხადებს უკანონო პატიმრობაში მყოფ, „ბათუმელებისა“ და „ნეთგაზეთის“ დამფუძნებელ, მზია ამაღლობელს, ასევე, საჯაროდ საუბრობს საზოგადოებრივ მაუწყებელში მიმდინარე პროცესებზე, მათ შორის, ეთერის საზოგადოებისთვის გახსნის საკითხებზე.

„მიგვაჩნია, რომ მის მიმართ გატარებული ზომები მისი, როგორც ჟურნალისტის, საეთერო დამოუკიდებლობის წინააღმდეგ გატარებული ღონისძიებაა. მიუხედავად იმისა, რომ საზოგადოებრივი მაუწყებლის დამოუკიდებლობა საქართველოს კონსტიტუციაში გამოხატვის თავისუფლების ნაწილია, სწორედ განსხვავებული აზრის გამოხატვის გამო საზოგადოებრივი მაუწყებელი თავად დევნის მისსავე თანამშრომელს, ვასილ ივანოვ-ჩიქოვანს“. 

ორგანიზაციის განცხადებით, საზოგადოებრივი მაუწყებელი პოლიტიკური ჩარევებისგან დამოუკიდებლად უნდა ფუნქციონირებდეს, თუმცა, ის ამას ვერ ახერხებს. 

„საზოგადოებრივი მაუწყებელი პასუხისმგებელია საზოგადოების წინაშე, ერთი მხრივ, იგი არსებობს, რათა ემსახუროს საზოგადოებას ზოგადად და, მეორე მხრივ, იგი ფინანსდება საჯარო სახსრებით, თუმცა, ნაცვლად ამ საჯარო ფუნქციის შესრულებისა, იგი ემსახურება „ქართულ ოცნებას„“. 

საზოგადოებრივი მაუწყებლის ხელმძღვანელობის მხრიდან ვასილ ივანოვ-ჩიქოვანისთვის საინფორმაციო გამოშვების წამყვანობის დროებით შეჩერებას გმობს „მედიის ადვოკატირების კოალიციაც“. 

კოალიციის შეფასებით, აღნიშნული გადაწყვეტილება ობიექტური, მიუკერძოებელი და ქვეყნის ევროპული გზის აქტიური მხარდამჭერი ჟურნალისტისა და მისი კოლეგების გაჩუმებას ემსახურება. 

„მედიის ადვოკატირების კოალიცია“ მიიჩნევს, რომ საზოგადოებრივი მაუწყებელში მიმდინარე პროცესები ცხადყოფს, რომ იგი ვერ ასრულებს საკანონმდებლო ვალდებულებებს, არასრულყოფილად აშუქებს ქვეყანაში მიმდინარე პროცესებს, არის მიკერძოებული „ქართული ოცნების“ მიმართ და ხელს არ უწყობს ქვეყნის ევროინტეგრაციის პროცესს, ამაზე პირდაპირი პასუხისმგებლობა კი სამეურვეო საბჭოს თავმჯდომარე ვასილ მაღლაფერიძეს და არხის დირექტორ თინათინ ბერძენიშვილს აკისრიათ. 

„აღნიშნული პირები და მათი გავლენის ქვეშ მყოფი მაუწყებლის სხვა თანამშრომლები და სამეურვეო საბჭოს წევრები მიზანმიმართულად ცდილობენ საეთერო სივრცეში ობიექტური ხმების გაჩუმებას და “ბიძინა ივანიშვილისა” და “ქართული ოცნების” პროპაგანდის გავრცელებას. ბოლო დღეებში საზოგადოებამ კიდევ ერთხელ მოისმინა საზოგადოებრივ მაუწყებელში არსებული ცენზურისა და ხელმძღვანელობის მხრიდან “ქართული ოცნების” სასარგებლოდ სარედაქციო პოლიტიკაში ჩარევის არაერთი შემთხვევა“. 

კოალიცია საერთაშორისო ორგანიზაციებს, მათ შორის ევროპის მაუწყებელთა კავშირს (EBU) მოუწოდებს გამოხატონ პოზიცია „საქართველოს საზოგადოებრივ მაუწყებელში“ მიმდინარე პროცესებზე, „კერძოდ ცენზურასა და პროპაგანდაში არაერთგზის მხილებული ვასილ მაღლაფერიძისა და თინათინ ბერძენიშვილის ქმედებების შესახებ“. 

საზოგადოებრივი მაუწყებლის გარშემო განვითარებულ მოვლენებს გამოეხმაურა „ევროპის ჟურნალისტთა ფედერაციაც“, რომელიც შეშფოთებულია საქართველოში რეპრესიის გაძლიერებითა და „საქართველოს საზოგადოებრივ მაუწყებელზე“ „ქართული ოცნების“ გავლენების გაძლიერებით, მიმდინარე პროტესტებსა და ადამიანის უფლებათა დარღვევებზე ცენზურის დაწესების მიზნით. 

„ევროპის ჟურნალისტთა ფედერაცია მხარს უჭერს საზოგადოებრივი მაუწყებლის ჟურნალისტებს, რომლებმაც დაგმეს [მზია] ამაღლობელის დაკავების არასათანადო გაშუქება საზოგადოებრივი მაუწყებლის სამეურვეო საბჭოს სხდომაზე. შეხვედრა გაიმართა სარედაქციო დამოუკიდებლობის გამო მზარდი დაძაბულობისა და საზოგადოებრივი მაუწყებლის შენობის წინ მიმდინარე საპროტესტო აქციების ფონზე“.

EFJ-ის გენერალური მდივანი, რიკარდო გუტიერესი „ევროპის მაუწყებელთა კავშირს“ რეაგირებისკენაც მოუწოდებს: „თუ უსამართლოდ სანქცირებული ჟურნალისტი დაუყოვნებლივ არ იქნება აღდგენილი, „საზოგადოებრივი მაუწყებელი“ EBU-დან უნდა გაირიცხოს“.

საზოგადოებრივი მაუწყებლის წამყვანმა, ვასილ ივანოვ-ჩიქოვანმა გუშინ, 4 თებერვალს სოციალურ ქსელში დაწერა, რომ 18–საათიან მოამბეს აღარ წაიყვანს.

„მოამბის“ წამყვანმა „პირველი არხის“ ოფიციალური პოზიციაც გაავრცელა, რომლის მიხედვითაც, ტელევიზიის მიერ მიღებული გადაწყვეტილების მიზეზი პროდიუსერების მიერ ივანოვ-ჩიქოვანთან თანამშრომლობაზე უარის თქმაა:

„როგორც თქვენთვის ცნობილია, დღეს გამართულ სამეურვეო საბჭოს სხდომაზე „მოამბის” პროდიუსერებმა, თქვენს მიერ საჯაროდ (მათ შორის ეთერში) გაკეთებულ განცხადებებთან დაკავშირებით, დააფიქსირეს საკუთარი პოზიცია და თქვენთან, როგორც „მოამბე”-ს წამყვანთან, მუშაობის გაგრძელებაზე განაცხადეს უარი. აღნიშნული გარემოების გათვალისწინებით, თანამშრომელთა შორის არსებული და შესაძლო სამომავლო დისკომფორტის, დაძაბული და არაჯანსაღი სამუშაო გარემოს  შექმნის/გაუარესების საფრთხის თავიდან აცილების, ასევე მაუწყებლის კანონისმიერი ვალდებულებების შესრულების უზრუნველყოფის  მიზნით,  გაცნობებთ, რომ მიმდინარე წლის 4 თებერვლიდან, არსებული გართულებული ვითარების ნორმალიზებამდე, დროებით აღარ დაგევალებათ საინფორმაციო გამოშვება “მოამბე”-ს წამყვანის ფუნქციის შესრულების ვალდებულება“.

ვასილ ივანოვ-ჩიქოვანის მიერ ამ ინფორმაციის გასაჯაროვებამდე, გუშინდელი საზოგადოებრივი მაუწყებლის სამეურვეო საბჭოს სხდომის მიმდინარეობისას ორმა პროდიუსერმა, თამუნა კენკიშვილმა და მაია ჭუჭულაშვილმა განაცხადეს, რომ 18:00-საათიანი „მოამბის“ პროდიუსერობაზე, რომელიც ივანოვ-ჩიქოვანს მიჰყავს, უარს ამბობენ. 

ვასილ ივანოვ-ჩიქოვანი “საზოგადოებრივი მაუწყებლის პირველი არხის” ერთადერთი წამყვანია, რომელიც მზია ამაღლობელს სოლიდარობას “მოამბის” პირდარი ეთერში უცხადებდა. ივანოვ-ჩიქოვანი ტელევიზიის იმ თანამშრომელთა შორისაცაა, რომლებიც მენეჯმენტისგან დღის ეთერის დათმობას ითხოვს.

“მოამბის” წამყვანმა 2024 წლის 30 ნოებრის საგანგებო ეთერის დროს, პირდაპირ ეთერი თქვა, რომ მაუწყებლის ახალი და მიმდინარე ამბების ბლოკის სარედაქციო პოლიტიკა საზოგადოების მოთხოვნებს ვერ პასუხობს. ვასილ ივანოვ-ჩიქოვანი ღიად საუბრობს სამეურვეო საბჭოს თავმჯდომარის, ვასილ მაღლაფერიძის გავლენაზეც.

„ევროპის ჟურნალისტთა ფედერაცია“ შეშფოთებულია საქართველოში რეპრესიის გაძლიერებითა და „საქართველოს საზოგადოებრივ მაუწყებელზე“ „ქართული ოცნების“ გავლენების გაძლიერებით, მიმდინარე პროტესტებსა და ადამიანის უფლებათა დარღვევებზე ცენზურის დაწესების მიზნით. 

„ევროპის ჟურნალისტთა ფედერაცია მხარს უჭერს საზოგადოებრივი მაუწყებლის ჟურნალისტებს, რომლებმაც დაგმეს [მზია] ამაღლობელის დაკავების არასათანადო გაშუქება საზოგადოებრივი მაუწყებლის სამეურვეო საბჭოს სხდომაზე. შეხვედრა გაიმართა სარედაქციო დამოუკიდებლობის გამო მზარდი დაძაბულობისა და საზოგადოებრივი მაუწყებლის შენობის წინ მიმდინარე საპროტესტო აქციების ფონზე“.

EFJ აღნიშნავს, რომ სამეურვეო საბჭოს 30 იანვრის სხდომაზე, ჟურნალისტმა ვასილ ივანოვ-ჩიქოვანმა გააკრიტიკა საბჭოს თავმჯდომარის, ვასილ მაღლაფერიძის ჩარევა სარედაქციო გადაწყვეტილებებში. 

განცხადებაში ასევე აღნიშნულია, რომ ივანოვ-ჩიქოვანი მისი პოზიციის გამო „საზოგადოებრივი მაუწყებლის“ საინფორმაციო გამოშვებას ჩამოაშორეს, რასაც „ევროპის ჟურნალისტთა ფედერაცია“ მიუღებელ ცენზურად და პოლიტიკურ ჩარევად მიიჩნევს. 

EFJ-ის გენერალური მდივნი, რიკარდო გუტიერესი „ევროპის მაუწყებელთა კავშირს“ რეაგირებისკენ მოუწოდებს: „თუ უსამართლოდ სანქცირებული ჟურნალისტი დაუყოვნებლივ არ იქნება აღდგენილი, „საზოგადოებრივი მაუწყებელი“ EBU-დან უნდა გაირიცხოს“.

„ევროპის ჟურნალისტთა ფედერაცია“ კიდევ ერთხელ ითხოვს „ბათუმელებისა“ და „ნეტგაზეთის“ დამფუძნებლისა და დირექტორის, მზია ამაღლობელის დაუყოვნებლივ გათავისუფლებასაც. 

EFJ საერთაშორისო საზოგადოებას მოუწოდებს, მოახდინოს მაქსიმალური ზეწოლა საქართველოს ხელისუფლებაზე, რათა შეწყვიტოს ჟურნალისტების მიმართ რეპრესიები და გაათავისუფლოს მზია ამაღლობელი და სხვა ყველა სინდისის პატიმარი.

„ჟურნალისტთა ევროპის ფედერაცია“ 44 ქვეყნის 73 ორგანიზაციის 295 000-ზე მეტ ჟურნალისტს აერთიანებს. 

4 თებერვალს, პარლამენტის შენობასთან მედიისა და სამოქალაქო საზოგადოების წარმომადგენლებმა „ბათუმელებისა“ და „ნეტგაზეთის“ დამფუძნებლისა და დირექტორის, მზია ამაღლობელის მორიგი მხარდამჭერი აქცია გამართეს. 

ამ დროს „ქართული ოცნების“ პარლამენტის საგაზაფხულო სესია „ქვეყნის მდგომარეობის შესახებ უმნიშვნელოვანეს საკითხებზე“ მიხეილ ყაველაშვილის მოხსენებით იხსნებოდა.

აქციის მონაწილეები პარლამენტის უკანა შესასვლელიდან 9 აპრილის ქუჩის მიმართულებით დაიძრნენ, რომლებიც პოლიციის მოწოდებას, გადასულიყვნენ ტროტუარზე დაემორჩილნენ. თუმცა, ამის მიუხედავად, პოლიციელები მათ მიმართ აგრესიით გამოირჩეოდნენ, ძალის გამოყენებით ატოვებინებდნენ ტროტუარსაც და აიძულებდნენ რუსთაველის გამზირზე ჩასულიყვნენ. 

პოლიციელები აგრესიით გამოირჩეოდნენ მედიის იმ წარმომადგენლების მიმართაც, რომლებიც აქციას აშუქებდნენ. პროფესიულ საქმიანობაში ხელი შეუშალეს და ფიზიკური შეურაცხყოფა მიაყენეს „პუბლიკის“, NEWS.On.ge-ს და OC Media-ს ჟურნალისტებს. 

„საქართველოს ჟურნალისტური ეთიკის ქარტიის“ განცხადებით, ძალოვანმა უწყებებმა პატივი უნდა სცენ საქართველოს კონსტიტუციით დაცულ უფლებებს, შეწყვიტონ თავდასხმები მედიის წარმომადგენლებზე და მისცენ მათ პროფესიული მოვალეობის უსაფრთხოდ შესრულების საშუალება.

„მედიის ადვოკატირების კოალიციის“ შეფასებით კი, „ეს ქმედებები არის ბიძინა ივანიშვილის  და “ქართული ოცნების” მიზანმიმართული პოლიტიკის ნაწილი, რომელიც, მათ შორის, მიმართულია თავისუფალი მედიის წინააღმდეგ. დღემდე არცერთი მსგავსი ინციდენტის ჩამდენი პირი არ დასჯილა“. 

„სოციალური სამართლიანობის ცენტრის“ განცხადებაში კი აღნიშნულია, რომ ჟურნალისტებზე მიზანმიმართული თავდასხმის ფაქტების სიმრავლე, მასშტაბი, ხასიათი და დამნაშავეების სისტემური დაუსჯელობა აშკარად მიუთითებს, რომ მედია „ქართული ოცნების“ სამიზნეში მოექცა და მათზე თავდასხმით, რეჟიმი ყველა კრიტიკულ ხმას ებრძვის, რომელიც მათი მმართველობის სისასტიკეს ამხელს. 

4 თებერვალს, მზია ამაღლობელის მხარდამჭერი აქციის გაშუქებისას მომხდარი ინციდენტები:

• NEWS.On.ge

საპროტესტო აქციაზე, პროფესიული საქმიანობის შესრულებისას, პოლიცია თავს დაესხა გამოცემა NEWS.On.ge-ს მთავარ რედაქტორს, ვანცენტ ხაბეიშვილს. ხაბეიშვილს, ნიღბიანებმა თავში ძლიერად ჩაარტყეს და ძირს დააგდეს, რის გამოც გადაუდებელი კვლევებისთვის კლინიკაშიც იმყოფებოდა.

• „პუბლიკა“

ნიღბიანმა პოლიციელებმა პროფესიულ საქმიანობაში ხელი შეუშალეს და ფიზიკური შეურაცხყოფა მიაყენეს (თმაზე მოქაჩეს და ხელი დაარტყეს) „პუბლიკის“ ფოტორეპორტიორ ნათია ლევერაშვილსაც.

• OC Media
  
  
  

OC Media-ს ჟურნალისტის, გივი ავალიანის თქმით, პროფესიული მოვალეობის შესრულებისას ნიღბიანმა პოლიციელმა ხელი შეუშალა და ტელეფონის წართმევა სცადა.

2 თებერვალს, ჟურნალისტურ საქმიანობაში ხელშეშლის 10-ზე მეტი ინციდენტი დაფიქსირდა „თბილისი მოლთან“ მიმდინარე აქციის გაშუქების დროსაც.

2024 წლის 28 ნოემბერს ირაკლი კობახიძემ განაცხადა, რომ ევროკავშირში გაწევრიანების მოლაპარაკების პროცესს აჩერებს, რასაც ფართომასშტაბიანი საპროტესტო აქციები მოჰყვა. გასულ წელს პროევროპული აქციების გაშუქებისას მედიას პროფესიულ საქმიანობაში ხელი 90-ზე მეტ შემთხვევაში შეეშალა. 

2 თებერვალს, პროევროპული აქციების 67-ე დღეს, ახალი არჩევნების ჩატარებისა და აქციებზე დაკავებული ადამიანების გათავისუფლების მოთხოვნით, საპროტესტო აქცია თბილისში, აღმაშენებლის ხეივანზე გაიმართა. „თბილისი მოლთან“ მიმდინარე აქციის გაშუქებისას ჟურნალისტურ საქმიანობაში ხელშეშლის 10-ზე მეტი ინციდენტი დაფიქსირდა.

„საქართველოს ჟურნალისტური ეთიკის ქარტიის“ განცხადებით, „შსს-ს სხვადასხვა დანაყოფის წარმომადგენლები, რომელთა იდენტიფიცირება მეტწილად შეუძლებელი იყო იმის გამო, რომ სახე ნიღბით ჰქონდათ დაფარული და ამოსაცნობ ნიშნებს არ ატარებდნენ, „თბილისი მოლთან“ მიმდინარე აქციაზე ჟურნალისტებს ხაზგასმულად უპატივცემულოდ და უხეშად ეპყრობოდნენ, აყენებდნენ სიტყვიერ შეურაცხყოფას, ტერიტორიიდან ძალის გამოყენებით აძევებდნენ და გადაღებაში ხელს უშლიდნენ. პოლიციელები განსაკუთრებულ აგრესიას იჩენდნენ მაშინ, როცა ჟურნალისტები მათ მიერ მშვიდობიანი აქციის მონაწილეებზე ძალადობის ფაქტების გადაღებას ცდილობდნენ“. 

ჟურნალისტური ეთიკის ქარტია ძალოვნების მხრიდან ჟურნალისტთა მიმართ არასათანადო მოპყრობისა და ძალის გადამეტების ფაქტებს გმობს და საერთაშორისო უფლებადამცველ ორგანიზაციებს მოუწოდებს, „შესაბამისი შეფასება მისცენ კონსტიტუციისა და კანონის ჩარჩოებიდან გასული ძალოვნების საფრთხის შემცველ ქმედებებსა და სისტემურ ძალადობას მედიის წარნმომადგენლებზე“. 

2 თებერვლის საპროტესტო აქციაზე მომხდარ შემთხვევებს გამოეხმაურა და დაზარალებულ ჟურნალისტებსა და მედიაორგანიზაციებს სოლიდარობა გამოუცხადა „მედიის ადვოკატირების კოალიციამაც“.  

„ეს ფაქტები წარმოადგენს მედიის თავისუფლებაზე პირდაპირ თავდასხმას და დემოკრატიული პრინციპების უხეშ დარღვევას. განსაკუთრებით საგანგაშოა, რომ აღნიშნული დანაშაულები პირველი შემთხვევები არ არის და უკვე წლებია “ქართული ოცნების” რეჟიმი ძალადობს საკუთარ მოქალაქეებსა და მედიის წარმომადგენლებზე. აღსანიშნავია, რომ 2024 წლის 28 ნოემბრიდან დღემდე მედიის წინააღმდეგ ძალადობაში მონაწილე არც ერთი პირი არ მიცემულა პასუხისგებაში და უკანონო პატიმრობაში რჩება “ნეტგაზეთისა” და “ბათუმელების” დირექტორი მზია ამაღლობელი, რომელიც დაკავების დღიდან შიმშილობს“, - ვკითხულობთ კოალიციის განცხადებაში. 

„თბილისი მოლთან“  მიმდინარე აქციის გაშუქებისას მომხდარი ინციდენტები:

• „TV პირველი“

დაახლოებით 18:00 საათზე, აქციის გაშუქებისას დაშავდა „TV  პირველის“ ოპერატორი ნიკო კოკაია. ტელევიზიის განცხადებით, ოპერატორი სასწრაფომ კლინიკაში გადაიყვანა. კოკაია რამდენიმე წუთის განმავლობაში უგონო მდგომარეობაში იმყოფებოდა. 

ამ ინციდენტიდან დაახლოებით ერთ საათში, პოლიციელებმა პროფესიულ საქმიანობაში ხელი შეუშალეს ამავე ტელეკომპანიის ჟურნალისტს, დიანა ჩირგაძესა და მის ოპერატორს. ჟურნალისტის თქმით, მანამდე პოლიციელებმა მათ სიტყვიერი შეურაცხყოფა მიაყენეს, შეეცადნენ, რომ ფიზიკურად გასწორებოდნენ ოპერატორს და სამაუწყებლო აპარატურა დაეზიანებინათ. 

პროფესიულ საქმიანობაში ხელი შეუშალეს ჟურნალისტ ხატია სამხარაძესაც. „TV პირველის“ ინფორმაციით, განსაკუთრებულ დავალებათა დეპარტამენტის დირექტორის, ზვიად ხარაზიშვილის („ხარება“) მოადგილემ, მირზა კეზევაძემ ჟურნალისტს პირადი ტელეფონი წაართვა, ტელეფონი ძირს დააგდო და ფეხი დაარტყა. 

• „ფორმულა“

„TV პირველის“ ჟურნალისტის, ხატია სამხარაძის თქმით, პოლიციელებმა მუშაობაში ხელი შეუშალეს ტელეკომპანია „ფორმულას“ გადამღებ ჯგუფსაც. 

• „მთავარი არხი“

20:36 საათზე „მთავარი არხის“ ჟურნალისტმა, დეა მამისეიშვილმა Facebook-ის საკუთარ გვერდზე გამოაქვეყნა ვიდეო, რომელშიც ჩანს, რომ პოლიციელებმა მას პროფესიული მოვალეობის შესრულებაში ხელი შეუშალეს და სიტყვიერი შეურაცხყოფა მიაყენეს.

• „მედია აპრილი“

პოლიციელებმა აქციის გაშუქებაში ხელი შეუშალეს „მედია აპრილის“ თანამშრომლებს, ვახო ქარელსა და ნატა ურიდიას. მედიის მიერ გავრცელებულ ვიდეოში ჩანს, რომ პოლიციელები ცდილობდნენ, მათთვის ტერიტორია ძალის გამოყენებით დაეტოვებინათ. 

• „რადიო თავისუფლება“

პროფესიულ საქმიანობაში ხელი შეუშალეს და დაემუქრნენ „რადიო თავისუფლების“ ჟურნალისტს, გელა ბოჩიკაშვილს. ვიდეოში ისმის, თუ როგორ ემუქრება პოლიციელი ჟურნალისტს: „გაწიე ეგ კამერა, თორემ გაგიმტვრევ თავ-პირს“.

• „რადიო მარნეული“

ჟურნალისტურ საქმიანობაში ხელი შეუშალეს „რადიო მარნეულის“ ჟურნალისტ ვლადიმერ ჩხიტუნიძესაც. ის პოლიტიკოს ნიკა მელიას დაკავებას იღებდა, რა დროსაც განსაკუთრებულ დავალებათა დეპარტამენტის თანამშრომლებმა გააჩერეს და ტროტუარზე ძალის გამოყენებით გადაიყვანეს. 

• „გურია ნიუსი“

პროფესიული მოვალეობის შესრულებაში ხელი შეუშალეს „გურია ნიუსის“ ჟურნალისტსაც. გამოცემის მიერ გავრცელებულ ვიდეოში ჩანს, თუ როგორ ურტყამს ხელს „გურია ნიუსის“ კამერას ნიღბიანი პირი, რომელსაც პოლიციის ფორმა არ ეცვა.

• „მედიაჩეკერი“

„თბილისი მოლთან” მიმდინარე აქციის დროს პოლიცია გადაღებაში ხელს უშლიდა ჟურნალისტ ნინია კაკაბაძესაც. მას პოლიციელებმა ხელიც ჰკრეს. 

2024 წლის 28 ნოემბერს ირაკლი კობახიძემ განაცხადა, რომ ევროკავშირში გაწევრიანების მოლაპარაკების პროცესს აჩერებს, რასაც თბილისსა და საქართველოს სხვა ქალაქებში საპროტესტო აქციები მოჰყვა. გასულ წელს პროევროპული აქციების გაშუქებისას მედიას პროფესიულ საქმიანობაში ხელი 90-ზე მეტ შემთხვევაში შეეშალა. 

„საქართველოს ჟურნალისტური ეთიკის ქარტიის“ განცხადებით, შსს-ს სხვადასხვა დანაყოფის წარმომადგენლები, რომელთა იდენტიფიცირება მეტწილად შეუძლებელი იყო იმის გამო, რომ სახე ნიღბით ჰქონდათ დაფარული და ამოსაცნობ ნიშნებს არ ატარებდნენ, „თბილისი მოლთან“ მიმდინარე აქციაზე ჟურნალისტებს ხაზგასმულად უპატივცემულოდ და უხეშად ეპყრობოდნენ, აყენებდნენ სიტყვიერ შეურაცხყოფას, ტერიტორიიდან ძალის გამოყენებით აძევებდნენ და გადაღებაში ხელს უშლიდნენ.

„პოლიციელები განსაკუთრებულ აგრესიას იჩენდნენ მაშინ, როცა ჟურნალისტები მათ მიერ მშვიდობიანი აქციის მონაწილეებზე ძალადობის ფაქტების გადაღებას ცდილობდნენ“.

„ჟურნალისტური ეთიკის ქარტია“ აღწერს მომხდარ ინციდენტებსაც:

„ვიდეოში, რომელიც „რადიო თავისუფლებამ“ გამოაქვეყნა, ისმის, თუ როგორ ემუქრება პოლიციელი ამ მედიასაშუალების ჟურნალისტს გელა ბოჩიკაშვილს: „გაწიე ეგ კამერა, თორემ გაგიმტვრევ თავ-პირს“. პოლიციელი უკან არ იხევს მაშინაც კი, როცა ჟურნალისტი მას უხსნის, რომ ის პროფესიულ მოვალეობას ასრულებს: „ვინც არ უნდა იყო, გაწიე კამერა“.

პოლიციელებმა მუშაობაში ხელი შეუშალეს „მედია აპრილის“ ჟურნალისტებს ვახო ქარელსა და ნატა ურიდიას. ვიდეოში ჩანს, რომ პოლიციელები ცდილობენ, მათ ტერიტორია ძალის გამოყენებით დაატოვებინონ.

პოლიციელებმა პროფესიული მოვალეობის შესრულებაში ხელი შეუშალეს „მთავარი არხის“ ჟურნალისტს დეა მამისეიშვილს. მას პოლიციელებმა ხელი ჰკრეს, ურტყამდნენ ხელებს და ფეხებს. მიაყენეს სიტყვიერი შეურაცხყოფაც. ამის ამსახველი ვიდეო სოციალურ ქსელში ჟურნალისტმა თავად გამოაქვეყნა.

„რადიო მარნეულის“ ჟურნალისტი ვლადიმერ ჩხიტუნიძე ნიკა მელიას დაკავებას იღებდა, რა დროსაც ის გდდ-ს თანამშრომლებმა გააჩერეს და ტროტუარზე ძალის გამოყენებით გადაიყვანეს.

„ტვ პირველის“ მიერ გამოქვეყნებულ ვიდეოში ჩანს, რომ პოლიციელები ფიზიკური ძალის გამოყენებით აგდებენ ტერიტორიიდან ტელეკომპანიის ჟურნალისტს დიანა ჩირგაძეს. ჟურნალისტის თქმით, პოლიციელებმა მანამდე სიტყვიერი შეურაცხყოფა მიაყენეს მას და ოპერატორს. მეტიც, ისინი შეეცადნენ, ფიზიკურად გასწორებოდნენ ოპერატორს და სამაუწყებლო აპარატურა დაეზიანებინათ.

ჰოსპიტალიზაცია დასჭირდა „ტვ პირველის“ ოპერატორს ნიკო კოკაიას. ის კლინიკა „ვივამედში“ გადაიყვანეს და კვლევები ჩაუტარეს, რამაც აჩვენა ტვინის შერყევა. “ნეტგაზეთის“ გამოქვეყნებულ ვიდეოში ჩანს, რომ ოპერატორი ძლიერ ტკივილს განიცდის. მან დაზიანება ჭყლეტისას მიიღო, როცა პოლიცია აქციის მონაწილეებს აკავებდა. ნიკო კოკაია რამდენიმე წუთის განმავლობაში უგონოდ იყო.

„ტვ პირველის“ ჟურნალისტს ხატია სამხარაძეს ნიღბიანმა პოლიციელმა, „ტვ პირველის“ ინფორმაციით, მირზა კეზევაძემ წაართვა პირადი ტელეფონი, რომლითაც ის „აგროჰაბის“ მიმდებარე ტერიტორიაზე ზვიად ხარაზიშვილის მანქანას იღებდა. პოლიციელმა ტელეფონი ძირს დააგდო და ფეხი დაარტყა. იმავდროულად პოლიციელებმა მუშაობაში ხელი შეუშალეს ტელეკომპანია „ფორმულას“ გადამღებ ჯგუფსაც. ხატია სამხარაძის თქმით, მათ ჟურნალისტ გიორგი კვიჟინაძისთვის მიკროფონის წართმევა სცადეს.

პროფესიული მოვალეობის შესრულებაში ხელი შეუშალეს „მედიაჩეკერის“ ჟურნალისტს ნინია კაკაბაძესაც იმ მანქანის გადაღებისას, რომლითაც ზვიად ხარაზიშვილი გადაადგილდებოდა. მას პოლიციელებმა ხელი ჰკრეს.

პროფესიული მოვალეობის შესრულებაში ხელი შეუშალეს “გურია ნიუსის” ჟურნალისტსაც. ვიდეოში ჩანს, თუ როგორ ურტყამს ხელს “გურია ნიუსის” კამერას ნიღბიანი პირი, რომელსაც პოლიციის ფორმა არ ეცვა”.

ქარტია გმობს ძალოვნების მხრიდან ჟურნალისტთა მიმართ არასათანადო მოპყრობისა და ძალის გადამეტების ფაქტებს და საერთაშორისო უფლებადამცველ ორგანიზაციებს მოუწოდებს, შესაბამისი შეფასება მისცენ კონსტიტუციისა და კანონის ჩარჩოებიდან გასული ძალოვნების საფრთხის შემცველ ქმედებებსა და სისტემურ ძალადობას მედიის წარნმომადგენლებზე.

„საქართველოს ახალგაზრდა იურისტთა ასოციაციამ“ სახალხო დამცველს მიმართა, უზრუნველყოს სპეციალური სამედიცინო ჯგუფის შექმნა, რომელიც მზია ამაღლობელის ჯანმრთელობის მდგომარეობას მონიტორინგს გაუწევს.

„2025 წლის 31 იანვარს მიღებული სამედიცინო დოკუმენტაციის გადამოწმების შედეგად გაირკვა, რომ მზია ამაღლობელს არ უტარდება ყველა ის აუცილებელი კვლევა და პროცედურა, რომელიც საჭიროა მისი ჯანმრთელობის მდგომარეობის სრულფასოვნად შესაფასებლად.

მიუხედავად იმისა, რომ 1 თებერვალს შესაბამის უწყებებს მივმართეთ აღნიშნული კვლევების უზრუნველსაყოფად, ამ დრომდე უცნობია, რა რეაგირება მოჰყვა ჩვენს მოთხოვნას. ამასთან, მზია ამაღლობელი უკვე 22 დღეა სრულ შიმშილობაზე იმყოფება, რაც მნიშვნელოვნად ზრდის მისი ჯანმრთელობის მდგომარეობის კრიტიკულად დამძიმების რისკს.

იმისათვის, რომ მზია ამღლობელის ჯანმრთელობის მდგომარეობა სათანადოდ გაკონტროლდეს, აუცილებელია ექიმთა სპეციალური ჯგუფის შექმნა, რომლის პირველადი შემადგენლობა უნდა დაკომპლექტდეს რეანიმატოლოგის, ენდოკრინოლოგისა და მეტაბოლური დაავადებების სპეციალისტებით. საჭიროების შემთხვევაში, მათ უნდა შეუერთდნენ ნევროპათოლოგი, კარდიოლოგი და გასტროენტეროლოგი.

 საია მოუწოდებს სახალხო დამცველს, უზრუნველყოს ამ ჯგუფის შექმნა, რათა დროულად იქნეს მიღებული საჭირო სამედიცინო ზომები. სახალხო დამცველს ასევე მიეწოდა იმ ექიმების სია, რომლებიც მზად არიან ჩაერთონ მონიტორინგის პროცესში“, - წერს ორგანიზაცია.

„ბათუმელებისა“ და ,,ნეტგაზეთის" დამფუძნებელი და დირექტორი დაკავების დღიდან, 22-ე დღეა შიმშილობს. მზია ამაღლობელს წინასწარი პატიმრობა აქვს შეფარდებული. მას 4-დან 7 წლამდე პატიმრობა ემუქრება.

მზია ამაღლობელი 11-12 იანვარს ბათუმის პოლიციის მთავარ სამმართველოსთან ორჯერ დააკავეს. პირველად ამაღლობელი პოლიციამ კედელზე იმ სტიკერის გაკვრის გამო დააკავა, რომელზეც „გაიფიცე“ ეწერა, ის მოგვიანებით ხელწერილის საფუძველზე გაათავისუფლეს, თუმცა მალევე მეორედ ირაკლი დგებუაძისთვის სილის გაწვნის გამო დააკავეს.

15 იანვარს „საქართველოს ახალგაზრდა იურისტთა ასოციაციამ“ ინფორმაცია გაავრცელა ინფორმაცია, რომ „მისი[მზია ამაღლობელის] დაკავების შემდგომ, ირაკლი დგებუაძე აყენებდა სიტყვიერ შეურაცხყოფას ხოლო შემდგომ, პოლიციის განყოფილებაში რამდენჯერმე შეეცადა მას ფიზიკურად გასწორებოდა, თუმცა, პოლიციის სხვა თანამშრომლებმა შეძლეს ირაკლი დგებუაძის შეკავება და მისი ოთახიდან გაყვანა. ირაკლი დგებუაძე რამდენჯერმე შევიდა ოთახში და აგრძელებდა აგრესიულ მოპყრობას მის მიმართ, ერთ-ერთი ასეთი შესვლისას, მან მზია ამაღლობელს სახეში შეაფურთხა. ასევე, მისი ბრაძანების შესაბამისად, მზია ამაღლობელს გარკვეული დროის განმავლობაში არ ეძლეოდა წყლის დალევის  და საპირფარეშოთი სარგებლობის საშუალება“.

„საქართველოს ჟურნალისტური ეთიკის ქარტია” გმობს შალვა პაპუაშვილის მუქარას „პუბლიკას“ მიმართ და მოუწოდებს მას, შეწყვიტოს დამოუკიდებელი მედიის მიმართ სიძულვილის გაღვივება

ორგანიზაციის განცხადებით, „ქართული ოცნება“ - დამოუკიდებელი ონლაინ გამოცემების დევნას, ხოლო მასთან დაკავშირებული ძალაუფლების მქონე პირები დამოუკიდებელი ონლაინ გამოცემების მიმართ სიძულვილის გაღვივებას აგრძელებენ.

„ქართული ოცნების“ რეპრესიული პოლიტიკა დამოუკიდებელი მედიის მიმართ 1 თებერვალს ახალ საფეხურზე გადავიდა, როდესაც შალვა პაპუაშვილმა მედიის მიერ საკუთარი პროფესიული მოვალეობის შესრულება მანიპულაციურად დააკავშირა 31 იანვარს სახელდახელოდ მიღებულ, შეკრების უფლების შემზღუდავ შესწორებასთან მთავრობის #361 დადგენილებაში და სისხლის სამართლებრივ პასუხისმგემლობაზე ალაპარაკდა.

ონლაინ გამოცემა „პუბლიკამ“ 1 თებერვალს გაავრცელა ინფორმაცია სინდისის პატიმრების გათავისუფლებისა და ახალი საპარლამენტო არჩევნების დანიშვნის მოთხოვნით 2 თებერვალს „თბილისი მოლთან“ დაგეგმილი აქციის შესახებ.

შალვა პაპუაშვილი ამ ინფორმაციას 1 თებერვალსვე გამოეხმაურა პოსტით ფეისბუქის პირად გვერდზე, რომელშიც „პუბლიკა“ სისხლის სამართლის დანაშაულის ჩადენის რეკლამირებაში დაადანაშაულა.

ჟურნალისტური ეთიკის ქარტია შალვა პაპუაშვილს შეახსენებს, რომ სიტყვისა და გამოხატვის თავისუფლება დემოკრატიის ქვაკუთხედია და რომ მედიის პროფესიული მოვალეობაა, მიუკერძოებლად გააშუქოს ქვეყანაში მიმდინარე ყველა მოვლენა. „თბილისი მოლთან“ დაგეგმილი აქცია სწორედ ამგვარ მოვლენათა რიგს მიეკუთვნება.

მედიის პასუხისმგებლობის დაყენება მოვლენის გაშუქების გამო მედიის სარედაქციო დამოუკიდებლობაში ჩარევის უხეშ მცდელობას წარმოადგენს. შალვა პაპუაშვილმა თავისი პოსტით მიზანმიმართულად გააღვივა სიძულვილი დამოუკიდებელი ონლაინ მედიის მიმართ. ამას ადასტურებს კომენტარები მისი პოსტის ქვეშ და ისიც, რომ თავად მედიასაშუალებამ შალვა პაპუაშვილის პოსტი თავდასხმად და მუქარად აღიქვა.

 ჟურნალისტური ეთიკის ქარტია შალვა პაპუაშვილს მოუწოდებს, პატივი სცეს პრესის თავისუფლებას, რომელიც დაცულია საქართველოს კონსტიტუციითა და საქართველოში მოქმედი კანონმდებლობით და საერთაშორისო კონვენციებით, რომელთა ხელმომწერიც არის საქართველო, და ხელი აიღოს დამოუკიდებელი მედიის დევნასა და შევიწროებაზე”, - ვკითხულობთ ჟურნალისტური ეთიკის ქარტიის განცხადებაში.

შალვა პაპუაშვილის განცხადებას „პუბლიკა” მუქარად აღიქვამს. გამოცემის შეფასებით, პაპუაშვილი სარედაქციო დამოუკიდებლობაზე ზეწოლას ცდილობს და მათ მიმართ სიძულვილსა და ძალადობას ახალისებს, რაც მის პოსტზე კომენტარებით დასტურდება:

„”პუბლიკა” ჟურნალისტური საქმიანობის ფარგლებში აშუქებს ქვეყანაში მიმდინარე მოვლენებს, მათ შორის საპროტესტო აქციებს, ანონსებს და ა.შ.

აქვე აღვნიშნავთ, რომ ,,პუბლიკამ" დღეს გააშუქა ბრძანება, რომლის მიხედვითაც საერთაშორისო მნიშვნელობის გზები სტრატეგიული ობიექტების ნუსხაში შევიდა და საზოგადოებას განუმარტა, რომ მისი ბლოკირება სისხლის სამართლის დანაშაულია. ასევე გაშუქდა შინაგან საქმეთა სამინისტროს პრევენციული განცხადება ხვალ დაანონსებულ აქციაზე.

შალვა პაპუაშვილი ცდილობს ზეწოლას ჩვენს სარედაქციო დამოუკიდებლობაზე, ახალისებს ჩვენ მიმართ სიძულვილს და ძალადობას, რაც დასტურდება მის პოსტზე კომენტარებით. პაპუაშვილის ამ განცხადებას ,,პუბლიკის” თანამშრომლები აღვიქვამთ მუქარად”.

„ქართული ოცნების” პარლამენტის თავმჯდომარემ ფეისბუკის გვერდზე „პუბლიკას" მასალის ე.წ. სქრინი გამოაქვეყნა და დაწერა, რომ გამოცემა “სისხლის სამართლის დანაშაულს აანონსებს”.

თბილისში დაკავებულ აზერბაიჯანელ ჟურნალისტს, აფგან სადიგოვს საექსტრადაციო პატიმრობა კიდევ 3 თვით, მეორედ გაუხანგრძლივდა.

თბილისის საქალაქო სასამართლომ სადიგოვისთვის აღკვეთის ღონისძიების სახით შეფარდებული საექსტრადიციო პატიმრობა მეორედ 3 თვით 2024 წლის 1 ნოემბერს გაახანგრძლივა.

აფგან სადიგოვი ციხის სამედიცინო დაწესებულებაში 21 სექტემბრიდან, 133-ე დღეა შიმშილობს.

15 იანვარს თბილისის სააპელაციო სასამართლოს მოსამართლე დავით ახალბედაშვილმა არ დააკმაყოფილა აფგან სადიგოვის საჩივარიც, მისთვის ლტოლვილის ან ჰუმანიტარული სტატუსის მინიჭებაზე უარის შესახებ.

ამავე დღეს, „სოციალური სამართლიანობის ცენტრმა“ გაავრცელა ინფორმაცია, რომ სტრასბურგის სასამართლომ საქართველოს აფგან სადიგოვის აზერბაიჯანში ექსტრადიცია აუკრძალა.

აფგან სადიგოვს თბილისის საქალაქო სასამართლომ 3-თვიანი საექსტრადიციო პატიმრობა 4 აგვისტოს შეუფარდა. ჟურნალისტი წინა დღეს, 3 აგვისტოს, შემდგომი ექსტრადირების მიზნით, ცენტრალური კრიმინალური პოლიციის დეპარტამენტმა დააკავა. 

აზერბაიჯანელი ჟურნალისტი საქართველოში 2023 წლის 24 დეკემბრიდან იმყოფება და მას საქართველოს იუსტიციის სამინისტროს მიერ გაცემული დროებითი ბინადრობის მოწმობა აქვს. აფგან სადიგოვი ონლაინ მედია “Azel.Tv”-ის მთავარი რედაქტორია. 

„ბათუმელებისა“ და „ნეტგაზეთის“ დამფუძნებლისა და დირექტორის ადვოკატის, მაია მწარიაშვილის თქმით, მზია ამაღლობელის ჯანმრთელობის მდგომარების შესახებ, რომელიც მე-20 დღეა შიმშილობს, „სავალალოდ ცოტა დოკუმენტაცია“ აქვთ და სისხლის საერთო ანალიზის გარდა, მისთვის სხვა კვლევა არ ჩაუტარებიათ.

„ჯერ რაც გვაქვს, ესაა მხოლოდ ერთხელ გაკეთებული სისხლის საერთო ანალიზი, 21 იანვარს. წარმოგიდგენიათ, ადამიანი შიმშილობს, დღეს მე-20 დღეა და მხოლოდ ერთი ანალიზია, რაც ჩაგვაბარა სახალხო დამცველმა, სისხლის საერთო ანალიზი. მეტი არაფერი კვლევა არ არსებობს, ყოველ შემთხვევაში 27 რიცხვის ჩათვლით. ინფორმაციის დონეზე ვიცით, რომ კიდევ გაუკეთეს საერთო ანალიზი, 28 იანვარს, მაგრამ ჯერჯერობით არაფერ სერიოზულ კვლევებზე საუბარი არაა“. 

დღეს, 31 იანვარს, პენიტენციურ დაწესებულებაში ამაღლობელი მოინახულეს სახალხო დამცველის წარმომადგენლებმა, მათ შორის ექიმმაც. ომბუდსმენის განცხადებით,  ჟურნალისტის ჯანმრთელობის მდგომარეობა ამ ეტაპზე დამაკმაყოფილებელია, უტარდება სამედიცინო კვლევები და იმყოფება ინტენსიური სამედიცინო მეთვალყურეობის ქვეშ.

„ამავდროულად, უნდა აღინიშნოს, რომ მას დაკავებამდე ჰქონდა ჯანმრთელობის კონკრეტული პრობლემები და შიმშილობის ფონზე არსებობს მისი გართულების რისკი“.

ომბუდსმენის აპარატი კონსილიუმის შექმნასთან დაკავშირებულ კითხვებსაც ეხმაურება და წერს, რომ „განიხილავს, კანონმდებლობით მისთვის მინიჭებული მანდატის ფარგლებში, დამატებითი სპეციალისტების მოწვევის საკითხს, ასეთის  აუცილებლობის გამოვლენის შემთხვევაში“. 

,,ბათუმელებისა“ და ,,ნეტგაზეთის" დამფუძნებელსა და დირექტორს მოსამართლე ნინო სახელაშვილმა აღკვეთის ღონისძიების სახით წინასწარი პატიმრობა 14 იანვარს შეუფარდა. 

მზია ამაღლობელი 11-12 იანვარს ბათუმის პოლიციის მთავარ სამმართველოსთან ორჯერ დააკავეს. ამაღლობელი პოლიციამ პირველად კედელზე იმ სტიკერის გაკვრის გამო დააკავა, რომელზეც „გაიფიცე“ ეწერა, მოგვიანებით ის ხელწერილის საფუძველზე გაათავისუფლეს, თუმცა, მალევე მეორედ ბათუმის პოლიციის უფროსისთვის სილის გაწნის გამო დააკავეს.

ამაღლობელთან ადვოკატებს რამდენიმე საათის განმავლობაში არ უშვებდნენ. სახალხო დამცველის წარმომადგენელს კი მონახულობის დროს მან უთხრა, რომ არასათანადოდ მოეპყრნენ.

„ბათუმებელის“ ინფორმაციით, პირველი დაკავების შემდეგ აჭარის პოლიციის დეპარტამენტიდან გამოსულ მზია ამაღლობელს ახლობლები დახვდნენ, რომლებიც სამმართველოსთან მისი დაკავების შემდეგ მივიდნენ:

„მზია ამაღლობელი მის საგულშემატკივროდ მისულ ადამიანებს ესაუბრებოდა, რა დროსაც პოლიციამ დაკავების ახალი ტალღა დაიწყო. უწყვეტ, ლაივ კადრებში ჩანს, რომ პოლიციამ უმიზეზოდ დააკავა ჯერ ერთი პირი, შემდეგ კი მეორე. ორივე დაკავებული მზია ამაღლობელის ახლობლები იყვნენ.

პოლიციის მხრიდან პროვოკაციული ქმედებების გამო აქციის მონაწილეებსა და პოლიციას შორის დაპირისპირება დაიწყო, დაიწყო ჭყლეტა და სწორედ ამ დროს დააკავეს მზია ამაღლობელი“.

როგორც გამოცემა წერს, მზია ამაღლობელის დაკავების პროცესში ბათუმის პოლიციის უფროსი, ირაკლი დგებუაძე პირადად მონაწილებდა. „ბათუმელების“ მიერ გავრცელებულ ვიდეოში დგებუაძე ამაღლობელის შესახებ ამბობს: „სისხლით... ბო*იშვილი ვიყო სისხლით დავიჭერ... ამას მოვუ**ნავ დედის მუ*ელს“.

„საქართველოს ახალგაზრდა იურისტთა ასოციაციის“ ინფორმაციით, „მისი[მზია ამაღლობელის] დაკავების შემდგომ, ირაკლი დგებუაძე აყენებდა სიტყვიერ შეურაცხყოფას ხოლო შემდგომ, პოლიციის განყოფილებაში რამდენჯერმე შეეცადა მას ფიზიკურად გასწორებოდა, თუმცა, პოლიციის სხვა თანამშრომლებმა შეძლეს ირაკლი დგებუაძის შეკავება და მისი ოთახიდან გაყვანა. ირაკლი დგებუაძე რამდენჯერმე შევიდა ოთახში და აგრძელებდა აგრესიულ მოპყრობას მის მიმართ, ერთ-ერთი ასეთი შესვლისას, მან მზია ამაღლობელს სახეში შეაფურთხა. ასევე, მისი ბრაძანების შესაბამისად, მზია ამაღლობელს გარკვეული დროის განმავლობაში არ ეძლეოდა წყლის დალევის  და საპირფარეშოთი სარგებლობის საშუალება“.

სპეციალურ საგამოძიებო სამსახურს მზია ამაღლობელისთვის დაზარალებულის სტატუსი ამ დრომდე არ მიუნიჭებია, აჭარის სამმართველოში გამოძიება კი, „საქართველოს შინაგან საქმეთა სამინისტროს ცალკეული თანამშრომლების მხრიდან ბათუმში გამართული საპროტესტო აქციაზე დაკავებული პირების მიმართ, სამსახურებრივი უფლებამოსილების ძალადობით გადამეტების შესაძლო ფაქტებზე“ მიმდინარეობს. 

მზია ამაღლობელის წინააღმდეგ გამოძიება სისხლის სამართლის კოდექსის 353-ე პრიმა მუხლის პირველი ნაწილით დაიწყო, რაც პოლიციელზე თავდასხმას გულისხმობს. „ბათუმელების“ დირექტორს 4-დან 7 წლამდე პატიმრობა ემუქრება. 

„მედიის ადვოკატირების კოალიცია“ საზოგადოებრივი მაუწყებლის მიერ კონსტიტუციური და საკანონმდებლო ვალდებულებების სისტემატური დარღვევის გამო ღრმა შეშფოთებას გამოთქვამს.

კოალიციის განცხადებით, საზოგადოებრივი მაუწყებელი, რომელიც „ქართული ოცნების” აშკარა გავლენის ქვეშ იმყოფება, ქვეყანაში მიმდინარე მოვლენების ობიექტურ და სრულფასოვან გაშუქებას ვერ უზრუნველყოფს. 

„ეს გავლენა განსაკუთრებით თვალსაჩინოა მაუწყებლის გენერალური დირექტორის, თინათინ ბერძენიშვილისა და სამეურვეო საბჭოს თავმჯდომარის, ვასილ მაღლაფერიძის საქმიანობისას.

საზოგადოებრივი მაუწყებლის მიკერძოებული საქმიანობა განსაკუთრებით საგანგაშოა დღეს, როდესაც ქვეყანაში უმნიშვნელოვანესი პოლიტიკური პროცესები მიმდინარეობს. მთელი ქვეყნის მასშტაბით მოსახლეობა უწყვეტ საპროტესტო აქციებს მართავს “ქართული ოცნების” მიერ მიტაცებული არჩევნების, წამების, მასობრივი ძალადობის, მათ შორის მედიის წარმომადგენლების წინააღმდეგ განხორციელებული ქმედებებისა და პოლიტიკური პატიმრების გამო. ამ კრიტიკულ პერიოდში მაუწყებლის საინფორმაციო პოლიტიკა მიზანმიმართულად უგულებელყოფს საზოგადოებისთვის მნიშვნელოვანი მოვლენების გაშუქებას და ცხადად წარმოაჩენს “ქართული ოცნების” მიმართ აშკარა მიკერძოებას.

საზოგადოებრივი მაუწყებელი უხეშად არღვევს როგორც საქართველოს კანონმდებლობას, ისე წამყვან საერთაშორისო სტანდარტებსა და რეკომენდაციებს დამოუკიდებელი სარედაქციო პოლიტიკის, ანგარიშვალდებულებისა და მედია პლურალიზმის კუთხით. მაუწყებლის ხელმძღვანელობა სრულად უგულებელყოფს სამეურვეო საბჭოს და საკუთარი ჟურნალისტების ნაწილისა და საზოგადოების ლეგიტიმურ მოთხოვნას საზოგადოებრივ-პოლიტიკური დისკუსიის ფორმატების გაფართოების შესახებ. ”ქართული ოცნების” წინააღმდეგ მიმართული უწყვეტი პროტესტის პარალელურად, ყოველდღიური აქციები ტარდება საზოგადოებრივი მაუწყებლის შენობის წინაც. პროტესტი გამოწვეულია საზოგადოებრივი მაუწყებლის მიკერძოებული სარედაქციო პოლიტიკის წინააღმდეგ. საინიციატივო ჯგუფის განმარტებით, გასული წლის დეკემბრის თვეში საგანგებო ეთერის ფორმატში საზოგადოებისთვის მცირე საეთერო დროის მოპოვება შესაძლებელი გახდა, თუმცა მალევე საზოგადოებრივმა მაუწყებელმა მიცემული პირობა დაარღვია და სახალხო ეთერი არ აღადგინა. “ჩვენი მოთხოვნები უცვლელი რჩება, სახალხო ეთერთან ერთად მოვითხოვთ, არხის ხელმძღვანელობის გადადგომას, პოლიტპატიმრების განთავისუფლებას და ახალ არჩევნებს. თავისუფლება პოლიტპატიმრებს! თავისუფლება მზია ამაღლობელს!“ – ნათქვამია საინიციატივო ჯგუფის განცხადებაში, რომლითაც 29 იანვარს საზოგადოებრივი მაუწყებლის „პირველი არხის“ ძველ შენობასთან განგრძობითი პროტესტის ორი თვის აღსანიშნად აქცია დააანონსეს. 

სამეურვეო საბჭოს ნაწილი ცალსახად ემიჯნება საბჭოს თავმჯდომარის ვასიკო მაღლაფერიძისა და მისი მხარდამჭერი წევრების უსაფუძვლო კრიტიკას მაუწყებლის წინ მიმდინარე საპროტესტო აქციებთან დაკავშირებით. კრიტიკის საფუძველია ასევე ის ფაქტიც, რომ მაუწყებელი არ არის სოლიდარული კოლეგა-ჟურნალისტების მიმართ, ამ შემთხვევაში კი უკანონო წინასწარ პატიმრობაში მყოფი მზია ამაღლობელის, რომელიც უკვე 18 დღე შიმშილობს. საზოგადოებრივი მაუწყებლის  მიკერძოებული სარედაქციო პოლიტიკის გარდა თვითონ საბჭოს წევრებისათვისაც კი პასუხგაუცემელია სერიოზული კითხვები დაკავშირებული მაუწყებლის მართვასთან, კერძოდ რა თანხები იხარჯება მაუწყებლის პროგრამების განსახორციელებლად, როგორ გამოიყურება სამაუწყებლო სეზონის გეგმაზე, რომელი გადაცემები იგეგმება ეთერში, რატომ არ ფუნქციონირებს დღის ეთერი, რა პრინციპით ნაწილდება ხელფასები, რა მექანიზმებით რეგულირდება შიდა ინტერესთა კონფლიქტები, აღნიშნულია განცხადებაში. 

არსებულ ვითარებაში გადაუდებელ აუცილებლობას წარმოადგენს მაუწყებლის ხელმძღვანელი პირების დაუყოვნებლივი გადადგომა და მათ ნაცვლად მიუკერძოებელი, პროფესიონალი პირების შერჩევა. აუცილებელია ცენზურის ნებისმიერი ფორმის აღმოფხვრა და ჟურნალისტების პროფესიული დამოუკიდებლობის სრული უზრუნველყოფა. ასევე მნიშვნელოვანია საზოგადოების, სამეურვეო საბჭოსა და თანამშრომელთა ნაწილის სამართლიანი მოთხოვნების სათანადო გათვალისწინება პროგრამული პოლიტიკის შემუშავებისას.

საზოგადოებრივი მაუწყებლის არსებული მდგომარეობა საფრთხეს უქმნის არა მხოლოდ მედიის თავისუფლებას, არამედ მთლიანად დემოკრატიულ პროცესს საქართველოში“, - ვკითხულობთ განცხადებაში.

„მედიის ადვოკატირების კოალიცია“ ადამიანის უფლებების დამცველ და მედიის საკითხებზე მომუშავე 17 ორგანიზაციას აერთიანებს.