„სოციალური სამართლიანობის ცენტრი“ თბილისში დაკავებული აზერბაიჯანელი ჟურნალისტის, აფგან სადიგოვის წერილს აქვეყნებს.

"ბოლო დღეებში თბილისში მიმდინარე უწყვეტ საპროტესტო აქციებზე დემონსტრანტების მიმართ სასტიკი და მძიმე ძალადობის ფაქტები დაფიქსირდა, საპოლიციო ძალები დაუნდობლად ეპყრობოდნენ ჟურნალისტებსაც. ჟურნალისტების ნაწილი სასტიკად ნაცემია, ნაწილი კი ძვლების მოტეხილობითა და სხეულის სხვადასხვა დაზიანებით საავადმყოფოებში გადაიყვანილი.

მივესალმები საქართველოს დამოუკიდებელ მედიას და ჟურნალისტებს, რომლებიც მუდმივად მხარში მიდგნენ, ავლენენ სიმამაცეს, გამძლეობას და ნებისყოფას, მადლობას ვუხდი და მეც მხარს ვუჭერ მათ.

გაუმარჯოს საქართველოს დამოუკიდებელ მედიას, ჟურნალისტებს!

გაუმარჯოს დემოკრატიის და თავისუფლების მოყვარულ მოქალაქეებს!

რაც არ უნდა მოხდეს ქართველმა ხალხმა არ უნდა დაუშვას, რომ ქვეყანაში დიქტატურა დამყარდეს, რადგან ეს არის ყველა ბოროტების საფუძველი, სიკვდილზე უარესიც კი.

როგორც ჩანს, საქართველოს ხელისუფლებაც აპირებს გახდეს იმ დიქტატორთა გაერთიანების წევრი (რუსეთი, აზერბაიჯანი, თურქეთი, ბელარუსი, ჩრ. კორეა და მისთანები), რომელიც კაცობრიობის მტერია და მიისწრაფვის მათკენ.

აზერბაიჯანში კი პოლიტიკური ვითარება გაცილებით მძიმეა. ციხეები სავსეა პოლიტიკური პატიმრებით. 20 წელზე მეტია, რაც ილჰამ ალიევის ხელისუფლება კრიმინალური, კორუმპირებული, მკვლელი, მექრთამე ჩინოვნიკებისგან შემდგარი გუნდით ძარცვავს სახელმწიფო ბიუჯეტს, ავიწროებს და ჩაგრავს ხალხს, სასტიკად ემუქრება პოლიტიკური პარტიების წევრებს, დამოუკიდებელი მედიის წარმომადგენლებს და სამოქალაქო აქტივისტებს და აძლიერებს მათ წინააღმდეგ რეპრესიებს. ეს პროცესები დღეს კულმინაციამდეა მისული აზერბაიჯანში.

რაც შეეხება ჩემს შემთხვევას, აზერბაიჯანში ჩემი ჟურნალისტური მოღვაწეობისა და გამოძიების გამო, მე და ჩემი ოჯახი მუდმივად ვიმყოფებოდით უმძიმესი დევნისა და მუქარების ქვეშ. ჩვენი ოჯახის ღირსებით გვაშანტაჟებდნენ, მცირეწლოვანი შვილების მოკვლით გვემუქრებოდნენ. ჩემს ოჯახს , რომელიც ახლა თბილისში იმყოფება, დღემდე ემუქრებიან და დევნიან, მათ სიცოცხლეს სერიოზული საფრთხე ემუქრება.

სწორედ აზერბაიჯანის დიქტატორის დაკვეთით ვარ საქართველოში დაპატიმრებული.

აზერბაიჯანის ხელისუფლების დაკვეთით 2-ჯერ გრძელვადიანი, 3 ჯერ კი ადმინისტრაციული წესით დაკავებული ვიყავი და რამდენიმე წელი ვცხოვრობდი, როგორც პოლიტპატიმარი.

ძირს დიქტატურა!

არა რეპრესიებს!

თავისუფლება ყველა პოლიტიკურ პატიმარს!"

28 ნოემბერს თბილისის საქალაქო სასამართლომ აფგან სადიგოვის აზერბაიჯანში ექტრადიციის გადაწყვეტილება მიიღო. სადიგოვს შსს-ის მიგრაციის დეპარტამენტმა საქართველოში პოლიტიკური თავშესაფრის მიცემაზე უარი 16 სექტემბერს უთხრა. 21 სექტემბრიდან კი, თბილისში დაკავებულმა ჟურნალისტმა შიმშილობა დაიწყო.

სადიგოვს საექსტრადიციო პატიმრობა კიდევ 3 თვით თბილისის საქალაქო სასამართლომ 1 ნოემბერს გაუხანგრძლივა. ის შემდგომი ექსტრადირების მიზნით 3 აგვისტოს დააკავეს.

აზერბაიჯანელი ჟურნალისტი საქართველოში 2023 წლის 24 დეკემბრიდან იმყოფება და მას საქართველოს იუსტიციის სამინისტროს მიერ გაცემული დროებითი ბინადრობის მოწმობა აქვს. აფგან სადიგოვი ონლაინ მედია Azel.Tv-ის მთავარი რედაქტორია. 

„TV პირველის“ ინფორმაციით, 17-18 დეკემბრის ღამეს, ტელეკომპანიის ჟურნალისტს, ნანუკა ქაჯაიასა და მის ოპერატორს, ნიკო კოკაია რუსთაველის გამზირზე მიმდინარე აქციის გაშუქებისას პროფესიულ საქმიანობაში ხელი შეუშალეს.

„“ვესვრი ამას“, “ჭიქას ვესვრი- თქო“ - ე.წ. ტიტუშკამ „ტვ პირველის“ ჟურნალისტს პირდაპირ ეთერში სიტყვიერი შეურაცხყოფა მიაყენა. მიუხედავად იმისა, რომ ადგილზე საპატრულო პოლიციის რამდენიმე ეკიპაჟი იმყოფებოდა, მათ რეაგირება არ მოუხდენიათ და პირი, რომელიც ჟურნალისტებს და აქციის მონაწილეებს სიტყვიერ შეურაცხყოფას აყენებდა, უბრალოდ ადგილიდან განარიდეს. “ტვ პირველის“ ჟურნალისტის კითხვაზე - რატომ არაფერს აკეთებდნენ ისინი, პოლიცია არ პასუხობდა და უმტკიცებდა, რომ აუცილებლად მოახდენდნენ რეაგრიებას. ნანუკა ქაჯაიას თქმით, აქციის დასრულების შემდეგ, აქციის მონაწილეებთან ე.წ ტიტუშკა მივარდა და ადგილზე მყოფ ყველა ადამიანს სიტყვიერ შეურაცხყოფას აყენებდა“.

ტელეკომპანიამ მოგვიანებით გამოაქვეყნა ვიდეომასალაც და განაცხადა, რომ პირი, რომელიც „TV პირველის“ ჟურნალისტს პროფესიულ საქმიანობაში ხელს უშლიდა, პოლიციამ საჩვენებლად დააკავა და 5 წუთში გაათავისუფლა. 

„მოპოვებული ვიდეო მასალით  დგინდება, რომ მას შემდეგ, რაც თავდამსხმელი ჩვენი ჟურნალისტის მიერ პოლიციელებისთვის დასმული კითხვების შემდეგ, საჩვენებლად დააკავეს და პოლიციის მანქანით წაიყვანეს, პარლამენტის უკან მდებარე ქუჩაზე ჩამოსვეს. ერთ-ერთი პირი, ვინც პოლიციელის და თავდამსხმელის საუბარი მოისმინა, კონფიდენციალურად “პირველებს“ უყვება, რომ ესმოდა სამართალდამცველების კითხვა - „რატომ გაშიფრე„“.

როგორც „TV პირველი“ წერს, „იდენტიფიცირებულია ე.წ. ტიტუშკა, რომელიც "ტვ პირველის" გადამღებ ჯგუფზე თავდასხმის თანამონაწილეა“. 

არხის ინფორმაციით,  38 წლის დავით ენუქიძე, გუშინ რუსთაველის გამზირზე იმ პირთან ერთად იმყოფებოდა, რომელიც ნანუკა ქაჯაიას და ნიკო კოკაიას  პროფესიულ საქმიანობაში ხელს უშლიდნენ, აგინებდნენ და ემუქრებოდნენ. 

„არაოფიციალური ინფორმაციით, ენუქიძე პენიტენციური დეპარტამენტის ყოფილი თანამშრომელია. ძალადობრივი დაჯგუფების სავარაუდო წევრი ვერ  უარყოფს, რომ გუშინ აქციაზე იმყოფებოდა, თუმცა გამომკითხეს თუ არა დანაშაულის ფაქტებზე  კითხვას ვერ პასუხობს“.

28 ნოემბრიდან დაწყებული პროევროპული აქციების გაშუქებისას მედიას პროფესიულ საქმიანობაში ხელი 90-ზე მეტ შემთხვევაში შეეშალა. მედიის წარმომადგენლების მიმართ შსს-ის ძალები აგრესიით გამოირჩევიან. ისინი ჟურნალისტების ნაწილს ფიზიკურადაც გაუსწორდნენ. მათ დასჭირდათ სამედიცინო დახმარებაც. განსაკუთრებულად დაშავდნენ: გურამ როგავა, ალექსანდრე ქეშელაშვილი, მარიამ გაფრინდაშვილი, მაკა ჩიხლაძე და გიორგი შეწირული. მედიის წარმომადგენლების ნაწილს დაუზიანეს ანდა წაართვეს აღჭურვულობაც.

28 ნოემბერს ირაკლი კობახიძემ განაცხადა, რომ ევროკავშირში გაწევრიანების მოლაპარაკების პროცესს აჩერებს, რასაც თბილისსა და საქართველოს სხვა ქალაქებში ფართომასშტაბიანი საპროტესტო აქციები მოჰყვა. 

„საზოგადოებრივ მაუწყებელს, რომელსაც  ,,მაუწყებლობის შესახებ“ საქართველოს კანონის მე-16 მუხლის თანახმად, ვალდებულება აქვს უზრუნველყოს ევროკავშირში ინტეგრაციის პოპულარიზაცია და რომელიც ამტკიცებს, რომ  არის დაბალანსებული და ობიექტური მედია, პირდაპირ ეთერში არ აშუქებს საქართველოს პრეზიდენტის ევროპარლამენტისადმი მიმართვას; ეს ხდება ქვეყანაში ღრმა პოლიტიკური კრიზისისა და უპრეცედენტო საზოგადოებრივი პროტესტის ფონზე, იმ დროს, როცა გადასარჩენია ქვეყნის ევროპული მომავალი.

საქართველოს პრეზიდენტთან მიმართებით საზოგადოებრივი მაუწყებელი კვლავ არ ახდენს საზოგადოების სრულყოფილ და ობიექტურ ინფორმირებას“.

„ჟურნალისტიკის რესურსცენტრის“ ინფორმაციით, ფოთის ადგილობრივი ტელევიზიის, „მეცხრე ტალღის“ დირექტორი და „საქართველოს რეგიონულ მაუწყებელთა ალიანსის“ თანათავმჯდომარე, გია სალია 13 დეკემბერს, ზუგდიდში, საპროტესტო მსვლელობის გადაღების დროს ავტომობილით გადაადგილებისთვის 1000 ლარით დააჯარიმეს.

როგორც JRC წერს, გია სალიას 16 დეკემბერს ფოთიდან ზუგდიდისკენ გადაადგილებისას საპატრულო ეკიპაჟი გაჰყვა, გაჩერება და მანქანიდან გადასვლა უბრძანა, რადგან მისი ავტომობილი ძებნაზე იყო გადაცემული.

„საქართველოს ჟურნალისტური ეთიკის ქარტია“ პროფესიული მოვალეობის შესრულების დროს ავტომობილით გადაადგილების გამო დაჯარიმებას მედიაზე ზეწოლის ახალ და საგანგაშო ფორმად მიიჩნევს და საპატრულო პოლიციას მოუწოდებს, უკანონო გადაწყვეტილება გააუქმოს.

„პოლიცია მას 13 დეკემბერს, ზუგდიდში მოქალაქეების მიერ ორგანიზებული მსვლელობის დროს ავტომობილით ჯგუფურ მოძრაობაში მონაწილეობას ედავება. გერმანე სალიას განმარტებით, ის მსვლელობაში კი არ მონაწილეობდა, არამედ ავტომობილით მიჰყვებოდა მას გადასაღებად“, - ვკითხულობთ ქარტიის განცხადებაში. 

„საქართველოს რეგიონულ მაუწყებელთა ალიანსისა“ და JRC -ის დირექტორის, ნათია კუპრაშვილის განცხადებით, ეს ფაქტი პროფესიული მოვალეობის შესრულებისას საპროტესტო აქციაზე ავტომობილით გადაადგილებისთვის მედიის დაჯარიმების პირველი და საგანგაშო შემთხვევაა.

„ჩვენ შინაგან საქმეთა სამინისტროს დავუკავშირდით, გვაინტერესებდა რამდენად იცოდნენ, რომ საუბარია მედიაზე და ავტომობილში მსხდომი პირები პროფესიულ ვალდებულებას ასრულებდნენ და მსვლელობის ვიდეოს იღებდნენ. ასევე, რამდენად ადასტურებდნენ დაჯარიმების და მანქანის ძებნაზე გადაცემის ფაქტს. უწყებაში გვითხრეს, რომ "ვიდეო თუ გაქვთ რა დადასტურება გინდათ" და აქვე დაგვპირდნენ, რომ დეტალებს გადაამოწმებენ და დაგვიკავშირდებიან. ჩვენ უწყებისაგან პასუხს ველოდებით“, - წერს „ჟურნალისტიკის რესურსცენტრი“.

გია სალიას მხარდაჭერას უცხადებს და საქმის სამართლებრივ დეტალებს სწავლოს „მედიაომბუდსმენიც“. 

„საქართველოს ჟურნალისტური ეთიკის ქარტია“ შინაგან საქმეთა სამინისტროს მოუწოდებს, აღკვეთოს აჭარის პოლიციის დეპარტამენტის დირექტორის, გრიგოლ ბესელიასა და ბათუმის პოლიციის უფროსის, ირაკლი დგებუაძის მხრიდან ეთერ თურაძის მიმართ ანგარიშსწორება და მუქარა.

16 დეკემბერს, ბათუმში, საკონსტიტუციო სასამართლოსთან მიმდინარე აქციაზე “ბათუმელების” რედაქტორის კითხვას, საპროტესტო აქციის მონაწილეების წინააღმდეგ გამოყენებული ზომების გამო შესაძლო დასანქცირებასთან დაკავშირებით, აჭარის პოლიციის უფროსის გაღიზიანება მოჰყვა. 

„პროფესიული მოვალეობის შესრულების დროს ეთერ თურაძესთან გრიგოლ ბესელია მივიდა და ფიზიკური ძალის გამოყენებით გადაიყვანა გზიდან, სადაც დემონსტრანტები აქციას მართავდნენ და მედიაც მუშაობდა.

ამ ინციდენტის შემდეგ გადაღებულ ვიდეომასალაში ჩანს, რომ ეთერ თურაძის მიმართ აგრესიას გამოხატავს ბათუმის პოლიციის უფროსი, ირაკლი დგებუაძეც, რომელიც “ბათუმელებს” არაერთხელ ჰყავს მხილებული ადამიანის უფლებების დარღვევაში. პოლიციის უფროსი ონლაინგამოცემის რედაქტორს უხეშად და უპატივცემულოდ მიმართავს. ჟურნალისტური ეთიკის ქარტიისთვის ცნობილია, რომ ირაკლი დგებუაძე ეთერ თურაძეს ადმინისტრაციული სამართალდარღვევის ოქმის შედგენით და დაჯარიმებით დაემუქრა“, - ვკითხულობთ ქარტიის განცხადებაში.

ჟურნალისტური ეთიკის ქარტია კიდევ ერთხელ მოუწოდებს შინაგან საქმეთა სამინისტროს თანამშრომლებს, გამოიჩინონ პატივისცემა ჟურნალისტების მიმართ, არ შეუშალონ ხელი საპროტესტო აქციების გაშუქებისას და შეწყვიტონ მუქარა. 

როგორ ორგანიზაცია განმარტავს, პოლიციის ეთიკის კოდექსის თანახმად, „პოლიციელი, მისი თანამდებობის ან წოდების მიუხედავად, ვალდებულია, საზოგადოების წევრებთან ურთიერთობაში იყოს ტაქტიანი, თავაზიანი და კეთილგანწყობილი. მოქალაქისადმი წაყენებული მოთხოვნები თუ შენიშვნები გამოთქვას მშვიდი, ზრდილობიანი და დამაჯერებელი ფორმით. პოლიციელმა უნდა მისცეს მოქალაქეს საშუალება გამოთქვას საკუთარი მოსაზრება. პოლიციელისგან დაუშვებელია ქედმაღლური მიმართვა, მუქარა, ირონია, ჟარგონის გამოყენება და ფამილარული ტონით საუბარი. ყველა სიტუაციაში და ნებისმიერ ადამიანთან ურთიერთობისას, როგორც სამუშაო, ასევე არასამუშაო დროს, აუცილებელია ქცევის ეთიკური ნორმების დაცვა.“

„საქართველოს ჟურნალისტური ეთიკის ქარტია“ წევრობაზე დაფუძნებული დამოუკიდებელი ორგანიზაციაა, რომლის ხელმომწერიც 300-ზე მეტი ჟურნალისტია.

ადამიანის უფლებადამცველი საერთაშორისო ორგანიზაცია Amnesty International-ი საქართველოში მიმდინარე პროევროპულ აქციებზე პოლიციისა და არაფორმალური ჯგუფების მხრიდან ადამიანის უფლებების დარღვევის შესახებ ანგარიშს აქვეყნებს. დოკუმენტში აღწერილია ჟურნალისტებზე თავდასხმის შემთხვევებიც. 

Amnesty International-ი მიმოიხილავს პოლიციის მხრიდან არასაჭირო და გადაჭარბებული ძალის გამოყენების, მათი მხრიდან აქციის მონაწილეებზე ძალადობის, ჟურნალისტების მიზანში ამოღების, თვითნებური დაკავებებისა და დაკავების შემდეგ წამებისა და სხვაგვარი სასტიკი მოპყრობის, სამართლიანი სასამართლოს უფლების დარღვევის, სახელმწიფოსთან დაკავშირებული ჯგუფების მხრიდან ფართოდ გავრცელებული შევიწროებისა და დაშინების შემთხვევებს.

დოკუმენტი დაზარალებული ჟურნალისტებისა და მომიტინგეების კომენტარებს, ფოტო-ვიდეომასალას, უფლებადამცველებთან ჩატარებულ ინტერვიუებსა და სხვადასხვა ორგანიზაციის ანგარიშს ეყრდნობა.

„29 ნოემბრიდან დედაქალაქში მასობრივი აქციები დაიწყო, რამდენიმე ათასმა ადამიანმა პარლამენტის წინ და რამდენიმე ცენტრალურ ქუჩაზე მშვიდობიანი საპროტესტო აქცია გაიმართა; ქვეყნის მასშტაბით სხვა აქციებიც დაიწყო. პოლიციამ საპასუხოდ წლის ჭავლი, ცრემლსადენი გაზი და რეზინის ტყვიები გამოიყენა, რამაც ესკალაცია გამოიწვია. წარმოქმნილ ძალადობისა და დაპირისპირებების შედეგად მრავალი ადამიანი დაშავდა, ვიდეომასალაში კი მშვიდობიანი მომიტინგეებისა და აქციების გადამღები ჟურნალისტების სასტიკი ცემა არის აღბეჭდილი. პოლიცია აქციის მონაწილეებს დემონსტრაციების გარეთაც დევნიდა, მათ სახლებსა და ოფისებში ჩხრეკებსა და დაკავებებს ანხორციელებდა. ამ დროისთვის 460-ზე მეტი ადამიანი არის დაკავებული, მათ შორის, 430-ის წინააღმდეგ ადმინისტრაციული საქმე, 30-ის წინააღმდეგ კი სისხლის სამართლის საქმე არის აღძრული“.

Amnesty International-ი საქართველოს ხელისუფლებას მოუწოდებს: დაუყოვნებლივ შეაჩეროს პოლიციისა და პოლიციის თანამონაწილეობით მოქმედი უცნობი ჯგუფების მხრიდან ძალადობა, დაიცვას ადამიანის უფლებები და უზრუნველყოს მათი პატივისცემა, ჩაატაროს უკანონო ძალის გამოყენების დროული, მიუკერძოებელი და ეფექტური გამოძიება. ორგანიზაციის განცხადებით, ასევე მნიშვნელოვანია დაუყოვნებლივ გათავისუფლდეს ყველა, ვინც მათი უფლებების მშვიდობიანი გამოყენების გამო დააკავეს.

გარდა ამისა, ადამიანის უფლებადამცველი საერთაშორისო ორგანიზაცია საერთაშორისო საზოგადოებას, მათ შორის ევროკავშირსა და გაეროს, მოუწოდებს, საჯაროდ დაგმოს ძალის გადაჭარბებული გამოყენება და საქართველოს ხელისუფლებისგან მოითხოვონ დაკავებული მომიტინგეების გათავისუფლება.

28 ნოემბერს ირაკლი კობახიძემ განაცხადა, რომ ევროკავშირში გაწევრიანების მოლაპარაკების პროცესს აჩერებს, რასაც თბილისსა და საქართველოს სხვა ქალაქებში საპროტესტო აქციები მოჰყვა. 

პროევროპული აქციების გაშუქებისას მედიას პროფესიულ საქმიანობაში ხელი 90-ზე მეტ შემთხვევაში შეეშალა. მედიის წარმომადგენლების მიმართ შსს-ის ძალები აგრესიით გამოირჩევიან. ისინი ჟურნალისტების ნაწილს ფიზიკურადაც გაუსწორდნენ. მათ დასჭირდათ სამედიცინო დახმარებაც. განსაკუთრებულად დაშავდნენ: გურამ როგავა, ალექსანდრე ქეშელაშვილი, მარიამ გაფრინდაშვილი, მაკა ჩიხლაძე და გიორგი შეწირული. მედიის წარმომადგენლების ნაწილს დაუზიანეს ანდა წაართვეს აღჭურვულობაც. 

ვრცლად პროევროპული აქციების გაშუქებისას დაზარალებული ჟურნალისტების შესახებ, იხილეთ „მედიაჩეკერის“ მასალა - 28 ნოემბრიდან მედიის საქმიანობაში ხელშეშლის 90-ზე მეტი ინციდენტი მოხდა

„სამართლიანი არჩევნებისა და დემოკრატიის საერთაშორისო საზოგადოებამ“ ის პროპაგანდისტული გზავნილები შეისწავლა, რომლებსაც „ქართული ოცნება“ და მასთან დაკავშირებული აქტორები საპროტესტო აქციების ჩასახშობად სოციალურ ქსელებში ავრცელებდნენ.

საპროტესტო აქციების დისკრედიტაციის მიზნით გავრცელებული ნარატივები:

• „თბილისში მიმდინარე აქციები მშვიდობიანი არ არის“ 

როგორც ISFED-ი წერს, სოციალური ქსელების სხვადასხვა პლატფორმაზე გავრცელებული პოსტების ნაწილში „ქართული ოცნების“ მხარდამჭერი სხვადასხვა აქტორები, პარტიის ლიდერების მსგავსად, ამტკიცებდნენ, რომ დედაქალაქში გამართული მასშტაბური აქციები მშვიდობიანი არ არის. ამის სადემონსტრაციოდ კი, აქვეყნებდნენ ფოტოებსა და ვიდეოებს, რომლებშიც ჩანს, თუ როგორ ისვრიან აქციის მონაწილეები პიროტექნიკას.

„სამართლიანი არჩევნები“ აღნიშნავს, პროპაგანდისტული მედიასაშუალებები აქციის მონაწილეებს „აგრესიულ მომიტინგეებს“, „რადიკალებს“ ან სარკაზმით „მშვიდობიან“ მომიტინგეებს უწოდებდნენ. 

„პიროტექნიკის გამოყენებასთან ერთად, ძირითადი აქცენტი მოსალოდნელ პროვოკაციებზე კეთდებოდა, რომელსაც „მუხტის ასაწევად“ მსხვერპლი უნდა მოჰყოლოდა. მსგავსი პოსტების ნაწილი დარეკლამებული იყო“.

ტელეკომპანია „იმედის“ გვერდზე გავრცელდა გზავნილიც, რომ აქციის მონაწილეები შეიარაღებულები იყვნენ, თუმცა, ფაქტების გადამამომწმებელმა ორგანიზაციებმა დაადგინეს, რომ „იმედი“ დეზინფორმაციას ავრცელებდა და ქარდზე გამოსახული პირი არა იარაღით, არამედ შტატივითა და კამერით იდგა.

„სამართლიანი არჩევნები“ წერს, რომ აქციის მონაწილეების „რადიკალებად“ პოზიციონირებასთან ერთად, პროპაგანდისტული მედიები სამართალდამცავების მხრიდან მოქალაქეების სასტიკ მოპყრობას „საპოლიციო ღონისძიებასა“ და „პროვოკაციებზე პასუხს“ უწოდებდა.

„“ქართული ოცნების“ მხარდამჭერი გამოცემები ყოველდღიურად ავრცელებდნენ დაშავებული სამართალდამცავების შესახებ რაოდენობრივ ინფორმაციას, თუმცა მსგავსი სიხშირით არ გავრცელებულა დაკავებული და დაზარალებული მომიტინგეების შესახებ მონაცემები. დაზარალებული სამართალდამცავების კადრებით იწყებოდა პროპაგანდისტული ტელევიზიების სიუჟეტებიც“.

სამართალდამცავების მხარდამჭერი კამპანიის ფარგლებში კი „ქართული ოცნების“ პროპაგანდისტულმა მედიამ, „ნიუსჰაბმა“ გამოაქვეყნა და დაარეკლამა ვიდეოებიც სათაურით - „მოქალაქე პოლიციას მადლობას უხდის“. 

• „აქციები გარე ძალების მიერ არის მართული და „მაიდნის” სცენარს იმეორებს“

როგორც „სამართლიანი არჩევნები“ წერს, საპროტესტო აქციების მადისკრედიტირებელი ერთ-ერთი ძირითადი გზავნილი მისი „ნაცმაიდანად“ მოხსენიება იყო. პროპაგანდისტული მედიები და ანონიმურად მოქმედი გვერდები კი აქტიურად აზიარებდნენ „ქართული ოცნების“ ლიდერების განცხადებებს, რომელთა მიხედვითაც, „აქციის მონაწილეების მიზანი სახელმწიფო გადატრიალებაა და ოპოზიცია საქართველოს ომში ჩართვას ცდილობს“.  

ISFED-ი აღნიშნავს, რომ აქციების დისკრედიტაციისთვის 1 დეკემბერს შეიქმნა ფეისბუკჯგუფი - „ანტი-მაიდანი!”, რომლის ერთ-ერთი ადმინისტრატორიც პროპაგანდისტული ტელევიზია PosTV-ის წამყვანია.

„ჯგუფში შეთქმულების თეორიებთან ერთად, „ქართული ოცნების“ მხარდამჭერი გზავნილები ვრცელდებოდა. ჯგუფში გამოქვეყნებული მადისკრედიტირებელი პოსტების სამიზნე აქციის მონაწილეებთან ერთად ჟურნალისტებიც არიან“.  

• „ანტიდასავლური კამპანია“

როგორც „სამართლიანი არჩევნები“ წერს, „ქართული ოცნების“ ანტიკონსტიტუციური გადაწყვეტილების - ევროკავშირთან მოლაპარაკებების შეჩერების მიღების შემდეგ, სახალხო პროტესტის ფონზე, პარტიის ლიდერები ანტიდასავლური განწყობების მეტად გაღვივებას ცდილობდნენ და მოლაპარაკებების შეჩერებას ევროკავშირსა და დასავლეთს აბრალებდნენ. 

დასავლეთის მხრიდან აქციის მონაწილეებისადმი არაადამიანური მოპყრობისა და გაუმართლებელი ძალადობის დაგმობის შემდეგ კი, PosTV-მა ქარდები აშშ-ის და ევროკავშირის ელჩების ყალბი ციტატებით გამოაქვეყნა. 

„ქარდების აღწერაში იდენტური ტექსტი იყო მითითებული: „ასეთი უნდა იყოს ობიექტური ელჩის კომენტარი მომიტინგეების მხრიდან განხორციელებულ ძალადობაზე.” ყალბ ციტატებში აქციის მონაწილეები მოძალადეებად იყვნენ წარმოჩენილი, ელჩები კი მათ ქმედებებს გმობდნენ. ქარდები აქტიურად გავრცელდა ფეისბუქპროფილებსა და ჯგუფებში, თუმცა „PosTV-ის” გაკეთებული აღწერის გარეშე. აღსანიშნავია, რომ პროპაგანდისტული მედიის პოსტების კომენტარებშიც აუდიტორიის უმრავლესობა ციტატებს ნამდვილად აღიქვამდა. ქარდები დარეკლამებულიც იყო, თუმცა Meta-ს წესების დარღვევის გამო მათი ნაწილი წაიშალა“.

• „აქციის მონაწილეებისა და მედიის მადისკრედიტირებელი კამპანია“

„სამართლიანი არჩევნები“ აღნიშნავს, რომ პროპაგანდისტული მედიების დისკრედიტაციის სამიზნე ტელეწამყვანებიც გახდნენ. 

„“ქართული ოცნების“ მხარდამჭერ მედიებსა და გვერდებზე ვრცელდებოდა ტელევიზიებისა და ჟურნალისტების გამაშარჟებელი და შეურაცხმყოფელი გზავნილები. კრიტიკა და დაცინვა აქციების გაშუქებასა და ჟურნალისტების ოპოზიციურ პოლიტიკურ პარტიებთან კავშირს შეეხებოდ“. 

გარდა ამისა, „ქართული ოცნების“ წარმომადგენლებმა და პროპაგანდისტულმა მედიამ „ტვ პირველის" ჟურნალისტსა და ოპერატორზე თავდასხმის აქციის დისკრედიტაციის მიზნით გამოყენება სცადეს.

“„ტვ პირველის“ გადამღებ ჯგუფზე თავდასხმას ტელეკომპანია „იმედთან“ სატელეფონო ჩართვით გამოეხმაურა „ქართული ოცნების“ აღმასრულებელი მდივანი, მამუკა მდინარაძე, და ჟურნალისტებზე ძალადობას ამორალური უწოდა. მამუკა მდინარაძემ თავდასხმას „მიზანმიმართული პროვოკაცია“ უწოდა“. 

„სამართლიანი არჩევნებისა და დემოკრატიის საერთაშორისო საზოგადოება“ აღნიშნავს, რომ მიმდინარე აქციების ფონზე „ქართული ოცნების“ წარმომადგენლები და მათი პროპაგანდისტული წყაროები დეზინფორმაციულ ფრონტს ყოველდღიურად აძლიერებენ. შექმნილი კრიზისის ძირეული მიზეზების განხილვისა და საზოგადოების სამართლიან მოთხოვნებზე რეაგირების ნაცვლად კი, „ქართული ოცნება“, როგორც ფიზიკურად, ისე ვერბალურად ძალაუფლების დემონსტრირებას აგრძელებს და აქციებთან დაკავშირებული ცრუ ბრალდებების გავრცელების გზით, საზოგადოების გულწრფელი პროტესტის ჩახშობას ცდილობს. 

„დეზინფორმაცია იქცა აქციის მონაწილეთა დემონიზების მძლავრ ინსტრუმენტად. შეცდომაში შემყვანი გზავნილების გავრცელებით, „ქართული ოცნება“ მიზნად ისახავს ბრალეულობის ოპოზიციის და დემონსტრანტებზე გადატანას და რეპრესიებისა და ძალოვნების მხრიდან აქციის მონაწილეთა მიმართ სასტიკი მოპყრობის გამართლებას“. 

საპროტესტო აქციების დისკრედიტაციის მიზნით გავრცელებული ნარატივების შესახებ, ვრცლად იხილეთ - „ქართული ოცნების“ პროპაგანდა პროტესტის ჩასახშობად.

28 ნოემბრიდან თბილისსა და საქართველოს სხვა ქალაქებში პროევროპული აქციები მიმდინარეობს. ამ დღეს ირაკლი კობახიძემ თქვა, რომ ევროკავშირში გაწევრიანების მოლაპარაკების პროცესს აჩერებს, რასაც ყოველდღიური ფართომასშტაბიანი პროტესტი მოჰყვა. პარლამენტის შენობასთან მიმდინარე აქციას შსს-ს ძალები სპეციალური საშუალებების გამოყენებით შლიან, პროტესტანტებს ფიზიკურად უსწორდებიან და აკავებენ. 

ფოტო : EPA-EFE/DAVID MDZINARISHVILI

„პრესის საერთაშორისო ინსტიტუტის“გლობალური ქსელის წევრი რედაქტორები და ჟურნალისტები ერთობლივგანცხადებას ავრცელებენ და ქართულ მედიას მხარდაჭერას უცხადებენ.

„ჩვენ, IPI-ის გლობალური ქსელისა და ცენტრალური და აღმოსავლეთ ევროპის დამოუკიდებელი მედიის ქსელის წევრები, კატეგორიულად ვგმობთ ჟურნალისტებზემიზანმიმართულ და სასტიკ თავდასხმებს სახელმწიფო უსაფრთხოების ძალებისა და კერძო პირების მხრიდან, საპროტესტო აქციების მიმდინარეობისას, რომლებიც მოჰყვა მთავრობის 28 ნოემბრის გადაწყვეტილებას, საქართველოს ევროკავშირში გაწევრიანების მოლაპარაკებები 2028 წლის ბოლომდე შეეჩერებინა.

საქართველოსთვის პრესის თავისუფლებისა და დემოკრატიისთვის ამ მძიმე პერიოდში, ჩვენ სრულ მხარდაჭერას ვუცხადებთ გაბედულ ქართველ ჟურნალისტებს, რომლებიც აგრძელებენ თავიანთ უმნიშვნელოვანეს საქმეს – საზოგადოების ინფორმირებას, უკიდურესად მტრულ და სახიფათო გარემოშიც კი. მათი საქმიანობა არის სასიცოცხლოდ მნიშვნელოვანი არა მხოლოდ საქართველოს მოსახლეობის ინფორმირებისთვის, არამედ მსოფლიოსთვისაც, რათა მოქალაქეებს ჰქონდეთ წვდომა სანდო ინფორმაციაზე იმ მოვლენების შესახებ, რაც ახლა საქართველოში ვითარდება.

ჟურნალისტებს სასტიკადსცემენ, სიტყვიერ შეურაცხყოფას აყენებენ, ემუქრებიან და აკავებენ. ამას გარდა, მათ აპარატურას ართმევენ და ანადგურებენ და მუშაობაში ხელს უშლიან. ამავდროულად, მთავრობა აგრძელებს დამოუკიდებელი და კრიტიკული მედიის დისკრედიტაციას.

ადგილობრივი მედიის თავისუფლებაზე მომუშავე ორგანიზაციების ინფორმაციით, 28 ნოემბრის შემდეგ, სულ მცირე, 90 ჟურნალისტს ფიზიკური, სიტყვიერი შეურაცხყოფა მიაყენეს ან მუშაობაში შეუშალეს ხელი. დაზარალებულთა უმეტესობა წარმოადგენს  თბილისში მდებარე დამოუკიდებელ და კრიტიკულად განწყობილ მედიასაშუალებებს.

მედიაზე ეს უპრეცედენტო თავდასხმები ხდება პრესის თავისუფლების სწრაფი გაუარესებისა და დემოკრატიის უკუსვლის ფონზე. ბოლო რამდენიმე თვის განმავლობაში მედიის გარემო უფრო მეტად მტრული და საშიში გახდა, რადგან კრიტიკული ხმების ჩასახშობად სამართლებრივი და ინსტიტუციური ბერკეტები გამოიყენება.

ჩვენთვის  საქართველოს თავისუფალი მედიის სიმამაცე და გამძლეობა შთამაგონებელია. თქვენი საქმიანობა უმნიშვნელოვანესია, ხოლო თქვენი სიმამაცე – შთაგონების წყაროა ჩვენთვის. კიდევ ერთხელ, ჩვენთქვენ სრულ სოლიდარობას გიცხადებთ“, - ვკითხულობთ განცხადებაში, რომელსაც ხელს 80-მდე ჟურნალისტი აწერს.

28 ნოემბრიდან დაწყებული პროევროპული აქციების გაშუქებისას მედიას პროფესიულ საქმიანობაში ხელი 90-ზე მეტ შემთხვევაში შეეშალა. მედიის წარმომადგენლების მიმართ შსს-ის ძალები აგრესიით გამოირჩევიან. ისინი ჟურნალისტების ნაწილს ფიზიკურადაც გაუსწორდნენ. მათ დასჭირდათ სამედიცინო დახმარებაც. განსაკუთრებულად დაშავდნენ: გურამ როგავა, ალექსანდრე ქეშელაშვილი, მარიამ გაფრინდაშვილი, მაკა ჩიხლაძე და გიორგი შეწირული. მედიის წარმომადგენლების ნაწილს დაუზიანეს ანდა წაართვეს აღჭურვულობაც.

28 ნოემბერს ირაკლი კობახიძემ განაცხადა, რომ ევროკავშირში გაწევრიანების მოლაპარაკების პროცესს აჩერებს, რასაც თბილისსა და საქართველოს სხვა ქალაქებში ფართომასშტაბიანი საპროტესტო აქციები მოჰყვა. 

პროსამთავრობო ტელეკომპანია „იმედმა“ გუშინ, 11 დეკემბერს ფეისბუკის ოფიციალურ გვერდზე გაავრცელა ინფორმაცია ქარდით, რომ „„ქართული ოცნების“ დეპუტატის წინააღმდეგ მუქარის სქრინი სუს-ს მიაწოდეს“. 

„იმედის“ მიერ გამოქვეყნებულ ქარდს თანდართული ჰქონდა ტექსტიც: „მუქარის შემცველ წერილში, რომელიც პარლამენტის ერთ-ერთ დეპუტატს გაუგზავნეს,  ავტორი არსებული ვითარებიდან გამომდინარე მომდევნო დღეების განმავლობაში შესაძლო მსხვერპლზე საუბრობს.  წერილის ადრესატს  დაკავებული თანამდებობის დატოვებას ურჩევს და მისი შვილებით აპელირებს. წერილის ე.წ სქრინები სუს-ს პარლამენტიდან მიაწოდეს“. 

თავად ქარდზე კი დატანილი იყო, სავარაუდოდ, ფრანგული ნომრიდან WhatsApp-ში მიღებული ინგლისურენოვანი შეტყობინების ე.წ. სქრინი. 

„იმედმა“ მაყურებელს „მუქარის შემცველი წერილის“ მტკიცებულად სწორედ ეს სქრინი შესთავაზა, თუმცა რეალურად ამ შეტყობინებას მუქარის შემცველი შინაარსი არ აქვს. რა წერია სინამდვილეში მიღებულ წერილში, ნახეთ თარგმანი სრულად:

„ძვირფასო გიორგი,

მინდოდა პირადად მომეწერა და ამეხსნა, რამდენად დიდია შენი როლი საქართველოში არსებული ვითარების სტაბილიზაციაში, რათა ადამიანები არ დაშავდნენ, არ დაზარალდნენ და, შესაძლოა, მომდევნო დღეებში არ დაიღუპონ. სიტუაცია მართლაც კრიტიკულია! გთხოვ, გაიღვიძე!

გთხოვ, გაიგო, რომ ცხოვრებაში მთავარი ღირებულებებია, რათა არ შეგრცხვეს შენი წარსულის. ფული მოდის და მიდის! მაგრამ ღირებულებები უცვლელად რჩება!

ღირს შენთვის და შენი მომავალი თაობებისთვის ასეთი სიმძიმის ტარება მთელი ცხოვრება? ამჟამად შენი იმიჯი თითქმის ნულს უტოლდება. არავინ გეუბნება ამას პირდაპირ, მაგრამ მერწმუნე, ასეა!

იყავი მამაცი!

არ იყო მშიშარა!

იპოვე შინაგანი ძალა და უბრალოდ გააკეთე ეს!

შენი სახელი ისტორიაში გმირად დარჩება.

გააკეთე მამაცი განცხადება და დატოვე შენი თანამდებობა, რათა ამ ადამიანებმა გადარჩენა შეძლონ!

მე შენი მეგობარი ვარ და ძალიან გიჭერ მხარს.  იმედია გაბედულად შევხედავთ ერთმანეთს თვალებში, როცა ერთმანეთს შევხვდებით. 

მე ვიცი, რომ შენ შეგიძლია ამის გაკეთება!“

„მაუწყებელი ვალდებულია უზრუნველყოს აუდიტორია სანდო და ზუსტი ინფორმაციით და არ დაუშვას ცრუ ან შეცდომაში შემყვანი ინფორმაციის გავრცელება“, -  განსაზღვრავს „მაუწყებელთა ქცევის კოდექსი“.

„საქართველოს ჟურნალისტური ეთიკის ქარტიის“ პირველი პრინციპით, ჟურნალისტმა პატივი უნდა სცეს სიმართლეს და საზოგადოების უფლებას, მიიღოს ზუსტი ინფორმაცია. მე-11 პრინციპის მიხედვით კი, ფაქტის განზრახ დამახინჯება ჟურნალისტმა უმძიმეს პროფესიულ დანაშაულად უნდა მიიჩნიოს.

„საქართველოს ჟურნალისტური ეთიკის ქარტია“ წევრობაზე დაფუძნებული დამოუკიდებელი ორგანიზაციაა, რომლის ხელმომწერიც 300-ზე მეტი ჟურნალისტია. 

„პუბლიკის“ ინფორმაციით, გამოცემის რეპორტიორი, მინდია გაბაძე აქციებთან დაკავშირებულ სისხლის სამართლის საქმეზე სასამართლოში მოწმის სახით გამოკითხეს. გაბაძეს გაუთქმელობის პირობაზე მოაწერინეს ხელი.

ჟურნალისტობა დღეს ჩემთვის არის ხელისუფლების მხრიდან ძალაუფლების გადამეტების, ძალადობის, წამების და არაადამიანური მოპყრობის ჩვენება ჩვენი თუ საერთაშორისო საზოგადოებისთვის. დანარჩენი ყველაფერი უბრალოდ დროის კარგვაა", - მინდია გაბაძე სოციალურ ქსელში წერს

გამოძიება სისხლის სამართლის კოდექსის 225-ე მუხლის 1 და 2 ნაწილით და 239-ე მუხლის პრიმა ნაწილით მიმდინარეობს, რაც ჯგუფური ძალადობის ორგანიზებას ხელმძღვანელობას, ამ მასში მონაწილეობას და ძალადობრივი ქმედებისაკენ საჯაროდ მოწოდებას გულისხმობს. 

ამავე გამოძიების ფარგლებში 10 დეკემბერს გამოიკითხა OC Media-ს დამფუძნებელი და ჟურნალისტი, მარიამ ნიკურაძეც.

28 ნოემბრიდან თბილისსა და საქართველოს სხვა ქალაქებში პროევროპული აქციები მიმდინარეობს. ამ დღეს ირაკლი კობახიძემ თქვა, რომ ევროკავშირში გაწევრიანების მოლაპარაკების პროცესს აჩერებს, რასაც ყოველდღიური ფართომასშტაბიანი პროტესტი მოჰყვა. პარლამენტის შენობასთან მიმდინარე აქციას შსს-ს ძალები სპეციალური საშუალებების გამოყენებით შლიან, პროტესტანტებს ფიზიკურად უსწორდებიან და აკავებენ. 

„მთავარი არხის“ გენერალურმა დირექტორმა, გიორგი გაბუნიამ 11 დეკემბერს, 21:00-საათიანი „მთავარის“ პირდაპირ ეთერში საგანგებო განცხადება გაავრცელა. 

გაბუნიას თქმით: „ზაზა ოქუაშვილმა გადაწყვიტა გააკეთოს ის, რაც დღეს ბიძინა ივანიშვილს ძალიან სჭირდება - ზაზა ოქუაშვილმა გადაწყვიტა, დახუროს „მთავარი არხი„“. „მთავარი არხის“ დაახლოებით 40% -იანი წილის მფლობელი სწორედ ოქუაშვილის მიერ დამფუძნებელი კომპანიებია. 

გიორგი გაბუნიამ ბრიფინგზე ზაზა ოქუაშვილის გადაწყვეტილების სავარაუდო მიზეზებზეც ისაუბრა. მისი თქმით, ტელეკომპანიის დახურვის გადაწყვეტილებაზე გავლენა სწორედ ბიძინა ივანიშვილს შეიძლება ჰქონდეს, რომელთანაც ოქუაშვილს „მძიმე სამართლებრივი დავა აქვს“, რაც კი არ გამორიცხავს მათ შორის თანამშრომლობას, არამედ პირიქით - „სწორედ ამ დავაში შეთანხმების მისაღწევად ოქუაშვილს ძალიან სჭირდება „მთავარი არხით“ მანიპულირება“.

გაბუნიამ „ოქუაშვილის დავალებების მორჩილი შემსრულებელი უწოდა“ ტელეკომპანიის დირექტორს, გოგი ქურდაძეს. მისი თქმით, ქურდაძე კომპანიაში ყველა ფინანსურ ოპერაციას ბლოკავს და კომპანიისთვის სასიცოცხლოდ მნიშვნელოვანი კონტრაქტების გაფორმებაზე უარს ამბობს.

„ზაზა ოქუაშვილის გადაწყვეტილებით და მისი დირექტორის ქმედებებით „მთავარი არხი“ უკვე დარჩა ფინანსური წყაროების გარეშე და ნელ-ნელა წყდება ჩვენთან გაფორმებული კონტრაქტებიც, რაც, საბოლოოდ, არხის მუშაობას შეუძლებელს გახდის - ეს კი ზუსტად ის არის, რაც დღეს სჭირდება ბიძინა ივანიშვილს“.

„მთავარი არხის“ გენერალური დირექტორი აღნიშნავს, რომ არხი იბრძოლებს და ეთერში დარჩება მანამ, სანამ შეძლებენ:

„ჩვენ არ გვიბრძოლია ამდენი იმისთვის, რომ, საბოლოოდ, არხი ზაზა ოქუაშვილის სახით ბიძინა ივანიშვილს ჩავუგდოთ ხელში. ამიტომ სადამდეც შევძლებთ, ისევ ვიბრძოლებთ და ვიქნებით ეთერში ჩვენი მაყურებლისა და ქართველი ხალხისთვის. მთავარი ხართ თქვენ და ჩვენთვის მთავარია, ბოლო წუთამდე ვიდგეთ ჩვენს კოლეგებთან ერთად ყველაზე ცხელ წერტილებში და მოგიყვეთ, რა ხდება იქ, სადაც წყდება საქართველოს ბედი და ვერანაირი გოგი, ვერანაირი ზაზა და ვერც პუტინის მეგობარი ბიძინა ვერ შეგვაჩერებს!“

საგანგებო ბრიფინგის შემდეგ, არხის გენერალურმა დირექტორმა, ტელეკომპანია „ფორმულას“ ეთერშიც („გიორგი თარგამაძის ფორმულა“)  ისაუბრა. გიორგი გაბუნიას თქმით, ზაზა ოქუაშვილმა მისსავე კომპანიას („მთავარ არხს“) ქონება კაბალური პირობებით ათხოვა.

„მას [ზაზა ოქუაშვილს] არც ეს შენობა და არც ტექნიკა „მთავარი არხისთვის“ არ გადაუცია და არც უჩუქებია, გვათხოვა, იჯარით მოგვცა, რითიც ნელ-ნელა დააგროვა დავალიანება. წარმოიდგინეთ, დამფუძნებელმა თავისივე კომპანიას ძალიან კაბალური პირობებით ათხოვა ქონება, რომელშიც ჩვენ კიდევ ფული გვქონდა გადასახდელი, ეს ხდებოდა ჯერ კიდევ ჩემამდე, ვიდრე მე გავხდებოდი გენერალური დირექტორი, რამაც გამოიწვია დავალიანების დაგროვება. როდესაც მას დაჭირდა, დაიწყო ამ დავალიანების მოთხოვნა პრობლემების შესაქმნელად და უფრო მეტიც, ბოლოს, როდესაც უკვე ნიკა გვარამიამ გადაწყვიტა პოლიტიკაში წასვლა, წესდებით ასე იყო გათვალისწინებული, რომ ნიკა პირდაპირ რომ წასულიყო, არხი დირექტორის გარეშე რჩებოდა და აუცილებლად მას უნდა დაენიშნა ახალი დირექტორი და ზაზა ოქუაშვილმა მოითხოვა წესდების შეცვლა. გააკეთა ისე, რომ აქ დასვა თავისი დირექტორი, თანაც ისეთი პირობებით, რომ მე, როგორც გენერალურ დირექტორს, ფაქტობრივად არ შემძლებოდა მის გარეშე გადაწყვეტილებების მიღება…“

გიორგი გაბუნიამ თქვა ისიც, რომ ნიკა გვარამიას პოლიტიკაში წასვლის შემდეგ, ოქუაშვილმა მას ნატო და როსტომ ჩხეიძეების პარტიულ სიაში ჩასმა მოსთხოვა, რაზეც უარი მიიღო.

„რამდენიმე თვეში მან მოითხოვა ნიკა გვარამიასგან, როგორც უკვე პოლიტიკოსისგან, პარტიულ სიაში თავისი დეპუტატების, ნატო და როსტომ ჩხეიძეების ჩასმა, რაზეც მან, რა თქმა უნდა, მიიღო უარი, რადგან ეს უკვე იყო ბიძინა ივანიშვილის თამაში. ჩვენ, ყველას ძალიან კარგად გვახსოვს, რომ 2023 წლის მაისში, როდესაც „ოცნებას“ დასჭირდა ოპოზიციის ხმები, ზუსტად ამ დეპუტატებს, ვითომ შეეშალათ, როგორც თვითონ თქვეს და შემთხვევით, შეცდომით დააჭირეს ღილაკებს ხელი და „ოცნებას“ იუსტიციის საბჭოში გაუყვანეს ის კანდიდატები, რომლებიც ხელისუფლებას სჭირდებოდა“.

ზაზა ოქუაშვილმა გიორგი გაბუნიას დღეს, დილით უპასუხა. საინფორმაციო სააგენტო „ინტერპრესნიუსზე“ გამოქვეყნებულ განცხადებაში ოქუაშვილმა გაბუნიას ნათქვამს ცილისწამება უწოდა და ის ნიკა გვარამიასთან ერთად არხის გაკოტრებამდე მიყვანაში დაადანაშაულა. 

„სულ რამდენიმე დღის წინ, მქონდა კომუნიკაცია ჟურნალისტთა ჯგუფთან და მათაც ვუთხარი, რომ მიუხედავად ნიკა გვარამიას და გიორგი გაბუნიას მხრიდან „მთავარი არხის“ გაძარცვისა და ხელოვნურად გაკოტრებამდე მიყვანისა, ტელეკომპანიის დახურვაზე არც მიფიქრია. მეტიც, ჩემს მიერ გამოითქვა მზადყოფნა, შესაბამისი მხარდაჭერა აღმოვუჩინო არხს მისი საჭიროებების უზრუნველსაყოფად.

„მთავარი არხის“ პრობლემა არის ის, რომ დირექტორებმა, ჯერ ნიკა გვარამიამ და შემდეგ გიორგი გაბუნიამ ტელეკომპანია მიიყვანეს გაკოტრებამდე. მათი საქმიანობა არის მაგალითი, როგორ შეიძლება ამოეფარო მედიას და ძარცვო ტელეკომპანია თანამშრომელთა მოთმინებისა და ქვეყანაში მიმდინარე ვითარების ხარჯზე, გამოიყენო და გადააქციო ტელევიზია საერთაშორისო მასშტაბით მილიონობით დოლარის გათეთრების მანქანად“.

რამდენიმე საათში განცხადება გაავრცელა „მთავარი არხის“ დამფუძნებელმა და ყოფილმა გენერალურმა დირექტორმა, ნიკა გვარამიამ და ზაზა ოქუაშვილის მიერ ტელეკომპანია „მთავარი არხისთვის“ პრობლემების შექმნა მის პოლიტიკაში წასვლას დაუკავშირა.

„უცებ და გაურკვევლად (იმ ეტაპისთვის), ოქუაშვილმა უარი განაცხადა ჩემს გადადგომაზე (პარტნიორთა კრების თანხმობა იყო საჭირო) და გიორგის [გაბუნია] დანიშვნაზე. „ჭიდაობა“ რამდენიმე თვე გაგრძელდა და ბოლოს, მიზნის მნიშვნელობიდან გამომდინარე, შეთანხმება შედგა: მეც ვნიშნავდი „ჩემს“ დირექტორს (რაც კოლექტივის არჩევანს მივანდე),  ოქუაშვილიც და მესამე მსხვილი დამფუძნებელიც. დაინიშნა გიორგი გაბუნია, მანუჩარ ახალაია და ვინმე გოგი. მთავარი ნაღმი კი ის იყო, სამივეს ხელმოწერას ითხოვდნენ ნებისმიერ გადაწყვეტილებაზე და ასეც ჩაიწერა წესდებაში“.

ნიკა გვარამია წერს იმაზეც, რომ საპარლამენტო არჩევნების წინ ნატო ჩხეიძემ „კოალიცია ცვლილებისთვის“ საპარლამენტო სიის ოცეულში ჩასმა მოითხოვა ძმასთან, როსტომ ჩხეიძესთან და კიდევ ერთ ადამიანთან ერთად, რაზეც უარი მიიღო.

„ან ვინ ან საიდან გადაწყვიტეთ, რომ რაიმე გეკუთვნით? როგორ, ტვ ხომ ჩვენია და მაგიტომო. ტვ თქვენი არაა, ერთ-ერთი დამფუძნებელი ხართ, და ამას გარდა, ტვ-ს მეწილეები კოალიციასთან კავშირში არ არიან და არაფერი ეკუთვნით საერთოდ, - იყო ჩემი პასუხი.

ამის მერე დაიწყო უარების სერია - გოგი ყველაფერს აპრობლემებდა, სამაგიეროდ ნატო ჩხეიძის „იჯარას“ და მის ხელფასს ერთი დღე მაინც გადაცდენოდა, გოგიც გამოჩნდებოდა ხოლმე. არხზე დაიწყო გოგის „რევიზიები“. მიიღო ყველა დოკუმენტი, რაც მოითხოვა ყველას ახსნა - განმარტება, ვისიც მოითხოვა. ყველა წლის აუდიტის დასკვნა. მიადგა გაყიდვების სახლს, რომელიც დაქირავებული ცალკე ორგანიზაციაა, რომელიც რეკლამას ყიდის (ყველა დიდი ტვ ამგვარად მუშაობს).

ამ, მათი ტვინით, შანტაჟის ფონზე ახლა უკვე ოქუაშვილმა ჩამოწია მოთხოვნა 1 ადგილამდე სიაში - მხოლოდ ნატო. ეს იცით რომელი ნატო ჩხეიძეა? მე რომ ციხეში ვიჯექი და მან და მისმა ამფსონებმა ქოცებს რომ იუსტიციის საბჭოს წევრები აარჩევინეს. ბიძინასთან ერთხელ მაინც გარიგებულს სიაში მე რომ ჩავწერდი, ეს, ხვდებით, რეალურობის მარცვალსაც არ შეიცავს. ცხადია - უარი“.

გვარამიას განცხადებით, გოგი ქურდაძე, ზაზა ოქუაშვილის მითითებით და ბიძინა ივანიშვილთან გარიგებით, „მთავარ არხს“ ფაქტობრივად ხურავს.

„საკმარისი ფული ანგარიშზე გაყიდვების სახლს აქვს (სარეკლამო შემოსავლებიდან) და გოგის ხელმოწერაზე უარის გამო, ასევე ბანკებში შეტანილი წერილების და პროკურატურაში შეტანილი საჩივრების გამო, ფულს ვერ ურიგებენ თანამშრომლებს და ვერც სხვა ხარჯებს წევენ, მათ შორის, კომუნალურ და ტვ-ს ფუნქციონირებისთვის სასიცოცხლოდ მნიშვნელოვან ხარჯებს, რის გარეშეც ეთერის ტრანსლირებაც კი შეუძლებელი იქნება. ცხადია, რომ ეს ივანიშვილის თამაშის მოთამაშე ხალხი (სხვას ამ ქვეყანაში არავის აწყობს „მთავარი არხის“ დახურვა) ყველაფერზე წამსვლელია. ფაქტია, ერთი ხელმოწერის გარდა, მისგან არაფერია საჭირო: არც ფული, არც რაიმე სხვა. მხოლოდ ხელმოწერა კანონიერი შემოსავლის კანონიერად განსაკარგად“.

ზაზა ოქუაშვილმა facebook-ის საკუთარ გვერდზე გაავრცელა მეორე განცხადებაც და „TV პირველს“ და „ფორმულას“ გიორგი გაბუნიას მიერ გაკეთებული განცხადების საპასუხოდ პირდაპირი ეთერის დათმობა სთხოვა. ოქუაშვილმა დაწერა ისიც, რომ არხის ამჟამინდელ მენეჯმეტს, რამდენიმე თვის წინ, გენერალური დირექტორის თანამდებობაზე ნანუკა ჟორჟოლიანისა და გია ჭანტურიას კანდიდატურები შესთავაზა, რაზეც უარი მიიღო.

„ეს შეთავაზებები, ორივე, ახლაც ძალაშია, ვინაიდან მიმაჩნია, რომ ეს ადამიანები კარგად იცნობენ ტელევიზიის სპეციფიკას, აქვთ შესაბამისი გამოცდილება და შესძლებენ კომპანიის კეთილსინდისიერად მართვას“.

ტელეკომპანია „მთავარი არხი“ 2019 წლის 9 სექტემბრიდან მაუწყებლობს. 2020 წლის მაისში ტელეკომპანიის 39,2% -იანი წილის მფლობელი ლონდონში რეგისტრირებული BGIM ltd-ია გახდა, რომლის დამფუძნებელიც ზაზა ოქუაშვილია.  BGIM ltd-ი მართავს „შპს ომეგა მოტორს 2“-ის, „მაგული ხარებავასა“ და „ომეგა მოტორ ჯგუფის“ 0,2 პროცენტიან წილებსაც.

ნიკა გვარამიამ „მთავარი არხის“ გენერალური დირექტორის პოზიცია მიმდინარე წლის თებერვალში დატოვა და აპრილში ტელეკომპანიის 12 %-იანი წილი, მეუღლეს, სოფიო ლილუაშვილს გადაუფორმა. ტელეკომპანიის გენერალური დირექტორი გიორგი გაბუნია გახდა. არხის მსხვილი მეწილეების გადაწყვეტილებით, მასთან ერთად დაინიშნა 2 ახალი დირექტორიც: გიორგი ქურდაძე და მანუჩარ ახალაია. ახალიამ თანამდებობა კი, 2024 წლის ოქტომბერში დატოვა.

ნიკა გვარამიამ "ერთიანი ნაციონალური მოძრაობის" ყოფილ თავმჯდომარესთან, ნიკა მელიასთან ერთად პოლიტიკური პარტია "ახალი" დაარსა. 

დიდი ბრიტანეთის პარლამენტის თემთა პალატაში დეპუტატმა ბლერ მაკდუგალმა ქართული პროსამთავრობო ტელეკომპანია „იმედის” მფლობელი კომპანიის ბრიტანეთში სანქცირების საკითხი დააყენა.

მაკდუგალმა თემთა პალატის ლიდერს, ლუსი პაუელს მიმართა კითხვით, არის თუ არა თანახმა, განიხილონ დანაშაულის წინააღმდეგ ბრძოლის ეროვნული სააგენტოს მიერ გამოძიების დაწყება და Hunnewell Partners-ისთვის ოპერაციების აკრძალვა. დეპუტატმა ხაზი გაუსვა, რომ „იმედი“ ბრიტანეთიდან, კომპანია Hunnewell Partners-ის მეშვეობით იმართებბა.

„იმის გათვალისწინებით, რომ ფართო ყურადღება ექცევა საქართველოში მშვიდობიანი დემონსტრანტების ძალადობრივად დარბევას, მაინტერესებს, დაუთმობთ თუ არა დროს ამ საკითხზე დებატებს? ჩვენ შეგვიძლია ვიმსჯელოთ იმ ფაქტზე, რომ ტელეკომპანია „იმედი”, მთავარი პროპაგანდისტული არხი, რომელსაც სასტიკი მთავრობა იყენებს, იმართება დიდი ბრიტანეთიდან კომპანია Hunnewell Partners-ის მეშვეობით.

ასევე, მაინტერესებს თანახმა ხართ თუ არა, რომ ამ დებატებზე ვიმსჯელოთ, ხომ არ დადგა დრო, რომ დანაშაულის წინააღმდეგ ბრძოლის ეროვნულმა სააგენტომ (NCA) დაიწყოს გამოძიება ამ ქვეყნიდან ისეთ ოპერაციებზე, რომელიც მიმართულია პრორუსული პროპაგანდისა და მშვიდობიანი მომიტინგეების წინააღმდეგ ძალადობის წაქეზებისკენ“, - თქვა მაკდუგალმა თემთა პალატაში გამოსვლისას.

ლუსი პაუელმა ამ საკითხის წამოწევისთვის ბლერ მაკდუგალის მადლობა გადაუხადა და თქვა:

„მთავრობა აგრძელებს მოწოდებას საქართველოს ხელისუფლებისადმი, შეაჩერონ დემოკრატიული ნორმებისგან გადახვევა და დასავლელი პარტნიორებისგან იზოლაცია. ჩვენ კვლავ ვგმობთ დემონსტრანტებისა და ჟურნალისტების წინააღმდეგ ძალაუფლების გადამეტებულ გამოყენებას. თქვენ ძალიან მნიშვნელოვანი საკითხი წამოწიეთ ამ სფეროში მომუშავე კომპანიების ანგარიშვალდებულებასთან დაკავშირებით“.

საჯარო რეესტრის ეროვნული სააგენტოს ამონაწერის მიხედვით, ტელეკომპანია „იმედის“ 100 %-იანი წილის მესაკუთრე „შპს ჯორჯიან მედია პროდაქშენ გრუპია“, რომელსაც თავის მხრივ, Hunnewell Partners-ის კომპანიათა ჯგუფში შემავალი Media Finance Group B.V. ფლობს.