cmis-ის მონაცემებით, 12:00 საათისთვის ჟურნალისტების სიტყვიერი და ფიზიკური შეურაცხყოფისა და საარჩევნო უბნიდან გაძევების 6 შემთხვევა დაფიქსირდა, დაზარალდა 10 ჟურნალისტი.

ჟურნალისტებისთვის ხელის შეშლის შემთხვევები საარჩევნო უბნებზე:

• “ფორმულას” ჟურნალისტს საარჩევნო უბანზე სიტყვიერი შეურაცხყოფა მიაყენეს და გადაღების შეზღუდვა სცადეს.
• ტელეკომპანიების “მთავარი არხის” და “TV პირველის” ჟურნალისტები ქეთა ციცქიშვილი და მარიამ გაფრინდაშვილი ჯერ საარჩევნო უბნიდან გააძევეს, ხოლო მოგვიანებით, როდესაც საარჩევნო უბანთან მობილიზებულ მოქალაქეებს კითხვებს უსვამდნენ, მოქალაქემ მათ სიტყვიერი შეურაცხყოფა მიაყენეს და ფიზიკურად შეეხებაც სცადა.
• ახმეტაში, მე-11 საარჩევნო უბანზე “ქართული ოცნების” კოორდინატორებმა ჟურნალისტს გელა მთივლიშვილს, რომლიც დამკვირვებლის სტატუსით მუშაობდა ტელეფონი ჩამოართვეს და ფიზიკური და სიტყვიერი შეურაცხყოფა მიაყანეს. 
• ქუთაისში მე-2 საარჩევნო უბანზე, cnews-ის ჟურნალისტს „ქართული ოცნების“ აქტივისტები ფიზიკურად გაუსწორდნენ. „ქართული ოცნების“ აქტივისტების გაღიაზიანება ჟურნალისტის მიერ აღმოჩენილმა სიებმა გამოიწვია, სადაც მოქალაქეების პირადი მონაცემები იყო დაფიქსირებული. მას ფიზკურად სამი ადამიანი გაუსწორდა.
• ბათუმის მე-5 საარჩევნო უბანზე მობილიზებულმა “ქართული ოცნების” კოორდინატორებმა “TV პირველის” ჟურნალისტს თამთა დოლენჯაშვილს, რომელიც კითხვების დასასმელად მათ მიკროავტობუსში ავიდა, ჯერ კარი ჩაუკეტეს და გარეთ არ უშვებდნენ, შემედგ ერთ-ერთი კოორდინატორი ციხეში გაშვებით დაემუქრა.

როგორც Cnews-ი წერს, მათ ჟურნალისტს, გიგა გელხვიიძეს ქუთაისში ფიზიკურად გაუსწორდნენ.

“თავდასხმა მედიის წარმომადგენელზე - ქუთაისში #2 საარჩევნო უბანზე, cnews-ის ჟურნალისტს „ქართული ოცნების“ აქტივისტები ფიზიკურად გაუსწორდნენ. „ქართული ოცნების“ აქტივისტების გაღიაზიანება ჟურნალისტის მიერ აღმოჩენილმა სიებმა გამოიქვია, სადაც მოქალაქეების პირადი მონაცემები იყო დაფიქსირებული”. მას ფიზკურად სამი ადამიანი გაუსწორდა.

მთის ამბები / საქართველოს ამბების დამფუძნებელი და რედაქტორი გელა მთივლიშვილი სოციალურ ქსელში წერს, რომ ახმეტაში, მატნის მე-11 საარჩევნო უბანში თავს დაესხნენ, ტელეფონი წაართვეს და გადაღებაში ხელი შეუშალეს.

“ახმეტაში მატნის მე-11 საარჩევნო უბანში თავს დაგვესხნენ სავარაუდოდ უბნის მაყურებლები, როცა შესასვლელიდან და მიმდებარე ტერიტორიიდან მათი და “ქართული ოცნების” კოორდინატორების გასვლა მოვითხოვეთ. დღეს მეც და ლადოც დამკვირვებლების სტატუსით ვმუშაობთ. ტელეფონი წაგვართვეს, გადაღებაში ხელი შეგვიშალეს, დაგვარტყეს, მოგვაფურთხეს და გვაგინეს. მანამდე, ახმეტის 1-ელ უბანში შევესწარით ფაქტს, როგორ გადასცა “ოცნების” კოორდინატორმა ერთ-ერთ ამომრჩეველს ფული, ამბობს, რომ ვალი გაუსტუმრა. 112-ზე დავრეკეთ, რეაგირება არ არის”- წერს მთივლიშვილი სოციალურ ქსელში.

როგორც ჟურნალისტი აღნიშნავს, ისინი დამკვირვებლის სტატუსით მუშაობენ.

„მთავარი არხის“ ჟურნალისტის, ია გულიაშვილის განცხადებით, ტელეკომპანიის გადამღებ ჯგუფს გურჯაანის მეორე საარჩევნო უბანზე მუშაობის დროს ქალაქის სპორტსკოლის მაშველი, კახა დევიძე დაუპირისპირდა. 

ია გულიაშვილის თქმით, ისინი საარჩევნო უბანზე კონკრეტული ფაქტის გადამოწმებას ცდილობდნენ.

„გურჯაანის #2 საარჩევნო უბანზე იმის გასარკვევად მივედი, თუ როგორ მოხდა, რომ არჩევნებამდე რამდენიმე ხნით ადრე ერთსა და იმავე მისამართზე ათეულობით ადამიანი ჰყავთ რეგისტრირებული“. 

როგორც „მთავარი არხის“ ჟურნალისტი „მედიაჩეკერთან“ ჰყვება, გადამღები ჯგუფის ადგილზე მუშაობის დროს, დაცვის პოლიციელები მივიდნენ, რომლებსაც კახა დევიძეც მიჰყვა. 

„საარჩევნო კომისიის თავმჯდომარე გვეუბნებოდა, რომ საარჩევნო უბანი უნდა დაიცვან და ამიტომ არიანო. ჟურნალისტი ვარ და თავისთავად იქ მყოფი პირებისგან ვცდილობდი, ინფორმაცია მიმეღო, რა მიზნით და რა მოტივით იყვნენ მოსულები, რამაც გამოიწვია „ქართული ოცნების“ „ზონდერის“ კახა დევიძის  გაღიზიანება“.

ია გულიაშვილის თქმით, დევიძემ მათ სიტყვიერი შეურაცხყოფა მიაყენა, მის ხელთ არსებული ნივთები ესროლა და კამერის დამტვრევითაც დაემუქრა. ინციდენტთან დაკავშირებით, ჟურნალისტმა 112-საც მიაწოდა ინფორმაცია, თუმცა, მას ჯერჯერობით არავინ დაკავშირებია.

განახლება: როგორც „მედიაჩეკერს“ სპეციალური საგამოძიებო სამსახურიდან აცნობეს, უწყება ჟურნალისტს უკვე დაუკავშირდა და ის დაბარებულია საგამოძიებო სამსახურში რეაგირების მიზნით.

„მთავარი არხისა“ და qvemoqartli.ge-ს ჟურნალისტებზე ზეწოლის შემთხვევებს გამოეხმაურა „საქართველოს ჟურნალისტური ეთიკის ქარტია“. ორგანიზაცია შეშფოთებას გამოთქვამს იმის გამო, რომ ადგილობრივი ჩინოვნიკები და მმართველ პარტიასთან დაკავშირებული პირები რეგიონებში აგრესიულად ექცევიან ჟურნალისტებს, რომელებიც საარჩევნო გარემოს შესახებ ინფორმაციას აგროვებენ.

„ჟურნალისტური ეთიკის ქარტიამ“ სპეციალურ საგამოძიებო სამსახურს ჟურნალისტურ საქმიანობაში ხელშეშლის ორივე ფაქტის დაუყოვნებლივ და ეფექტურად გამოძიებისკენ მოუწოდა, საჯარო უწყებების წარმომადგენლებს კი შეახსენა, რომ ჟურნალისტისთვის პროფესიული მოვალეობის შესრულებისას ხელის შეშლა სისხლის სამართლის დანაშაულია.

მთავარი არხის გადამღები ჯგუფისთვის ჟურნალისტურ საქმიანობაში ხელშეშლის შესახებ სპეციალურ საგამოძიებო სამსახურს წერილობით შეატყობინა და გამოძიების დაწყება მოითხოვა „მედიაომბუდსმენმაც“.

ორგანიზაცია ჟურნალისტებისა და ოპერატორების სამართლებრივ დახმარებას აგრძელებს. არჩევნების დღეს მედიისთვის ხელმისაწვდომი იქნება ცხელი ხაზი: 577 070 592

როგორც ქვემო ქართლის საინფორმაციო პორტალმა - QvemoQartli.ge 23 ოქტომბერს დაწერა, ჟურნალისტი ქეთევან მოსიავა „ქართული ოცნების“ ღონისძიებისთვის თბილისში მოქალაქეების გადაყვანის პროცესის გადაღებას ცდილობდა, რა დროსაც, რუსთავის მუნიციპალური აიპის თავმჯდომარის მოადგილემ, კარლო ნოდიამ მას ფოტო/ვიდეო გადაღების უფლება შეუზღუდა.

„მედიაომბუდსმენმა“ მედიისთვის წინასაარჩევნო პერიოდი (2024 წლის 27 აგვისტოდან -  25 ოქტომბრამდე) შეაფასა. ორგანიზაციის განცხადებით, მმართველი პარტიის პოლიტიკა და რიტორიკა მედიის მიმართ უცვლელი იყო და წინასაარჩევნო პროცესში მედიის მიმართ ბოიკოტის რეჟიმი არ შეწყვეტილა. შესაბამისად, საზოგადოებას მრავალფეროვან პოლიტიკურ დებატებზე ხელი არ მიუწვდებოდა. 

„მედიაომბუდსმენის“ შეფასებით, საქართველოში ჟურნალისტური საქმიანობა მოიცავს ფიზიკურ, ფინანსურ და ორგანიზაციულ რისკებს. მედიასაშუალებები კი ვერ ახერხებენ ხელისუფლების მაკონტროლებელი როლის შესრულებას ხელოვნური ბარიერებისა და არასათანადო პირობების გამო.

მედიის კონტროლის მექანიზმები

საქართველოს საკონსტიტუციო სასამართლომ ე.წ. “რუსული კანონის” მოქმედებაარ შეაჩერა, ხოლო სარჩელი არსებითად განსახილველად ნაწილობრივ მიიღო. ამ კანონის ძალით, ხელისუფლება მედიას და სამოქალაქო სექტორს უცხოური გავლენის აგენტებად მიიჩნევს. მოიცავს მათ შორის, მედიის სფეროში დასაქმებული პირების პერსონალური მონაცემების გასაჯაროვების რისკებს, ასევე შექმნა მედიაორგანიზაციების დახურვის წინაპირობა.

მედიის რეგულირების პოლიტიკური შინაარსი

- წინასაარჩევნო პერიოდში კომუნიკაციების კომისია “ქართული ოცნების” მოთხოვნით სჯიდა კრიტიკულ მედიასაშუალებებს;

- კომისიამ სამ კრიტიკულ მაუწყებელს „მთავარ არხს“, „ტელეკომპანია პირველს“ და „ფორმულას“ სამართალდარღვევათა ოქმი შეუდგინა უკრაინელი ხალხის ტრაგედიის გამოყენების არაეთიკური რეკლამების გამოუქვეყნებლობის გამო. ამ გზით, კომისიამ უპირობოდ გააძლიერა მმართველი პარტიის პროპაგანდისტული ნარატივი;

- კომისიამ ედისონ რისერჩის კვლევის საფუძველზე ოპოზიციური პარტია „გახარია საქართველოსთვის“ კვალიფიციური საარჩევნო სუბიექტის სტატუსის მინიჭების გამო ტელეკომპანია “ფორმულა“ სამართალდამრღვევად ცნო და ოქმი შეუდგინა. მიუხედავად იმისა, რომ კანონში არ არის ნათელი ჩანაწერი, რა დამატებით მექანიზმებს ითხოვდა კომისია. აღსანიშნავია, რომ არხი კვლევით ორგანიზაციასთან 9 წელია თანამშრომლობს და სადავო არასოდეს გამხდარა. წლის მანძილზე “ფორმულამ” ხუთი კვლევა გამოაქვეყნა იგივე სტანდარტით.

- წინასაარჩევნო პერიოდის დასასრულს კომუნიკაციების კომისია მიიჩნევს, რომ 2024 წლის საპარლამენტო არჩევნების წინასაარჩევნო კამპანიის დროს მაუწყებლების მხრიდან უპრეცედენტო და საგანგაშო კანონდარღვევები გამოვლინდა და სადამკვირვებლო მისიებს რეაგირებისკენ მოუწოდებს. „მთავარი არხის“, „ფორმულას“ და „ტვ პირველის“ კანონდარღვევის დაფიქსირებისთანავე, კომუნიკაციების კომისიამ მყისიერად გამოთქვა შეშფოთება, რომ მაუწყებლების ქმედება ქმნიდა საშიშ პრეცედენტს, ვინაიდან დაინახა რისკი, რომ სხვა არხებიც მიბაძავდნენ აღნიშნულ სამ მაუწყებელს, რაც დააზიანებდა საარჩევნო გარემოს.მოგვიანებით ასეც მოხდა და ასევე ღიად, ანალოგიური გადაწყვეტილება მიიღეს „ტელეიმედმა“, „მაესტრომ“, „პოსტვ“-მ და „რუსთავი 2“-მა, რომ არ განეთავსებინათ ეთერში ოპოზიციური პარტიების საარჩევნო რგოლები - მითითებულია კომისიის 17 ოქტომბრის განცხადებაში.

კრიტიკა კრიტიკული მედიის წინააღმდეგ - ვის აკრიტიკებს "მედიაკრიტიკა"?

კომუნიკაციების კომისიამ 2018 წელს ა(ა)იპ “მედიააკადემია” დააფუძნა. მისი

ერთ-ერთი პლატფორმა “მედიაკრიტიკა” უმეტეს შემთხვევაში სწორედ კრიტიკული მედიასაშუალებების შესახებ ამზადებს მასალებს. “მედიაომბუდსმენმა” შეაფასა პლატფორმის სექტემბრის თვის აქტივობა, ოქტომბრის თვეში მედიაში არაერთი გამოწვევის მიუხედავად, “მედიაკრიტიკას” მასალები არ გაუვრცელებია:

- სექტემბერში გამოქვეყნებული მასალები შიდა და საერთაშორისო პოლიტიკის თემებზე მმართველი პარტიის “ქართული ოცნებისეული” დამოკიდებულებების გაგრძელებას ჰგავდა;

- საერთაშორისო ნაწილში, “მედიაკრიტიკის” პლატფორმის მთავარი “სამიზნე” ამერიკული დემოკრატია და მართვის სისტემის შესახებ შეთქმულების თეორიების გაძლიერება იყო;

- ეროვნულ დონეზე კი პლატფორმა აკრიტიკებდა ჟურნალისტებს ანტიკორუფციული სამსახურის მიერ არასამთავრობო ორგანიზაციის დასჯის და ლავროვის საპასუხოდ “ქართული ოცნების” დადებითი განწყობების გაშუქების გამო;

- გამოქვეყნებულ მასალებში ნათლად ჩანს, რომ კრიტიკას უმეტესად გააჩნია პოლიტიკური დატვირთვა და პლატფორმა ცდილობს თავისი როლი შეასრულოს საზოგადოების აზრის ფორმირებაში. იმავდროულად, ასეთი სარედაქციო პოლიტიკა კვლავ აჩენს უცვლელ კითხვებს - ვისი ინტერესების დაცვას ემსახურება კომუნიკაციების კომისიის ბიუჯეტიდან დაფინანსებული პლატფორმით გავრცელებული კრიტიკა?

პოლიტიკურად მოტივირებული მართლმსაჯულება მედიისთვის

- თბილისის საქალაქო და სააპელაციო სასამართლოები მუდმივად იზიარებდა კომუნიკაციების კომისიის პოზიციას და სჯიდა კრიტიკულ

მაუწყებლებს;

- შინაგან საქმეთა ყოფილი მინისტრის ალექსანდრე ჭიკაიძის სარჩელის საფუძველზე თბილისის საქალაქო სასამართლომ 11 ოქტომბერს „ტელეკომპანია პირველსა“ და მის ჟურნალისტს, სოფიკო ნიაურს 10 000 ლარის გადახდა დააკისრა. ჟურნალისტების პერსონალური სანქცირება ეწინააღმდეგება შიდა და საერთაშორისო სტანდარტებს;

- თბილისის საქალაქო სასამართლომ წარმოებაში მიიღო 2023 წელს ე. წ “რუსული კანონის” წინააღმდეგ გამართული აქციების გაშუქებისას დაზარალებული 18 ჟურნალისტისა და ოპერატორის სარჩელი.

მოსარჩელეები საქართველოს შინაგან საქმეთა სამინისტროსგან მორალური ზიანის ანაზღაურებას მოითხოვენ. აქციების გადაღების დროს ჟურნალისტები და ოპერატორები ფიზიკური და სიტყვიერი ძალადობის სამიზნე გახდნენ. სამართალდამცავთა მხრიდან ზეწოლა და აგრესია, მათ შორის, წიწაკის სპრეისა და წყლის ჭავლის გამოყენება, მკაფიოდ მიუთითებს იმ სისტემურ პრობლემებზე, რომლებიც ჟურნალისტური საქმიანობის ნაწილია საქართველოში. სპეციალურმა საგამოძიებო სამსახურმა დაიწყო დაუყოვნებლივ გამოძიება, თუმცა დამნაშავე პირები ამ დრომდე არ გამოვლენილან და შესაბამისი პასუხისმგებლობის დაკისრების საკითხი ბუნდოვანია.

ჟურნალისტების უფლებები

- ქეთევან მოსიავა, QvemoQartli.ge-ს ჟურნალისტი, 23 ოქტომბერს ცდილობდა გადაეღო „ქართული ოცნების“ ღონისძიებაზე თბილისში ორგანიზებულად მოქალაქეების გადაყვანა. ერთ-ერთ ლოკაციაზე,

შარტავას გამზირთან მუშაობის დროს, მას ფოტო/ვიდეო გადაღების უფლება შეუზღუდა რუსთავის მუნიციპალური აიპის თავმჯდომარის მოადგილე კარლო ნოდიამ. ნოდია ჟურნალისტისგან მოითხოვდა მედიის ბეიჯის წარდგენას მისთვის, ასევე აცხადებდა რომ არ აძლევდა ჟურნალისტს მისი გადაღების უფლებას. დაპირისპირების დროს ისმის მისი მხრიდან გაჟღერებული მუქარაც: „მე ვერ აგიკრძალავ შენ, შეგეხები ხელით რომ ჩაგიშალო გადაღება.“

- „წაბრძანდით, ნაციონალების შეხვედრაზე დადექით... თქვენ ხართ ჩვეულებრივი მიყიდული, გაყიდული...,“ – ასე მიმართა ხარაგაულის მერმა, კობა ლურსმანაშვილმა დამოუკიდებელი მედია ორგანიზაცია „ჩემი ხარაგაულის“ დამფუძნებელს ლაურა გოგოლაძეს. შემთხვევა 16 ოქტომბერს, ხარაგაულში მოხდა. „ქართულ ოცნებას“ ხარაგაულის ცენტრში ამომრჩეველთან შეხვედრა ჰქონდა დაგეგმილი, რომელზე დასწრების უფლებაც ჟურნალისტებს არ მისცეს.

- 11 ოქტომბერს ბათუმის ახალი შემოვლითი გზის მონაკვეთი საზეიმოდ გახსნა პრემიერ-მინისტრმა და აჭარის მთავრობამ. ონლაინ გამოცემამ “აჭარა თაიმსმა” გაავრცელა ვიდეო, რომ გზა რეალურად არ დასრულებულა და ის ბეტონის ფილებით არის გადაკეტილი. გაშუქების საპასუხოდ ჟურნალისტ სულხან მესხიძის უცნობმა პირმა შეურაცხმყოფელი შეტყობინებები გაუგზავნა მობილურ ტელეფონზე.

- “აფხაზებსაც უნდა მოვუხადოთ ბოდიში“ - აჭარის უმაღლესი საბჭოს წევრი „ოცნებიდან“, დავით ბაციკაძე ოსებისთვის ბოდიშის მოხდაზე პასუხობდა კითხვას. პასუხის შემდეგ ბაციკაძემ „სეპარატისტი“ და „მოღალატე“ უწოდა“ბათუმელების” ჟურნალისტს კითხვის დასმისთვის.

ცენტრალურმა საარჩევნო კომისიამ “ამაზრზენი, სამარცხვინო და აღმაშფოთებელი” ვიდეორგოლების შინაარსი შეისწავლა და დარღვევის ნიშნები ვერ აღმოაჩინა

2024 წლის 19 ოქტომბერს საქართველოს ცენტრალურმა საარჩევნო კომისიამ კრიტიკული მაუწყებლების საჩივარი განიხილა და მიიღო გადაწყვეტილება ადმინისტრაციული სამართალდარღვევის ოქმის შედგენაზე უარის თქმის შესახებ. „საჩივარში მოხსენიებული საარჩევნო სუბიექტის მიერ წინასაარჩევნოდ გამოქვეყნებული ვიდეორგოლის შესწავლის შედეგად არ იკვეთება საარჩევნო კოდექსის 45-ე მუხლის მე-3 პუნქტით დადგენილი მოთხოვნების დარღვევა“.

უცხოელი ჟურნალისტების უფლებები

არჩევნების და ევროპული ვალდებულებების ფონზე აზერბაიჯანელი ჟურნალისტი ქართულ ციხეშია. აფგან სადიგოვი, რომელიც თბილისში 3 აგვისტოს დააკავეს, თბილისის წინასწარი დაკავების იზოლატორში 21 სექტემბრის შემდეგ შიმშილობს. თბილისის იზოლატორში შიმშილობის მე-17 დღეს სადიგოვი შეუძლოდ გახდა და ის საავადმყოფოში გადაიყვანეს. მისი მეუღლე სევინჩ სადიგოვა ამბობს, რომ „საქართველოში ალიევის დაკვეთით ადამიანებს კლავენ“.

ჩეხი ჟურნალისტი, რომელიც საქართველოში არ შემოუშვეს, პრაღაში ბრუნდება. როგორც რეი ბეისლი სოციალურ პლატფორმა X-ზე წერს თბილისის საერთაშორისო აეროპორტში უკანონოდ დაკავებული 34 საათი იყო.

არჩევნების დღეს ჟურნალისტებისა და ოპერატორებისთვის ხელმისაწვდომი იქნება „მედიაომბუდსმენის“ საკონსულტაციო ცხელი ხაზი: 577 070 592

26 ოქტომბერს საქართველოს პარლამენტის არჩევნები გაიმართება. ამომრჩევლები ოთხი წლის ვადით საქართველოს პარლამენტის 150 დეპუტატს პროპორციული საარჩევნო სისტემის საფუძველზე აირჩევენ. 

„პრესის საერთაშორისო ინსტიტუტი“ საქართველოს საპარლამენტო არჩევნებამდე სამი დღით ადრე ჩეხი ჟურნალისტის, რეი ბეისლის საქართველოში არშემოშვების ფაქტს გმობს და აღნიშნავს, რომ საქართველოს ხელისუფლებამ უცხოელი ჟურნალისტების ქვეყანაში შესვლის აკრძალვის შემაშფოთებელი პრაქტიკა უნდა დაასრულოს.

IPI-ის მიერ გავრცელებული ინფორმაციით, რეი ბეისლი ფრილანსერი ჟურნალისტია, რომელსაც 26 ოქტომბრის არჩევნები უკრაინული დამოუკიდებელი მედიასაშუალებისთვის - Kyiv Indepedent უნდა გაეშუქებინა. როგორც „პრესის საერთაშორისო ინსტიტუტი“ აღნიშნავს, ჩეხი ჟურნალისტი საქართველოში 2024 წლის გაზაფხულზე იმყოფებოდა და რუსული კანონის საწინააღმდეგო აქციებს აქტიურად აშუქებდა.

„ეს არის კიდევ ერთი შემაშფოთებელი შემთხვევა, როდესაც უცხოელ ჟურნალისტებს საქართველოში შესვლა ყოველგვარი ახსნა-განმარტების გარეშე აეკრძალათ“, - განაცხადა IPI-ის დროებითმა აღმასრულებელმა დირექტორმა. სკოტ გრიფენის თქმით, საქართველოს ხელისუფლებამ დამოუკიდებელ მედიას მიმდინარე არჩევნების გაშუქებაში ხელი არ უნდა შეუშალოს. 

რეი ბეისლის საქართველოში არ შემოშვების ფაქტს გამოეხმაურა „საქართველოს ჟურნალისტური ეთიკის ქარტიაც“.   

„რუსული კანონის შემობრუნების შემდგომ ქვეყანაში დემოკრატიის ხარისხის სწრაფი ტემპით გაუარესებამ საქართველო მსოფლიო მედიის ყურადღების ცენტრში მოაქცია. ინტერესი გამორჩეულად მაღალია 26 ოქტომბერს დანიშნული საპარლამენტო არჩევნების მიმართაც, რომელიც იმავდროულად წარმოადგენს რეფერენდუმს საქართველოს გეოპოლიტიკურ ორიენტაციის თაობაზე.

საქართველოს ხელისუფლების პირდაპირი მოვალეობაა, კანონის ფარგლებში უზრუნველყოს ყველა ადგილობრივი და უცხოელი ჟურნალისტის წვდომა იმ ტერიტორიებსა და ინფორმაციაზე, რაც მათ საქართველოში მიმდინარე არჩევნების გასაშუქებლად სჭირდებათ. ის, თუ როგორ მოექცევა საქართველოს ხელისუფლება უცხოელ ჟურნალისტებს, აუცილებლად მოახდენს გავლენას არჩევნების ხარისხზე და საერთაშორისო ორგანზაციების შეფასებებშიც აირეკლება“, - ვკითხულობთ ქარტიის განცხადებაში.

22 ოქტომბერს ჩეხმა ჟურნალისტმა პლატფორმა X-ზე დაწერა, რომ იგი საქართველოში ყოველგვარი ახსნა-განმარტების გარეშე არ შემოუშვეს. „სტუდია მონიტორის“ მიერ გავრცელებული ინფორმაციით კი, ბეისლიმ ბოლოს მათ შეატყობინა, რომ ტელეფონის ჩამორთმევას უპირებდნენ, შემდეგ კი მასთან კონტაქტი შეწყდა. გუშინ, 24 ოქტომბერს კი, ცნობილი გახდა, რომ ჟურნალისტმა საქართველო დატოვა. როგორც რეი ბეისლი სოციალურ პლატფორმა X-ზე დაწერა, თბილისის საერთაშორისო აეროპორტში უკანონოდ დაკავებული 34 საათი იყო.

„დამწუხრებული ვარ საქართველოდან წასვლის გამო. ეს არჩევნები გადამწყვეტია ქვეყნისთვის და მთელი მსოფლიოსთვის. ახლა პრაღაში მივემგზავრები იმ იმედით, რომ სხვების დახმარებით უახლოეს მომავალში შევძლებ საქართველოში დაბრუნებას“. 

თბილისის აეროპორტში ჩეხი ჟურნალისტის მონახულებას რამდენიმე საათის განმავლობაში ცდილობდა „ტოლერანტობისა და მრავალფეროვნების ინსტიტუტის“ (TDI) ადვოკატიც. შოთა თუთბერიძე. შინაგან საქმეთა სამინისტრომ ქვეყანაში შემოსვლაზე უარის საფუძვლად რეი ბეისლის მიუთითა: „არ აკმაყოფილებს საქართველოს კანონმდებლობით განსაზღვრულ სხვა მოთხოვნებს“.

აღსანიშნავია, რომ ბოლო პერიოდში საქართველოში სხვა უცხოუელი ჟურნალისტებიც არ შემოუშვეს. 17 სექტემბერს საზღვრის კვეთის უფლება არ მისცეს ქართულ-სომხური მედიაგამოცემა Aliq Media-ს დამფუძნებელსა და ერთ-ერთ რედაქტორს არსენ ხარატიანს, რომელიც ლუქსემბურგიდან თბილისში მოფრინავდა და მეორე დღეს სომხეთში უნდა წასულიყო. ერთი დღით ადრე კი, საქართველოში მცხოვრები ბელარუსი ჟურნალისტი და აქტივისტი, ანდრეი მიალეშკა არ შემოუშვეს. სამივე შემთხვევაში ჟურნალისტს ქვეყანაში შემოსვლაზე უარი ერთი საფუძვლით ეთქვა.

„პრესის საერთაშორისო ინსტიტუტის“ (IPI) 19 სექტემბრის ინფორმაციით, 2022 წლიდან სულ მცირე 12 შემთხვევა დაფიქსირდა, როცა ქვეყანაში შემოსვლაზე უცხოელ ჟურნალისტებს უარი ეთქვათ.

სადამკვირვებლო მისიამ - „ჩემი ხმა“ წინასაარჩევნო გარემოს შეფასება დაასრულა. მასში მონაწილეობა მისიის არაერთმა წევრმა სამოქალაქო საზოგადოების ორგანიზაციამ მიიღო. სადამკვირვებლო მისიის საერთო შეფასებით, მიუხედავად იმისა, რომ უშუალოდ არჩევნებში მონაწილეობის მხრივ პარტიები შეზღუდული არ ყოფილან, 2024 წლის 26 ოქტომბრის საპარლამენტო არჩევნების წინასაარჩევნო გარემო იყო არათანაბარი, ხოლო სახელმწიფო ინსტიტუტების გადაწყვეტილებები და მიდგომები საარჩევნო დარღვევების მიმართ უსამართლო და მმართველი პარტიის სასარგებლოდ მიკერძოებული. 

როგორც წინასაარჩევნო გარემოს შეფასების დოკუმენტში ვკითხულობთ, ეს პერიოდი მასიური დეზინფორმაციული კამპანიის ფონზე მიმდინარეობდა. 

„პრაქტიკულად მთელი სახელმწიფო მანქანა, ასევე ხელისუფლების მიერ კონტროლირებული და მართული პროპაგანდისტული მედიასაშუალებები ემსახურებოდა მმართველი პარტიის საარჩევნო მიზნებს. ამ პროცესში, სხვადასხვა ფორმითა და მასშტაბით მონაწილეობდნენ არა მხოლოდ საკანონმდებლო და აღმასრულებელი ხელისუფლების ორგანოები, არამედ სასამართლო ხელისუფლებაც და ე.წ. დამოუკიდებელი ინსტიტუტებიც - ცენტრალური საარჩევნო კომისია, კომუნიკაციების კომისია და ანტიკორუფციული ბიურო“.

სადამკვირვებლო მისია აღნიშნავს, რომ ხელისუფლების მხრიდან მუდმივი თავდასხმების სამიზნე ხელისუფლებისადმი კრიტიკულად განწყობილი მედია იყო. 

„კომუნიკაციების კომისია, რომელიც ხელისუფლების პროპაგანდისტული არხების დაჯარიმების რამდენიმე შემთხვევით ამაოდ ცდილობდა ნეიტრალურობის ფასადის შექმნას, უმეტესწილად უკანონოდ და დაუსაბუთებლად სწორედ ხელისუფლებისადმი კრიტიკულად განწყობილ სამაუწყებლო კომპანიებს აჯარიმებდა“.

ანგარიშის მიხედვით, მკვეთრად უთანასწორო იყო საარჩევნო პერიოდში მედიაზე წვდომა საარჩევნო სუბიექტებისათვისაც.

„სახელისუფლებო რედაქციის მქონე მედიასაშუალებები დახურული იყო ოპოზიციური პარტიებისა და სამოქალაქო საზოგადოებისათვის. ამას ემატება ისიც, რომ მმართველი პარტიის წევრები კრიტიკულ მედია-საშუალებებს არ სტუმრობდნენ, რამაც დააზიანა ამომრჩევლის ჯეროვანი ინფორმირების პროცესი“.

ხვალ, 26 ოქტომბერს საქართველოს საპარლამენტო არჩევნები გაიმართება. ქვეყნის ისტორიაში პირველად, საქართველოს მოქალაქეები უმაღლეს საკანონმდებლო ორგანოს სრულად პროპორციული საარჩევნო სისტემის საფუძველზე აირჩევენ. საქართველოს პარლამენტის 150 მანდატი განაწილდება იმ პოლიტიკურ პარტიებზე, რომლებიც არჩევნებში მონაწილე ამომრჩეველთა ნამდვილი ხმების 5 %-ს მაინც მიიღებენ.

„სამართლიანი არჩევნებისა და დემოკრატიის საერთაშორისო საზოგადოებამ“ წინასაარჩევნო გარემო შეაფასა. როგორც ანგარიშში ვკითხულობთ, 2024 წლის საპარლამენტო არჩევნებისთვის მედიაგარემო პოლარიზებული იყო. მმართველი პარტიის კანდიდატები არ მონაწილეობდნენ ხელისუფლების მიმართ კრიტიკული მედიასაშუალებების საინფორმაციო გადაცემებში, ხოლო პროსახელისუფლებო მედია არ იწვევდა ძირითადი ოპოზიციური პარტიების წარმომადგენლებს მის სატელევიზიო გადაცემებში.

საქართველოს კომუნიკაციების ეროვნული კომისიის მიერ მიღებულმა გადაწყვეტილებებმა კი კრიტიკულ მედიასაშუალებებთან მიმართებით კომისიის საქმიანობის სადამსჯელო მექანიზმად გამოყენებისა და მისი ინსტრუმენტალიზების რისკები შექმნა.

„მაგალითად, წინასაარჩევნო პერიოდში მედიაორგანიზაციებმა ეთერში არ განათავსეს ომში მყოფი უკრაინელი ხალხის ტრაგედიის საარჩევნო მიზნებისთვის გამოყენების ამსახველი და სამოქალაქო სექტორის წარმომადგენლების მადისკრედიტირებელი შინაარსის მქონე პოლიტიკურ რეკლამები, მედიაეთიკის სტანდარტის დარღვევის არგუმენტით. კომუნიკაციების კომისიამ კი აღნიშნული შემთხვევები კანონმდებლობის დარღვევად მიიჩნია და მედიაორგანიზაციებს ფინანსური პასუხისმგებლობაც დააკისრა.

პრობლემური და რისკის შემცველი იყო სასამართლოსა და კომუნიკაციების კომისიის მიერ განვითარებული მსჯელობა, იმასთან დაკავშირებით, რომ პირის მიერ საჯაროდ გაკეთებული განცხადება სხვა პოლიტიკურ პარტიასთან გაერთიანების თაობაზე, იმ პირობებში, როდესაც პარტიაში რეორგანიზაცია ან/და შერწყმა არ განხორციელებულა, საკმარისად შეიძლება ჩაითვალოს იმისათვის, რომ საარჩევნო სუბიექტის აქტივობა, სხვა საარჩევნო სუბიექტის სასარგებლოდ იქნას მიჩნეული. ასევე, მედიაორგანიზაციების მხრიდან გამოიკვეთა უფასო თუ ფასიანი პოლიტიკური რეკლამების შერჩევითად განუთავსებლობის შემთხვევებიც“.

„სამართლიანი არჩევნების“ შეფასებით, კომუნიკაციების კომისიამ რუსული კანონის წინააღმდეგ გაშუქებული ვიდეორგოლი პოლიტიკურ რეკლამად მიიჩნია, რითაც სახიფათო პრეცედენტი და კრიტიკული მედიაორგანიზაციების გამოხატვის თავისუფლების შეზღუდვის რისკი შექმნა. 

როგორც ორგანიზაცია აღნიშნავს, წინასაარჩევნო პერიოდში საკანონმდებლო ორგანოში კრიტიკული მედიასაშუალებების ჟურნალისტების მიმართ აკრედიტაციის შეჩერების რამდენიმე შემთხვევაც გამოვლინდა. ასევე, გამოვლინდა ჟურნალისტებზე სიტყვიერი და ფიზიკური შეურაცხყოფის შემთხვევები. მსგავსი ფაქტები კი, ჟურნალისტური საქმიანობის განხორციელების ხელშეშლად შეიძლება იქნას მიჩნეული. 

„არჩევნების წინ, ქვეყნის შიგნით არსებული დეზინფორმაციული და საინფორმაციო მანიპულაციების პარალელურად, მნიშვნელოვნად გააქტიურდა რუსული საინფორმაციო ოპერაციები პოლიტიკურ პროცესებში. სოციალურ მედიაში მოქმედმა ქსელმა, რომელიც რუსეთთან არის დაკავშირებული და წინა წლებში, ძირითადად, ანტიდასავლურ გზავნილებს, კერძოდ კი საქართველოს ევროკავშირში ინტეგრაციის საწინააღმდეგო ნარატივებს ავრცელებდა, წინასაარჩევნო პერიოდში ხელისუფლების მხარდამჭერი კამპანია გაააქტიურა“. 

სოციალური მედიის საარჩევნო მიზნებით გამოყენება 

როგორც „სამართლიანი არჩევნების“ ანგარიშში ვკითხულობთ, ოფიციალური გვერდების აქტიურობის პარალელურად, სოციალურ ქსელებში ანონიმურად

მიმდინარე არაეთიკურმა კამპანიამ, რომლის სამიზნეც პოლიტიკურ აქტორებთან ერთად, სამოქალაქო და მედია ორგანიზაციებიც იყვნენ, პარტიების (ძირითადად, მმართველი პარტიის) ნარატივებში გადაინაცვლა. ამ მიმართულებით განსაკუთრებით აქტიური ოპოზიციური პარტიების მადისკრედიტირებელი და მმართველი გუნდის მხარდამჭერი ანგარიშები იყვნენ.

„შეთქმულების თეორიები, ნაციონალისტური, ანტიდასავლური, ანტილიბერალური და ჰომოფობიური გზავნილები განსაკუთრებით ხშირი იყო პროსახელისუფლებო და ოპოზიციის მადისკრედიტირებელ კამპანიებში. მსგავს კამპანიებში აქტიურად იყვნენ ჩართული პროსახელისუფლებო მედიასაშუალებებიც. მათი რეკლამების უმრავლესობა შეიცავდა ღია აგიტაციას მმართველი პარტიის სასარგებლოდ და ოპოზიციური პოლიტიკური გაერთიანებების საწინააღმდეგოდ. აღნიშნულმა სარეკლამო კამპანიამ საარჩევნო სუბიექტსა და მოცემულ მედიასაშუალებებს შორის ზღვარი, ფაქტობრივად, წაშალა. ამასთან ერთად, „POSTV-ის“ რეკლამების ნაწილი შეიცავდა შეურაცხმყოფელ ლექსიკას, აწარმოებდა ჰომოფობიურ და ანტიდასავლურ, მათ შორის ევროკავშირის საწინააღმდეგო, კამპანიას“.

ხვალ, 26 ოქტომბერს საქართველოს საპარლამენტო არჩევნები გაიმართება. ქვეყნის ისტორიაში პირველად, საქართველოს მოქალაქეები უმაღლეს საკანონმდებლო ორგანოს სრულად პროპორციული საარჩევნო სისტემის საფუძველზე აირჩევენ. საქართველოს პარლამენტის 150 მანდატი განაწილდება იმ პოლიტიკურ პარტიებზე, რომლებიც არჩევნებში მონაწილე ამომრჩეველთა ნამდვილი ხმების 5 %-ს მაინც მიიღებენ.

„საქართველოს ახალგაზრდა იურისტთა ასოციაციის“ სადამკვირვებლო მისიამ წინასაარჩევნო გარემო შეაფასა. ორგანიზაციის ანგარიშის მიხედვით, წინასაარჩევნო პერიოდი მაღალი პოლარიზაციის ფონზე, არათანასწორ გარემოში წარიმართა. კანონმდებლობის დარღვევის ფაქტებმა და გამოკვეთილმა უარყოფითმა ტენდენციებმა კი წინასაარჩევნო პროცესებზე დამაზიანებლად იმოქმედა.  

საიამ უარყოფითად შეაფასა კომუნიკაციების კომისიის 4 გადაწყვეტილებაც: 

„ნიშანდობლივია, რომ კომისიის და შემდგომ სასამართლოს გადაწყვეტილებები ამ საქმეებზე საარჩევნო ნორმების არასწორ განმარტებებს ემყარებოდა, რაც მმართველ პარტიას, ყველა შემთხვევაში, სხვა საარჩევნო სუბიექტებთან შედარებით, უპირატეს მდგომარეობაში აყენებდა. ნორმების ამგვარი ინტერპრეტაცია ძირს უთხრის თავისუფალ, სამართლიან და კონკურენტულ წინასაარჩევნო გარემოს და აზიანებს პოლიტიკურ ძალებს შორის თანასწორი საარჩევნო გარემოს უზრუნველყოფის მიზანს“.

სადამკვირვებლო მისიის ფარგლებში საია საჯარო ინფორმაციის მოთხოვნის შესახებ წერილებზე საჯარო უწყებების რეაგირების მონიტორინგსაც აწარმოებდა. ორგანიზაციამ საჯარო ინფორმაციის მიღების მიზნით სხვადასხვა საჯარო უწყებას 158-ჯერ მიმართა. 48 შემთხვევაში მას პასუხი არ მიუღია, ხოლო 23 წერილზე პასუხი არასრულყოფილი იყო. 

„საჯარო ინფორმაციის გაუცემლობა აფერხებს საიას სადამკვირვებლო მისიის მონიტორინგის პროცესს“. 

„საქართველოს ახალგაზრდა იურისტთა ასოციაციის“ ანგარიშში მოხვდა რუსული სტილის კანონის მიღება და მისი თანმდევი მოვლენებიც.

„„უცხოური გავლენის გამჭვირვალობის“ კანონის ხელახალმა ინიციირებამ და მისმა თანმდევმა პროცესებმა, ასევე, ხელისუფლების მხრიდან სამოქალაქო სექტორის სისტემურმა მადისკრედიტირებელმა კამპანიამ და ოპოზიციური პოლიტიკური პარტიების აკრძალვის რიტორიკამ კითხვის ნიშნის ქვეშ დააყენა არჩევნების თავისუფალ და სამართლიან გარემოში ჩატარების შესაძლებლობა“.  

საიამ გრძელვადიანი სადამკვირვებლო მისია 2024 წლის აპრილიდან დაიწყო.

„საქართველოს ჟურნალისტური ეთიკის ქარტია“ 26 ოქტომბერს დაგეგმილ არჩევნებთან დაკავშირებით განცხადებას ავრცელებს.

„საქართველოს ჟურნალისტური ეთიკის ქარტია მოუწოდებს შინაგან საქმეთა სამინისტროს, სხვა ძალოვან უწყებებს, საარჩევნო პროცესის მონაწილე ყველა მხარეს, მათ შორის საარჩევნო ადმინისტრაციას, პოლიტიკურ პარტიებს და მოქალაქეებს, არჩევნების დღეს, 26 ოქტომბერს, გამოიჩინონ მაღალი პროფესიონალიზმი და მოქალაქეობრივი პასუხისმგებლობა, საზოგადოების ინფორმირების საქმეში ჟურნალისტიკის განსაკუთრებული როლის გათვალისწინებით და 2024 წლის არჩევნების თავისუფალ და კონკურენტულ გარემოში ჩატარების მნიშვნელობიდან გამომდინარე, კანონმდებლობის სრული დაცვით იმოქმედონ, ქართველ და უცხოელ ჟურნალისტებს პროფესიული საქმიანობის სრულყოფილად განხორციელების საშუალება მისცენ.

ჟურნალისტთა უსაფრთხოების უზრუნველყოფა სახელმწიფო ორგანოების პირდაპირი მოვალეობაა, ხოლო ჟურნალისტისთვის პროფესიულ საქმიანობაში ხელშეშლა სისხლის სამართლის კოდექსით დასჯადი დანაშაულია. 

საქართველოს ჟურნალისტური ეთიკის ქარტია არჩევნების დღეს ჟურნალისტთა უფლებების სადარაჯოზე იდგება და დაუყოვნებლივ გამოეხმაურება ჟურნალისტების მიმართ სახელმწიფო უწყებების წარმომადგენლების ან მოქალაქეების მხრიდან განხორციელებულ ნებისმიერ ზეწოლას“.

ამგვარი შემთხვევების შესახებ მიმართეთ ჟურნალისტური ეთიკის ქარტიასა და ქარტიის მედიაპლატფორმა „მედიაჩეკერს“ ცხელი ხაზის ნომერზე: 557 992 490, ან მოგვწერეთ ჩვენს ოფიციალურ ფეისბუკ გვერდებზე.

თბილისის საქალაქო სასამართლომ „იმედი“ და „რუსთავი 2“ „ძლიერი საქართველოს“ და „გახარია საქართველოსთვის“ ფასიანი პოლიტიკური რეკლამის განუთავსებლობისთვის 5-5 ათასი ლარით დააჯარიმა და ვიდერგოლის ეთერში განთავსება დაავალა. კომუნიკაციების კომისიამ ტელეკომპანიებს ადმინისტრაციული სამართალდარღვევის ოქმები 23  ოქტომბერს შეუდგინა.

ComCom-ის მიერ შედგენილი ადმინისტრაციული სამართალდარღვევის ოქმები წინასაარჩევნო პერიოდში სასამართლოში იგზავნება და საბოლოო გადაწყვეტილებას სასამართლო შემჭიდროვებულ ვადაში (2 დღე) იღებს.

კომისიის განცხადებით, ოპოზიციური პარტიების საჩივრების მიხედვით, მიუხედავად ტელევიზიებისთვის ფასიანი პოლიტიკური რეკლამის წარდგენისა და ამ საკითხზე ComCom-ისა და სასამართლოს გადაწყვეტილებებისა, რომლის ფარგლებშიც ორივე ტელევიზია ფასიანი პოლიტიკური რეკლამის განუთავსებლობისთვის კანონდამრღვევებად უკვე სცნეს, მაუწყებლები პარტიების მიერ მიწოდებულ ფასიან პოლიტიკურ რეკლამას არ ათავსებდნენ.

3 ოპოზიციური ძალის: „ძლიერი საქართველო“, „ერთიანობა - ნაციონალური მოძრაობა“, „გახარია საქართველოსთვის“ პოლიტიკური რეკლამების განუთავსებლობისთვის სასამართლომ ათ დღეში „იმედი“ და „რუსთავი 2“ ოთხ-ოთხჯერ, ჯამში 20-20 ათასი ლარით დააჯარიმა.

22 ოქტომბერს თბილისის საქალაქო სასამართლომ „რუსთავი 2“ 5 000 ლარით დააჯარიმა „ერთიანობა - ნაციონალური მოძრაობის“ უფასო პოლიტიკური რეკლამის განუთავსებლობისთვის.

„ერთიანობა - ნაციონალური მოძრაობის“ უფასო პოლიტიკური რეკლამის განუთავსებლობისთვის სასამართლომ 5-5 ათასი ლარით დააჯარიმა „იმედი“, POSTV და „მაესტროც“.  

თბილისის საქალაქო სასამართლომ „იმედი“ და „რუსთავი 2“ 5-5 ათასი ლარით ორჯერ დააჯარიმა კოალიცია „ძლიერი საქართველოს“ ფასიანი პოლიტიკური რეკლამის განუთავსებლობისთვისაც. 

„გახარია საქართველოსთვის“ კომუნიკაციების კომისიას უჩივლა სასამართლოშიც. 

10 ოქტომბერს „იმედმა“ გამოაქვეყნა განცხადება, რომ სანამ „მთავარი“, „ტვ პირველი“ და „ფორმულა“ „ქართული ოცნების“ ვიდეოებს ეთერში არ გაუშვებდა, „კოლექტიური ნაცმოძრაობის“ რეკლამებს ისიც აღარ განათავსებდა. „იმედის“ გადაწყვეტილება გაიზიარა „პოსტვ“-მაც.

თბილისში დაკავებული აზერბაიჯანელი ჟურნალისტი 1 თვეზე მეტია შიმშილობს. როგორც აფგან სადიგოვის მეუღლემ „მედიაჩეკერთან“ საუბრისას განაცხადა, ჟურნალისტის ჯანმრთელობის მდგომარეობა მკვეთრად გაუარესებულია.

სევინჩ სადიგოვას თქმით, აფგანს გადაადგილებაც უჭირს, წნევა და შაქარის ნორმა სისხლში ძალიან დაბალი აქვს და შესაძლოა, ნებისმიერ დროს კომაში ჩავარდეს.

„მისი მდგომარეობა ძალიან დამძიმებულია. მას დღეს შევხვდი, ის ეტლით მოიყვანეს. შეხვედრის დასრულებისას ექიმი და ფსიქოლოგი შემოვიდნენ და მითხრეს, რომ მისი ჯანმრთელობის მდგომარეობა ძალიან მძიმეა, ბავშვების თანდასწრებით არ უნდათ საუბარი, მაგრამ ნებისმიერ წუთს შეიძლება, რომ კომაში ჩავარდეს. 

ექიმი მეუბნებოდა, რომ რაღაც აუცილებლად უნდა მიიღოს, მაგრამ აფგანი არ თანხმდება. ამბობს, რომ შიმშილობას გააგრძელებს, რადგან არ მუშაობს კანონი და მუშაობს მხოლოდ ბრძანებები, მას სხვა გზა არ აქვს და მოკვდება“, - ამბობს სადიგოვა.

აფგან სადიგოვს თბილისის საქალაქო სასამართლომ 3-თვიანი საექსტრადიციო პატიმრობა 4 აგვისტოს შეუფარდა. ჟურნალისტი წინა დღეს, 3 აგვისტოს, შემდგომი ექსტრადირების მიზნით, ცენტრალური კრიმინალური პოლიციის დეპარტამენტმა დააკავა. საქალაქო სასამართლოს 4 აგვისტოს განჩინება უცვლელი დატოვა სააპელაციო სასამართლომაც.

აფგან სადიგოვს შსს-ის მიგრაციის დეპარტამენტმა საქართველოში პოლიტიკური თავშესაფრის მიცემაზე უარი 16 სექტემბერს უთხრა. 21 სექტემბრიდან კი, ჟურნალისტმა შიმშილობა დაიწყო.

აზერბაიჯანელი ჟურნალისტი საქართველოში 2023 წლის 24 დეკემბრიდან იმყოფება და მას საქართველოს იუსტიციის სამინისტროს მიერ გაცემული დროებითი ბინადრობის მოწმობა აქვს. აფგან სადიგოვი ონლაინ მედია “Azel.Tv”-ის მთავარი რედაქტორია.