„ევროპის ფონდმა“ ჯილდოს - „საგამოძიებო ჟურნალისტიკა ცვლილებებისათვის“ 2024 წლის გამარჯვებულები დაასახელა. 

ფონდის განცხადებით, ქართველი გამომძიებელი ჟურნალისტების მხარდაჭერისა და წახალისებისათვის, ვისაც მნიშვნელოვანი საკითხების გასაშუქებლად ხშირად სახიფათო და მტრულ გარემოში უწევთ მუშაობა, „ევროპის ფონდმა“ საგამოძიებო ჟურნალისტიკის ჯილდო დააწესა. 

„ჯილდო მიზნად ისახავს გამოავლინოს და წაახალისოს ის ჟურნალისტები და მედია საშუალებები, რომლებმაც არაერთი საჭირბოროტო საკითხი გამოააშკარავეს და ამავდროულად, ბიძგი მისცეს ფართო საზოგადოებრივ მობილიზაციას პასუხისმგებელი პირების ანგარიშვალდებულების მოთხოვნით, ან მიაღწიეს სხვა მნიშვნელოვან ცვლილებებს საქართველოს მოქალაქეთა საკეთილდღეოდ“.

2024  წლის გამარჯვებული ავტორები:

ჯილდო საუკეთესო ჟურნალისტური გამოძიებისათვის გადაეცა გელა მთივლიშვილს ფილმისთვის - „დანაშაული შოვში“

„მთის ამბების“ ამ უმნიშვნელოვანესმა ჟურნალისტურმა გამოძიებამ წარმოაჩინა სამსახურეობრივი გულგრილობის დამღუპველი შედეგები და დაადგინა, რომ ბუნებრივი კატასტროფა შოვში, რომელსაც მრავალი ადამიანის სიცოცხლე ემსხვერპლა, პროგნოზირებადი იყო; ამის შესახებ ინფორმაცია კი ათწლეულების განმავლობაში არსებობდა.  დოკუმენტების, გეოლოგიური რუკების და საექსპერტო კვლევების ზედმიწევნით შესწავლის შემდეგ, მთის ამბებმა გამოავლინა, რომ ხელისუფლების უმოქმედობის და დანაშაულებრივი გულგილობის გამო, საკურორტო ზონას ევაკუაციის გეგმა, უსაფრთხოების ზომები და ადეკვატური ინფრასტრუქტურა არ გააჩნდა; სრულად არ იყო მდინარე ბუბაზე დამცავი ჯებირი აგებული. სტიქიიდან ყველაზე მნიშვნელოვანი პირველი საათების განმავლობაში, სამაშველო ოპერაციები დაყოვნებით და არაკოორდინირებულად მიმდინარეობდა, მაშველებს არ ჰქონდათ სათანადო აღჭურვილობა, რათა სტიქიის შედეგებს გამკლავებოდნენ. ეს გაბედული ჟურნალისტური გამოძიება აკისრებს პასუხისმგებლობას ხელისუფლებაში მყოფებს და ამავდროულად, გვიამბობს იმ ტრაგედიის მსხვერპლთა სათქმელს, რომლის  თავიდან აცილებაც შესაძლებელი იყო.

მეორე ჯილდო გადაეცა აიდან იუსუფსა და ნათია მიქელაძეს ჟურნალისტური გამოძიებისათვის - “სანქციებისგან თავის არიდება: როგორ მონაწილეობს საქართველო რუსეთის სამხედრო მომარაგების ჯაჭვში” (აიფაქტი)

ჟურნალისტური გამოძიებით გამოვლინდა რუსეთისთვის სანქცირებული საქონლის მიწოდების ფარული სქემა. გამოძიებამ აჩვენა, რომ 2022 წელს დაწესებული საერთაშორისო სანქციების მიუხედავად, ორმაგი დანიშნულების ნივთები, როგორიცაა დრონები, GPS მოწყობილობები და კომპიუტერული ჩიპები, კვლავ მიეწოდებოდა რუსეთს ისეთი ქვეყნების გავლით, როგორიცაა საქართველო, სომხეთი, აზერბაიჯანი, ასევე ცენტრალური აზიის ქვეყნები. აღმოჩნდა, რომ 2023-2024 წლებში, 10,7 მილიონ დოლარად შეფასებული ეს კრიტიკულად მნიშნველოვანი მარაგი მიემართებოდა რუსეთის სამხედრო ძალისხმევაზე უკრაინასთან მიმდინარე ომში. გამკაცრებულ კონტროლთან დაკავშირებით საქართველოს შემოსავლების სამსახურის მიერ გაკეთებული განცხადებების საპირისპიროდ, IFact-ის ჟურნალისტურმა გამოძიებამ გამოავლინა სანქციების აღუსრულებლობის შემთხვევები. აღნიშნული ნამუშევარი წარმოაჩენს გლობალური ვაჭრობისა და ანგარიშვალდებულებასთან  დაკავშირებულ სირთულეებს.

მესამე ჯილდო გადაეცა TV პირველის ჟურნალისტს, მაკა ჩიხლაძეს და ასევე,  სტუდია მონიტორის ჟურნალისტებს, ზურაბ მოდებაძესა და ნინო ზურიაშვილს.

მაკა ჩიხლაძის ჟურნალისტურმა გამოძიებამ გამოააშკარავა სახელმწიფო სახსრების  ბოროტად გამოყენების შემთხვევები და წარმოაჩინა, თუ როგორ იხარჯება სახელმწიფო ბიუჯეტიდან მილიონობით ლარი არარსებულ სამუშაოებზე დასაქმებული ფიზიკური პირების ანაზღაურებაში მთელი ქვეყნის მასშტაბით. გამოძიებამ აჩვენა, რომ მუნიციპალური არაკომერციული იურიდიული და საჯარო სამართლის სუბიექტების დასაქმებულთა რაოდენობა მნიშვნელოვნადაა გაზრდილი. ამ პიროვნებებს, რომლებიც ხშირად სამსახურშიც კი არ ჩნდებიან, სავარაუდოდ, მთავრობა პოლიტიკური მიზნებისთვის იყენებს, კერძოდ, საპროტესტო აქციებისას და ამომრჩეველთა მოსყიდვისთვის, რაც არჩევნების შედეგებზე გავლენის მოხდენის პოტენციური სტრატეგიას წარმოადგენს.

ზურაბ მოდებაძისა და ნინო ზურიაშვილის გამოძიებამ „სისტემა ხალხის წინააღმდეგ“ გამოავლინა თუ როგორ იყენებდა ხელისუფლება უკანონო დაკავებებს,  ე.წ. “უცხოური გავლენის აგენტების” კანონის წინააღმდეგ პროტესტის ჩასახშობად. ჟურნალისტურმა გამოძიებამ წარმოაჩინა პოლიციის მიერ ცრუ ჩვენებების საფუძველზე აქტიური მოქალაქეების, პოლიტიკოსების, ჟურნალისტებისა და უფლებადამცველების დაკავების შემთხვევები.  გამოძიებამ აჩვენა, თუ როგორ იყენებს ხელისუფლება დაკავებებს საზოგადოების დაშინებისა და გაჩუმებისათვის, რაც ერთგვარი მსუსხავი ეფექტია  საპროტესტო მოძრაობებზე. ამის პარალელურად კი, მოსამართლეები, რომლებიც ამ საქმეებს უძღვებიდნენ, უვადოდ დაინიშნენ.

ჟიურის განსაკუთრებული აღიარება დაიმსახურა სამხრეთის კარიბჭემ და მისმა ჟურნალისტებმა -  ნუკა სტეფნაძემ,  თაკო ფეიქრიშვილმა და თემო ინასარიძემ, მცირე ადგილობრივი მედიასაშუალების მიერ გაწეული გამორჩეული ძალისხმევისა და მონდომებისთვის. 

შეზღუდული რესურსებისა და რთული გარემოს მიუხედავად, ჟურნალისტებმა ჩაატარეს გამოძიებების შესანიშნავი სერია, რომლებმაც გამოააშკარავეს არაერთი დარღვევა, უფლებამოსილების ბოროტად გამოყენების, კორუფციის და საბიუჯეტო რესურსების არასათანადო ხარჯვის შემთხვევები. მათ მიერ გაწეულმა შრომამ გაახმოვანა ადგილობრივი თემების წინაშე მდგარი პრობლემები, რომლებიც სხვა შემთხვევაში საზოგადოებისათვის შეუმჩნეველი დარჩებოდა.

„ევროსაბჭოს ჟურნალისტთა უსაფრთხოების პლატფორმა“ (SJP) საქართველოში ჩატარებული 26 ოქტომბრის საპარლამენტო არჩევნების შესახებ განცხადებას ავრცელებს.

ორგანიზაციის განცხადებით, საპარლამენტო არჩევნების დღეს სულ მცირე 15 შემთხვევა დაფიქსირდა, რა დროსაც 22 ჟურნალისტსა და მედიის სხვა წარმომადგენლებს სიტყვიერი და ფიზიკური შეურაცხყოფა მიაყენეს, იყო დაშინების მცდელობაც. 

„ევროსაბჭოს ჟურნალისტთა უსაფრთხოების პლატფორმა“ ოფიციალურ განცხადებაში 10-მდე მედიასაშუალების წარმომადგენლების პროფესიულ საქმიანობაში ხელშეშლის შემთხვევებს აღწერს.

სპეციალური საგამოძიებო სამსახურის განცხადებით,2024 წლის 26 ოქტომბერს, ჟურნალისტების პროფესიულ საქმიანობაში უკანონოდ ხელის შეშლის შესაძლო ფაქტებთან დაკავშირებით, გამოძიება საქართველოს სისხლის სამართლის კოდექსის 154-ე მუხლის პირველი ნაწილით მიმდინარეობს.

„გამოძიების დაწყებას საფუძვლად დაედო მედიაომბუდსმენიდან, შინაგან საქმეთა სამინისტროდან და სამსახურის ცხელ ხაზზე შემოსული შეტყობინებები, ასევე ჩატარებული გასაუბრებები, რომელიც საქართველოს სხვადასხვა რეგიონში ჟურნალისტებთან დაკავშირებულ 17 ინციდენტს შეეხებოდა. აღნიშნული ფაქტებიდან 13 შემთხვევა, შეტყობინების შინაარსიდან გამომდინარე არ შეიცავდა დანაშაულის ნიშნებს. მიუხედავად ამისა, თითოეულ ფაქტთან დაკავშირებით სპეციალური საგამოძიებო სამსახურის გამომძიებლები შეტყობინების შემოსვლისთანავე არაერთგზის დაუკავშირდნენ ჟურნალისტებსა და ოპერატორებს და მყისიერი სამართლებრივი რეაგირება მოახდინეს. ამ დროისთვის, საგამოძიებო ორგანოში, ინფორმაციის მოწოდების მიზნით, მხოლოდ 5 ჟურნალისტი და 1 ოპერატორი გამოცხადდა. სპეციალური საგამოძიებო სამსახურის  საქმეზე ატარებს ყველა საჭირო საგამოძიებო და საპროცესო მოქმედებას“, - ვკითხულობთ საგამოძიებო სამსახურის განცხადებაში.

საქართველოს პროკურატურის განცხადებით კი, პროკურატურაში, შინაგან საქმეთა სამინისტროსა და სპეციალურ საგამოძიებო სამსახურში წინასაარჩევნო პერიოდში და არჩევნების დღეს ჩადენილი სავარაუდო დანაშაულების ფაქტებზე, 47 სისხლის სამართლის საქმეზე მიმდინარეობს გამოძიება, მათ შორის ჟურნალისტური საქმიანობის ხელშეშლის კვალიფიკაციით.

„საქართველოს ჟურნალისტური ეთიკის ქარტიის“ განცხადებით, არჩევნების დღეს ჟურნალისტებსა და ოპერატორებს მაღალი საფრთხის შემცველ, ძალადობრივ გარემოში უწევდათ მუშაობა. 

„მათ მიმართ აგრესიას ავლენდნენ როგორც უშუალოდ უბანზე მყოფი პირები, მათ შორის, საუბნო საარჩევნო კომისიის წევრები და, ზოგ შემთხვევაში, საუბნო საარჩევნო კომისიის თავმჯდომარეები, „ქართული ოცნების“ პარტიული წარმომადგენლები, და დამკვირვებლები, ისე უბნის მიმდებარედ მობილიზებული, სავარაუდოდ, „ქართულ ოცნებასთან“ დაკავშირებული არაუფლებამოსილი პირები.

ჟურნალისტებსა და ოპერატორებს არაერთხელ მიაყენეს სიტყვიერი და ფიზიკური შეურაცხყოფა, დაუზიანეს აპარატურა. მათ აძევებდნენ საარჩევნო უბნებიდან, ზოგ შემთხვევაში, ძალის გამოყენებითაც, და არ აძლევდნენ უბნებსა თუ უბნების მიმდებარე ტერიტორიაზე გადაღების საშუალებას.

ზოგიერთ შემთხვევაში, ჟურნალისტებს არ  აძლევდნენ კომენტარს და მათ შეკითხვებს არ პასუხობდნენ საუბნო საარჩევნო კომისიის თავმჯდომარეები.

ჟურნალისტები და ოპერატორები ხდებოდნენ სამიზნე მაშინ, როცა ისეთი დარღვევების დოკუმენტირებას ცდილობდნენ, რაც ამომრჩევლის ნებაზე სხვადასხვა გზით ზემოქმედებას ასახავდა.

საუბნო და საოლქო საარჩევნო კომისიების ხელმძღვანელები მედიის წარმომადგენელთა უფლებების დარღვევის ფაქტებზე სათანადოდ არ რეაგირებდნენ. პოლიცია 112-ზე შესულ შეტყობინებებზე ხშირად ან საერთოდ არ რეაგირებდა, ან დროულად არ რეაგირებდა.

ჟურნალისტებს და ოპერატორებს არ ჰქონდათ განცდა, რომ პოლიცია მათ ძალადობისგან დაიცავდა. ზოგიერთ შემთხვევაში, მათ, მომეტებული საფრთხის გამო, უბნებზე მუშაობის შეწყვეტაც მოუხდათ.    

მედიის წარმომადგენელთა უფლებების დარღვევის სიხშირე და შემთხვევათა მსგავსება, ქარტიას აძლევს საფუძველს რომ დაასკვნას, რომ დამოუკიდებელი და კრიტიკული მედიასაშუალებების ჟურნალისტებისა და ოპერატორების მიმართ ძალადობას ჰქონდა სისტემური ხასიათი და ის იყო წახალისებული", - ვკითხულობთ ორგანიზაციის განცხადებაში. 

„საქართველოს ჟურნალისტური ეთიკის ქარტიის“ ინფორმაციით, ამ დროის მონაცემებით, 26 ოქტომბრის საპარლამენტო არჩევნების გაშუქებისას, მედიის 55 წარმომადგენლის უფლებები 33 შემთხვევაში დაირღვა. ქარტია სპეციალურ საგამოძიებო სამსახურს ამ შემთხვევებით დაინტერესებისა და მათი სწრაფად და ეფექტურად გამოიძიებისკენ მოუწოდებს.  

„საქართველოს ჟურნალისტური ეთიკის ქარტია“ წევრობაზე დაფუძნებული დამოუკიდებელი ორგანიზაციაა, რომლის ხელმომწერიც 300-ზე მეტი ჟურნალისტია.

„მედიაომბუდსმენი“ 2024 წლის 26 ოქტომბრის საპარლამენტო არჩევნების დღეს მედიის სამუშაო პირობებს აფასებს. ანგარიშის მიხედვით, არჩევნების გაშუქებისას ჟურნალისტებისა და ოპერატორების სამუშაო გარემო გამოირჩეოდა აგრესიით, ზეწოლით, მუქარითა და პროფესიულ საქმიანობაში ხელშეშლის ფაქტებით. კრიტიკული მედიის წარმომადგენლებისთვის კენჭისყრასთან დაკავშირებული ინფორმაციის მიღებისა და გავრცელების პროცესი კი, უკიდურესად მძიმე და საფრთხის შემცველი იყო. 

„საარჩევნო უბნებში, კენჭისყრის შენობის შესასვლელებში, მიმდებარედ (მათ შორის, კანონით აკრძალულ მანძილზე) მობილიზებული „ქართული ოცნების“ აგრესიული ჯგუფები. ისინი მედიის წარმომადგენლებს აყენებდნენ ფიზიკურ და სიტყვიერ შეურაცხყოფას, აგინებდნენ. აგრესია განსაკუთრებით საშიში ხდებოდა ამომრჩეველზე ზეწოლის, კონტროლის, მოსყიდვის ფაქტების დოკუმენტირებისა და დაფიქსირების მცდელობისას. ჟურნალისტების უმრავლესობა საუბრობს აგრესიაზე საარჩევნო უბნებთან მობილიზებული ე.წ. “ძველი ბიჭებისგან”". 

როგორც „მედიაომბუდსმენი“ წერს, უსაფრთხოების ზომების გამო, მედიის წარმომადგენლები გადაღების ადგილს ტოვებდნენ. 

„ცხელი ხაზის, 112-ის მეშვეობით არაერთი შეტყობინების მიუხედავად, გამოძახების უმრავლეს შემთხვევაში, პოლიცია ადგილზე არ მოვიდა, საუბნო თუ საოლქო საარჩევნო კომისიების ხელმძღვანელები არ რეაგირებდნენ ხელშეშლაზე, რის გამოც მთელ რიგ უბნებზე მედიისთვის მუშაობა შეუძლებელი აღმოჩნდა“.

„მედიაომბუდსმენის“ ანგარიშის მიხედვით, ჟურნალისტები და ოპერატორები ამბობენ, რომ კრიტიკულ ჟურნალისტებსა და დამკვირვებლებზე ძალადობა იყო წახალისებული. თბილისის უბნებზე კი, ზოგიერთი კომისიის თავმჯდომარე ან არ აძლევდა ინფორმაციას ჟურნალისტებს, ან თავს არიდებდა და კომენტარს გაურბოდა, ვიდრე მიმოწერა ან სატელეფონო ზარი არ ექნებოდათ და ნებართვას არ მიიღებდა. ჟურნალისტებს ემუქრებოდნენ უბნიდან გაძევებითაც. იყო შემთხვევაც, როცა ჟურნალისტს ეუბნებოდნენ, რომ უბანზე გადაღების უფლება საერთოდ არ ჰქონდა.

როგორც ორგანიზაცია წერს, აგრესია კენჭისყრის შემდეგაც არ შეწყვეტილა. „არჩევნების შემდეგ, ლაშა ტალახაძემ, "ქართული ოცნების" საარჩევნო სიის წევრმა და სპორტსმენმა, ჟურნალისტს, დიტო ბელქანიას პირადში მიწერა და შეურაცხყოფა მიაყენა“. 

“მედიაომბუდსმენმა” 25 და 26 ოქტომბერს საპარლამენტო არჩევნების გაშუქებისას მედიის წარმომადგენლების უფლებების დარღვევის 30 შემთხვევა დააფიქსირა. დანაშაულებრივი ქმედებებით კი, მინიმუმ 50 ჟურნალისტის და ოპერატორის უფლება დაირღვა. ამ ფაქტების შესახებ ორგანიზაცია სპეციალურ საგამოძიებო სამსახურს ეტაპობრივად ატყობინებდა. ჟურნალისტების და ოპერატორების ნაწილი გამოკითხვაზე უკვე დაიბარეს.

„მედიის წარმომადგენლებთან ერთად, ირღვეოდა არჩევნებით დაინტერესებული მოქალაქეების უფლება მიეღოთ და გაევრცელებინათ ინფორმაცია საარჩევნო უბნებთან განვითარებული პროცესების შესახებ“.

ორგანიზაცია აღნიშნავს, რომ სახელმწიფოს ეკისრება ვალდებულება, ეფექტიანად გამოიძიოს ჟურნალისტების მიმართ ჩადენილი ძალადობრივი ქმედებები და მოახდინოს შესაძლო დანაშაულებრივი ქმედების განმახორციელებელი პირების იდენტიფიცირება. სპეციალური საგამოძიებო სამსახური ვალდებულია თითოეულ ფაქტთან დაკავშირებით დაიწყოს გამოძიება.

„არჩევნების დღეს მინიმუმ 50 ჟურნალისტზე და ოპერატორზე თავდასხმა და ხელშეშლა ქმნის გარემოს, სადაც მოქალაქეები ვერ იღებენ საჭირო ინფორმაციას და მოაკლდებიან შესაძლებლობას სრულად იყვნენ ჩართული პოლიტიკურ პროცესებში. 

ეს რეალობა ხელს უწყობს საზოგადოებაში თვითცენზურის გაძლიერებას და ჟურნალისტებზე, ოპერატორებსა და მედიამენეჯერებზე მორალურ და პროფესიულ ზეწოლას, რაც კითხვის ნიშნის ქვეშ აყენებს ქვეყნის დემოკრატიული პროცესების კეთილსინდისიერებას“, - წერს „მედიაომბუდსმენი“.

კენჭისყრის დღეს მომხდარი ხელშეშლების ფაქტების შესახებ დეტალურად ნახეთ

26 ოქტომბერს საქართველოს საპარლამენტო არჩევნები გაიმართა. კენჭისყრის დღეს საარჩევნო უბნებზე მუშაობისას ჟურნალისტებს პროფესიულ საქმიანობაში ხელი 22 შემთხვევაში შეეშალათ. უბნებთან მყოფი პირები სიტყვიერ და ფიზიკურ შეურაცხყოფას ძირითადად „TV პირველის“, „მთავარი არხისა“ და „ფორმულას“ გადამღებ ჯგუფებს აყენებდნენ. ჟურნალისტებს ხელს უშლიდნენ საარჩევნო კომისიის წევრებიც. 

არჩევნების დღეს პროფესიული მოვალეობის შესრულებისას ხელი მედიის 40-მდე წარმომადგენელს შეეშალა. 

ჟურნალისტებისთვის ხელის შეშლის შემთხვევები საარჩევნო უბნებზე

• 09:09 - ტელეკომპანია „ფორმულამ“ გაავრცელა კადრები, სადაც ჩანს, ლაგოდეხში, სოფელ ჭიაურში სიტყვიერი შეურაცხყოფა მიაყენეს და გადაღებაში ხელი შეუშალეს ტელეკომპანიის ჟურნალისტს, დავით ჭაბაშვილს. ამავე ვიდეოში ჩანს, რომ პროფესიული მოვალეობის შესრულებაში ხელს უშლიდნენ „ლაგოდეხის ტელევიზიის“ ჟურნალისტს, ნიკა ბურჭულაძეს.
• 09:39 - „TV პირველმა“ გამოაქვეყნა ვიდეო მასალა, სადაც ჩანს, რომ ჟურნალისტ გვანცა ჩხიკვაძეს ქუთაისის 64-ე უბანზე პროფესიულ საქმიანობაში ხელი შეეშალა. სავარაუდოდ ქართული ოცნების აქტივისტმა, რომელიც ჟურნალისტის თქმით, ადამიანებს პირადობის მოწმობებს ართმევდა, მის წინააღმდეგ დაწერილი საჩივარი პირდაპირ ეთერში დახია და ჟურნალისტს ჯიბეში ჩაუდო. მან ჟურნალისტს „ქვეყნის მტრებო“ და „მკვლელები“ უწოდა.
• 10:31 - „TV პირველის“ ინფორმაციით, ბათუმის მე-5 საარჩევნო უბანთან მობილიზებულმა „ქართული ოცნების“ კოორდინატორებმა ტელეკომპანიის ჟურნალისტს, თამთა დოლენჯაშვილს, რომელიც მათ მიკროავტობუსში შეკითხვების დასასმელად ავიდა, კარი ჩაუკეტეს და გარეთ არ უშვებდნენ. შემდეგ კი, სავარაუდოდ კოორდინატორების უფროსმა, ედუარდ შარაძემ დოლენჯაშვილს უთხრა, რომ „სისხლის სამართლის დამნაშავედ წარსდგება“.
• 11:10 - „მთავარმა არხმა“ გაავრცელა ვიდეომასალა, სადაც ჩანს, რომ თბილისში, ისნის ერთ-ერთ საარჩევნო უბანზე „მთავარი არხისა“ და „ტვ პირველის“ ჟურნალისტებს, ქეთა ციცქიშვილს და მარიამ გაფრინდაშვილს უცხო პირი დაუპირისპირდა და დარბევით დაემუქრა. მანამდე კი, ჟურნალისტები საარჩევნო უბნიდანაც გააძევეს.
• 11:31 - მთის ამბები / საქართველოს ამბების დამფუძნებელმა და რედაქტორმა გელა მთივლიშვილმა სოციალურ ქსელში დაწერა, რომ ახმეტაში, მატნის მე-11 საარჩევნო უბანში თავს დაესხნენ, ტელეფონი წაართვეს და გადაღებაში ხელი შეუშალეს. 
• 11:50 - Cnews-მა გამოაქვეყნა, რომ ჟურნალისტს, გიგა გელხვიიძეს ქუთაისში 3 პირი ფიზიკურად გაუსწორდა.
• 11:56 - რადიო „მარნეულმა“ დაწერა, რომ მე-7 საარჩევნო უბანზე კომისიის თავმჯდომარე ჟურნალისტებს, ვლადიმერ ჩხიტუნიძესა და თიკო დავაძეს აგრესიული ტონით გადაღებას უკრძალავდა.
• 14:11- რადიო „მარნეულმა“ გაავრცელა ინფორმაცია, რომ მათ ჟურნალისტს, ვლადიმერ ჩხიტუნიძეს კომისიის თავმჯდომარე არ უშვებდა სოფელ სადახლოს 71-ე უბანზეც. საოლქო კომისიისთვის მიმართვის შემდეგ, თავმჯდომარემ ჟურნალისტი უბანზე დაუშვა.
• 14:17 - „TV პირველმა“ გაავრცელა ინფორმაცია, რომ მათ გადამღებ ჯგუფს: მარიამ მაკასარაშვილსა და ნუკრი ქაფიაშვილს კახეთში, ქვემო ხოდაშენში, თავს დაესხნენ და აპარატურა დაუმტვრიეს.
• „TV პირველის“ გადამღებ ჯგუფს [სოფო ნიაური და დავით ბერაძე] ხელი შეუშალეს ზუგდიდის მე-9 საარჩევნო უბანზეც. ჟურნალისტის თქმით, სპეციალური ბეიჯის ქონის მიუხედავად, კომისიის თამჯდომარე მათ გადაღების უფლებას არ აძლევდა და შენობაში არ უშვებდა.
• 14:31 - „მრავალკუთხედმა“ გამოაქვეყნა ვიდეომასალა, სადაც ჩანს, რომ წალენჯიხის 21-ე უბანზე „ქართული ოცნების“ წარმომადგენელი ლირა ღურწკაია მედიის წამომადგენელს, დიტო ბელქანიას  დაუპირისპირდა. 
• 14:35 - „რადიო თავისუფლებამ“ დაწერა, რომ რუსთავში, 33-ე საარჩევნო უბანზე მათ ჟურნალისტს, დავით მჭედლიძეს საქმიანობაში ხელი შეუშალეს.
• 14:50 - „მთავარმა არხმა“ გაავრცელა ინფორმაცია, რომ კახეთში თავს დაესხნენ ტელეკომპანიის გადამღებ ჯგუფს: ია გულიაშვილსა და ლევან დვალს.
• 15:02 - მთავარმა არხმა“ გამოაქვეყნა ვიდეო, სადაც ჩანს, რომ ბათუმის მე-17 საარჩევნო უბანზე შესვლის უფლებას არ აძლევდნენ „მთავარი არხისა“ [თეა ვაშალომიძე და ბაჩანა ოქროპირიძე] და „ფორმულას“ [თამარ თედიაშვილი და ლერი როგავა] გადამღებ ჯგუფებს. სავარაუდოდ, „ქართული ოცნებასთან“  დაკავშირებულმა პირებმა, რომლებიც უბანთან იყვნენ მობილიზებულები, ჟურნალისტებს პროვოკატორები უწოდეს და უთხრეს, რომ „სიტუაციის არევისთვის“ იყვნენ მისულები.
• 15:15 - „ფორმულამ“ გაავრცელა ვიდეომასალა, სადაც ჩანს, რომ მარნეულში, სადახლოს 69-ე უბანზე ჟურნალისტ თიკო ერაძეს პროფესიულ საქმიანობაში ხელი სავარაუდოდ კომისიის წევრებმა შეუშალეს.
• 16:00 - (დაახლოებით) დაუპირისპირდნენ „ფორმულას“ გადამღებ ჯგუფს ისნის მე-9 საარჩევნო უბანზე. ჟურნალისტ ნუცა ბახუტაშვილის თქმით, მას და მის ოპერატორს, გიგა აღდგომელაშვილს მიაყენეს სიტყვიერი შეურაცხყოფა და რომ არა პოლიციელების მხრიდან დროული რეაგირება, ის გადაიზრდებოდა ფიზიკურ დაპირისპირებაში.
• 16:26 - „პუბლიკამ“ გაავრცელა ვიდეო მასალა, სადაც ჩანს, თუ როგორ მიაყენეს სიტყვიერი შეურაცხყოფა ონლაინ გამოცემის რეპორტიორს, მინდია გაბაძეს გლდანში, 59-ე საარჩევნო უბანთან. გაბაძესთან ერთად სიტყვიერი შეურაცხყოფა მიაყენეს „რადიო თავისუფლების“ ჟურნალისტს, თამუნა ჩქარეულს და „პუბლიკასთვის“ მომუშავე ფრილანსერ ჟურნალისტს, შაკო ბრეგაძეს. 
• გლდანში, მე-60 საარჩევნო უბანზე სიტყვიერი შეურაცხყოფა მიაყენეს და ჟურნალისტურ საქმიანობაში ხელი შეუშალეს „მთავარი არხის“ ჟურნალისტს, ნინა მაჩაბელს და ოპერატორს, გიორგი ჩანტლაძეს.
• გლდანის მე-60 საარჩევნო უბანთან მუშაობის დროს ხელი შეეშალა „TV პირველის“ გადამღებ ჯგუფსაც, მაკა ანდრონიკაშვილსა და გიორგი შეწირულს. ჟურნალისტის თქმით, მათ უბნიდან გაძევებით ემუქრებოდნენ, ხელშეშლის პროცესში კი ჩართულნი იყვნენ როგორც საოლქო კომისიის წარმომადგენლები, ისე „ქართული ოცნების“ დამკვირვებლები.
• 17:26 - „TV პირველმა“ გამოაქვეყნა, რომ მარნეულის მე-4 საარჩევნო უბანთან „TV პირველის“ გადამღებ ჯგუფს პროფესიულ საქმიანობაში ხელი შეუშალეს. უბანთან მობილიზებულმა პირებმა სიტყვიერი და ფიზიკური შეურაცხყოფა მიაყენეს ჟურნალისტ ნინო ელიკაშვილს და მის ოპერატორს, ირაკლი მურმანიშვილი. „TV პირველის“ გადამღებ ჯგუფს უბნის დატოვებისკენ მოუწოდებდა „ქართული ოცნების“ საარჩევნო შტაბის უფროსი, ამირან გიორგაძე.  
• 17:47 - „TV პირველმა“ გაავრცელა ვიდეოკადრები, სადაც ჩანს, რომ ვაზისუბანში ტელეკომპანიის ოპერატორს თავს დაესხნენ და კამერა დაუზიანეს. შემთხვევა, სავარაუდოდ, 53-ე უბნის მიმდებარედ მოხდა, სადაც ტელეკომპანიის ჟურნალისტი, მარიამ გაფრინდაშვილი და ოპერატორი პაპუნა ხაჩიძე მობილიზებას იღებდნენ. 
• 20:24 - „ფორმულამ“ გამოაქვეყნა, რომ ქუთაისის 49-ე საარჩევნო უბანზე ტელეკომპანიის ჟურნალისტს, მარი წაქაძეს საარჩევნო კომისიის წევრებმა ოქმი შეუდგინეს და საარჩევნო უბნიდან გააძევეს.

პრორუსულმა ტელევიზიამ - „ალტ-ინფო“ ფინანსური პრობლემების გამო მაუწყებლობა შეწყვიტა. ამის შესახებ „ალტ-ანალიტიკის“ სპეციალური ეთერის ერთ-ერთმა წამყვანმა, გიორგი ქარდავამ განაცხადა:

„ჩვენი ტელევიზია ამ ფორმატით ვერ გააგრძელებს მუშაობას იმ მარტივი მიზეზთა გამო, რომ თქვენ იცით, თავიდან ბოლომდე ჩვენი ტელევიზია იყო თქვენი დახმარებით, თქვენი ფინანსების დახმარებით. პირველი თეთრიდან ბოლო თეთრამდე ეს ტელევიზია და, ზოგადად, ჩვენი პარტიული ინფრასტრუქტურა არსებობს და არსებობდა ჩვეულებრივი ხალხის, ჩვენი მაყურებლის, თანამებრძოლის შემოწირულობებით და სახსრებით. ცხადია, ჩვენ ვერ ვეტყვით და მოვუწოდებთ მაყურებლებს, რომ მუდმივ რეჟიმში შეინახონ ამხელა ტელევიზია. ეს ძალიან რთულია. რესურსებიდან გამომდინარე წარმოუდგენელია. ამიტომ, მოგვიწევს გარკვეული რეორგანიზაცია და მაუწყებლობის შეცვლა“.

გიორგი ქარდავას თქმით, თუ რა ფორმატით გააგრძელებენ „პოლიტიკურ და საინფორმაციო ბრძოლას“, ჯერ ინფორმაცია არ აქვთ.

გადაწყვეტილებას „კონსერვატიული მოძრაობის“ ლიდერები არჩევნებში მიღებული დაბალი შედეგით ხსნიან. 26 ოქტომბრის საპარლამენტო არჩევნებში „კონსერვატიული მოძრაობა“ „პატრიოტთა ალიანსთან“ ერთად მონაწილეობდა. „ცესკოს“ მონაცემებით, მათ 5%-იანი ბარიერი ვერ გადალახეს.

აშშ-ის ხაზინის დეპარტამენტის მიერ 16 სექტემბერს დასანქცირებულ პირებს შორის პრორუსულ  ორგანიზაცია „ალტ-ინფოსთან“ დაკავშირებული ზურა მახარაძე და კონსტანტინე მორგოშიაც არიან. ასევე, 20 სექტემბერს ცნობილი გახდა, რომ myvideo.ge-მ „ალტ-ინფო“ არხების ჩამონათვალიდან ამოიღო.

26 ოქტომბერს საქართველოს საპარლამენტო არჩევნები გაიმართა. კენჭისყრის დღეს საარჩევნო უბნებთან მუშაობისას პროფესიულ საქმიანობაში ჟურნალისტებს ხელი 16 შემთხვევაში შეეშალათ. უბნებთან მყოფი პირები სიტყვიერ და ფიზიკურ შეურაცხყოფას ძირითადად „TV პირველის“, „მთავარი არხისა“ და „ფორმულას“ გადამღებ ჯგუფებს აყენებდნენ. არჩევნების დღეს ჯამში მედიის 25 წარმომადგენელი დაზარალდა.

ჟურნალისტებისთვის ხელის შეშლის შემთხვევები საარჩევნო უბნებზე

• 09:09 - ტელეკომპანია „ფორმულამ“ გაავრცელა კადრები, სადაც ჩანს, ლაგოდეხში, სოფელ ჭიაურში სიტყვიერი შეურაცხყოფა მიაყენეს და გადაღებაში ხელი შეუშალეს ტელეკომპანიის ჟურნალისტს, დავით ჭაბაშვილს.
• 10:31 - „TV პირველის“ ინფორმაციით, ბათუმის მე-5 საარჩევნო უბანთან მობილიზებულმა „ქართული ოცნების“ კოორდინატორებმა ტელეკომპანიის ჟურნალისტს, თამთა დოლენჯაშვილს, რომელიც მათ მიკროავტობუსში შეკითხვების დასასმელად ავიდა, კარი ჩაუკეტეს და გარეთ არ უშვებდნენ. შემდეგ კი, სავარაუდოდ კოორდინატორების უფროსმა, ედუარდ შარაძემ დოლენჯაშვილს უთხრა, რომ „სისხლის სამართლის დამნაშავედ წარსდგება“.
• 11:10 - „მთავარმა არხმა“ გაავრცელა ვიდეომასალა, სადაც ჩანს, რომ თბილისში, ისნის ერთ-ერთ საარჩევნო უბანზე „მთავარი არხისა“ და „ტვ პირველის“ ჟურნალისტებს, ქეთა ციცქიშვილს და მარიამ გაფრინდაშვილს უცხო პირი დაუპირისპირდა და დარბევით დაემუქრა. მანამდე კი, ჟურნალისტები საარჩევნო უბნიდანაც გააძევეს.
• 11:31 - მთის ამბები / საქართველოს ამბების დამფუძნებელმა და რედაქტორმა გელა მთივლიშვილმა სოციალურ ქსელში დაწერა, რომ ახმეტაში, მატნის მე-11 საარჩევნო უბანში თავს დაესხნენ, ტელეფონი წაართვეს და გადაღებაში ხელი შეუშალეს.
• 11:50 - Cnews-მა გამოაქვეყნა, რომ ჟურნალისტს, გიგა გელხვიიძეს ქუთაისში 3 პირი ფიზიკურად გაუსწორდა.
• 11:56 - რადიო „მარნეულმა“ დაწერა, რომ მე-7 საარჩევნო უბანზე კომისიის თავმჯდომარე ჟურნალისტებს, ვლადიმერ ჩხიტუნიძესა და თიკო დავაძეს აგრესიული ტონით გადაღებას უკრძალავდა.
• 14:11- რადიო „მარნეულმა“ გაავრცელა ინფორმაცია, რომ მათ ჟურნალისტს კომისიის თავმჯდომარე არ უშვებდა სოფელ სადახლოს 71-ე უბანზეც. საოლქო კომისიისთვის მიმართვის შემდეგ, თავმჯდომარემ ჟურნალისტი უბანზე დაუშვა.
• 14:17 - „TV პირველმა“ გაავრცელა ინფორმაცია, რომ მათ გადამღებ ჯგუფს კახეთში, ქვემო ხოდაშენში, თავს დაესხნენ და აპარატურა დაუმტვრიეს.
• 14:31 - „მრავალკუთხედმა“ გამოაქვეყნა ვიდეომასალა, სადაც ჩანს, რომ წალენჯიხის 21-ე უბანზე „ქართული ოცნების“ წარმომადგენელი ლირა ღურწკაია მედიის წამომადგენელს, დიტო ბელქანიას დაუპირისპირდა. 
• 14:35 - „რადიო თავისუფლებამ“ დაწერა, რომ რუსთავში, 33-ე საარჩევნო უბანზე მათ ჟურნალისტს, დავით მჭედლიძეს საქმიანობაში ხელი შეუშალეს.
• 14:50 - „მთავარმა არხმა“ გაავრცელა ინფორმაცია, რომ კახეთში თავს დაესხნენ ტელეკომპანიის გადამღებ ჯგუფს: ია გულიაშვილსა და ლევან დვალს.
• 15:02 - მთავარმა არხმა“ გამოაქვეყნა ვიდეო, სადაც ჩანს, რომ ბათუმის მე-17 საარჩევნო უბანზე შესვლის უფლებას არ აძლევდნენ „მთავარი არხისა“ და „ფორმულას“ გადამღებ ჯგუფებს. სავარაუდოდ, „ქართული ოცნებასთან“  დაკავშირებულმა პირებმა, რომლებიც უბანთან იყვნენ მობილიზებულები, ჟურნალისტებს პროვოკატორები უწოდეს და უთხრეს, რომ „სიტუაციის არევისთვის“ იყვნენ მისულები.
• 16:26 - „პუბლიკამ“ გაავრცელა ვიდეო მასალა, სადაც ჩანს, თუ როგორ მიაყენეს სიტყვიერი შეურაცხყოფა ონლაინ გამოცემის რეპორტიორს, მინდია გაბაძეს გლდანში, 59-ე საარჩევნო უბანთან. გაბაძესთან ერთად სიტყვიერი შეურაცხყოფა მიაყენეს „რადიო თავისუფლების“ ჟურნალისტს, თამუნა ჩქარეულს და „პუბლიკასთვის“ მომუშავე ფრილანსერ ჟურნალისტს, შაკო ბრეგაძეს. 
• 17:26 - „TV პირველმა“ გამოაქვეყნა, რომ მარნეულის მე-4 საარჩევნო უბანთან „TV პირველის“ გადამღებ ჯგუფს პროფესიულ საქმიანობაში ხელი შეუშალეს. უბანთან მობილიზებულმა პირებმა სიტყვიერი და ფიზიკური შეურაცხყოფა მიაყენეს ჟურნალისტ ნინო ელიკაშვილს და მის ოპერატორს. „TV პირველის“ გადამღებ ჯგუფს უბნის დატოვებისკენ მოუწოდებდა „ქართული ოცნების“ საარჩევნო შტაბის უფროსი, ამირან გიორგაძე.  
• 17:47 - „TV პირველმა“ გაავრცელა ვიდეოკადრები, სადაც ჩანს, რომ ვაზისუბანში ტელეკომპანიის ოპერატორს თავს დაესხნენ და კამერა დაუზიანეს. შემთხვევა, სავარაუდოდ, 53-ე უბნის მიმდებარედ მოხდა, სადაც ტელეკომპანიის ჟურნალისტი, მარიამ გაფრინდაშვილი და ოპერატორი პაპუნა ხაჩიძე მობილიზებას იღებდნენ. 
• 20:24 - „ფორმულამ“ გამოაქვეყნა, რომ ქუთაისის 49-ე საარჩევნო უბანზე ტელეკომპანიის ჟურნალისტს, მარი წაქაძეს საარჩევნო კომისიის წევრებმა ოქმი შეუდგინეს და საარჩევნო უბნიდან გააძევეს.
•  

„მედიაომბუდსმენმა“ ჟურნალისტურ საქმიანობაში ხელშეშლის 13 შემთხვევაზე სპეციალურ საგამოძიებო სამსახურს შეტყობინებით უკვე მიმართა.

არჩევნების დღეს ჟურნალისტებისთვის პროფესიულ საქმიანობაში ხელის შეშლის დამატებითი ფაქტების არსებობის შემთხვევაში მოგვწერეთ „მედიაჩეკერის“ ფეისბუკ გვერდზე ან დაგვირეკეთ: 557 992 490 

26 ოქტომბერს, საპარლამენტო არჩევნების დღეს, მარნეულის მე-4 საარჩევნო უბანთან „TV პირველის“ გადამღებ ჯგუფს პროფესიულ საქმიანობაში ხელი შეუშალეს. უბანთან მობილიზებულმა პირებმა სიტყვიერი და ფიზიკური შეურაცხყოფა მიაყენეს ჟურნალისტ ნინო ელიკაშვილს და მის ოპერატორს. „TV პირველის“ გადამღებ ჯგუფს უბნის დატოვებისკენ მოუწოდებდა „ქართული ოცნების“ საარჩევნო შტაბის უფროსი, ამირან გიორგაძე.  

"ზეგავლენას ახდენთ თქვენ, თქვენ თქვენი ტელევიზიით, რადგან კამერა გიკავიათ, მიკროფონი გიკავიათ, ყველაფრის უფლება გაქვთ, თქვენ ესე გგონიათ. ეგრე არ გამოვა," - ეუბნება ვიდეოჩანაწერში ამირან გიორგაძე „TV პირველის“ ჟურნალისტს.

ნინო ელიკაშვილის თქმით, მარნეულის მე-4 საარჩევნო უბანთან დაპირისპირება მას შემდეგ დაიწყო, რაც „საქართველოს ახალგაზრდა იურისტთა ასოციაციის“ დამკვირვებელს, გიორგი გოცირიძეს ფიზიკური შეურაცხყოფა მიაყენეს. ჟურნალისტის თქმით, ჯგუფი ადგილზე „ქართული ოცნებისა“ და „ძლიერი საქართველოს“ წარმომადგენლებს შორის დაპირისპირებას იღებდა. 

„აქ იმყოფება „ქართული ოცნების“ საარჩევნო შტაბის უფროსი, ამირან გიორგაძე, რომლის ოჯახის წევრებიც არიან მობილიზებულები მე-4 საარჩევნო უბანთან. სწორედ მათი მხრიდან განხორციელდა ჩვენ მიმართ სიტყვიერი შეურაცხყოფა, ფიზიკური დაპირისპირება. ისინი ცდილობდნენ, ჩვენი კამერის გადაგდებას შემაღლებული ტერიტორიიდან და ამის შემდგომ ჩვენ უკვე გამოვედით შედარებით უსაფრთხო ადგილას“ - აცხადებს ჟურნალისტი ადგილიდან ჩართვისას. 

ნინო ელიკაშვილმა ადგილზე მისულ საპატრულო პოლიციის წარმომადგენლებს ჰკითხა, მომხდართან დაკავშირებით დაიწყებოდა თუ არა გამოძიება, სამართალდამცავმა კი ჟურნალისტი პრესცენტრთან გადაამისამართა.

საერთაშორისო სადამკვირვებლო მისიამ 26 ოქტომბრის საპარლამენტო არჩევნები შეაფასა. ანგარიშში ყურადღება გამახვილებულია მედიაგარემოზეც. 

ეუთოს (OSCE) დემოკრატიული ინსტიტუტებისა და ადამიანის უფლებების ოფისის (ODIHR), ეუთოს საპარლამენტო ასამბლეის (OSCE PA), ევროპის საბჭოს საპარლამენტო ასამბლეის (PACE), ნატოს საპარლამენტო ასამბლეისა (NATO PA) და ევროპარლამენტის (EP) ერთობლივი სადამკვირვებლო მისიის შეფასებით, საქართველოს მედიაგარემო მრავალფეროვანი, მაგრამ მეტისმეტად პოლარიზებულია და დაფინანსების თვალსაზრისით პოლიტიკურ აქტორებზეა დამოკიდებული. სადამკვირვებლო მისიის მიერ განხორციელებულმა მედიამონიტორინგმა კი, ყველა მედიასაშუალების მკვეთრი პოლიტიკური მიკერძოება აჩვენა მაშინ, როცა მიუკერძოებელი გაშუქების ვალდებულება კომერციულ ტელეკომპანიებში უგულვებელყოფილი იყო.

„მიუხედავად იმისა, რომ საზოგადოებრივი მაუწყებლის მიერ კანდიდატთა გაშუქება მეტწილად პოზიტიური ან ნეიტრალური იყო, მან მმართველ პარტიას, სხვა პარტიებთან შედარებით, მნიშვნელოვნად მეტი დრო დაუთმო“.

საერთაშორისო სადამკვირვებლო მისიის ანგარიშის მიხედვით, ჟურნალისტთა უსაფრთხოება კვლავაც შეშფოთების უმთავრესი საგანია ბოლო დროს დაფიქსირებული თავდასხმების, დაშინებისა და ზეწოლის უწყვეტი ინციდენტების გამო.

ევროპის საბჭოს საპარლამენტო ასამბლეის დელეგაციის ხელმძღვანელის, იულიან ბულაის თქმით, 26 ოქტომბრის საპარლამენტო არჩევნები ხასიათდებოდა „პოლიტიკური და მედია ლანდშაფტის მძაფრი პოლარიზებით, ოპოზიციისა და სამოქალაქო საზოგადოების წინააღმდეგ მიმართული სიძულვილის ენითა და პრეზიდენტის აპარატის წინააღმდეგ მიმართული ანტაგონიზმით“.

საქართველოს საპარლამენტო არჩევნების საერთაშორისო სადამკვირვებლო მისია ჯამში 42 ქვეყნის წარმომადგენელი 529 დამკვირვებლით მუშაობდა. მათ შორის იყო დემოკრატიული ინსტიტუტებისა და ადამიანის უფლებების ოფისის (ODIHR) მიერ გამოგზავნილი 380 ექსპერტი, გრძელვადიანი და მოკლევადიანი დამკვირვებლების, ეუთოს საპარლამენტო ასამბლეის (OSCE PA) 60 პარლამენტარი, ევროპის საბჭოს საპარლამენტო ასამბლეის 39-წევრიანი დელეგაცია (PACE), ევროპარლამენტის 12-წევრიანი დელეგაცია (EP) და ნატოს საპარლამენტო ასამბლეის 38-წევრიანი დელეგაცია (NATO PA).

„მედიის, ინფორმაციის და სოციალური კვლევების ცენტრის“ ინფორმაციით, გუშინ, 26 ოქტომბერს ქუთაისის 49-ე საარჩევნო უბანზე ტელეკომპანია „ფორმულას“ ჟურნალისტს, მარი წაქაძეს საარჩევნო კომისიის წევრებმა ოქმი შეუდგინეს და საარჩევნო უბნიდან გააძევეს. ამ ფაქტის პარალელურად, ადგილზე მყოფი დაუდგენელი პირი ჟურნალისტისთვის ხელის შეეშალა პირდაპირ ეთერში ყოფნის დროს ცდილობდა. როგორც cmis-ი წერს, ეს პირი ამბობდა, რომ ჟურნალისტს „ტყუილის საუბარში“ უშლიდა ხელს. მარი წაქაძემ  დახმარებისთვის პოლიციას მიმართა, თუმცა დახმარება ვერ მიიღო.

„მედიის, ინფორმაციის და სოციალური კვლევების ცენტრის“ მონაცემებით, საპარლამენტო არჩევნების დღეს [20:00 საათის მდგომარეობით] მედიის 25 წარმომადგენელი დაზარალდა. 

საპარლამენტო არჩევნების დღეს, 26 ოქტომბერს, საარჩევნო უბნებთან მედიის წარმომადგენლებისთვის პროფესიულ საქმიანობაში ხელის შეშლის ფაქტებს გამოეხმაურა „საქართველოს ახალგაზრდა იურისტთა ასოციაცია“. 

ორგანიზაციის განცხადებით, მთელი დღის განმავლობაში მედიის წარმომადგენლების მისამართით საარჩევნო უბნებზე მობილიზებული ძალადობრივი ჯგუფებისა და საარჩევნო უბნის წევრების მხრიდან შეინიშნება აგრესია და მტრული გარემო.

„ადგილი ჰქონდა შეურაცხყოფის, პროფესიულ საქმიანობაში ხელშეშლისა და ფიზიკური ძალადობის ფაქტებს. „ტვ პირველის“ გადამღებ ჯგუფს თავს დაესხნენ თელავში, მარნეულსა და ვაზისუბანში. ფიზიკურად გაუსწორდნენ CNews-ის ჟურნალისტს. „მთავარი არხის“  წარმომადგენლებს ხელი შეუშალეს მუშაობაში კახეთსა და ბათუმში. გამოვლინდა „რადიო თავისუფლების“ ჟურნალისტისთვის პროფესიულ საქმიანობაში ხელშეშლის ფაქტი რუსთავში; სიტყვიერი შეურაცხყოფა მიაყენეს და პროფესიულ საქმიანობაში ხელშეშლას ცდილობდნენ რადიო „მარნეულის“, „პუბლიკას“, „ფორმულასა“ და „ტვ პირველის“ ჟურნალისტებისთვის", - წერს ორგანიზაცია.

„საქართველოს ახალგაზრდა იურისტთა ასოციაციის“ შეფასებით, ჟურნალისტზე თავდასხმა პრესის თავისუფლების დარღვევაა და დემოკრატიულ საზოგადოებას მნიშვნელოვან საფრთხეს უქმნის.