საქართველოში მომუშავე ონლაინ მედიები: On.ge, „პუბლიკა“, „ტაბულა“, Netgazeti, „ბათუმელები“ 19 ნოემბერს, პოლიციის მხრიდან ჟურნალისტურ საქმიანობაში ხელშეშლის ფაქტებს გმობენ:

“კერძოდ, “მთავარი არხის” ოპერატორის, სერგი ბარამიძის დაკავებას, მის მიმართ განხორციელებულ ფიზიკურ ძალადობასა და საქმიანობაში ხელშეშლას.

ჟურნალისტურ საქმიანობაში ხელს უშლიდნენ OC Media-ს ჟურნალისტს, მარიამ ნიკურაძესაც. პოლიცია გადაღების შესაძლებლობას არ აძლევდა Netgazeti-ს კორესპონდენტ გივი ავალიანს და ფიზიკური შეურაცხყოფა მიაყენეს Publika-ს ჟურნალისტს, მინდია გაბაძეს.

მსგავსი შემთხვევები საფრთხეს უქმნის ქვეყანაში პრესის თავისუფლებას და არღვევს ჟურნალისტის ხელშეუხებლობის უფლებას.

ჟურნალისტისთვის პროფესიულ საქმიანობაში უკანონოდ ხელშეშლა, მათ შორის ძალადობის მუქარით ან სამსახურებრივი მდგომარეობის გამოყენებით, არის საქართველოს სისხლის სამართლის კოდექსის 154-ე მუხლით [ჟურნალისტისათვის პროფესიულ საქმიანობაში უკანონოდ ხელის შეშლა] გათვალისწინებული დასჯადი ქმედება.

ჟურნალისტურ საქმიანობაში ჩარევად მიიჩნევა: ფიზიკური ძალადობა, მუქარა ან სხვა ფორმის ზეწოლა, რომელიც აფერხებს ჟურნალისტის მუშაობას.

ხოლო საერთაშორისო სამართლის დონეზე, ჟურნალისტური საქმიანობა დაცულია ევროპული უფლებების კონვენციით, რომლის მე-10 მუხლი უზრუნველყოფს გამოხატვის თავისუფლებას. ევროსასამართლოში აღიარებული საქართველოს ვალდებულების მიხედვით, ჟურნალისტებს უნდა ჰქონდეთ უფლება, რომ მათი საქმიანობა არ შეიზღუდოს არასამართლებრივი ძალადობის, მუქარის ან სხვა სახის სამართლებრივი შეზღუდვების შედეგად.

ჟურნალისტების მიმართ წლების განმავლობაში წარმოებული მადისკრედიტირებელი კამპანიის ფონზე, ქვეყანაში სულ უფრო უარესდება პრესის თავისუფლების მაჩვენებელი. გამოვხატავთ უკიდურეს პროტესტს შინაგან საქმეთა სამინისტროს და სპეციალური საგამოძიებო სამსახურის უმოქმედობის გამო, მოვუწოდებთ ადგილობრივ და საერთაშორისო  საზოგადოებას, დაგვეხმარონ მედიაზე თავდასხმის ქმედით აღკვეთაში”- აღნიშნულია დამოუკიდებელი ონლაინ მედიების ერთობლივ განცხადებაში.

დღეს, 19 ნოემბერს სამართალდამცავებმა ჭავჭავაძის გამზირზე მიმდინარე მშვიდობიანი აქცია ძალის გამოყენებით დაშალეს, რის შედეგადაც 4 ჟურნალისტი დაშავდა:

• ტელეკომპანია „მთავარი არხის“ ოპერატორი სერგი ბარამიძე კი ძალის გამოყენებით დააკავეს. ბარამიძე მოგვიანებით, ხელწერილის საფუძველზე გაათავისუფლეს.
• პროფესიული მოვალეობის შესრულებისას ფიზიკურად იძალადეს და დააკავეს “მთავარი არხის” ოპერატორი სერგი ბარამიძე;
• სამართალდამცველებმა ფიზიკური შეურაცხყოფა მიაყენეს “პუბლიკას” ჟურნალისტს მინდია გაბაძეს.
• სპეციალური დანიშნულების რაზმის წევრებმა ხელი შეუშალეს OC Media-ს ჟურნალისტს, მარიამ ნიკურაძეს პროფესიული მოვალეობის შესრულებაში;
• სამართალდამცველებმა Netgazeti-ს კორესპონდენტს, გივი ავალიანს არ მისცეს გადაღების საშუალება.

მედიის წარმომადგენლებისთვის პროფესიულ საქმიანობაში ხელშეშლისა და ფიზიკური შეურაცხყოფის შემთხვევებს სამოქალაქო საზოგადოების არაერთი ორგანიზაცია გამოეხმაურა.

თბილისის სახელმწიფო უნივერსიტეტის პირველ კორპუსთან მიმდებარე ტერიტორია პროტესტანტებს კარვებით გადაკეტილი 17 ნოემბრიდან ჰქონდათ. ისინი 26 ოქტომბრის საპარლამენტო არჩევნებს გაყალბებულად მიიჩნევენ და ხელახალ არჩევნებს მოითხოვენ.

ფოტო - "პუბლიკა"


„მედიაომბუდსმენი“ შინაგან საქმეთა სამინისტროს მოუწოდებს, შეაჩეროს მედიასა და აქციის მონაწილეებზე ძალადობა. ორგანიზაცია მოუწოდებს სპეციალურ საგამოძიებო სამსახურსაც, დაუყოვნებლივ დაიწყოს გამოძიება სახელმწიფოს წარმომადგენლების მიერ ჩადენილ დანაშაულებთან დაკავშირებით. 

„მედიაომბუდსმენმა“ მედიის წარმომადგენლების დევნისა და დაკავების შეტყობინებებით სპეციალურ საგამოძიებო სამსახურს უკვე მიმართა.

დღეს, 19 ნოემბერს პოლიციამ ჭავჭავაძის გამზირზე მიმდინარე მშვიდობიანი აქცია ძალის გამოყენებით დაშალა, რის შედეგადაც 4 ჟურნალისტი დაშავდა. ტელეკომპანია “მთავარის” ოპერატორი სერგი ბარამიძე კი ძალის გამოყენებით დააკავეს. 

• სპეცდანიშნულების წევრები ჟურნალისტურ საქმიანობაში ხელს უშლიდნენ OC Media ჟურნალისტს მარიამ ნიკურაძეს
•  სამართალდამცველები გადაღების შესაძლებლობას არ აძლევდნენ Netgazeti კორესპონდენტს გივი ავალიანს
• ჟურნალისტური საქმიანობის შესრულების პროცესში დააკავეს მთავარი არხი • Mtavari Arkhi ოპერატორი სერგი ბარამიძე
• სამართალდამცველებმა ფიზიკური შეურაცხყოფა მიაყენეს პუბლიკა • Publika ჟურნალისტს მინდია გაბაძეს

სქრინი - TV პირველი


თბილისის საქალაქო სასამართლომ აფგან სადიგოვის სარჩელი შსს-ს მიგრაციის დეპარტამენტის წინააღმდეგ არ დააკმაყოფილა. სადიგოვი იმ გადაწყვეტილების ბათილად ცნობას ითხოვდა, რომლითაც მიგრაციის დეპარტამენტმა აზერბაიჯანელ ჟურნალისტს საქართველოში ლტოლვილისა და ჰუმანიტარული სტატუსის მინიჭებაზე უარი უთხრა. 

სასამართლოს გადაწყვეტილებას „სოციალური სამარლიანობის ცენტრის“ ხელმძღვანელი, თამთა მიქელაძე გამოეხმაურა. მისი თქმით: „ამით სასამართლო თანამონაწილეობს აფგან სადიგოვის ალიევისთვის გადაცემის დანაშაულში და ბრმად და უნამუსოდ ამტკიცებს, რომ აზერბაიჯანში რისკების წინაშე არ დადგება ეს ადამიანი. ადამიანი, რომელიც ორჯერ უკვე იყო დაპატიმრებული უკანონოფ ბაქოში. პროკურატურაც აჩქარებს ექსტრადიციის მოთხოვნით სასამართლოში შესვლას.

ყველა რგოლი ჩართულია ამ ოჯახის გადაგურებაში და ალიევის „ზაკაზის“ შესრულებაში. ყველაფერი უნდა გავაკეთოთ, რომ დიქტატორების და ავტორიტარების გარიგებისგან დავიცვათ ეს პატიოსანი და გაბედული ჟურნალისტების ოჯახი“.

თბილისში დაკავებული აზერბაიჯანელი ჟურნალისტის ინტერესებს სწორედ „სოციალური სამართლიანობის ცენტრი“ იცავს. ორგანიზაციის იურისტის, ქეთი ჩუთლაშვილის თქმით, საქალაქო სასამართლოს მიერ სადიგოვისთვის ლტოლვილის სტატუსის მინიჭებაზე უარი ძალაში დატოვა სააპელაციოში გასაჩივრდება. 

ცენტრის განცხადებით, მათ სასამართლოში, სხვა მნიშვნელოვან მტკიცებულებებთან ერთად,  Amnesty International-ის წერილიც წარადგინეს. ორგანიზაცია საქართველოს ხელისუფლებას აფგან სადიგოვის ექსტრადიციის დაუშვებლობისკენ მოუწოდებს და წერს, რომ აზერბაიჯანში დაბრუნების შემთხვევაში, სადიგოვის უფლებები სერიოზულად დაირღვევა, მათ შორის არსებობს უკანონო დაკავების, წამების და სხვა არასათანადო მოპყრობის, ასევე არასამართლიანი გასამართლების მომეტებული რისკები. 

„ექსტრადიციაზე დათანხმებით საქართველო დაარღვევს ნაკისრ საერთაშორისო ვალდებულებას (არგაძევების პრინციპს), არ გადააგზავნოს ნებისმიერი პირი ისეთ ადგილას, სადაც ის დადგება ადამიანის უფლებების ისეთი სერიოზული დარღვევის რეალური რისკის წინაშე, როგორიცაა წამება და არასათანადო მოპყრობის სხვა ფორმები. წამების და სხვა არაადამიანური მოპყრობის აკრძალვა საერთაშორისო კანონმდებლობით დაცული აბსოლუტური უფლებაა“.

აფგან სადიგოვს შსს-ის მიგრაციის დეპარტამენტმა საქართველოში პოლიტიკური თავშესაფრის მიცემაზე უარი 16 სექტემბერს უთხრა. 21 სექტემბრიდან კი, ჟურნალისტმა შიმშილობა დაიწყო და მისი ჯანმრთელობის მდგომარეობა როგორც მეუღლე, სევინჩ სადიგოვა ამბობს, ძალიან  მძიმეა. 

სადიგოვს საექსტრადიციო პატიმრობა კიდევ 3 თვით თბილისის საქალაქო სასამართლომ 1 ნოემბერს გაუხანგრძლივა. ის შემდგომი ექსტრადირების მიზნით 3 აგვისტოს დააკავეს. 

აზერბაიჯანელი ჟურნალისტი საქართველოში 2023 წლის 24 დეკემბრიდან იმყოფება და მას საქართველოს იუსტიციის სამინისტროს მიერ გაცემული დროებითი ბინადრობის მოწმობა აქვს. აფგან სადიგოვი ონლაინ მედია “Azel.Tv”-ის მთავარი რედაქტორია. 

„ანა დოლიძე პირველი არხის ჟურნალისტს თავს დაესხა“, - ამ სახელწოდებით „პირველმა არხმა“ მანიპულაციური მასალა ოფიციალურ ვებგვერდსა და სოციალურ ქსელში გამოაქვეყნა. ფეისბუკის გვერდზე გავრცელებულ ამბავს თან დართული ჰქონდა ფოტო, სადაც ჩანს, რომ დოლიძეს ხელი მაღლა აქვს აწეული და სათაურთან ერთად ქმნის შთაბეჭდილებას, რომ ის ან დასარტყმელად ემზადება ანდა ურტყამს. 

ეს ფოტო აქვს გამოყენებული ქავერად 1tv.ge-ზე გამოქვეყნებულ მასალასაც, რომელშიც უკვე ვიდეოსაც ვხვდებით. თან დართულ ტექსტში კი, ვკითხულობთ: „15 ნოემბერს, აქციის მიმდინარეობისას, პირველი არხის ჟურნალისტის შეკითხვაზე პასუხის გაცემის ნაცვლად, „ძლიერი საქართველოს“ წევრმა, ანა დოლიძემ ჟურნალისტს შეურაცხყოფა მიაყენა. 

სამწუხაროდ, ლამის ჩვეულებრივ ამბად იქცა, რომ რიგ შემთხვევებში პოლიტიკოსები ჟურნალისტებს არ აძლევენ პროფესიული მოვალეობის შესრულების საშუალებას და არც ღია აგრესიას თაკილობენ.

„ძლიერი საქართველოს“ წევრმა, ანა დოლიძემ უკვე მეორედ მიაყენა შეურაცხყოფა პირველი არხის ჟურნალისტს და, ამავე დროს, ხელისუფლებაში მოსვლის შემდეგ მთელ არხს ანგარიშსწორებით დაემუქრა. ჩვენ არ ვაპირებთ ქალბატონ ანა დოლიძესა და მის თანამოაზრეებთან პოლემიკას, თუ რამდენად შეესაბამება პროევროპულ სულისკვეთებას მედიის მიმართ მუქარა, რადგან დარწმუნებულნი ვართ, რომ ასეთი საქციელი მიუღებელია ნებისმიერი ადამიანის მხრიდან. თუმცა ვაცხადებთ, რომ, ამგვარი ინციდენტების მიუხედავად, მაინც გავაგრძელებთ პროფესიული მოვალეობის შესრულებას და მოვლენების გაშუქებას – ვაჩვენებთ იმას, რაც რეალურად ხდება და რასაც ვხედავთ და არა იმას, რაც ვიღაცებს სურთ, რომ დაგვანახონ. ასევე, მიუხედავად მუქარებისა, მომავალშიც ყველაფერს გავაკეთებთ, რომ საქართველოს მოქალაქეებს სრული ინფორმაცია მივაწოდოთ იმ ადამიანების შესახებ, რომელთაც ქვეყნის მართვის პრეტენზია აქვთ“.

რა ჩანს ვიდეოში? 

„პირველი არხის“ მიერ მასალისთვის შერჩეული სათაურისა და ფოტოს შემდეგ, მაყურებელი ელოდება, რომ სწორედ ამ ვიდეოში ნახავს, როგორ „დაესხა თავს“ ანა დოლიძე ჟურნალისტს.

თუმცა, პირველი, რასაც კადრებიდან ვგებულობთ, არის ის, რომ ფოტო ამ ვიდეოდან ამოღებული ე.წ. სქრინი არ არის. ამასთან, ვიდეო ჩაწერილია ღამე, ფოტო კი, გადაღებულია დღის სინათლეზე. 

ვიდეოში ჩანს, რომ „პირველი არხის“ ჟურნალისტს პოლიტიკური გაერთიანება „ძლიერი საქართველოს“ ერთი-ერთი ლიდერისგან კომენტარის მიღება მიმდინარე სტუდენტური პროტესტის შესახებ სურს, ანა დოლიძე კი, ტელევიზიის თანამშრომელს ახსენებს, რომ ის ხალხის გადასახადებით დაფინანსებული არხია.

„ვაფინანსებთ ამ ტელევიზიას და ვაფინანსებთ ბოლოჯერ, იმიტომ რომ თქვენი ტელევიზია გადაქცეულია გველის გესლის მთხეველ ორგანოდ, ჩვეულებრივ რუსულ პროპაგანდისტულ არხად“, - მიმართავს დოლიძე ჟურნალისტს და გამოხატავს უკმაყოფილებას ქალების აქციასთან დაკავშირებით მომზადებული სიუჟეტის გამო, რომელიც მისი თქმით, „არაფერში არ ჯდება“. დოლიძე აღნიშნავს იმასაც, რომ პრეტენზიას გამოთქვამს, როგორც გადასახადის გადამხდელი და ამბობს: “ხელისუფლებაში რომ მოვალ, დაივიწყეთ სახელმწიფო დაფინანსება“.

რა ნახა მაყურებელმა ქალების აქციასთან დაკავშირებით 13 ნოემბრის მთავარ საინფორმაციო გამოშვებაში და რითია უკმაყოფილო ანა დოლიძე?

„მოამბის“ ეთერში გასულ დაახლოებით 7-წუთიან სიუჟეტს - „ოპოზიციონერი ქალების საპროტესტო აქცია“ 5 ავტორი ჰყავს: შალვა სუმბაძე, ლიზა დვალი, შოთა ჩოხელი, პაატა ჯაჭვლიანი და გოჩა გამეზარდაშვილი. წამყვანის, თამთა სანიკიძის თქმით, საარჩევნო ადმინისტრაციასთან არჩევნების შედეგების გაუქმების მოთხოვნით ქალების აქცია გაიმართა, სადაც ქალი ოპოზიციონერი პოლიტიკოსებიც იმყოფებოდნენ. 

„სიტუაცია განსაკუთრებით მაშინ გამწვავდა, როცა ადგილზე შეკრებილებმა ხელახალი არჩევნების მოთხოვნით დაწერილი განცხადებების დასატოვებლად საარჩევნო ადმინისტრაციის შენობაში შესვლა სცადეს. მცდელობას სამართალდამცავებთან დაპირისპირება მოჰყვა. მოგვიანებით აქციის მონაწილეებმა ფეხით მსვლელობა მოაწყვეს, რომელიც არანაკლებ ხმაურიანი აღმოჩნდა“, - ამბობს სანიკიძე. 

სიუჟეტის პირველივე წინადადებაში კი, ვისმენთ: „ქალების აქცია, რომელიც დაანონსებული იყო, როგორც მშვიდობიანი პროტესტი, სტარტზევე ხმაურით დაიწყო“. ჟურნალისტის თქმით, პროცესი დოკუმენტების ხელმიწერით გაგრძელდა, რომლის შეტანაც ცესკოში საპროტესტო აქციის მონაწილეებს ჯგუფურად სურდათ. 

„თავდაპირველად აქციის მონაწილეები ამტკიცებდნენ, რომ მათ უფლებებს უზღუდავდნენ, როდესაც განცხადების ჩაბარების შესაძლებლობას არ აძლევდნენ, თუმცა ცესკოს წარმომადგენელმა მოგვიანებით მათ განუმარტა, რომ შესვლის შესაძლებლობა მათ მაშინვე ექნებოდათ, როგორც კი კონსტრუქციულად, რიგრიგობით დაიწყებდნენ საკუთარი ხელმოწერილი დოკუმენტების საარჩევნო კომისიისთვის წარდგენას“. 

როგორ სიუჟეტის ავტორი ჰყვება, აქციის მონაწილეებმა ცესკოს შენობიდან აღმაშენებლის ხეივანზე გადაინაცვლეს და მსვლელობა დაიწყეს:

„აქციის მონაწილეთა მცირე რიცხოვნობიდან გამომდინარე შსს-ს წარმომადგენლებმა მათ გზის სრულად გადაკეტვის უფლება არ მისცეს, თუმცა მსვლელობისთვის გზის სავალი ნაწილის ნახევარი გაათავისუფლეს, ამის მიუხედავად ვითარება კიდევ რამდენჯერმე დაიაძაბა. ქალი ლიდერების ნაწილი პოლიციას დაუპირისპირდა და გზის გადაკეტვას კატეგორიულად ითხოვდა, თუმცა ხელოვნურად. იმის მიუხედავად, რომ აქციის მონაწილეთა რაოდენობა სულ რამდენიმე ათეულ ადამიანს შეადგენდა“. 

აღსანიშნავია, რომ სიუჟეტში სწორედ ამ ტექსტის პარალელურად, ვხედავთ ანა დოლიძესაც, რომელსაც ხელი მაღლა აქვს აწეული და საიდანაც კადრი „პირველმა არხმა“ ფოტოდ გამოიყენა მასალისთვის - „ანა დოლიძე პირველი არხის ჟურნალისტს თავს დაესხა“. 

ჟურნალისტის თქმით, „დაპირისპირების კადრები“ სოციალურ ქსელში ანა დოლიძემ თავადაც გაავრცელა, მაყურებელი ამ ვიდეოში ხედავს, რომ დოლიძე საავტომობილო გზაზე დგას და მოძრაობის 5 წუთით შეჩერებას ცდილობს.

13 ნოემბრის აქციაზე საუბარი სიუჟეტში ამით სრულდება და ავტორი ამბობს: „ეს ანა დოლიძის ფეისბუქ გვერდზე გამოქვეყნებული ერთადერთი მსგავსი ვიდეო არ არის. მან შინაგან საქმეთა სამინისტროს თანამშრომლებთან დაპირისპირების ვიდეო 11 ნოემბრის საღამოსაც გამოაქვეყნა, სადაც პოლიციას შეურაცხმყოფელი ეპითეტებით მიმართავს და ამის პარალელურად აღნიშნავს, რომ მას ვერ დააკავებენ, ვინაიდან პარლამენტის დეპუტატია“ და შემდეგ დრო ამ ვიდეოს ეთმობა. 

ავტორები მაყურებლებს 26 ოქტომბრის შემდეგ გამართულ აქციებსაც ახსენებენ და მმართველი პარტიის პოზიციას სთავაზობენ, რომ ოპოზიციამ გაყალბების მტკიცებულებები ვერ წარმოადგინა და „აქციები არის მცდელობა, მოახდინონ რაიმე ფორმით არჩევნების დისკრედიტირება“. ამას „ქართული ოცნების“ 2 წევრის, არჩილ გორდულაძისა და რატი იონათამიშვილის კომენტარები მოსდევს. აღსანიშნავია ისიც, რომ სიუჟეტში დრო აქციის მონაწილე მხოლოდ ერთი ქალის, „ერთიანობა - ნაციონალური მოძრაობის“ წევრის, თეონა ჭალიძის 13-წამიან შეფასებას ეთმობა. 

სიუჟეტი კი, სრულდება ფრაზით: “როგორც ირკვევა მსგავსი შინაარსის პროტესტი მსჯავრდებული ყოფილი პრეზიდენტის მოწონებას იმსახურებს. სააკაშვილი ოპოზიციას მოუწოდებს, გაზარდონ ქუჩის აქციების მასშტაბი“, პარალელურად კი, ეკრანზე ნაჩვენებია მიხელ სააკაშვილის ფეისბუკ პოსტიც. 

გუშინ, 16 ნოემბერს „პირველმა არხმა“ გაავრცელა განცხადებაც - „მივმართავთ „ძლიერ საქართველოს“ და სხვა პოლიტიკურ აქტორებს, დაიცვან საყოველთაოდ მიღებული ქცევის ნორმები“. 

„გვსურს, გამოვეხმაუროთ პოლიტიკური მოძრაობა „ძლიერი საქართველოს“ ლიდერის, ანა დოლიძის ბოლო დღეების განმავლობაში გამოხატულ აგრესიას პირველი არხის ჟურნალისტებისა და მთლიანად ორგანიზაციის მიმართ. როგორც ჩანს, ქალბატონი დოლიძე ცდილობს, გარკვეული დაპირისპირების პროვიცირებას და საზოგადოებრივი მაუწყებლის დისკრიმინაციას.

პირველ რიგში, ჩვენს შეშფოთებას იწვევს აქციების დროს მისი აგრესია ჩვენი ჟურნალისტების მიმართ, რამაც შესაძლოა, უკონტროლო პროცესი გამოიწვიოს და საფრთხე შეუქმნას ჟურნალისტის და მასთან ერთად მყოფი გადამღები ჯგუფის უსაფრთხოებას, თავი რომ დავანებოთ ჟურნალისტურ საქმიანობაში ხელის შეშლას. თავის მხრივ, მისი მიზანმიმართული და დაუსაბუთებელი ნეგატიური კამპანია პირველი არხის წინააღმდეგ, ხელოვნურად აქცევს ორგანიზაციას აგრესიის ობიექტად, რაც, ასევე, შეიძლება, საფრთხეს უქმნიდეს ყველა იმ ადამიანს, რომელიც საქმიანობს საზოგადოებრივ მაუწყებელში.

აღსანიშნავია, რომ ქალბატონი ანა დოლიძის საქციელს სხვა პოლიტიკური ლიდერებიც ბაძავენ და ეს კიდევ უფრო ამტკიცებს ჩვენს წუხილს სახიფათო ტენდენციებთან დაკავშირებით. კატეგორიულად ვგმობთ ამგვარ ქმედებას და მივმართავთ პოლიტიკურ გაერთიანება „ძლიერ საქართველოს“, ასევე, სხვა პოლიტიკურ აქტორებს, გაიაზრონ საკუთარი პასუხისმგებლობა შესაძლო ნეგატიურ შედეგებთან დაკავშირებით და ჟურნალისტებსა და ჩვენს მედიაორგანიზაციასთან ურთიერთობისას დაიცვან საყოველთაოდ მიღებული ქცევის წესები“, - წერს ტელეკომპანია. 

რამდენად იცავს „პირველი არხი“ გაშუქების პროფესიულ სტანდარტებს?

13 ნოემბრის სიუჟეტი - „ოპოზიციონერი ქალების საპროტესტო აქცია“ ვერ აკმაყოფილებს გაშუქების მიუკერძოებლობის პრინციპს. 15 ნოემბრის მასალა კი, - „ანა დოლიძე პირველი არხის ჟურნალისტს თავს დაესხა“ მანიპულაციურია.

„მაუწყებლობის შესახებ“ საქართველოს კანონით, საზოგადოებრივი მაუწყებელი ვალდებულია, „უზრუნველყოს პროგრამების სარედაქციო დამოუკიდებლობა, სამართლიანობა და მიუკერძოებლობა; სახელისუფლებო, პოლიტიკური, რელიგიური და კომერციული გავლენისაგან თავისუფლება“. 

„საზოგადოებრივი მაუწყებლის ქცევის კოდექსით“ კი, „პირველი არხი“ ისწრაფვის დაიცვას: „მიუკერძოებლობა - ვიყოთ მიუკერძოებლები. შევისწავლოთ და სამართლიანად ავსახოთ განსხვავებული პოზიციები საკამათო საკითხის შესახებ. დავიცვათ ბალანსი და არ გამოვხატოთ არც ერთი პოზიციის მხარდაჭერა. უყურადღებოდ არ დავტოვოთ არც ერთი საგულისხმო და ღირებული აზრი“. 

ფოტო: Mo Se

აღმაშენებლის ხეივანზე, საპროტესტო მსვლელობისას ტელეკომპანია „ფორმულას“ ერთ-ერთი დამფუძნებელი და რეჟისორი, გიორგი ლიფონავა დააკავეს. ამის შესახებ ინფორმაციას თავად ტელეკომპანიაც ავრცელებს.

„კონკრეტული სახელებით და გვარებით არ შემიძლია, რომ გითხრათ. შემიძლია გითხრათ, რომ სამი პირია ადმინისტრაციული წესით დაკავებული“, - განუცხადეს „მედიაჩეკერს“ შინაგან საქმეთა სამინისტროში.

ცესკოს შენობასთან დაწყებული აქციის მონაწილეებმა, პროტესტის ნიშნად, აღმაშენებლის ხეივნის გადაკეტვა სცადეს, თუმცა მათ პოლიციამ ამის საშუალება არ მისცა. სამართალდამცველებმა აქციის მონაწილეებს განუცხადეს, რომ ხალხის მცირე რაოდენობის გამო, გზის გადაკეტვის უფლება არა აქვთ.

აქციის მონაწილეებმა გზის გადაკეტვის გადაწყვეტილება მას შემდეგ მიიღეს, რაც ცენტრალურმა საარცევნო კომისიამ 26 ოქტომბრის არჩევნების შემაჯამებელი ოქმი დაამტკიცა.

5 ივლისის საქმეზე მსჯავრდებულების: დავით კუტალაძე, აკაკი ნაკაშიძე და ცოტნე ჩიხლაძე ვადაზე ადრე გათავისუფლებას „საქართველოს ახალგაზრდა იურისტთა ასოციაციის“ თავმჯდომარე, ნონა ქურდოვანიძე გამოეხმაურა. ქურდოვანიძის განცხადებით, ლექსო ლაშქარავას წინააღმდეგ ჩადენილ ძალადობაში მხილებულებზე „ამნისტია წესით არ უნდა გავრცელებულიყო“. 

2021 წლის 5 ივლისს “ღირსების მარშის” საწინააღმდეგო ძალადობრივი შეკრების გაშუქებისას მედიის 50-ზე მეტი წარმომადგენელი დაშავდა. მათ შორის „ტვ პირველის" ოპერატორი, ლექსო ლაშქარავაც იყო, რომელიც ძალადობიდან რამდენიმე დღეში გარდაიცვალა.

„დღეს გავრცელდა ინფორმაცია, რომ ლექსო ლაშქარავას წინააღმდეგ ჩადენილ ძალადობაში მხილებულმა მსჯავრდებულებმა ციხე დატოვეს.

სასამართლო მათ მიმართ გამოყენებულ სანქციაში ისედაც ლმობიერი იყო და საქმის განხილვისას მოუხსნა ერთი მუხლი, რომელიც უფრო მძიმე სანქციას ითვალისწინებდა. ამის გამო მათ ციხე 2025 წლის ზაფხულში უნდა დაეტოვებინათ.

იმ მუხლზე, რომელზეც სასჯელს იხდიდნენ, ამნისტია წესით არ უნდა გავრცელებულიყო. საინტერესოა, სხვა რა საფუძვლით მიიღეს მათ შეღავათები. ამ კითხვით საჯაროდაც მივმართავთ სასჯელაღსრულების დეპარტამენტს და დამატებით წერილობითაც მივწერთ.

ევროკავშირში გაწევრიანების ერთ-ერთი პირობა 5 ივლისის მოვლენების სრული გამოძიება იყო და არა უკვე დასჯილი პირების შეღავათები. ძალადობის ორგანიზატორები ისევ დაუსჯელები არიან,“ - წერს საიას თავმჯდომარე.

პარლამენტმა „ამნისტიის შესახებ“ კანონი 17 სექტემბერს მიიღო.

2021 წლის 5 ივლისის ძალადობის საქმეზე მსჯავრდებულ 6 პირს 4-წლიანი პატიმრობა ჰქონდა შეფარდებული.

ფოტო / "ბათუმელები"


ტელემედიის ნაწილს გუშინ, 14 ნოემბერს ბათუმელი სტუდენტების მიერ სახელმწიფო უნივერსიტეტის შენობაში პროტესტის დაწყება არ გაუშუქებია. 

ბათუმის სახელმწიფო უნივერსიტეტის სტუდენტთა ნაწილის აქციის შესახებ ინფორმაცია ონლაინ მედიამ გუშინ შუადღით გაავრცელა. თუმცა, „პირველ არხს“, „რუსთავი 2“-ს, „იმედსა“ და POSTV-ის ვებგვერდებსა და სოციალურ ქსელებში ამის შესახებ მასალები არ გამოუქვეყნებიათ. სტუდენტთა ჯგუფის პროტესტის შესახებ ინფორმაცია ვერც ამ ტელევიზიების საინფორმაციო გამოშვებებში მოხდა. სამაგიეროდ, მაგალითად, ერთ-ერთმა სამთავრობო ტელევიზიამ, „იმედმა“ 14 ნოემბრის მთავარ საინფორმაციო გამოშვებაში დრო დაუთმო სიუჟეტებს: „“გლადიატორი 2-ის“ პრემიერა“, „საკოლექციო მონეტები“, „თაბორის მთის ბილიკი“. „ქრონიკის“ ამავე გამოშვებაში გავიდა სიუჟეტიც სათაურით - „ლიბერალური ფაშიზმი“, რომელიც ძეგლების შავი წერტილებით მონიშვნას ეხებოდა. ანა ბერძენიშვილის თქმით: „ოპოზიციისა და მათი მეგობარი „ენჯეოების“ უარგუმენტობა იქამდე მივიდა, რომ პროტესტის გამოხატვას მსგავსი უსუსური ფორმებით ცდილობენ“. 

ბათუმის სახელმწიფო უნივერსიტეტის სტუდენტთა ნაწილმა გუშინდელი ღამე უნივერსიტეტის შენობაში გაათია. ისინი 26 ოქტომბერს ჩატარებულ არჩევნებს გაყალბებულად მიიჩნევენ და ხელახალ არჩევნებს ითხოვენ. მათ სოლიდარობას სხვადასხვა უნივერსიტეტის სტუდენტური ჯგუფებიც უცხადებენ. ბსუ-ს სტუდენტები საპროტესტო აქციის გამართვას დღეს, 15 ნოემბერს, 18:00 საათზე გეგმავენ უნივერსიტეტის შენობასთანაც.

სამთავრობო ტელევიზიებმა კი, დღეს უკვე სოციალურ ქსელში ბათუმის სახელმწიფო უნივერსიტეტის სტუდენტთა ჯგუფის მადისკრედიტირებელი კამპანია დაიწყეს. მაგალითად, „იმედის" მიერ გამოქვეყნებულ ქარდზე ვკითხულობთ: „ბათუმის უნივერსიტეტის პიკეტირების მონაწილე პირების ნაწილი სტუდენტი არ არის - ისინი სხვადასხვა პარტიის აქტივისტები არიან“. მსგავსი შინაარსის მასალა გაავრცელა POSTV-მაც. 

.....................................................................................................................................................................................................
„მაუწყებლობის შესახებ“ საქართველოს კანონით, საზოგადოებრივი მაუწყებელი ვალდებულია, უზრუნველყოს აუდიტორიის დროული და ყოველმხრივი ინფორმირება საქართველოში, მის რეგიონებსა და მსოფლიოში მიმდინარე მნიშვნელოვანი მოვლენების შესახებ. .....................................................................................................................................................................................................

საქართველოში 26 ოქტომბერს საპარლამენტო არჩევნები ჩატარდა. ცენტრალური საარჩევნო კომისიის მიერ გამოქვეყნებულ შედეგებს საქართველოს პრეზიდენტი, ოპოზიციური პარტიები და ამომრჩეველთა ნაწილი გაყალბებულად მიიჩნევს და ხელახალ არჩევნებს ითხოვს. საპარლამენტო არჩევნების სავარაუდო გაყალბების ფაქტზე გამოძიება პროკურატურამ ცესკოს მიმართვის საფუძველზე დაიწყო.

ტელეკომპანია „იმედმა“ 26 ოქტომბრის არჩევნების წინა პერიოდში კიდევ ერთხელ განაცხადა, რომ ტელევიზიის მისია „ნაციონალური მოძრაობის“ ხელისუფლებაში არ დაბრუნებაა. postv-ის 52 %-იანი წილის მფლობელი კი, ვიქტორ ჯაფარიძეა, რომელიც 2024 წლის არჩევნებზე „ქართული ოცნების“ პარტიული სიის 55-ე ნომერია.

„საქართველოს ჟურნალისტური ეთიკის ქარტია“ შინაგან საქმეთა სამინისტროს და საპოლიციო ძალებს მოუწოდებს, ჟურნალისტებს სათანადო პატივისცემით მოეპყრონ და პროფესიული მოვალეობის შესრულების შესაძლებლობა მისცენ, მათ შორის, საპროტესტო აქციების გაშუქებისას. 

გუშინ, 13 ნოემბერს, ცენტრალურ საარჩევნო კომისიასთან, ხელახალი არჩევნების მოთხოვნით ქალი პოლიტიკოსების მიერ ორგანიზებული აქციის გაშუქებისას, მედია „აპრილის“ ფოტო რეპორტიორს, ვახო ქარელს ვაკე-საბურთალოს პოლიციის უფროსმა, ლაშა სალუქვაძემ მუშაობაში ხელი შეუშალა. ქარელმა სპეციალურ საგამოძიებო სამსახურსაც მიმართა.

მედია „აპრილის“ ფოტორეპორტიორს, ვახო ქარელს ქალთა საპროტესტო მსვლელობის გაშუქებისას სამართალდამცავმა პროფესიულ საქმიანობაში ხელი შეუშალა. 

როგორც „აპრილი“ წერს, ქარელმა პოლიციელს არაერთხელ განუმარტა, რომ მედიის წარმომადგენელი იყო, საპასუხოდ კი სამართლდამცავმა ფოტორეპორტიორს უთხრა: „მერე რა რომ ჟურნალისტი ხარ, თავხედი არ უნდა იყო“.

„აპრილის“ ცნობით, ვახო ქარელმა სპეციალურ საგამოძიებო სამსახურს უკვე მიმართა. საგამოძიებო უწყებას დაუკავშირდა „მედიაჩეკერიც“, დამატებითი ინფორმაციის მიღების შემთხვევაში, მასალა შესაბამისად განახლდება. 

დღეს, 13 ნოემბერს ცენტრალური საარჩევნო კომისიის შენობასთან ხელახალი არჩევნების მოთხოვნით ქალების აქცია - „დავიბრუნოთ ჩვენი ხმა!“ გაიმართა. აქციის მონაწილეებმა გამართეს საპროტესტო მსვლელობაც. 

დღეს, 13 ნოემბერს ცენტრალური საარჩევნო კომისიის შენობასთან ქალების აქცია - „დავიბრუნოთ ჩვენი ხმა!“ გაიმართა. პროტესტის მონაწილეებს ხელში ეჭირათ თეთრი ფურცლები შავი წერტილებით, როგორც „გაჟონილი ხმების“ სიმბოლო.

პროსახელისუფლებო POSTV-მ ქალების საპროტესტო აქციასთან დაკავშირებით სოციალურ ქსელში ფოტოფაბრიკაცია გამოაქვეყნა და ფურცლებზე დატანილი შავი ლაქა წითელი ფერით შეცვალა. ქარდზე დატანილი იყო ფრაზაც: „ნეტა რას უნდა ნიშნავდეს?“

POSTV-ის მიერ გავრცელებული ფოტოფაბრიკაცია და გენდერული დეზინფორმაცია ფაქტების გადამოწმების პლატფორმამაც - „მითების დეტექტორი“ გადაამოწმა.  

„ცესკოსთან გამართული აქციიდან მედიამ ფოტოები და ვიდეოები გაავრცელა. ყველა მათგანში ჩანს, რომ წერტილები, რომლებიც მონაწილეების ფურცლებზეა გამოსახული, არა წითელი, არამედ შავი ფერისაა, შესაბამისად, POSTV-ის მიერ გამოქვეყნებული საინფორმაციო ბარათი ფოტოფაბრიკაციაა“, - წერს ორგანიზაცია.  

facebook-მა POSTV-ის მასალა შესაბამისად - alerted photo აღნიშნა. მოგვიანებით კი, ტელევიზიამ ქარდი საერთოდ წაშალა. 

POSTV-ის 52 %-იანი წილის მფლობელი ვიქტორ ჯაფარიძეა, რომელიც 2024 წლის არჩევნებზე „ქართული ოცნების“ პარტიული სიის 55-ე ნომერია.

„მედიის განვითარების ფონდი“ წინასაარჩევნო პერიოდში ტრადიციულ და სოციალურ მედიაში ანტიდასავლურ გზავნილებსა და დეზინფორმაციას იკვლევდა. შუალედურ ანგარიშში - „ანტიდასავლური პროპაგანდა და დეზინფორმაცია 2024 წლის საპარლამენტო არჩევნებზე“ 1 ივლისიდან 1 ოქტომბრამდე პერიოდია გაანალიზებული.

ანტიდასავლური გზავნილები ტრადიციულ მედიაში

ანტიდასავლური დისკურსის შესწავლისას „მედიის განვითარების ფონდმა“ სამთვიან პერიოდში 4055 კომენტარი გააანალიზა. გზავნილების უმეტესობა კოლექტიური დასავლეთის (32,9% - 1333) წინააღმდეგ იყო მიმართული, რასაც ანტიამერიკული (23,3% - 945) გზავნილები მოსდევდა. 13,1%-ს კი შეადგენდა რუსეთის მხარდამჭერი პირდაპირი გზავნილები, ან კომენტარები, რომლებიც რუსეთის ქმედებების ირიბ გამართლებას ახდენდა. როგორც ორგანიზაცია აღნიშნავს, რუსეთი ერთადერთი სუბიექტია, რომელიც კვლევაში ან პოზიტიურად არის წარმოჩენილი, ან მისი ქმედებების ირიბი გამართლება ხდება, ყველა სხვა სუბიექტი კი ნეგატიურ კონტექსტშია წარმოდგენილი.

MDF-ის შუალედური ანგარიშის მიხედვით, სახელისუფლებო სარედაქციო პოლიტიკის მედიები დასავლურ კონსერვატიულ და ჩინურ წყაროებს უფრო ციტირებდნენ, ასევე უკრაინელებს, ვინც ზელენსკის ხელისუფლების მიმართ კრიტიკულად არის განწყობილი, ღიად კრემლისტური გამოცემები კი - რუსეთის და ბელორუსის. არასამთავრობო ორგანიზაციების პოლიტიზირებულობასა და უცხო ქვეყნის დაკვეთით მოქმედებაზე განცხადებებს კი, სახელისუფლებო პარტიასა და ექსპერტებთან ერთად, სახელისუფლებო პროპაგანდისტული ტელეკომპანიების „იმედისა“ და „პოსტვის“ წამყვანებიც აკეთებდნენ: 

• მაგდა ანიკაშვილი, ტვ იმედის ჟურნალისტი: ,,...ზღვარი, პრაქტიკულად, პარტიებსა და ენჯეოებს შორის აღარ არსებობს25". 
• ზვიად ავალიანი, PosTV-ის წამყვანი: “...ისინი რეალურად ასრულებენ დავალებას… ისინი არიან იმ ნარატივში, რასაც ქვია რადიკალური ოპოზიცია და ენჯეო სექტორი და რასაც ამ ნარატივის შემქმნელები ბრძანებენ, ის უნდა გააკეთონ26.’’ 

მედია, როგორც წყარო 

მედიები, რომლებიც ანტიდასავლურ გზავნილებს ავრცელებდნენ ან ასეთი გზავნილების გამტარები რესპონდენტების პოზიციის ხშირი გაშუქების გამო იყვნენ, „მედიის განვითარების ფონდმა“ სარედაქციო პოლიტიკის მიხედვით, კრემლისტურ/ულტრამემარჯვენედ და სახელისუფლებოდ დაყო. 

MDF-ის შუალედური ანგარიშის მიხედვით, კრემლისტური/ულტრამემარჯვენე მედიებიდან ყველაზე მეტ ანტიდასავლურ გზავნილს „სეზონი ტვ“-ის (318) წამყვანები ახმოვანებდნენ. როგორც ორგანიზაცია აღნიშნავს, კრემლისტური „ალტ-ინფოს“ ეთერში ძირითადად ამავე ტელევიზიასთან დაკავშირებული კონსერვატიული მოძრაობის წევრები ისხდნენ და მედიისა და პარტიის ერთმანეთისგან გამიჯვნა პრაქტიკულად შეუძლებელი იყო, საარჩევნო ციკლის გამო კი, პარტიის წარმომადგენლები რესპონდენტების კატეგორიაში გააერთიანეს.

როგორც კვლევაში ვკითხულობთ, სახელისუფლებო სარედაქციო პოლიტიკის მედიებიდან ყველაზე მეტ ანტიდასავლურ გზავნილს PosTV ავრცელებდა (182), რომლის საკონტროლო პაკეტის მფლობელი “ხალხის ძალის” ერთ-ერთი ლიდერი ვიქტორ ჯაფარიძეა. კვლევის ავტორები აღნიშნავენ იმასაც, რომ PosTV განსაკუთრებით ჰომოფობიური და ანტილიბერალური განწყობებით გამოირჩევა, რისთვისაც სპეციალური გადაცემა “ლიბერალიზმის ანატომიაც” კი შექმნა. 

„სახელისუფლებო ტელეკომპანია „იმედში“ (24 - სარედაქციო, 207- რესპონდენტი), ისევე, როგორც ონლაინ სააგენტო “მარშალპრესზე” (7 - სარედაქციო, 815 - რესპონდენტი) ანტიდასავლური კომენტარების სიჭარბე რესპონდენტების ხარჯზე მიიღწევა. ანალოგიური ვითარებაა გაზეთ “რეზონანსშიც” (1 - სარედაქციო, 236 - რესპონდენტი)“, - ვკითხულობთ ანგარიშში.

დეზინფორმაცია და სხვა მანიპულაციური შინაარსი სოციალურ მედიაში

ივლისი-სექტემბრის პერიოდში „მითების დეტექტორმა“ პოლიტიკური პარტიების წინააღმდეგ დეზინფორმაციისა და მანიპულაციური შინაარსის 25 შემთხვევა გამოავლინა. 

ანგარიშის მიხედვით, ყალბი ამბების სამიზნეს არჩევნებში მონაწილე კოალიციური გაერთიანებები, კონკრეტული პოლიტიკური პარტიები და პოლიტიკური ლიდერები წარმოადგენდნენ, თუმცა გავრცელებული ყალბი ინფორმაციის უმეტესი ნაწილი, 25-დან 19 შემთხვევა ოპოზიციის წინააღმდეგ იყო მიმართული. წინასაარჩევნო მონიტორინგის დროს გამოკვეთილი სხვადასხვა დარღვევის ტიპებიდან კი, ვიზუალური მანიპულაციების გავრცელება ჭარბობდა. 

„აღსანიშნავია, რომ ყალბი ინფორმაციის წყაროების ტიპოლოგია განსხვავდებოდა სამიზნეების მიხედვით - მმართველი პარტიის საწინააღმდეგო შინაარსის შემთხვევაში, წყაროები ძირითადად იყვნენ ოპოზიციის მხარდამჭერი ფეისბუქ მომხმარებლები და კოალიცია “ერთიანობა - ნაციონალური მოძრაობის” წევრები, ხოლო ოპოზიციური პარტიის წინააღმდეგ გავრცელებულ ყალბი ინფორმაციის წყაროებში ჭარბობდა სახელისუფლებო სარედაქციო პოლიტიკის მედია, სახელისუფლებო ექსპერტები და ოპოზიციის მადისკრედიტირებელი ანონიმური ფეისბუქ გვერდები/ანგარიშები“. 

რეგიონული მედიის სახელით მოქმედი სახელისუფლებო ფეისბუკ გვერდები

წინასაარჩევნოდ „მითების დეტექტორი“ 1 რეგიონული მედიისა (STV.GE) და 3 ფეისბუკ გვერდის აქტივობასაც დააკვირდა, რომლებიც რეგიონულ მედიად პოზიციონირებენ („Guria Times • გურია თაიმსი“, „ჭიათურის საათი“, „სამეგრელოს ქრონიკა“). ანგარიშის მიხედვით, გამოვლინდა, რომ ოთხივე ფეისბუკ გვერდი “ქართული ოცნების” აქტიურ მხარდაჭერას ავლენს. კვლევის ავტორები აღნიშნავენ, რომ STV.GE იმ მედიათა შორისაა, ვინც ყოველწლიურად იღებს სამთავრობო კონტრაქტებს საბიუჯეტო რეკლამებისა და ინფორმაციის გავრცელების მიზნით. 

„დანარჩენი სამი ფეისბუქ გვერდის შემთხვევაში ჩანს, რომ მათ რეგიონული მედიის მხოლოდ სახელწოდებები აქვთ, თუმცა არ აქვთ რეგისტრირებული ვებ-საიტები და რეალურად არა მედიას, არამედ მმართველი პარტიის მხარდამჭერ და ოპოზიციის მადისკრედიტირებელ გვერდებს წარმოადგენენ“. 

„მითების დეტექტორი“ ყურადღებას „გურია თაიმსზე“ ამახვილებს, რომელიც 2021 წლის თვითმმართველობის არჩევნების წინა პერიოდშიც იყო გამოვლენილი. როგორც MDF-ის შუალედურ ანგარიშში ვკითხულობთ, Guria Times • გურია თაიმსი შეიმჩნეოდა სახელისუფლებო სარედაქციო პოლიტიკის მქონე მედიებთან კოორდინირებულ გავრცელებაში, როდესაც მათ გერმანიის ბუნდესტაგის საგარეო ურთიერთობათა კომიტეტის თავჯდომარის, მიხეილ როთის განცხადებები არჩევნებში ჩარევად შეაფასეს და მასალები იდენტური ტექსტით გაავრცელეს.

წინასაარჩევნო პერიოდში (ივლისი-სექტემბერი) გამოკვეთილი ტენდენციების შესახებ ვრცლად წაიკითხეთ ანგარიშში - „ანტიდასავლური პროპაგანდა და დეზინფორმაცია 2024 წლის საპარლამენტო არჩევნებზე“

„საქართველოს ახალგაზრდა იურისტთა ასოციაციის“ განმარტებით, ბოლო პერიოდში სამთავრობო მედიების მიერ გავრცელებული ინფორმაცია, თითქოს არასამთავრობო ორგანიზაციებს რუსული კანონის წინააღმდეგ საჩივარი სტრასბურგის სასამართლოში არ გაუგზავნიათ, სინამდვილეს არ შეესაბამება.

როგორც ორგანიზაცია წერს, საჩივარი 2024 წლის 17 ოქტომბერს გაიგზავნა და სტრასბურგის სასამართლოს 22 ოქტომბერს  ჩაბარდა, რასაც გადამზიდი კომპანიის მიერ მიწოდებული დოკუმენტიც ადასტურებს.

„ამ ეტაპზე მიმდინარეობს საქმის რეგისტრაციის პროცედურები,  რომელიც საქმის მოცულობის გათვალისწინებით, გარკვეულ დროს მოითხოვს,“ - აღნიშნავს საია.

„საქართველოს ახალგაზრდა იურისტთა ასოციაცია“ ადამიანის უფლებათა ევროპულ სასამართლოში რუსულ კანონსა და მის მიერ გამოწვეულ შედეგებს 16 მედიაორგანიზაციის, 120 სამოქალაქო საზოგადოების ორგანიზაციისა და 4 ფიზიკური პირის სახელით ასაჩივრებს.