“პედერასტიის ზეობა”, ანუ სამი დედაკაცი, რომლებმაც ააფორიაქეს მსოფლიო“ - სტატიას ამ სახელწოდებით, ინტერნეტგამოცემა - „საქართველო და მსოფლიო“ აქვეყნებს. სტატიაში ლგბტ პირების უფლებების დამცველი ქალების მიმართ, გამოყენებულია ჰომოფობიური გამონათვამები.

სტატიაში ვკითხულობთ: “პედერასტიის ზეობა”, ანუ სამი დედაკაცი, რომლებმაც ააფორიაქეს მსოფლიო ელენა კაგანი, რუთ გინსბურგი და სონია სოტომაიერი. ამ ქალბატონების სახელები კი იყო ცნობილი ფართო საზოგადოებისთვის, მაგრამ ელენემ, რუთმა და სონიამ “იქუხეს” 2013 წელს, როდესაც ხმა მისცეს ქორწინების დაცვის კანონის გაუქმებას. რადა, ეს კანონი განმარტავდა ქორწინებას, როგორც მამაკაცისა და ქალის კავშირს.“

ამავე სტატიასში, მკითხველი ანტისემიტურ გამონათქვამებსაც გადააწყდება. მიუხედავად ავტორის გაფრთხილებისა, რომ არ იზიარებს, ანტისემიტურ განწყობებს, წარმოდგენილი ტექსტი ნებსით თუ უნებლიეთ, ანტისემიტურ სტერეოტიპებს აძლიერებს, წარმოადგენს რა ებრაელ ერს, ერთი მხრივ მარიონეტებად ანგლო- საქსების ხელში, ხოლო მეორე მხრივ როგორც „ვერცხლისმოყვარეებს“ და „მსოფლიო ბატონობაზე მეოცნებეებს“;

“ებრაელი ერის ყველაზე მავნე ნაწილის _ სიონისტების “სისუსტეებს” _ ვერცხლისმოყვარეობასა და მსოფლიოზე ბატონობის ოცნებას _ ოსტატურად იყენებს დასავლური, უფრო ზუსტად, ანგლო-საქსური ელიტა, რომლისთვისაც ებრაელები უფრო მეტი ნაგავია, ვიდრე სხვა ერები. ანგლო-საქსები, სიონისტების მეშვეობით იკმაყოფილებენ თავიანთ გეოპოლიტიკურ და ფინანსურ ინტერესებს. დასავლურ ელიტას ებრაელები არ ირჩევენ და, აქედან გამომდინარე, ის არ არის დამოკიდებული ებრაელებზე. ანგლო-საქსები მსოფლიო ებრაელობას ფარულად იყენებენ. გავიხსენოთ თუნდაც ჰიტლერის აღზევება”.

ავტორი აქვე დასძენს: “ამ საშინელი კანონის მიღებაში გადამწყვეტი როლი ვითომდა სამმა ებრაელმა ქალმა ითამაშა, სინამდვილეში კი მათ უკან ანგლო-საქსების ე.წ. ისტებლიშმენტია, რომელსაც, ეტყობა, ძალიან სურს, გაიხსენოს “სახელოვანი” წარსული (XVI-XVII საუკუნეები), როდესაც ინგლისის სამეფოში მეკობრეობა და მამათმავლობა ლამის პრესტიჟული “პროფესიები” იყო“ - ნათქვამია სტატიაში.

ჰომოფობიური გამონათქვამები და სიძულვილის ენის ლექსიკაა გამოყენებული სტატიაში: „თეთრი სახლის ცისფერი არჩევანი, ანუ სატანის ზეობა დედამიწაზე“ - რომელშიც, საუბარია ამერიკის შეერთებულ შტატებში ერთსესიანთა ქორწინების ყველა შტატის მასშტაბით დაკანონებაზე.

„ვაშინგტონში ერთსქესიანი ქორწინებების დაკანონება, გნებავთ, დემოტრაკიის გამარჯვება თეთრი სახლის ლგბტ ფერებით შეღებვითა და ამ ფონზე ბებერი პედერასტების თვალცრემლიანი “ზასაობით”აღნიშნეს...“ - ვკითხულობთ სტატიაში.

ამავე მასალაში, მკითხველი პოლიტიკურ სიძულვილის ენასაც შეხვდება, რომელსაც ავტორი ყოფილი პრეზიდენტის მიხეილ სააკაშილის და საზოგადოებისათვის ცნობილი სხვა საახეების მისამართით იყენებს:

“გავიხსენოთ ვაშინგტონის “ძაღლიშვილი” სააკაშვილის 9-წლიანი რეჟიმი” - ვკითხულობთ სტატიაში - “ცხვირმოუხოცავი, რიგ შემთხვევაში, საეჭვო სექსუალური ორიენტაციის მინისტრები თუ, საზოგადოდ, მაღალჩინოსნები; ამორალურობის, გარყვნილების მქადაგებელი მწერლები თუ პოეტები (ბუღაძეები, ბურჭულაძე-დეისაძეები და ა.შ.), რომლებიც, მათ მიმართ საზოგადოების უდიდესი ნაწილის მკვეთრად უარყოფითი დამოკიდებულების მიუხედავად, განებივრებულები არიან სხვადასხვა პრემიითა თუ გრანტებით; ე.წ. სატელევიზიო თოქშოუები, რომლებიც სულის წარმწყმედ ქვენა გრძნობებს პროპაგანდას უწევენ, რომელსაც ახალი ხელისუფლების პირობებშიც აგრძელებენ კონჩიტა გაბუნიები;”- განმარტავს ავტორი და საკუთარი პოზიციის დაფიქსირებას, ერსქესიან წყვილთა ქორწინების საკითხე კიდევ უფრო მწვავე ლექსიკით აგრძელებს: „საქართველოში ალაპარაკდნენ რეფერენდუმის ჩატარებაზე, (ერთსქესიანთა ქორწინების შესახებ) რაც, ჩემი აზრით, სრული აბსურდია. რეფერენდუმი რაზე, ხალხო, უკანალის მიცემის დაკანონებაზე?!“

ანტიდასავლური განწყობების ტირაჟირება, „მამა ათანასე (ხაბეიშვილი): ამერიკაა მათი სამშობლო და მიბრძანდნენ, იქნებ ხელიც სთხოვონ თავიანთ მამობილ ობამას...“ - სტატიითაც, სადაც ანტიდასავლური მოსაზრებების ავტორი - მოძღვარი ასინათე ხაბეიშვილია.

„კონკრეტულად დასავლეთს რაც შეეხება, გამუდმებით გვესმის, რომ ნატო _ ეს არის საქართველოს ხსნა და მომავალი, რომ მხოლოდ იქ შესვლა გადაგვარჩენს, თორემ დაღუპულები ვართ. რეალურად რას ვხედავთ _ თავის დროზე, როცა ნატო აწ უკვე ყოფილი იუგოსლავიის ტერიტორიას ბომბავდა (ოპერაციას ერქვა “გულმოწყალე ანგელოზი” _ ჯ. ჟ.), და ეს ხდებოდა აღდგომის ბრწყინვალე დღესასწაულზე, ჭურვებზე ეწერა: “გილოცავთ აღდგომას!”. აი, ასე ცინიკურად ანგრევდნენ ქრისტიანულ, მართლმადიდებლურ ტაძრებს და ამ უბედურებას შეეწირა ათეულათასობით მშვიდობიანი მოქალაქე. ახლა ვეკითხები იმ ე.წ. მედასავლეთე ლიბერალებს, რომლებსაც ერთი სული აქვთ, ევროატლანტიკურ სტრუქტურებში შეგვიყვანონ: ეს არის დემოკრატია? ეს არის ჰუმანიზმი და სიყვარული“ - ანტიდასავლური განწყობები“ - აცხადებს მოძღვარი ასინათე ხაბეიშვილი;

რესპონდენტი აქვე დასძენს: „იმის თქმა მინდა, რომ, თუ საქართველო არ გაწყვეტს კავშირს ქრისტეს მგმობელებთან და ეშმაკის მსახურებთან, ამერიკასა და მის მეთაურებთან ერთად დაიღუპება. ეს გარდაუვალია, რადგან ყოველი ერი და სახელმწიფო, რომელიც ასცდება ჭეშმარიტების გზას, იღუპება. შესცოდა დავითმა (მეფსალმუნემ) ღმერთს და მის სახელმწიფოში სამოცდაათი ათასი ადამიანი დაიღუპა შავი ჭირით; შესცოდა იონა წინასწარმეტყველმა და გემს, რომელშიც სხვა ადამიანებიც იმყოფებოდნენ, საფრთხე დაემუქრა; გემი, რომლის შესახებაც სახარება მოგვითხრობს, ტალღებმა დაფარა არა ქარიშხლის, არამედ იუდას ცოდვის გამო. ჩვენც რომ არ დავიღუპოთ, სწორედ ამიტომ უნდა გავწყვიტოთ კავშირი. “ვისაც ყურნი ასხე, ისმინონ!”“

ხაბეიშვილის განცხადებებში, ანტიდასავლურ განწყობებთან ერთად ჰომოფობიასაც ვხვდებით: „ფაქტია, რომ დღეს საქართველო ფეხდაფეხ მიჰყვება ამერიკასა და ევროპას. ეს კურსი სად მიგვიყვანს? _ ეს გზა მიგვიყვანს ზუსტად იქ, სადაც არის ახლა ევროპა და ამერიკა, ვგულისხმობ იმ დემონურ საკანონმდებლო ცვლილებებს, რომლებიც ამას წინათ ამერიკაში განხორციელდა, მანამდე კი _ ევროპის რიგ ქვეყნებში. ახლა ზოგიერთი იტყვის, ამერიკა და ევროპა არაფერს გვაძალებსო, სწორედ რომ გვაძალებს. აბა, რას ჰქვია ამერიკული სტანდარტი, ევროპული სტანდარტი ან იმავე ევროკავშირის დირექტივა, მოთხოვნა, მითითება?! _ ეს სიტყვები ხომ ყოველდღიურად გვესმის. ან იმაზე მეტი დაძალება რა გინდა, როცა კანონს, კონსტიტუციას _ყველაფერს სხვა გიწერს? ცხადია, ამას იმ მდგომარეობამდე მივყავართ, რომელიც ახლა არის ამერიკის შეერთებულ შტატებში, მაგრამ არაერთხელ მითქვამს და კიდევ გავიმეორებ:ქართველი კაცი არასოდეს შეეგუება გარყვნილებას; ქართველი ხალხი არ მიიღებს იმ სიბინძურეს, რომელიც დასავლეთის რიგ ქვეყნებში უჩუმრად დააკანონეს და, რომ იტყვიან, ხახვივით შერჩათ. ასე რომ, მშვიდად ნუ იქნებიან. ამერიკამ რაღაც კანონი რომ მიიღო, არ ნიშნავს, რომ რიგში საქართველო დგას. ბევრი, შეიძლება, ამას ელოდება, მაგრამ ეს არ მოხდება, ისინი ამას ვერ ეღირსებიან!“ - აცხადებს წმინდა თეოდორე ტირონის ტაძრის წინამძღვარი ათანასე ხაბეიშვილი.

ჟურნალისტური ეთიკის ქარტიის მე-7 პრინციპი განმარტავს: ჟურნალისტს უნდა ესმოდეს მედიის მიერ დისკრიმინაციის წახალისების საფრთხე; ამიტომ ყველაფერი უნდა იღონოს ნებისმიერი პირის დისკრიმინაციის თავიდან ასაცილებლად რასის, სქესის, სექსუალური ორიენტაციის, ენის, რელიგიის, პოლიტიკური და სხვა შეხედულებების, ეროვნული ან სოციალური წარმოშობის საფუძველზე ან რაიმე სხვა ნიშნით.

ტელეკომპანია „იმედის“ ეთერში ტოკ-შოუ „რეაქცია“ 3 ივლისს ფეხბურთის თემას მიეძღვნა. გადაცემაში ძირითადად სამი თემა მიმოიხილეს - უეფას ევროპის სუპერ თასის ბილეთების გაყიდვისას წარმოქმნილი პრობლემები, ქართული ფეხბურთის ზოგადი მდგომარეობა და ფეხბურთის ფედერაციის პრეზიდენტის მომავალი არჩევნები.

გადაცემის ანონსში არჩევნების ნაწილი ასე იყო წარდგენილი:

„სულ მალე ქართულ საფეხბურთო სივრცეში ახალი დაპირისპირება იფეთქებს, რომელიც კარგა ხანია კულუარებში მწიფდება. ფედერაციის არჩევნებში ერთმანეთს, სავარაუდოდ, არველაძე, კობიაშვილი და ყაველაშვილი უპირისპირდებიან, გადის თუ არა საფეხბურთო დაპირისპირება ენერგეტიკის სამინისტროზე, ვის ლობირებს ვიცე-პრემიერი კალაძე, ჩაერევა თუ არა ისევ დიდი პოლიტიკა ფეხბურთში, როგორც ეს წლების წინ იყო, როცა ნემსაძემ არჩვენები მოიგო და ორ საათში უარი ათქმევინეს“.

შესავალ ნაწილში კი წამყვანი მხოლოდ ამ თემას ეხება და ვიდრე სტუმრებთან გადავა, ამბობს:

„დღეს ბევრ საინტერესო ამბავს მოისმენთ მოქმედი გმირებისგან, მაგალითად, ერევა თუ არა კახი კალაძე ფეხბურთის პრეზიდენტის მომავალ არჩევნებში და მართლა დაეძაბა თუ არა ურთიერთობები არველაძეებთან. ეს ამბავი ჯერ კულუარებს არ გასცდენია, მაგრამ ამბობენ, რომ ვიცე-პრემიერ კალაძეს ფეხბურთის ფედერაციის მოახლოებულ არჩევნებში საკუთარი ფავორიტი ჰყავს - კობიაშვილი“.

შემდეგ წამყვანი აღნიშნავს იმას, რომ კალაძემ და კობიაშვილმა გადაცემაში მონაწილეობაზე უარი თქვეს და ისევ ხაზს უსვამს ფეხბურთისა და პოლიტიკის კვეთის მაგალითების არსებობას.

ანონსიდან და შემდეგ წამყვანის შესავლიდან იქმნება შთაბეჭდილება, რომ გადაცემის მსვლელობისას მაყურებელმა უნდა მიიღოს ინფორმაცია, მართლაც არის თუ არა კობიაშვილი კალაძის ფავორიტი და ერევა თუ არა ვიცე-პრემიერი ფედერაციის საქმიანობაში.

129 წუთი ქრონომეტრაჟის მქონე გადაცემაში წამყვანი ამ თემას მხოლოდ 84-ე წუთზე ეხება, როდესაც სტუდიაში მყოფ რევაზ არველაძეს ეკითხება როგორც წინასაარჩევნო პერიოდში კალაძის ჩარევაზე, ასევე, მასთან რაიმე დაპირისპირებაზე, რასაც რევაზ არველაძე უარყოფს. წამყვანი მას არ ასრულებინებს პასუხს და სხვა სტუმარს რთავს ეთერში. საერთო ჯამში შესავალ ტექსტსა და ანონსში ერთ-ერთ მთავარ თემად გატანილ საკითხს მხოლოდ სამი წუთი დაეთმო.

აღსანიშნავია, რომ მთელი გადაცემის განმავლობაში ლევან კობიაშვილს წამყვანი, როგორც კალაძის ფავორიტ კანდიდატს, ისე მოიხსენიებს, მაგრამ მხოლოდ 85-ე წუთზე ეკითხება რევაზ არველაძეს, არის თუ არა კობიაშვილი კალაძის ფავორიტი, რაზეც არველაძე პასუხობს, რომ შესაძლოა, ვიცე-პრემიერის მიერ გაკეთებული განცხადებებიდან ასე ვიფიქროთ. გადაცემის მსვლელობისას არ ყოფილა წარმოდგენილი რაიმე არგუმენტი, ფაქტი, კომენტარი რაც დაადასტურებდა წამყვანის ნათქვამს, რომ კალაძე კობიაშვილს უჭერს მხარს.

შესაბამისად, მაყურებელმა ვერ გაიგო რაში გამოიხატება ფავორიტობა, კალაძემ სად დაუჭირა ღიად მხარი, რა მესიჯები გაავრცელა მან ფედერაციის მისამართით, როგორ, რა ფორმით ერევა ის წინასაარჩევნო პროცესში, მით უმეტეს, რომ წამყვანი ამავე კონტექსტში იხსენებს 2007 წელს ფეხბურთის პრეზიდენტის არჩევნებს, როდესაც გამარჯვებიდან რამდენიმე საათში გიორგი ნემსაძემ უარი თქვა პოსტის დაკავებაზე, სავარაუდოდ, ხელისუფლების ზეწოლის გამო.

მაუწყებელს ზუსტი ინფორმაციის გადაცემას როგორც მაუწყებელთა ქცევის კოდექსი, ისე ჟურნალისტური ეთიკის ქარტია ავალდებულებს. ქარტიის თანახმად, უნდა ჩანდეს ჟურნალისტის მცდელობა, რომ მან საზოგადოების მიმართ გამოიჩინა პატივისცემა და ბოლომდე გადაამოწმა ფაქტები, რათა გამოექვეყნებინა სიმართლე და ზუსტი ინფორმაცია.

მაუწყებელთა ქცევის კოდექსი კი ამბობს, რომ სიზუსტის უზრუნველყოფისათვის წყარო იდენტიფიცრებული უნდა იყოს და მაუწყებელმა ინფორმაცია სრულად და ამომწურავად უნდა გადასცეს აუდიტორიას.

6 ივლისს, ტელეკომპანია “რუსთავი 2-ის” გადაცემაში გავიდა სიუჟეტი მაშველ გოგონაზე - “სუსტი ძლიერი სქესი”. სიუჟეტის გმირი 23 წლის სოფი ცისკარიშვილია - პროფესიით საბანკო საქმის სპეციალისტია, რომელიც ამჟამად სამაშველო სამსახურში მუშაობს და აქტიურ სამაშველო საქმიანობას, მოდელობასაც უთავსებს.

ჟურნალისტი ამბობს, რომ სოფიმ “მაშველის პროფესია კარგად მოირგო და სტერეოტიპი დაარღვია”. აქვე, ჟურნალისტი სიუჟეტის გმირს სუსტი სქესის წარმომადგენელს უწოდებს: “23 წლის სოფი ცისკარიშვილი ერთადერთი სუსტი სქესის წარმომადგენელია სამაშველო სამსახურში".

ის ხაზს უსვამს ქალთან - როგორც “სუსტი სქესის” წარმომადგენელთან თანამშრომლების განსაკუთრებულ დამოკიდებულებასაც: “მიუხედავად იმისა, რომ სოფის შესაძლებლობებში ეჭვი არ ეპარებათ, ცდილობენ გაუფრთხილდნენ და მინიმალურად დატვირთონ”.

„სუსტი ძლიერი სქესი“ - ამავე სათაურითაა დაარქივებული სიუჟეტი, ტელეკომპანიის ოფიციალურ ვებგვერდზეც. როგორც სიუჟეტის აღწერაში ვკითხულობთ,“ 23 წლის სოფო სამაშველო სამსახურის ერთადერთი სუსტი სქესის წარმომადგენელია (...) ის, გამორჩეული გარეგნობის გარდა, აქტიური ცხოვრების წესით სხვა ქალებისგან განსხვავდება“.

მაუწყებელთა ქცევის კოდექსის თანახმად (მუხლი 33), მაუწყებელმა ხელი არ უნდა შეუწყოს სტერეოტიპების ჩამოყალიბებას.

გენდერულ თანასწორობასა და მედიაზე ევროსაბჭოს წევრი ქვეყნების მინისტრთა კომიტეტის რეკომენდაციის თანახმად, მედია საშუალებებმა ხელი უნდა შეუწყონ თვითრეგულირების მექანიზმების, შიდა ქცევის/ეთიკის კოდექსებისა და შიდა მონიტორინგის, ასევე ისეთი სტანდარტების შემუშავებას, რაც მედია გაშუქებაში გენდერულ თანასწორობას შეუწყობს ხელს, უნდა უზრუნველყონ ქალთა და მამაკაცთა არასტერეოტიპული იმიჯი, ფუნქცია და ხილვადობა, რომელიც თავისუფალია სექსისტური რეკლამირების, ენისა და შინაარსისაგან, რასაც სქესის საფუძველზე დისკრიმინაციის, სიძულვილისა და გენდერზე დაფუძნებული ძალადობისკენ მივყავართ.

23 ივნისს „გურია ნიუსის“ ვებგვერდზე გამოქვეყნდა სტატია „გურიელიძის კომპანია წყალქვეშა ნადირობითაა დაკავებული“. სტატიაში ორგანიზაცია „თბილისის ზოოპარკის მონიტორინგი“ თბილისის ზოოპარკის დირექტორს ზურაბ გურიელიძეს ბრალს სდებს წყალქვეშა ნადირობისა და სანადირო იარაღის გაყიდვაში. ორგანიზაცია აცხადებს, რომ გურიელიძე შპს „პოსეიდონის სამყაროს“ მეწილეა. ეს კომპანია კი წყალქვეშა ნადირობის ტურებს მართავს და ვაჭრობს წყალქვეშა ნადირობისთვის განკუთვნილი იარაღით. ორგანიზაცია ამ ინფორმაციის ერთ-ერთ წყაროდ „საერთაშორისო გამჭვირვალობა - საქართველოს“ უთითებს.

მასალაში მოყვანილია „თბილისის ზოოპარკის მონიტორინგის“ წარმომადგენლის ციტატა:

„ზოოპარკის დირექტორს ზ. გურიელიძეს (ადამიანს რომელიც მუდმივად ცდილობს დაგვარწმუნოს რომ არის დაკავებული ცხოველთა გადარჩენით) რამდენად გააჩნია მორალური უფლება ეკავოს ზოოლოგიური პარკის დირექტორის პოსტი იმ დროს, როდესაც პარტნიორისა და მეწილის სახით არის ჩართული ბიზნესში, რომელიც დაკავებულია სანადირო იარაღის ვაჭრობითა და ნადირობის ტურების გამართვით. ბიზნესში, რომელიც ემსახურება ცხოველთა განადგურებას გართობისა და კომერციული მოგების მიზნით".

ზურაბ გურიელიძე მართლაც ფლობს კომპანია „პოსეიდონის სამყაროს“ 5 პროცენტს. რეესტრში მითითებული წესდების მიხედვით, „პოსეიდონის სამყარო“ არის მრავალპროფილიანი ტურისტული კომპანია, რომელიც დაინტერესებულ პირებს სთავაზობს დაივინგს, წყალქვეშა ნადირობას, სპორტული თევზაობის, ეკოტურიზმის და სხვა საზღვაო და საწყლოსნო ტურების და კვლევითი ექსპედიციების მოწყობას“.

„გურია ნიუსის“ სტატიაში გამოქვეყნებისას არ იყო ზურაბ გურიელიძის კომენტარი. მეორე დღეს გაჩნდა მინაწერი, რომ გამოცემა ეცდებოდა მასთან დაკავშირებას. მოგვიანებით კი მასალა საერთოდ გაქრა საიტიდან.

ზურაბ გურიელიძის თქმით, „გურია ნიუსიდან“ ამ დრომდე მას არავინ დაკავშირებია. გურიელიძემ Mediachecker-თან საუბრისას განაცხადა, რომ წყალქვეშა ნადირობა არ ნიშნავს წყალქვეშ იარაღით ჩასვლას და პირდაპირი გაგებით ნადირობას. წყალქვეშა ნადირობის დროს ადამიანი წყალში ჩადის ერთი პატარა ისრით, საყვინთავი აღჭურვილობის გარეშე. მას შეუძლია ხელით დაიჭიროს ერთი-ორი თევზი. ბუნებრივად მეტი თევზის დაჭერის შესაძლებლობა მას არ აქვს. გურიელიძის თქმით, ეს არის ერთ-ერთი მიღებული ფორმა წყალქვეშა სამყაროს უკეთ გასაცნობად და არანაირად არ ეწინააღმდეგება მის საქმიანობას.

გარდა ამისა, „გურია ნიუსის“ მასალაში, რესპონდენტი ინფორმაციის წყაროდ „საერთაშორისო გამჭვირვალობა- საქართველოს“ უთითებს. თავად მასალაში ორგანიზაციის პოზიცია წარმოჩენილი არაა, მისი ოფიციალური განცხადება მოგვიანებით გავრცელდა: „გვსურს აღვნიშნოთ, რომ „საერთაშორისო გამჭვირვალობა – საქართველოს“ თბილისის ზოოპარკის დირექტორის საქმიანობასთან დაკავშირებით არავითარი კვლევა არ ჩაუტარებია.სავარაუდოდ, ხსენებული მონაცემების მოპოვება ჩვენი ორგანიზაციის მიერ შექმნილი საძიებო სისტემისhttp://companyinfo.ge/ka/საშუალებით მოხდა, სადაც ავტომატურად იტვირთება საჯარო რეესტრის ეროვნული სააგენტოს მონაცემები. ვფიქრობთ, რომ ეს კამპანია ზურაბ გურიელიძის წინააღმდეგ მიზანმიმართულ ხასიათს ატარებს და მის დისკრედიტაციას ისახავს მიზნად. იმ შემთხვევაშიც კი, თუ გამოქვეყნებული ინფორმაცია სიმართლეს შეესაბამება, ამ კომპანიაში წილის ფლობა არ წარმოადგენს კანონის დარღვევას ან ინტერესთა შეუთავსებლობის მაგალითს. შესაბამისად, ამ ინფორმაციის გამოყენებით, ბატონი გურიელიძის იმიჯის შელახვის მცდელობა უსაფუძვლოა“.

Media Checker „გურია ნიუსსაც“ დაუკავშირდა. რედაქციის განმარტებით, სტატია საიტიდან მოიხსნა იმ მიზეზით, რომ ის ცალმხრივი იყო. რედაქტორის განმარტებით, ამავე თემის შესახებ ახალ სტატიაზე ამ წუთებში მუშაობენ.

ინფორმაციის შესწორების სტანდარტი ჟურნალისტური ეთიკის ქარტიის მეხუთე მუხლშია განმარტებული: „მედია ვალდებულია, შეასწოროს გამოქვეყნებული არსებითად არაზუსტი ინფორმაცია, რომელსაც შეცდომაში შეჰყავს საზოგადოება“. ამავე მუხლის განმარტებით ნაწილში კი აღნიშნულია:“ამ მუხლით ჟურნალისტები და რედაქტორები პასუხისმგებლობას იღებენ, რომ პატიოსნად განაცხადონ არაზუსტი ინფორმაციის გამოქვეყნების შესახებ და შეასწორონ ის. მიუღებელია შესწორება იმგვარად, რომ თავიდან გაკეთდეს სიუჟეტი ან სტატია, სადაც არაზუსტ ინფორმაციას ჩაენაცვლება ზუსტი ინფორმაცია, მაგრამ არ იქნება გაცხადებული უკვე დაშვებული შეცდომის შესახებ“.

MediaChecker: მასალაში დაზუსტების მიზნით, შეტანილია ცვლილება.

პირველადი ვერსია: MediaChecker „გურია ნიუსსაც“ დაუკავშირდა. რედაქციის განმარტებით, სტატია საიტიდან მოიხსნა იმ მიზეზით, რომ ის არასრულყოფილი იყო.

ჩასწორებული: MediaChecker „გურია ნიუსსაც“ დაუკავშირდა. რედაქციის განმარტებით, სტატია საიტიდან მოიხსნა იმ მიზეზით, რომ ის ცალმხივი იყო.